Maglakaw Ingon sa Gitudlo ni Jehova
“Tudloi ako, O Jehova, sa imong dalan. Ako molakaw sa imong kamatuoran. Hiusaha ang akong kasingkasing sa pagkahadlok sa imong ngalan.”—SALMO 86:11.
1, 2. Unsa ang nagpalihok sa mga Saksi ni Jehova sa pagdumili sa mga abuno sa dugo?
“TINGALI ang mga Saksi ni Jehova husto sa pagdumili sa paggamit sa mga produkto sa dugo, kay matuod kini nga dakodakong gidaghanon sa mga ahente nga mopahinabo sa balatian mahimong ikapasa pinaagi sa abuno nga dugo.”—Pranses matag adlaw pamantalaang medikal Le Quotidien du Médecin, Disyembre 15, 1987.
2 Ang uban nga nakabasa nianang komento mahimong mibati nga yanong suwerte lang nga ang mga Saksi ni Jehova midumili sa mga abuno sa dugo dugay na sa wala pa hibaloi sa kasagaran kon unsa ka peligroso, bisan makamatay, kini. Apan ang baroganan nga gihuptan sa mga Saksi ni Jehova sa dugo dili aksidente, ni kini lagda nga giimbento sa pipila ka kahibudngan nga sekta, baroganan gumikan sa kahadlok nga ang dugo dili luwas. Hinonoa, ang mga Saksi midumili sa dugo tungod sa ilang determinasyon sa paglakaw nga masinugtanon atubangan sa ilang Dakong Instruktor—ang Diyos.
3. (a) Unsa ang gibati ni David mahitungod sa pagdepende kang Jehova? (b) Unsang sangpotanan ang gilaoman ni David sa unahan tungod sa pagsalig sa Diyos?
3 Si Haring David, kinsa mibati sa iyang pagdepende sa Diyos, determinado nga matudloan niya ug sa ‘paglakaw sa iyang kamatuoran.’ (Salmo 86:11) Si David sa makausa gitambagan nga kon iyang likayan ang mahimong sad-an sa dugo sa mga mata sa Diyos, ang iyang ‘kalag mapamatud-an nga giputos sa sudlanan sa kinabuhi ni Jehova.’ (1 Samuel 25:21, 22, 25, 29) Ingon giputos sa mga tawo ang bililhong mga butang sa pagpanalipod ug pagtipig kanila, ingon man ang kinabuhi ni David mahimong mapanalipdan ug matipigan sa Diyos. Gidawat ang maalamong tambag, si David wala maningkamot sa pagluwas sa iyang kaugalingon pinaagi sa personal nga mga paningkamot apan misalig sa Usa kinsa iyang utangan sa kinabuhi: “Imong pahinaboon nga ako makaila sa dalan sa kinabuhi. Ang kalipay ngadto sa katagbawan naa sa imong nawong; naa ang kahimuot sa imong tuong kamot sa walay kataposan.”—Salmo 16:11.
4. Nganong buot ni David nga matudloan ni Jehova?
4 Uban nianang tinamdan, wala gibati ni David nga siya personal makapili kon unsang langitnong kasugoan ang balido o kinahanglan sugton. Ang iyang tinamdan mao: “Tudloi ako, O Jehova, sa imong dalan, ug mandoi ako sa dalan sa pagkamatarong.” “Tudloi ako, O Jehova, labot sa imong dalan. Ako molakaw sa imong kamatuoran. Hiusaha ang akong kasingkasing sa pagkahadlok sa imong ngalan. Ako modayeg kanimo, O Jehova nga akong Diyos, uban sa akong tibuok kasingkasing.” (Salmo 27:11; 86:11, 12) Usahay ang paglakaw sa kamatuoran sa atubangan sa Diyos mahimong dili kumbenyente o mahimong magkahulogan sa dakong sakripisyo, apan buot ni David nga tudloan sa hustong dalan ug molakaw niini.
Gitudloan Mahitungod sa Dugo
5. Unsa ang dayag nahibaloan ni David mahitungod sa baroganan sa Diyos sa dugo?
5 Takos sa atong pagtagad nga gikan sa pagkabata padayon, si David gitudloan sa panlantaw sa Diyos sa dugo, diin ang maong panlantaw dili relihiyosong misteryo. Sa dihang ang Kasugoan gibasa sa katawhan, si David nakadungog niini: “Ang kalag sa unod naa sa dugo, ug ako mismong gibutang kini diha sa altar alang kaninyo sa paghimog tabon-sa-sala alang sa inyong mga kalag, tungod kay ang dugo mao ang tabon-sa-sala pinaagi sa kalag niini. Mao kana ngano ako miingon sa mga anak sa Israel: ‘Walay kalag diha kaninyo ang mokaon sa dugo ug walay dumuluong pumuluyo nga nagapuyo ingon dumuluong sa inyong taliwala ang mokaon sa dugo.’”—Levitico 17:11, 12; Deuteronomio 4:10; 31:11.
6. Sa unsang paagi dunay padayon nga panginahanglan alang sa mga alagad sa Diyos nga matudloan sa dugo?
6 Samtang gigamit sa Diyos ang Israel ingon iyang gitigom nga katawhan, kadtong buot mopahimuot kaniya kinahanglan tudloan mahitungod sa dugo. Kaliwatan ngadto sa kaliwatan sa mga batang Israelita ang sa ingon gitudloan. Apan ang maong instruksiyon ba mopadayon human gidawat sa Diyos ang kongregasyon sa mga Kristohanon, diin gilangkob sila ingon “Israel sa Diyos”? (Galacia 6:16) Oo, sa matuod, ang panlantaw sa Diyos sa dugo wala mausab. (Malaquias 3:6) Ang iyang gipahayag nga baroganan mahitungod sa dîsayop nga paggamit sa dugo milungtad una pa milihok ang tugon sa Kasugoan, ug kini mipadayon human ang Kasugoan gipapha.—Genesis 9:3, 4; Buhat 15:28, 29.
7. Ngano ang pagkanatudloan sa Diyos sa dugo importante kanato?
7 Ang pagtahod sa dugo dugokan sa Kristiyanidad. ‘Dili ba hinobra ra kana?’ ang uban mangutana. Apan, unsa man ang dugokan sa Kristiyanidad kon dili ang halad ni Jesus? Ug ang apostol Pablo misulat: “Pinaagi kang [Jesus] kita duna sa kagawasan pinaagi sa lukat pinaagi sa dugo nianang usa, oo, ang kapasayloan sa atong kasal-anan, sumala sa kadagaya sa iyang dili takos nga kalolot.” (Efeso 1:7) Gihubad sa The Inspired Letters, ni Frank C. Laubach, ang berso: “Gibayran kita sa dugo ni Kristo ug karon kita Iya na.”
8. Sa unsang paagi ang “dakong panon” nagdepende sa dugo sa kinabuhi?
8 Ang tanan nga molaom nga makalabang buhi sa taliabot “dakong kasakitan” ug mopahimulos sa mga panalangin sa Diyos sa paraisong yuta nagdepende sa giula nga dugo ni Jesus. Gihubit sila sa Pinadayag 7:9-14 ug miingon mahitungod sa ilang nahimo: “Kini sila ang migula gikan sa dakong kasakitan, ug ilang gilabhan ang ilang mga bisti ug gihimo sila nga puti sa dugo sa Kordero.” Tagda ang pinulongan dinhi. Wala kini miingon nga kining mga maluwas latas sa kasakitan ‘midawat kang Jesus’ o ‘mituo kaniya,’ bisan pa kini hinongdanong mga aspeto. Mipadayon kini sa dugang lakang ug miingon nga ilang “gilabhan ang ilang mga bisti ug gihimo sila nga puti sa dugo” ni Jesus. Kana tungod kay ang iyang dugo dunay bili sa paglukat.
9. Nganong ang pagsugot kang Jehova sa dugo seryoso kaayo?
9 Ang apresasyon niining bili mitabang sa mga Saksi ni Jehova sa pagsagop sa dili sayop nga paggamit sa dugo, bisan pa kon ang mananambal sinserong miangkon nga ang abuno kinahanglanon. Mahimong motuo siya nga ang potensiyal nga benepisyo sa abuno mas bug-at kay sa mga risgo sa kahimsog nga ipatungha sa dugo mismo. Apan ang Kristohanon dili makasalikway sa mas grabe nga risgo, ang risgo sa pagkawala sa pag-uyon sa Diyos pinaagi sa pagsugot sa sayop nga paggamit sa dugo. Makausa si Pablo namolong mahitungod kanila nga “tinuyo nagbatasan sa sala human makadawat sa hustong kahibalo sa kamatuoran.” Ngano ang bisan unsang sala nianang matang seryoso? Tungod kay ang maong tawo “miyatak sa Anak sa Diyos ug . . . giisip ingong ordinaryo ug bili ang dugo sa tugon nga pinaagi niini siya gibalaan.”—Hebreohanon 9:16-24; 10:26-29.
Tabangi ang Uban nga Matudloan
10. Unsa ang naa sa luyo sa atong determinasyon sa pagdumili sa dugo?
10 Kita kinsa nagpabili sa halad lukat ni Jesus moamping nga dili mobatasan sa sala, nga mosalikway sa nagluwas-kinabuhi nga bili sa iyang dugo. Ingong nakapalandong na sa butang, atong naamgohan nga ang yanong pagpasalamat sa Diyos alang sa kinabuhi mopalihok kanato sa pagsalikway sa bisan unsang kompromiso sa iyang matarong nga kasugoan, diin kita masaligon nga gihatag uban sa atong kinamaayohang intereses sa kasingkasing—ang atong layog-abot kinamaayohang intereses. (Deuteronomio 6:24; Proverbio 14:27; Ecclesiastes 8:12) Unsa na man, bisan pa, ang bahin sa atong mga anak?
11-13. Unsang sayop nga panlantaw sa ilang mga anak ug sa dugo ang gibatonan sa pipila ka Kristohanong ginikanan, ug ngano?
11 Samtang ang atong mga anak mga masuso o mga bata pa aron makasabot, mahimo silang isipon ni Jehova nga hinlo ug madawat sa sukaranan sa atong debosyon. (1 Corinto 7:14) Busa matuod nga ang mga masuso sa Kristohanong panimalay mahimong wala pa makasabot ug makahimo sa pagpili mahitungod sa pagsugot sa balaod sa Diyos sa dugo. Kita, bisan pa, nagbuhat ba sa atong kinamaayohan sa pagtudlo kanila niining hinongdanong butang? Kinahanglan ugdang konsiderahon kana sa Kristohanong mga ginikanan, sanglit ang pipila ka ginikanan mopadayag nga dunay sayop nga tinamdan mahitungod sa ilang mga anak ug sa dugo. Ang uban mobati nga sila sa matuod walay dakong kontrol kon ang ilang menor nga mga anak abunohan. Nganong kini sayop nga panlantaw?
12 Daghang kayutaan dunay mga balaod o mga ahensiya sa kagamhanan sa pagpanalipod sa gipasagdan ug giabusohan nga mga bata. Ang mga anak sa mga Saksi ni Jehova wala pasagdi o abusohi kon ang mga ginikanan mopili batok sa pagtugot sa ilang hinigugmang anak nga hatagan sa dugo, nga mohangyo sa samang panahon sa paggamit sa kapuli nga mga tambal nga gitagana sa modernong medisina. Bisan sa medikal nga baroganan, dili kini pasagad o abuso, kon konsiderahon ang admitido nga mga peligro sa tambal pinaagi sa abuno. Kini mao ang paggamit sa katungod sa pagtimbang sa mga risgo nga nalangkit ug unya sa pagpili sa tambal.a Apan, ang legal nga mga tagana gidangpan sa pipila ka medikal nga kawani sa pagpangayog awtoridad sa pagpugos sa wala kagustohi nga abuno.
13 Ang ubang mga ginikanan, nakaamgo nga sayon ra sa medikal nga mga kawani sa pagkuhag pagpaluyo sa korte alang sa pag-abuno sa menor, mahimong mobati nga ang butang gawas na sa ilang mga kamot, nga walay butang mahimo o kinahanglan himoon sa mga ginikanan. Kasayop nianang panlantaw!—Proverbio 22:3.
14. Sa unsang paagi sila David ug Timoteo gitudloan sa ilang pagkabatan-on?
14 Atong namatikdan nga si David gitudloan sa dalan sa Diyos gikan sa iyang pagkabatan-on padayon. Kana misangkap kaniya sa pag-isip sa kinabuhi ingon gasa gikan sa Diyos ug sa pag-ila nga ang dugo mirepresentar sa kinabuhi. (Itandi ang 2 Samuel 23:14-17.) Si Timoteo gitudloan sa hunahuna sa Diyos “gikan sa pagkabata.” (2 Timoteo 3:14, 15) Dili ba mouyon ka nga bisan kon sila David ug Timoteo ubos sa kon unsa karon ang legal nga panuigon sa pagkahamtong, sila nakahimo sa pagpahayag sa ilang kaugalingon sa mga isyu nga milangkit sa kabubut-on sa Diyos? Mao man, sa dili pa hingkod ang panuigon, ang batan-ong mga Kristohanon karon kinahanglan matudloan sa dalan sa Diyos.
15, 16. (a) Unsang panlantaw ang naugmad sa pipila ka dapit sa mga katungod sa mga menor? (b) Unsa ang mitultol sa usa ka menor nga hatagan sa dugo?
15 Sa ubang mga dapit ang giingon hamtong nga menor gihatagan sa mga katungod susama nianang sa mga hingkod. Base sa panuigon o sa hamtong nga hunahuna, o sa duruha, ang batan-on mahimong isipon nga hamtong na sa paghimo sa iyang kaugalingong mga desisyon sa medikal nga pagtambal. Bisan sa dapit diin kini dili balaod, ang mga huwes ug mga opisyal mahimong mohatag sa dakong gibug-aton sa mga gusto sa batan-on kinsa makahimo sa klarong pagpahayag sa iyang lig-ong desisyon mahitungod sa dugo. Sa pikas bahin, kon ang batan-on dili klaro ni hamtong makapatin-aw sa iyang pagtuo, mobati ang hukmanan nga silay modesider kon unsa ang daw labing maayo, sama sa lagmit buhaton alang sa usa ka masuso.
16 Usa ka batan-ong lalaki mituon sa Bibliya nga hunonghunong sulod sa katuigan apan wala mabawtismohi. Bisag siya pito ka semana na lamang sa panuigon nga makabaton sa “katungod sa pagdumili sa medikal nga pagtambal alang sa iyang kagalingon,” usa ka ospital nga mitambal kaniya sa kanser nangitag pagpaluyo sa korte sa pag-abuno kaniya batok sa iyang gusto ug niadtong sa iyang mga ginikanan. Ang may konsiyensiya nga huwes misukit kaniya mahitungod sa iyang pagtuo sa dugo ug misukot sa sukaranang mga pangutana, ingon sa mga ngalan sa unang lima ka basahon sa Bibliya. Ang batan-ong lalake dili makangalan kanila ni makahatag sa makapakumbensir nga pamatuod nga siya nakasabot ngano siya midumili sa dugo. Ikasubo, giawtorisahan sa huwes ang mga abuno, mikomento: “Ang iyang pagdumili sa pagsugot sa mga abuno sa dugo wala gibase sa hamtong nga pagsabot sa iyang kaugalingon relihiyosong tinoohan.”
17. Unsang baroganan ang gibatonan sa usa ka 14-anyos batang babaye nga hatagan sa dugo, uban sa unsang resulta?
17 Mahimong lahi ang mga butang alang sa menor-de-edad nga maayo pagkatudlo sa mga dalan sa Diyos ug aktibong naglakaw sa Iyang kamatuoran. Usa ka batan-ong Kristohanon duna sa sama talagsaong tipo sa kanser. Ang batang babaye ug ang iyang mga ginikanan nakasabot ug midawat sa giusab nga chemotherapy gikan sa usa ka espesyalista sa usa ka iladong ospital. Sa gihapon, ang kaso gidala sa korte. Ang huwes misulat: “Si D.P. mitestigo nga siya mosukol sa pagdawat sa abuno sa dugo sa bisan unsang paagi mahimo niya. Giisip niya ang pag-abuno ingon paglapas sa iyang lawas ug gitandi kini sa paglugos. Gihangyo niya ang korte sa pagtahod sa iyang pagpili ug tugotan siya sa pagpadayon [sa ospital] nga wala ang gisugo sa Korte nga mga abuno sa dugo.” Ang Kristohanong instruksiyon nga nadawat niya mitabang kaniya niining malisod nga panahon.—Tan-awa ang kahon.
18. (a) Unsang lig-ong baroganan ang gibatonan sa usa ka masakiton batang babaye sa pagdawat sa dugo? (b) Unsa ang hukom sa huwes sa iyang pagtambal?
18 Usa ka 12-tuig batang babaye gitambalan sa leukemia. Gidala sa ahensiya sa kaayohan-bata ang butang sa korte aron ang dugo ipugos kaniya. Ang huwes mitiklop: “Si L. klarong mitug-an niining korte ug sa tininuod nga paagi, nga kon ang pagsulay himoon sa pag-abuno kaniya sa dugo, suklan niya ang maong abuno sa tanang kusog nga matigom niya. Miingon siya, ug ako mituo kaniya, nga siya mosiyagit ug mangusog ug iyang ibton ang himan sa inyeksiyon sa iyang bukton ug paningkamotan ang pagdaot sa dugo sa sudlanan ibabaw sa iyang higdaan. Dili ako mohatag sa bisan unsang sugo nga mobutang niining bata nianang mapait nga kaagi . . . Niining pasyenteha, ang tambal nga giproponer sa ospital mitagad lamang sa sakit sa pisikal nga sentido. Napakyas kini sa pagtagad sa emosyonal nga panginahanglan niya ug sa iyang relihiyosong tinoohan.”
Mga Ginikanan—Pagtudlo nga Maayo
19. Unsang espesyal nga obligasyon ang kinahanglan buhaton sa mga ginikanan nganha sa ilang mga anak?
19 Ang maong mga kasinatian nagdalag gamhanang mensahe sa mga ginikanan kinsa naninguha nga ang tanan sa ilang pamilya magkinabuhi sumala sa balaod sa Diyos sa dugo. Usa ka rason ngano si Abraham higala sa Diyos mao nga Siya nahibalo nga ang patriarka “mosugo sa iyang mga anak ug sa iyang panimalay sa ulahi niya aron sila mobantay sa dalan ni Jehova sa pagbuhat sa pagkamatarong.” (Genesis 18:19) Dili ba kinahanglan mao usab kini sa Kristohanong mga ginikanan karon? Kon ikaw ginikanan, gitudloan ba nimo ang imong minahal nga mga anak sa paglakaw sa dalan ni Jehova aron sila kanunay “andam sa paghimog depensa sa bisan kinsa nga mangayo . . . sa rason alang sa paglaom diha [kanila], apan nagbuhat sa ingon uban sa maaghop nga buot ug lalom nga pagtahod”?—1 Pedro 3:15.
20. Unsa labi na ang buot natong mahibaloan ug tuohan sa dugo sa atong mga anak? (Daniel 1:3-14)
20 Bisan pa maayo alang sa atong mga anak nga mahibalo mahitungod sa mga peligro sa sakit ug ubang mga risgo sa mga abuno sa dugo, ang pagtudlo sa atong mga anak sa hingpit nga kasugoan sa Diyos sa dugo wala magkahulogan labi na sa pagsilsil sa kahadlok sa dugo. Kon, pananglitan, ang huwes mangutana sa bata ngano dili siya buot hatagan sa dugo ug ang iyang tubag mao nga iyang gihunahuna ang dugo nga labihan ka delikado ug makahahadlok, unsa man ang epekto? Ang huwes mahimong mohukom nga siya yanong dîhamtong ug labihang nalisang, sama nga sobrang mahadlok siya ug operasyon sa apendiks nga siya mohilak ug mosukol niining operasyon bisan gibati sa iyang mga ginikanan nga mao ang labing maayo alang kaniya. Dugang pa, atong namatikdan sa una nga ang sukaranang rason ngano ang mga Kristohanon supak sa mga abuno dili kay ang dugo hugaw kondili kini bililhon sa atong Diyos ug Maghahatag-Kinabuhi. Kinahanglan ang atong mga anak mahibalo niana, ingon man nga ang posible medikal nga mga katalagman sa dugo mohatag sa dugang gibug-aton sa atong relihiyosong baroganan.
21. (a) Kinahanglan mahibaloan sa mga ginikanan ang unsa mahitungod sa ilang mga anak ug sa panlantaw sa Bibliya sa dugo? (b) Sa unsang paagi ang mga ginikanan makatabang sa ilang mga anak maylabot sa dugo?
21 Kon ikaw may mga anak, segurado ka ba nga sila uyon ug mahimong makasaysay sa base-Bibliya nga baroganan sa mga abuno? Sila ba sa matuod mituo niining baroganan ingon kabubut-on sa Diyos? Kumbensido ba sila nga ang paglapas sa balaod sa Diyos labihan ka seryoso nga kini mobutang sa peligro sa paglaom sa Kristohanon sa walay kataposang kinabuhi? Ang maalamong mga ginikanan mosubli niining mga butang uban sa ilang mga anak, bisan kon sila bata pa kaayo o halos hamtong na. Ang mga ginikanan mahimong mobansaybansay diin ang matag batan-on moatubang sa mga pangutana nga mahimong isukot sa huwes o opisyal sa ospital. Ang tumong dili ang pagsubli sa bata nga sinag-ulo ang gipili nga kamatuoran o tubag. Mas importante nga sila nahibalo kon unsa ang ilang gituohan, ug ngano. Hinoon, sa husay sa korte, ang mga ginikanan o uban pa mahimong mopresentar sa impormasyon mahitungod sa mga risgo sa dugo ug sa mabatonan kapuli nga mga tambal. Apan ang dayag pangitaon sa huwes o opisyal sa pagpakigsulti sa atong mga anak mao kon sila ba hamtong nakasabot sa ilang situasyon ug kapilian ug usab kon sila ba duna sa ilang kaugalingong mga prinsipyo ug lig-ong pagtuo.—Itandi ang 2 Hari 5:1-4.
22. Unsa ang mahimong permanente nga resulta sa atong pagkanatudloan sa Diyos sa dugo?
22 Tanan kita nanginahanglan sa pagpabili ug lig-ong mohupot sa panlantaw sa Diyos sa dugo. Gihubit sa Pinadayag 1:5 si Kristo ingon usa nga ‘nahigugma kanato ug nagtangtang kanato gikan sa atong mga sala pinaagi sa iyang kaugalingong dugo.’ Pinaagi lamang sa pagdawat sa bili sa dugo ni Jesus nga kita makabaton sa bug-os ug dayon nga kapasayloan sa atong mga sala. Klarong giingon sa Roma 5:9: “Busa, sanglit kita gipahayag nga matarong karon pinaagi sa iyang dugo, labi pang luwason kita pinaagi kaniya gikan sa kapungot.” Kamaalamon, nan, alang kanato ug sa atong mga anak nga matudloan ni Jehova niining butanga ug mahimong determinado sa paglakaw sa iyang dalan sa walay kataposan!
[Footnote]
a Tan-awa ang Sa Unsang Paagi ang Dugo Makaluwas sa Imong Kinabuhi?, gipatik sa Watchtower Bible and Tract Society of New York, Inc., panid 21-2, 28-31.
Yawing mga Punto sa Pagtudlo
◻ Unsang panlantaw ang atong batonan labot sa pagkatinudloan ni Jehova?
◻ Ngano ang pagsugot sa balaod sa Diyos sa dugo importante kaayo?
◻ Nganong hinongdanon nga ang mga batan-on makahimo sa klaro ug lig-ong pagpatin-aw sa ilang pagtuo sa dugo?
◻ Sa unsang paagi ang Kristohanong mga ginikanan makatabang sa ilang mga anak nga maayong pagkatudlo sa balaod ni Jehova sa dugo?
[Kahon sa panid 17]
ANG KORTE NADANI
Unsa ang gipahayag sa desisyon sa korte mahitungod ni D.P., nga gihisgotan sa parapo 17?
“Ang Korte labing nadani sa intelihensiya, pamarog, dignidad, ug puwersa niining 14-1/2 panuigon nga batan-on. Mahimong gibanlas siya sa pagkadiskobre nga siya dunay makamatay nga porma sa kanser . . . Bisan pa niana, usa ka hamtong batan-ong persona ang mianhi sa Korte sa pagtestigo. Mipadayag siya nga klarong nakapunting sa malisod nga tahas nga nag-atubang kaniya. Mitambong siya sa tanang sesyon sa pagtambag, miuyon sa usa ka plano sa pagtambal, miugmad sa usa ka makataronganong pilosopiya kon sa unsang paagi siya ingon tawo moatubang niining medikal nga hagit, ug mianhi siya sa Korte uban sa makapatandog nga hangyo: tahora ang akong desisyon . . .
“Dugang pa sa iyang kahamtong, gipahayag ni D.P. ang supisyente nga sukaranan alang sa iyang desisyon aron tahoron kini sa Korte. Madaot siya sa espirituwal, sikolohikal, moral, ug emosyonal sa usa ka plano sa pagtambal nga lakipan sa mga abuno sa dugo. Ang Korte motahod sa iyang gipili nga plano sa pagtambal.”
[Hulagway sa panid 16]
Basin buot sa huwes o administrador sa ospital mahibalo kon unsa gayod ang gituohan sa Kristohanong batan-on, ug ngano