Mga Magmamantala sa Gingharian Nagtaho
Kagawian nga Magdayandayan sa Atong Kristohanong Ministeryo
SI APOSTOL Pedro mitambag sa mga Kristohanon: “Hupti nga maayo ang inyong kagawian taliwala sa mga nasod.” (1 Pedro 2:12) Gipakita ni apostol Pablo nga pinaagi sa atong maayong kagawian, atong “gidayandayanan ang pagtulon-an sa atong Manluluwas, ang Diyos, diha sa tanang butang.” (Tito 2:10) Ang mga Saksi ni Jehova sa tibuok kalibotan may dungog sa maayong kagawian. Matikdi ang pila ka pananglitan.
Impresyon sa Magtutudlo sa Maayong Kagawian
◻ Ang sangang-buhatan sa Watch Tower sa Costa Rica nagtaho nga ang ubay-ubayng batan-on nianang nasora naghatag ug maayong panig-ingnan. Usa ka igsoong lalaki misugilon kon unsay nakadani niya sa kamatuoran. Siya miasoy: “Ang butang nakapadani kaayo kanako mao ang maayong kagawian sa mga batan-on ug mga hamtong apan ilabina sa mga batan-on. Samtang nagtrabaho ingong magtutudlo, nakahigayon ako sa pagpaniid pag-ayo sa mga Saksi sa akong eskuylahan. Ug sanglit ako nagkasera sa usa ka pamilya sa mga Saksi ni Jehova, akong napanid-an ang kagawian sa mga bata usab didto.
“Ako gayong namatikdan ang kalainan tali sa mga estudyante nga mga Saksi ug sa ubang estudyante sa akong eskuylahan. Ang mga Saksi kanunayng untop sa panahon ug maayog pamatasan, dili gayod mamakak, ug kanunayng nagbuhat sa ilang mga asaynment. Namatikdan ko usab nga sila maminatud-on sa dihang nagkuhag mga pasulit, bisan pag ang ubang estudyante sa katibuk-an nangopya. Dugang pa, sila maayog pamatasan ug matinahoron kanako ingong ilang magtutudlo. Kay nakadayeg sa mga batan-ong Saksi sa eskuylahan ug sa balay nga akong gikaserahan, misugod ako sa pagsusi niining relihiyona ug sa kataposan midawat sa kamatuoran.”
Maayong mga Sangpotanan Gikan sa Kristohanong Kagawian Panahon sa Usa ka Kombensiyon
◻ Usa sa mga Saksi ni Jehova sa usa ka kongregasyon sa kasadpang bahin sa El Salvador nagtinguha nga ipaambit ang maayong balita sa Gingharian sa iyang duha ka igsoong lalaki sa unod. Ang usa namati ug misugod sa pagtuon sa Bibliya uban sa mga Saksi ni Jehova. Ang laing igsoong lalaki sakop sa Evangelical nga simbahan nga gitawag Prinsipe sa Pakigdait, ug giingnan niya ang iyang igsoon: “Ayaw pagpakigsulti nako; ikaw nagaalagad sa intereses sa Yawa.”
Sa pag-abot sa panahon sa distritong kombensiyon, ang usang nagtuon nagdapit sa iyang igsoon nga mouban kaniya ngadto sa kombensiyon. Ang igsoon miingon: “Sige, mokuyog ako; tan-awon nako kon diin nako hisakpi ang mga Saksi.” Ang duha ka igsoong lalaki nag-uban sa pagtambong sa kombensiyon. Ang daghang tumatambong ug ang maayong kahikayan sa kombensiyon nakapahingangha sa Evangelical, kinsa miingon nga wala pa siya sukad makakitag ingon niadto. Sa iyang pag-uli sa balay, giingnan niya ang iyang igsoon: “Itunol ang imong kamot.” “Bahin ba kini sa unsa?” nangutana ang iyang igsoon. “Itunol lang ang imong kamot,” mao ang tubag. Sila naglamanohay, ug ang igsoon nga sakop sa Evangelical nga simbahan miingon: “Sukad karon ako magtuon uban sa mga Saksi ni Jehova. Tinuod, wala ako mahibalo kon unsay akong nasayloan.” Karon siya usab aktibo ug madasigong magmamantala sa maayong balita sa Gingharian sa Diyos.