Pagpabiling Malig-on Diha sa Pagtuo!
Mga Pangunang Punto Gikan sa Unang Pedro
ANG mga Saksi ni Jehova nagaatubang ug nagkalainlaing mga paglutos, o mga pagsulay sa ilang pagtuo. Diha sa ubang kayutaan, ang ilang buluhatong pagsangyaw sa Gingharian gihimo sa atubangan sa dagkong paglutos. Sa likod niini ug sa ubang mga paningkamot sa pagdaot sa ilang relasyon sa Diyos mao si Satanas nga Yawa. Apan siya dili molampos, kay palig-onon ni Jehova ang iyang mga alagad—oo, malig-on diha sa pagtuo.
Si apostol Pedro nakapribilehiyo sa ‘paglig-on sa iyang mga igsoon’ kinsa “naguol tungod sa daghang mga pagsulay.” (Lucas 22:32; 1 Pedro 1:6, 7) Iyang gihimo kini diha sa iyang unang sulat, nga gisulat sa mga 62-64 K.P. gikan sa Babilonya. Niini si Pedro nagtambag, naglipay, ug nagdasig sa mga Kristohanong Hudiyo ug Hentil, gitabangan sila sa pagbarog sa mga pag-atake ni Satanas ug sa pagpabilin nga “malig-on diha sa pagtuo.” (1 Pedro 1:1, 2; 5:8, 9) Karon nga hamubo na lamang ang panahon sa Yawa ug ang iyang mga pag-atake mabangison kaayo, tino nga ang katawhan ni Jehova makabenepisyo gikan sa dinasig nga mga pulong ni Pedro
Kagawian nga Gipasukad sa mga Prinsipyo sa Diyos
Langitnon o yutan-on man ang atong paglaom, kini angay motabang kanato sa pag-antos sa mga pagsulay ug molihok diha sa diyosnong paagi. (1:1–2:12) Ang paglaom sa usa ka langitnong panulondon maoy nagpahinabo sa mga dinihogan sa pagkalipay atubangan sa mga pagsulay, nga sa pagkatinuod nag-ulay sa ilang pagtuo. Ingong usa ka espirituwal nga balay nga natukod sa patukoranan ni Kristo, sila nagtanyag ug espirituwal nga mga halad nga dalawaton sa Diyos ug nagagawi diha sa usa ka maayong paagi nga mohatag kaniya ug himaya.
Ang atong mga pakiglabot sa tanang isigkatawo angay mandoan pinaagi sa mga prinsipyo sa Diyos. (2:13–3:12) Si Pedro nagpakita nga kita kinahanglang magpasakop sa tawhanong mga magmamando. Ang mga ulipon sa balay angay magpasakop sa ilang mga agalon, ug ang mga asawa magpasakop sa ilang mga bana. Ang diyosnong paggawi sa usa ka Kristohanong asawa basin ug makadani sa iyang dili-magtutuong bana ngadto sa tinuod nga pagtuo. Ug ang usa ka magtutuong bana angay nga ‘magpasidungog sa iyang asawa ingong usa ka mahuyang nga sudlanan.’ Ang tanang mga Kristohanon angay magpakita ug tawhanong pagbati, magbatog inigsoong gugma, buhaton ang maayo, ug tinguhaon ang kalinaw.
Pag-antos Mosangpot ug mga Panalangin
Ang matinumanong paglahutay sa pag-antos sa matuod nga mga Kristohanon mosangpot ug mga panalangin. (3:13–4:19) Kon kita moantos alang sa pagkamatarong angay nga malipay kita. Dugang pa, sanglit si Kristo nag-antos diha sa unod aron maagak kita ngadto sa Diyos, kita dili na angay magkinabuhi sumala sa atong unodnong mga tinguha. Kon antoson nato sa pagkamatinumanon ang mga pagsulay, kita makaambit sa dakong panagsadya inigpadayag unya ni Jesus. Ang pag-antos sa pasipala tungod sa ngalan ni Kristo, o ingong iyang mga tinun-an, makalipay kanato tungod kay kini nagpamatuod nga ania kanato ang espiritu ni Jehova. Busa kon kita mag-antos nga nahiuyon sa kabubut-on sa Diyos, atong isalig ang atong kaugalingon diha kaniya ug magpadayon sa pagbuhat ug maayo.
Ingong mga Kristohanon, kinahanglang atong tumanon nga matinumanon ang atong mga buluhaton ug magmapainubsanon kita ubos sa gamhanang kamot sa Diyos. (5:1-14) Ang mga ansiano kinahanglang magbantay sa panon sa Diyos nga malipayon, ug isalig natong tanan ang atong kabalaka diha kang Jehova, sa kasayoran nga siya nagatagad kanato. Kita kinahanglan usab nga mobarog nga malig-on batok sa Yawa ug dili gayod maluya, kay ang atong mga igsoon nakaagom sa samang mga pag-antos usab. Kanunayng hinumdomi nga si Jehova nga Diyos molig-on kanato ug mopaarang kanato sa pagpabiling malig-on diha sa pagtuo.
[Kahon/Hulagway sa panid 30]
Babayen-ong Pagpaanyag: Sa pagtambag sa Kristohanong mga babaye, si Pedro miingon: “Himoa nga ang inyong pagpaanyag dili anha sa panggawas nga pagsalapid sa buhok ug sa pagdayandayan sa mga alahas nga bulawan o pagsul-ob sa hamiling mga besti, kondili diha sa natagong pagkatawo sa kasingkasing pinaagi sa dili madunot nga besti sa maaghop ug malumong espiritu, nga adunay dakong bili sa mga mata sa Diyos.” (1 Pedro 3:3, 4) Sa unang siglo K.P., ang mga babayeng pagano kasagarang adunay maarti kaayong pagkasudlay nga buhok, nagasalapid sa ilang hatag-as nga buhok sa mapagawalong mga porma ug ang mga sinapid niini gidayandayanan ug bulawan. Malagmit, daghan ang nagbuhat niini aron sa pagpagarbo—usa ka butang nga dili angay sa mga Kristohanon. (1 Timoteo 2:9, 10) Apan, dili tanang pagpaanyag daotan, kay gilakip ni Pedro ang “pagsul-ob ug mga besti”—nga sa tin-aw gikinahanglan. Ang mga alahas gigamit usab sa mga alagad sa Diyos sa karaang mga panahon. (Genesis 24:53; Exodo 3:22; 2 Samuel 1:24; Jeremias 2:32; Lucas 15:22) Apan, ang Kristohanong babaye sa pagkamaalamon maglikay sa sobrang mga dayandayan ug makabibihag nga pamiste ug maugdang sa paggamit ug bisan unsang pagpaanyag sa nawong. Ang punto sa tambag sa apostol mao nga iyang hatagag dakong pagtagad, dili ang panggawas nga dayandayan, kondili ang pangsulod nga dayandayan. Aron mahimong tinuod madanihon, siya angay mamisti nga maugdang ug may disposisyon sa usa ka tawo nga may kahadlok sa Diyos.—Proverbio 31:30; Miqueas 6:8.
[Credit Line]
Israel Department of Antiquities and Museums: Israel Museums/David Harris