Mga Pangutana Gikan sa mga Magbabasa
◼ Nganong gisugdan ni Jesus ang Memoryal uban sa mga apostoles lamang ug dili uban sa ubang mga disipulo nga pagadalhon ngadto sa bag-ong pakigtugon?
Kini nga pangutana daw gipasukad sa sayop nga pagtuo nga nagtigom si Jesus uban sa iyang apostoles sa maong gabii aron sugdan ang Panihapon sa Ginoo uban sa Kristohanong kongregasyon sa mga dinihogan nga anaa na sa bag-ong pakigtugon. Hinunoa, sa Nisan 14, 33 K.P., ang Kristohanong kongregasyon wala pa maporma, ug miabot si Jesus uban sa iyang mga apostoles alang sa tinuig nga panihapon sa Hudiyohanong Paskuwa.
Sa pagkamatuod, si Jesus adunay laing mga disipulo gawas sa 12 nga nailhang mga apostoles. Sa tuig sa wala pa siya mamatay, siya nagpadalag 70 ka disipulo sa pagpanaw aron sa pagwali. Human sa iyang pagkabanhaw, “siya mipakita sa kapin sa lima ka gatos ka igsoon sa usa ka higayon.” Ug dihay “mga usa ka gatos ug kawhaan” ka disipulo ang nagtigom sa adlaw sa Pentekostes. (1 Corinto 15:6; Buhat 1:15, 16, 23; Lucas 10:1-24) Apan atong tagdon ang pundok uban kang Jesus sa dihang iyang gisugdan ang tinuig nga pagsaulog nga nailhang ang Panihapon sa Ginoo.
Ang Lucas 22:7, 8 naghatag kanato sa yugto sa panahon, nga nagaingon: “Miabot ang adlaw sa tinapay nga walay igpapatubo, nga maoy pag-ihaw sa karnero sa paskuwa; ug iyang gisugo si Pedro ug Juan, nga nag-ingon: ‘Lakaw kamo ug hikaya ninyo ang paskuwa alang kanato aron mangaon kita niini.’” Ang asoy nagpadayon: “Ingna ninyo ang tag-iya sa balay, ‘Ang Magtutudlo nagaingon kanimo: “Hain ba ang lawak diin adto ako makigsalo sa akong mga tinun-an sa pagkaon sa paskuwa?”’” Busa niadtong gabhiona si Jesus kauban sa 12 alang sa usa ka Hudiyohanong selebrasyon. Iyang gisultihan sila: “Dako kaayo ang akong tinguha sa pagkaon uban kaninyo niining paskuwa sa dili pa ako mag-antos.”—Lucas 22:11, 15.
Sukad sa pagsugod niini didto sa Ehipto, ang Paskuwa maoy usa ka pagsaulog sa pamilya. Sa gisugdan ang Paskuwa, gisultihan sa Diyos si Moises nga kinahanglang mag-ihaw ug usa ka karnero alang sa matag panimalay. Kon gamay ra ang pamilya nga dili makahurot sa usa ka buok karnero, ang silingan nga pamilya mahimong dapiton aron makasalo sa pangaon. Busa, makataronganon nga alang sa Paskuwa sa 33 K.P., ang kadaghanan sa mga tinun-an ni Jesus sa naandan nagtigom uban sa ilang mga pamilya alang niini nga panihapon.
Apan si Jesus “dako kaayo ug tinguha” sa pag-ambit nianang mahimong kataposan balidong Paskuwa, ug ang kataposang gabii sa dili pa siya mamatay, uban sa iyang suod nga mga sumusunod nga mibiyahe uban kaniya sa kadaghanang panahon sa iyang ministeryo. Sa kataposan sa panihapon sa Paskuwa, gisultihan sila ni Jesus mahitungod sa usa ka bag-ong selebrasyon nga kinahanglang saulogon sa tanan niyang mga sumusunod sa umaabot. Ang bino nianang umaabot pa nga Kristohanong selebrasyon naghawas sa dugo sa “bag-ong pakigtugon” nga maoy ipuli sa pakigtugon sa Kasugoan.—Lucas 22:20.
Sa gabii sa Nisan 14, 33 K.P., hinunoa, ang bag-ong pakigtugon wala pa matapos, kay ang nagapabalido nga halad—si Jesus—wala pa ikahalad. Ang pakigtugon sa Kasugoan ginapatuman pa. Kini wala pa ikalansang sa kahoy. Dugang pa, kini dili pa balido hangtod sa adlaw sa Pentekostes nga ang daang pakigtugon uban sa lumad nga mga Israelinhon pagapulihan sa bag-ong pakigtugon uban sa espirituwal nga Israel.—Galacia 6:16; Colosas 2:14.
Busa, ang 11 ka apostoles ug ang ubang mga tinun-an wala pa mailalom sa bag-ong pakigtugon niadtong gabhiona. Ug si Jesus wala magpakitag pagsupak sa ubang mga tinun-ang Hudiyo sa pagtugot kanila sa pagtigom uban sa ilang mga pamilya aron saulogon ang Paskuwa.