Kinabuhi ug Ministeryo ni Jesus

Si Jesus Nabuhi!

SA DIHANG nakita sa mga babaye nga walay sulod ang gilubngan ni Jesus, si Maria Magdalena midagan aron sultihan si Pedro ug Juan. Apan, ang ubang mga babaye dayag nagpabilin ra diha sa lubnganan. Sa wala magdugay, nagpakita ang usa ka manulonda ug gidapit sila sa pagsulod.

Dinhi nakita sa mga babaye ang laing manulonda, ug ang usa sa mga manulonda miingon kanila: “Ayaw kamo kahadlok, kay nasayod ako nga nangita kamo kang Jesus nga gilansang. Wala na siya dinhi, kay siya nabanhaw, sumala sa iyang giingon. Dali, tan-awa ang dapit nga iyang nahimutangan. Ug adtoa ninyo dayon ug sultihi ang iyang mga tinun-an nga siya nabanhaw gikan sa mga patay.” Busa uban sa kahadlok ug dakong kalipay, kining mga babayehana usab midagan.

Niining higayona, nakita na ni Maria si Pedro ug Juan, ug siya mitaho kanila: “Ilang gikuha ang Ginoo gikan sa handomanang lubnganan, ug kami wala masayod kon diin siya nila ibutang.” Dihadiha ang duha ka apostol mibiya nga nagdagan. Si Juan mas kusog nga modagan​—dayag nga mas batan-on pa—​ug unang nakaabot sa lubnganan. Niining panahona nakalakaw na ang mga babaye, busa walay tawo diha sa palibot. Mitikuko, gilili ni Juan ang lubnganan ug iyang nakita ang mga bendahe, apan siya nagpabilin sa gawas.

Sa miabot si Pedro, siya wala magpanuko ug misulod dayon. Iyang nakita ang mga bendahe nga nahimutang didto ug ang panapton usab nga gigamit sa pagputos sa ulo ni Jesus. Kini gipilo diha sa usa ka daplin. Karon si Juan misulod usab sa lubnganan, ug siya mituo sa taho ni Maria. Apan wala makasabot si Pedro ug Juan nga si Jesus nabanhaw, bisan pa nga Siya kanunay nagsulti kanila nga Siya mabanhaw. Naglibog, ang duha mipauli, apan si Maria, nga mibalik sa lubnganan, nagpabilin.

Kasamtangan, ang ubang mga babaye nanagdali sa pagtug-an sa mga tinun-an nga si Jesus nabanhaw, sumala sa gisugo kanila sa mga manulonda. Samtang sila nanagan sa makusog, gitagbo sila ni Jesus ug miingon: “Maayong adlaw!” Miluhod sa iyang tiilan, ilang gisimba siya. Unya miingon si Jesus: “Ayaw kamog kahadlok! Lakaw kamo, ug ingna ang akong mga igsoon, aron sila mangadto sa Galilea; ug didto ilang makita ako.”

Sayosayo pa, sa dihang milinog ug nagpakita ang mga manulonda, ang mga sundalo nga nagbantay nakurat ug daw nahimong mga tawong patay. Sa dihang naulian, dihadiha sila miadto sa siyudad ug gisultihan ang pangulong mga saserdote sa nahitabo. Human mikonsulta sa “tigulang nga mga lalaki” sa mga Hudiyo, ang desisyon mao ang pagpahilom sa maong butang pinaagi sa paghiphip sa mga sundalo. Sila gisugo: “Isulti kini sa mga tawo, ‘ang Iyang mga tinun-an mitungha sa kagabhion ug ilang gikawat siya samtang nangatulog kami.’”

Sanglit ang Romanhong mga sundalo silotan man sa kamatayon kon makatulog samtang sila magbantay, ang mga saserdote misaad: “Kon kini [taho bahin sa inyong pagkatulog] makaabot sa mga dalunggan sa gobernador, kami ray mag-igo sa pagsulti kaniya ug wala na kamoy angay nga kabalak-an.” Sanglit dako man ang gihiphip, gisunod sa mga sundalo ang gisugo kanila. Ingong sangpotanan, ang sayop nga taho nga gikawat ang lawas ni Jesus mikaylap taliwala sa mga Hudiyo.

Si Maria Magdalena, nga nagpabilin sa luyo sa lubnganan, nasubo sa hilabihan. Hain na man kaha si Jesus? Mitikubo sa pagtan-aw sa lubnganan, iyang nakita ang duha ka manulonda nga nagsapot ug maputi, kinsa mipakita pag-usab! Ang usa naglingkod sa ulohan ug ang lain sa tiilan sa nahimutangan sa lawas ni Jesus. “Babaye, nganong naghilak ka man?” sila nangutana.

“Ila man god nga gikuha ang akong Ginoo,” mitubag si Maria, “ug wala ako mahibalo kon diin nila gibutang siya.” Unya siya milingi ug nakakitag laing tawo nga nangutana pag-usab: “Babaye, nganong naghilak ka man?” Ug ang usa nangutana usab: “Kinsay imong gipangita?”

Naghunahuna nga kining tawhana mao ang tig-atiman sa tanaman sa lubnganan, siya miingon kaniya: “Senyor, kon ikaw maoy nagkuha kaniya, tug-ani ako kon diin nimo siya ibutang, ug kuhaon ko siya.”

“Maria!” ang tawo miingon. Ug dihadiha siya nahibalo, pinaagi sa iyang naandang paagi sa pagpakigsulti kaniya, nga siya si Jesus. “Rab·boʹni!” (nagkahulogang “Magtutudlo!”) siya miingon. Ug uban sa dakong kalipay, siya mikupot kaniya. Apan si Jesus miingon: “Ayaw ako pagkupti. Kay ako wala pa makasaka ngadto sa Amahan. Apan adtoa ang akong mga igsoon ug suginli sila, ‘Ako mosaka sa akong Amahan ug sa inyong Amahan ug sa akong Diyos ug inyong Diyos.’”

Karon si Maria midagan ngadto sa dapit nga gitigoman sa mga apostol ug sa kaubang mga tinun-an. Nadugangan sa iyang asoy ang mga taho nga gihatag na sa ubang mga babaye mahitungod sa pagkakita sa nabanhaw nga Jesus. Apan, kining mga tawhana, nga wala motuo sa nag-unang mga babaye, dayag nga wala usab motuo kang Maria. Mateo 28:3-15; Marcos 16:5-8; Lucas 24:4-12; Juan 20:2-18.

◆ Human makakita sa lubnganan nga walay sulod, unsay gibuhat ni Maria Magdalena, ug unsa ang naagian sa ubang mga babaye?

◆ Unsay reaksiyon ni Pedro ug Juan sa dihang nakita nila ang lubnganan nga walay sulod?

◆ Unsay naengkuwentro sa ubang mga babaye sa ilag pagpaingon aron sa pagtaho sa pagkabanhaw ni Jesus ngadto sa iyang mga tinun-an?

◆ Unsay nahitabo sa mga sundalo nga nagguwardiya, ug unsay reaksiyon sa mga saserdote sa ilang taho?

◆ Unsay nahitabo sa dihang si Maria Magdalena nag-inusara sa lubnganan, ug unsay reaksiyon sa mga tinun-an bahin sa taho sa mga babaye?