Nganong Magsul-ob sa Pagkamapaubsanon?

ANG Amerikanong awtor si Edgar Allan Poe bag-o pang nakahuman ug basa sa iyang bag-ong sugilanon ngadto sa iyang pipila ka higala. Sila tiaw nga miingon kaniya nga kanunay niyang gigamit ang ngalan sa bida. Unsay reaksiyon ni Poe? Ang usa ka higala nahinumdom: “Ang iyang mapahitas-ong espiritu dili gayod makadawat sa maong prangka nga pagsaway, busa sa silaob sa kasuko, nga wala makasanta ang iyang mga higala, iyang gilabay ang tanang papel ngadto sa kalayo.” Nawala ang sugilanon nga “kataw-anan kaayo, nga lahi kaayo gikan sa iyang naandang . . . sugilanong makasubo.” Ang pagpaubos makatipig unta niadto.

Tungod sa garbo ang mga tawo mohimog dili-maalamong butang, kini kaylap sa kalibotan. Apan lahi ang mga alagad ni Jehova. Sila kinahanglang magsul-ob ug maayong pagkadesinyong sapot sa pagkamapaubsanon.

Unsa ang Pagkamapaubsanon?

Si apostol Pablo naghisgot sa matahom nga Kristohanong sapot sa pagkamapaubsanon sa dihang siya misulat ngadto sa isigkamagtutuo sa karaang siyudad sa Colosas. Siya miawhag: “Ingong mga pinili sa Diyos, balaan ug hinigugma, isul-ob ninyo ang malumong pagbati sa kahangawa, kalulot, pagpaubos sa hunahuna, kalumo, ug hataas-nga-pailob.”​—Colosas 3:12.

Oo, ang pagkamapaubsanon “maoy pagpaubos sa hunahuna.” Kini maoy “pagkamapaubsanon sa hunahuna; kawalay garbo, kaaghop.” Ang tawong mapaubsanon “makasaranganon sa espiritu; dili hambogiro.” Siya “hilabihang makatahod o matinahoron kaayo.” (The World Book Dictionary, Tomo 1, panid 1030) Ang pagkamapaubsanon dili katalaw o kahuyangon. Sa pagkamatuod, ang garbo nagapabanaag ug kahuyang, samtang ang pagpakitag pagkamapaubsanon nagkinahanglag kaisog ug kusog.

Diha sa Kasulatan ang Hebreohanong pulong nga gihubad “magmapaubsanon kamo” sa literal nagkahulogang “tamaki ang inyong kaugalingon.” Busa, ang maalamong magsusulat sa Proverbio nagtambag: “Anak ko, . . . kon madakpan ka tungod sa mga pulong sa imong baba, . . . luwasa ang imong kaugalingon, kay ikaw nagapos sa kamot sa imong isigkatawo: Lakaw magpaubos ka sa imong kaugalingon ug magpakiluoy ka sa imong isigkatawo.” (Proverbio 6:1-3) Sa ato pa, isalikway ang garbo, dawata ang imong sayop, tul-ira ang mga butang.

Kinahanglang Tiunay Kini

Dili tanang tawo nga daw mapaubsanong tan-awon tinuod gayod nga mapaubsanon. Ang uban nga daw mapaubsanong mga indibiduwal sa pagkamatuod maoy mga mapahitas-on ug mobuhat ug bisan unsa aron makuha lang ang ilang gusto. Unya anaa kadtong nagagamit ug mga takoban sa mini nga pagpaubos aron dayegon sa uban. Pananglitan, nakasugat si apostol Pablo ug mga tawo nga nagpasundayag ug “minaut nga pagpaubos,” ug siya miingon nga ang si bisan kinsa nga nagabuhat niini sa aktuwal “sa walay katarongan nagapasigarbo tungod sa iyang unodnon nga mga panghunahuna.” Ang maong mga tawo sayop nga naghunahuna nga ang pagkabaton sa pag-uyon sa Diyos nagadepende kon siya ba nagakaon, nagainom, o naghikap sa pila ka butang o nagsunod o wala sa relihiyosong mga adlaw. Tinuod, siya tingali diyosnong tan-awon ug mapaubsanon, apan ang iyang mini nga pagpaubos walay bili. (Colosas 2:18, 23) Sa pagkamatuod, kini mohatod kaniya sa paghunahuna nga ang ganti sa kinabuhi ihatag sa mga tawong nagasalikway sa materyal nga mga butang. Kini mobunga ug malalangong porma sa materyalismo tungod kay gihatagag pagtagad sa higpit nga mga pagdili ang materyal nga mga butang nga iyang giangkong gikaligotgotan.

Sa usa ka bahin, ang tinuod nga pagpaubos mopugong sa usa ka tawo sa paghatag dakong importansiya sa kaugalingon sa pamisti, pamostora, ug estilo sa kinabuhi. (1 Juan 2:15-17) Ang tawo nga nagsul-ob ug sapot sa pagpaubos dili mohatag ug wala kinahanglanang pagtagad sa iyang kaugalingon o sa iyang mga abilidad. Hinunoa, ang pagpaubos makatabang kaniya sa pagtratar sa uban sa mahunahunaong paagi ug sa pagtan-aw sa iyang kaugalingon sama sa pagtan-aw kaniya sa Diyos. Ug sa unsang paagi kana?

Ang Hunahuna ni Jehova

Sa dihang ang manalagnang Samuel talidihog sa usa ka bag-ong hari alang sa nasod sa Israel, abi niya nga ang anak ni Jesse nga si Eliab mao ang pinili ni Jehova. Apan gisultihan ni Jehova si Samuel: “Ayaw tan-awa ang iyang panagway ug ang gitas-on sa iyang barog, tungod kay ako nagasalikway kaniya. Kay ang panan-aw sa tawo dili ingon sa panan-aw sa Diyos, tungod kay ang tawo makakita nianang makita sa mga mata; apan si Jehova, siya makakita sa kasingkasing.” Ang pito ka anak ni Jesse gisalikway. Ang gipili sa Diyos mao si David, nga napamatud-ang usa ka tawong kasaligan ug mapaubsanon.​—1 Samuel 13:14; 16:4-13.

Ang sapot sa pagpaubos mopanalipod kanato nga mahimong hambogiro, mabuotbuoton​—dili-kahimut-anan sa Diyos. Siya “nagabatok sa mga mapahitas-on, apan siya nagahatag ug dili-takos nga kalulot sa mga mapaubsanon.” (Santiago 4:6) Ang iyang hunahuna makita diha sa mga pulong sa salmista: “Bisan pa nga hataas si Jehova, siya nagatagad gihapon sa mapaubsanon; apan ang mapahitas-on siya nakaila gikan lamang sa halayo.” (Salmo 138:6; 1 Pedro 5:5, 6) Ang ginapaabot sa Diyos diha sa iyang mga alagad makita gikan niining pangutana, nga gibangon diha sa Miqueas 6:8: “Unsa ba ang gipangayo ni Jehova kanimo kondili ang pagbuhat sa matarong ug sa paghigugma sa kalulot ug sa paglakaw nga makasaranganon uban sa imong Diyos?”

Gipasundayag sa Diyos ug ni Kristo

Dili ikatingala nga si Jehova nagpaabot kanato nga magpakitag pagkamapaubsanon! Kini maoy usa sa iyang kaugalingong mga hiyas. Human nga giluwas sa Diyos siya gikan sa iyang mga kaaway, si David miawit: “Ikaw [Jehova] nagahatag kanako sa taming sa imong kaluwasan, . . . ug ang imong pagkamapaubsanon nagapadako kanako.” (Salmo 18:35; 2 Samuel 22:1, 36) Bisag si Jehova atua sa kahitas-an sa mga langit, “siya nagpaubos sa iyang kaugalingon aron sa pagtan-aw sa langit ug sa yuta, gibangon niya ang timawa gikan sa abog; gibayaw niya ang kabos gikan sa pagkaalaot, ug gipalingkod niya sila uban sa mga prinsipe.” (Salmo 113:5-8) Ang Diyos nagpakitag pagkamapaubsanon pinaagi sa pagpasundayag sa kaluoy diha sa makasasalang mga tawo. Ang iyang pakiglabot sa mga makasasala ug ang iyang paghatag sa iyang Anak ingong usa ka halad alang sa mga sala maoy mga kapasundayagan sa iyang pagpaubos, gugma, ug ubang mga hiyas.​—Roma 5:8; 8:20, 21.

Si Jesu-Kristo, nga “malumo ug mapaubsanon sa kasingkasing,” naghatag sa labing dakong tawhanong pananglitan sa pagkamapaubsanon. (Mateo 11:29) Iyang gisultihan ang iyang mga tinun-an: “Ang bisan kinsa nga magpahitaas sa iyang kaugalingon igapahiubos, ug bisan kinsa nga magpaubos sa iyang kaugalingon igapahitaas.” (Mateo 23:12) Dili usa kana ka yanong arte sa pagpanulti. Sa gabii sa wala pa siya mamatay, gihugasan ni Jesus ang mga tiil sa iyang mga apostoles, naghimog usa ka pag-alagad nga sagad himoon sa mga ulipon. (Juan 13:2-5, 12-17) Si Jesus mapaubsanong nag-alagad sa Diyos sa wala pa moanhi sa yuta ug nagpakitag pagkamapaubsanon sukad nga siya gibanhaw ngadto sa usa ka hinimayang katungdanan sa langit. Busa gitambagan ni Pablo ang isigkamagtutuo sa ‘paglantaw sa uban nga mas labaw kay kanila’ ug sa pagbaton ug mapaubsanong tinamdan sama kang Jesu-Kristo.​—Filipos 2:3, 5-11.

Sanglit ang Diyos ug si Kristo nagpasundayag ug pagkamapaubsanon, kadtong nagatinguha nga makabaton sa pag-uyon sa Diyos kinahanglang magpasundayag niining hiyasa. Kon may mga panahong magmapahitas-on kita, maalamong magpaubos kita ug mag-ampo sa pasaylo sa Diyos. (Itandi ang 2 Cronicas 32:24-26.) Ug inay magbaton ug hataas nga mga hunahuna labot sa atong kaugalingon, angay natong ipadapat ang tambag ni Pablo: “Ayaw palandonga ang magarbohong mga butang, hinunoa pakig-angay kamo sa mapaubsanong mga butang.” (Roma 12:16) Nan, sa unsang paagi ang pagpaubos makahatag kanatog kaayohan ug sa uban?

Mga Kaayohan sa Pagkamapaubsanon

Ang usa ka kaayohan sa pagkamapaubsanon mao nga kini magpugong kanato sa pagpanghambog mahitungod sa atong kaugalingon. Busa dili maglagot kanato ang uban ug malikayan ang kaulawan kon sila wala maikag sa atong mga kalamposan. Si Jehova ang atong ipasigarbo, dili ang atong kaugalingon.​—1 Corinto 1:31.

Ang pagpaubos makatabang kanato nga mabatonan ang pagtultol sa Diyos. Si Jehova nagpadalag usa ka manulonda kang Daniel pinaagi sa usa ka panan-awon tungod kay ang maong propeta nagpaubos atubangan sa Diyos sa nagpangitag pagtultol ug pagsabot. (Daniel 10:12) Sa dihang manguna na unta si Esdras sa pagdala sa katawhan ni Jehova gawas sa Babilonya nga may daghang dalang bulawan ug salapi aron ipatahom sa templo sa Jerusalem, siya nagproklamar ug pagpuasa aron sila magapaubos atubangan sa Diyos. Ang resulta? Gipanalipdan sila ni Jehova gikan sa pag-atake sa mga kaaway sa panahon sa peligrosong panaw. (Esdras 8:1-14, 21-32) Sama kang Daniel ug Esdras, ipasundayag ta ang pagkamapaubsanon ug mangitag pagtultol ni Jehova inay maningkamot sa pagtuman sa hinatag sa Diyos nga mga katungdanan sa atong kaugalingong kaalam ug kusog.

Kon kita sinul-oban sa sapot sa pagkamapaubsanon, atong tahuron ang uban. Pananglitan, ang mga anak nga mapaubsanon magatahod ug magasunod sa ilang mga ginikanan. Ang mapaubsanong mga Kristohanon magtahod usab sa ilang isigkamagtutuo sa ubang nasyonalidad, rasa, ug kagikan, kay ang pagpaubos mopahimo kanatong dili-mapihigon.​—Buhat 10:34, 35; 17:26.

Ang pagkamapaubsanon mopalambo sa gugma ug pakigdait. Ang tawong mapaubsanon dili makig-away sa isigkamagtutuo aron lang matino ang ilang giingong mga katungod. Ang gihimo lamang ni Pablo mao ang mga butang nga makapalig-on nga dili makasilo sa konsensiya sa igsoon. (Roma 14:19-21; 1 Corinto 8:9-13; 10:23-33) Ang pagkamapaubsanon makatabang usab kanato sa pagpalambo sa gugma ug pakigdait pinaagi sa pagpasaylo sa uban tungod sa ilang mga sala batok kanato. (Mateo 6:12-15; 18:21, 22) Kini motukmod kanato sa pagduol sa tawong nasilo, dawaton ang atong sayop, mangayo kaniyag pasaylo, ug buhaton ang atong maarangan aron matul-id ang bisan unsang sayop nga atong nahimo. (Mateo 5:23, 24; Lucas 19:8) Kon duolon kita sa nasilo nga indibiduwal, ang pagkamapaubsanon maoy mopalihok kanato sa paghusay sa mga butang nga makigdaiton diha sa espiritu sa gugma.​—Mateo 18:15; Lucas 17:3.

Ang kaluwasan nagadepende sa pagpakitag pagkamapaubsanon. Pananglitan, mahitungod sa Diyos, kini ang giingon: “Sa tawong mapaubsanon ikaw magaluwas; apan ang imong mga mata anaa sa ibabaw sa mga mapahitas-on, aron imo silang ipaubos.” (2 Samuel 22:28) Sa panahong ang Haring si Jesu-Kristo ‘magakabayo diha sa kamatuoran, sa pagkamapaubsanon, ug sa pagkamatarong,’ iyang luwason kadtong nagapaubos atubangan kaniya ug sa iyang Amahan. (Salmo 45:4) Kadtong nagapakitag pagkamapaubsanon makakaplag ug paglipay niining mga pulonga: “Pangitaa ninyo si Jehova, kamong tanang mga maaghop sa yuta, nga nanagtuman sa Iyang tanang tulomanon. Pangitaa ang pagkamatarong, pangitaa ang pagkamaaghop, tingali kamo pagatagoan sa adlaw sa kasuko ni Jehova.”​—Sofonias 2:3.

Pagkamapaubsanon ug Organisasyon sa Diyos

Ang pagkamapaubsanon moagak sa katawhan sa Diyos sa pag-apresyar sa iyang organisasyon ug mounong uban niana ingong mga maghuhupot sa integridad. (Itandi ang Juan 6:66-69.) Kon dili ihatag kanato ang pribilehiyo nga atong gipaabot nga madawat, ang pagpaubos makatabang kanato sa pagkooperar sa mga tawo nga nagapangabaga sa responsabilidad sulod sa kongregasyon. Ug ang atong mapaubsanong kooperasyon maghatag maayong pananglitan.

Sa laing bahin, ang pagpaubos mopugong kanato sa pagpakitag kakawangan labot sa atong mga pribilehiyo sa pag-alagad uban sa katawhan ni Jehova. Kini mopugong kanato sa pagpaabot sa pagdayeg sa trabaho nga kita nakapribilehiyo sa pagbuhat diha sa organisasyon sa Diyos. Dugang pa, kon kita nagaalagad ingong mga ansiano, ang pagpaubos motabang kanato sa pagtratar sa panon sa Diyos uban ang kalumo.​—Buhat 20:28, 29; 1 Pedro 3:8.

Pagpaubos ug Disiplina

Ang sapot sa pagpaubos motabang kanato sa pagdawat sa disiplina. Ang tawong mapaubsanon dili sama ni Haring Uzzias sa Juda, kansang kasingkasing nagmapahitas-on kaayo mao nga iyang giagaw ang mga katungdanan sa saserdote. Siya ‘nakalapas batok kang Jehova ug misulod sa templo aron sa pagsunog ug insenso ibabaw sa halaran sa insenso.’ Dihang nasuko si Uzzias sa mga saserdote tungod kay gibadlong siya, gitaptan siya ug sanla. Pagkadakong bili ang gibayad tungod sa kakulang sa pagpaubos! (2 Cronicas 26:16-21; Proverbio 16:18) Ayaw gayod sundoga si Uzzias ug ayaw itugot nga mapugngan ka sa garbo sa pagdawat sa disiplina gikan sa Diyos pinaagi sa Iyang Pulong ug organisasyon.

Niining bahina gisultihan ni Pablo ang dinihogan Hebreohanong mga Kristohanon: “Nahikalimot ba kamo sa tambag nga nagasangpit kaninyo ingon nga mga anak: ‘Anak ko, dili mo pagtamayon ang pagpanton gikan ni Jehova, ni magkaluya ka sa diha nga pagabadlongon ikaw niya; kay si Jehova nagapanton kaniya nga iyang gihigugma; gani, siya nagalatos sa matag usa ka anak nga iyang gisagop ingong anak.’ . . . Tinuod, ang tanang pagpanton daw dili makalipay, hinunoa makasakit hinoon; apan sa kapulihay kadtong namatuto niini magahatag sa ­bunga, nga mao, ang pagkamatarong.” (Hebreohanon 12:5-11) Hinumdomi, usab, nga “ang pagbadlong sa pahamatngon maoy dalan sa kinabuhi.”​—Proverbio 6:23.

Pabiling Sinapotan sa Pagkamapaubsanon

Pagkahinungdanon nga isul-ob kanunay sa mga Kristohanon ang sapot sa pagpaubos! Kini mopahimo kanato sa paglahutay ingong mga magmamantala sa Gingharian, magpaubos sa pagsangyaw gikan sa balay ug balay sa pagpangita sa mga tawong “matinguhaon sa kinabuhing dayon.” (Buhat 13:48; 20:20) Sa pagkamatuod, ang pagpaubos mopahimo kanato sa pagpadayon sa pagsunod sa Diyos sa tanang bahin, bisan pag ang mapahitas-ong mga magsusupak masilag sa atong matarong nga dalan.​—Salmo 34:21.

Tungod kay gipalihok kita sa pagkamapaubsanon sa ‘pagsalig kang Jehova uban sa atong bug-os nga kasingkasing,’ siya magatul-id sa atong mga alagianan. (Proverbio 3:5, 6) Gani, diha lamang kon isul-ob nato kining maayong hiyas nga kita tinuod nga makalakaw uban sa Diyos ug tagamtamon ang iyang pag-uyon ug panalangin. Sumala sa gisulat ni apostol Santiago: “Ipahiubos ninyo ang iyang kaugalingon atubangan sa panan-aw ni Jehova, ug siya magatuboy kaninyo.” (Santiago 4:10) Busa pasagdi nga atong isul-ob ang pagkamapaubsanon, kanang matahom nga sapot nga gidesinyo ni Jehova nga Diyos.