“Ang Kahayag Miabot sa Kalibotan”

“Kini mao ang pasikaranan sa paghukom, nga ang kahayag miabot sa kalibotan apan ang mga tawo labaw nga nahigugma sa kangitngit kay sa kahayag.”—JUAN 3:19.

1. Nganong kinahanglan nga ang matag usa magmahunahunaon bahin sa paghukom sa Diyos?

KADAGHANAN sa katawhan karong adlawa dili kaayo mabalak-on bahin sa paghukom sa Diyos. Ang pipila nag-isip nga ang Diyos paborableng maghukom kanila kon sila kanunay nga magsimba ug dili mobuhat ug daotan ngadto sa ilang mga silingan. Alang sa daghan, ang mga pagtulon-an sa Kakristiyanohan mahitungod sa impiyernong-kalayo ug sa purgatoryo nagpaduhaduha sa tibuok nga ideya sa paghukom sa Diyos. Apan ang kaylap nga pagkadili-matinagdanon ug kabakakan sa Kakristiyanohan dili makapausab sa kamatuoran nga sa dili madugay pagahukman sa Diyos ang matag tawo. (Roma 14:12; 2 Timoteo 4:1; Pinadayag 20:13) Ug dako ang magdepende niining paghukoma. Kadtong paborableng pagahukman makadawat sa gasa sa Diyos nga walay-kataposang kinabuhi, samtang kadtong dili pa­bo­ra­bleng pagahukman makadawat sa bug-os nga bayad sa sala: ang kamatayon.​—Roma 6:23.

2. Unsa ang pasikaranan sa paghukom sa Diyos?

² Busa, ang tinuod nga mga Kristohanon mabalak-on bahin sa paghukom sa Diyos, ug sila matinguhaon sa pagpahimuot kaniya. Sa unsang paagi ilang mahimo kini? Sa Juan 3:19, gihatag ni Jesus kanato ang katin-awan. Siya miingon: “Kini mao ang pasikaranan sa paghukom, nga ang kahayag miabot sa kalibotan apan ang mga tawo labaw nga nahigugma sa kangitngit kay sa kahayag, kay ang ilang mga binuhatan maoy daotan.” Oo, ang paghukom sa Diyos ibase diha sa kon kita nahigugma ba sa kahayag inay sa kangitngit.

“Ang Diyos Kahayag”

3. Unsa ang kangitngit, ug unsa ang kahayag?

³ Sa espirituwal nga diwa, ang kangitngit nalangkit sa pagkawalay-alamag ug pagkawalay-paglaom nga naglungtad sa kalibotan ni Satanas​—bisan pa nga si Satanas sagad nagtakoban ingon nga “usa ka manulonda sa kahayag.” (2 Corinto 4:4; 11:14; Efeso 6:12) Sa laing bahin, ang kahayag nalangkit sa pagsabot ug kalamdagan nga naggikan kang Jehova nga Diyos. Si Pablo naghisgot sa kahayag sa dihang siya misulat: “Kay ang Diyos ang nag-ingon: ‘Gikan sa kangitngit mosidlak ang kahayag,’ ug siya nagasidlak dinhi sa among mga kasingkasing sa paglamdag kanila pinaagi sa mahimayaong kahibalo sa Diyos pinaagi sa nawong ni Kristo.” (2 Corinto 4:6) Ang espirituwal nga kahayag nalangkit pag-ayo kang Jehova nga Diyos nga si apostol Juan misulat: “Ang Diyos kahayag.”​—1 Juan 1:5; Pinadayag 22:5.

4. (a) Sa unsang paagi gihimo ni Jehova nga mabatonan ang kahayag? (b) Sa unsang paagi kita makapasundayag ug gugma sa kahayag?

⁴ Si Jehova naghimo sa kahayag nga mabatonan pinaagi sa iyang pulong, nga karon libreng mabatonan sa sinulat nga dagway diha sa Balaang Bibliya. (Salmo 119:105; 2 Pedro 1:19) Busa, ang salmista tininuod nga mipahayag sa iyang gugma sa kahayag sa dihang siya misulat: “Akong gihigugma sa hilabihan ang imong kasugoan! Sa tibuok adlaw kini ang akong gipalandong. Ang akong kalag nagbantay sa imong mga pahimangno, ug gihigugma ko sila sa hilabihan gayod.” (Salmo 119:97, 167) Imo bang gihigugma ang kahayag sama sa dayag gihimo sa salmista? Ikaw ba regular nga nagbasa sa Pulong sa Diyos, nagpalandong niana, ug nanlimbasog sa pagpadapat sa giingon niini? (Salmo 1:1-3) Kon mao, ikaw nagtinguha nga makadawat ug paborableng paghukom gikan kang Jehova.

“Ako ang Kahayag sa Kalibotan”

5. Kang kinsa natumong ang balaang kahayag?

⁵ Ang naghatag-kinabuhi nga kahayag gikan kang Jehova natumong kang Jesu-Kristo. Sa introduksiyon sa Ebanghelyo ni Juan, atong mabasa: “Pinaagi kang [Jesus] mao ang kinabuhi, ug ang kinabuhi mao ang kahayag sa mga tawo. Ug ang kahayag nagasidlak diha sa kangitngitan, apan ang kangitngit wala makabuntog niana.” (Juan 1:4, 5) Sa pagkamatuod, si Jesus adunay suod nga kalangkitan sa kahayag mao nga siya gitawag “ang tinuod nga kahayag nga naghatag ug kahayag sa tanang matang sa tawo.” (Juan 1:9) Si Jesus mismo miingon: “Samtang ako ania sa kalibotan, ako mao ang kahayag sa kalibotan.”​—Juan 9:5.

6. Unsa ang buhaton sa usa ka tawo aron makabatog paborableng paghukom nga motultol sa kinabuhing dayon?

⁶ Busa, kadtong nahigugma sa kahayag nahigugma kang Jesus ug nagbatog pagtuo kaniya. Maoy imposible ang pagbatog paborableng paghukom nga walay pagtumong kang Jesus. Oo, pinaagi lamang sa pagsalig kaniya ingong tinudlong paagi sa kaluwasan sa Diyos nga kita makabatog paborableng paghukom. Si Jesus miingon: “Siya nga nagbaton ug pagtuo sa Anak adunay kinabuhing dayon; siya nga nagsupak sa Anak dili makakita sa kinabuhi, apan ang kapungot sa Diyos magpabilin ibabaw kaniya.” (Juan 3:36) Apan, unsay kahulogan sa pagbaton ug pagtuo diha kang Jesus?

7. Ang pagtuo diha kang Jesus nagpasabot sa pagtuo kang kinsa pa?

⁷ Una, si Jesus mismo miingon: “Siya nga adunay pagtuo kanako adunay pagtuo, dili lamang kanako, apan kaniya usab nga nagpadala kanako; ug siya nga nakakita kanako nakakita usab kaniya nga nagpadala kanako. Ako mianhi ingon nga kahayag sa kalibotan, aron nga ang matag usa nga adunay pagtuo kanako dili magpabilin sa kangitngit.” (Juan 12:44-46) Kadtong nahigugma kang Jesus ug nagbatog pagtuo kaniya kinahanglan usab nga adunay lalom nga gugma ug pagtuo sa Diyos ug Amahan ni Jesus, si Jehova. (Mateo 22:37; Juan 20:17) Si bisan kinsa nga nagagamit sa ngalan ni Jesus diha sa iyang pagsimba apan napakyas sa paghatag ug mas dakong pasidungog kang Jehova wala magpasundayag sa usa ka dalisay nga gugma sa kahayag.​—Salmo 22:27; Roma 14:7, 8; Filipos 2:10, 11.

“Pangulong Ahente” sa Diyos

8. Sa unsang paagi ang balaang kahayag natumong na kang Jesus bisan una sa iyang pagkatawo?

⁸ Ang pagbatog pagtuo kang Jesus nagkahulogan usab sa bug-os nga pagdawat sa iyang papel diha sa mga katuyoan ni Jehova. Ang kahinungdanon sa maong papel gipatugbaw sa dihang ang manulonda miingon ngadto kang Juan: “Ang pagpamatuod kang Jesus mao ang nagdasig sa pagpanagna.” (Pinadayag 19:10; Buhat 10:43; 2 Corinto 1:20) Gikan sa unang tagna sa Eden, ang tanang balaang inspiradong mga tagna sa bug-os nalangkit kang Jesus ug sa iyang bahin sa pagpatuman sa mga katuyoan sa Diyos. Sa susama, si Pablo nagsulti sa mga Kristohanon sa Galacia nga ang pakigtugon sa Kasugoan mao ang “mag-aagak ngadto kang Kristo.” (Galacia 3:24) Kadtong karaang pakigtugon sa Kasugoan gidesinyo sa pag-andam ug nasod alang sa pag-abot ni Jesus ingon nga Mesiyas. Busa bisan una sa iyang pagkatawo, ang kahayag nga gikan kang Jehova natumong kang Jesus.

9. Unsa ang nalangkit sa paghigugma sa kahayag sukad sa 33 K.P.?

⁹ Sa 29 K.P., si Jesus mipresentar sa iyang kaugalingon alang sa bawtismo ug gidihogan sa balaang espiritu, busa nahimong ang sinaad nga Mesiyas. Sa 33 K.P. siya namatay nga hingpit nga tawo, gibanhaw, mikayab ngadto sa langit, ug didto mitanyag sa bili sa iyang kinabuhi alang sa atong mga sala. (Hebreohanon 9:11-14, 24) Kining serye sa mga hitabo nagtimaan sa lisoanang punto sa pakiglabot sa Diyos uban sa katawhan. Si Jesus karon mao “ang Pangulong Ahente sa kinabuhi,” ‘ang Pangulong Ahente sa kaluwasan,’ “ang Pangulong Ahente ug Maghihingpit sa atong pagtuo.” (Buhat 3:15; Hebreohanon 2:10; 12:2; Roma 3:23, 24) Gikan sa 33 K.P. paunahan, ang mga mahigugmaon sa kahayag nag-ila, ug nagdawat, nga gawas kang Jesus “walay kaluwasan kang bisan kinsa, tungod kay walay laing ngalan sa silong sa langit ang gihatag taliwala sa mga tawo nga pinaagi kaniya kita maluwas.”​—Buhat 4:12.

10. Nganong hinungdanon kaayo ang pagpamati sa mga pulong ni Jesus ug pagtuman kanila?

¹⁰ Ang pagbatog pagtuo kang Jesus nagkahulogan usab sa pagdawat kaniya ingon nga “ang Pulong” ug ang “Kahibulongang Magtatambag.” (Juan 1:1; Isaias 9:6) Ang gipamulong ni Jesus kanunay nga nagpasundayag sa balaang kamatuoran. (Juan 8:28; Pinadayag 1:1, 2) Ang pagpamati kaniya nagkahulogan sa kinabuhi ug kamatayon. Si Jesus nagsulti sa mga Hudiyo sa iyang adlaw: “Siya nga mamati sa akong pulong ug motuo kaniya nga nagpadala kanako adunay kinabuhing dayon, ug siya dili pagahukman apan siya ibalhin gikan sa kamatayon ngadto sa kinabuhi.” (Juan 5:24) Sa unang siglo K.P., kadtong milihok pinasukad sa mga pulong ni Jesus giluwas gikan sa kangitngit sa kalibotan ni Satanas ug gibuhi, ingnon ta. Sila gipahayag nga matarong uban ang panglantaw nga mahimong kaubang mga manununod uban kaniya sa iyang langitnong Gingharian. (Efeso 1:1; 2:1, 4-7) Karong adlawa, ang pagsunod sa mga pulong ni Jesus nagbukas sa dalan aron ang daghan igapahayag nga matarong uban ang panglantaw nga maluwas sa Armageddon ug magbatog hingpit tawhanong kinabuhi sa bag-ong kalibotan.​—Pinadayag 21:1-4; itandi ang Santiago 2:21, 25.

“Pangulo Ibabaw sa Tanang Butang”

11. Unsang hataas nga awtoridad ang gihatag kang Jesus sa 33 K.P.?

¹¹ Human sa iyang pagkabanhaw, si Jesus nagbutyag ngadto sa iyang mga sumusunod sa laing bahin sa kahayag. Siya miingon: “Ang tanang pagbulot-an gikahatag kanako sa langit ug sa yuta.” (Mateo 28:18) Busa si Jesus gibayaw ngadto sa labaw nga posisyon sa unibersohanon nga organisasyon ni Jehova. Si Pablo mihatag sa dugang mga detalye sa dihang siya miingon: “Ang [Diyos] nagbanhaw kang [Jesus] gikan sa mga patay ug nagpalingkod kaniya diha sa iyang tumong kamot diha sa langitnong mga dapit, nga hataas kay sa tanang pamunoan ug pagbulot-an ug kagahom ug kaginoohan ug sa matag ngalan nga gihingalan, dili lamang niining sistema sa mga butang, apan usab nianang moabot. Iya usab nga gipasakop ang tanang mga butang ilalom sa iyang mga tiil, ug gihimo siya nga labaw ibabaw sa tanang butang sa kongregasyon, nga mao ang iyang lawas.” (Efeso 1:20-23; Filipos 2:9-11) Sukad sa 33 K.P., ang paghigugma sa kahayag naglakip sa pag-ila niining mahimayaong posisyon ni Jesus.

12. Sukad sa sinugdan unsay masadyaong gidawat sa dinihogang mga Kristohanon, ug sa unsang paagi nga ilang gipakita kini sa praktikal nga paagi?

¹² Sa ulahi, ang tanang katawhan kinahanglang moila sa pagbulot-an ni Jesus. (Mateo 24:30; Pinadayag 1:7) Ang mga mahigugmaon sa kahayag, hinunoa, masadyaong nag-ila niana sukad sa sinugdan. Ang dinihogang mga membro sa Kristohanong kongregasyon nagdawat kang Kristo ingon nga “ang ulo sa lawas, ang kongregasyon.” (Colosas 1:18; Efeso 5:23) Sa dihang sila nahimong bahin sa lawas, sila ‘giluwas gikan sa pagbulot-an sa kangitngit ug gibalhin ngadto sa Gingharian sa gugma sa Anak sa Diyos.’ (Colosas 1:13) Sukad sa maong panahon, sila masingkamoton sa pagsunod sa pagpangulo ni Jesus diha sa matag bahin sa ilang mga kinabuhi, ug sa atong panahon sila nagtudlo sa “ubang mga karnero” sa pagbuhat sa susama. (Juan 10:16) Ang pasukaranang kinahanglanon alang sa pagdawat ug pa­bo­ra­bleng paghukom mao ang pag-ila sa pagpangulo ni Jesus.

13. Kanus-a sugdi ni Jesus ang paggamit sa pagbulot-an sa Gingharian, ug unsa ang misunod dinhi sa yuta?

¹³ Sa iyang pagkayab sa langit sa 33 K.P., si Jesus wala dayon mogamit sa iyang pagbulot-an sa bug-os nga sukod. Bisan pag Ulo sa Kristohanong kongregasyon siya naghulat sa hustong panahon aron gamiton ang bug-os nga awtoridad ibabaw sa katawhan sa katibuk-an. (Salmo 110:1; Buhat 2:33-35) Kanang panahona miabot sa 1914, sa dihang si Jesus naentrono ingon nga Hari sa Gingharian sa Diyos ug misugod “ang kataposang mga adlaw” niining kalibotana. (2 Timoteo 3:1) Sukad sa 1919, ang pagpanigom sa nanghibilin sa mga dinihogan nagpadayon ngadto sa pagkakompleto niini. Sukad ilabina sa 1935, si Jesus nagbahinbahin sa katawhan ngadto sa “mga karnero,” kinsa makapanunod “sa gingharian nga giandam alang [kanila],” ug “mga kanding,” kinsa “mamahawa ngadto sa walay kataposang kalaglagan.”​—Mateo 25:31-34, 41, 46.

14. Sa unsang paagi gipasundayag sa dakong panon ang gugma sa kahayag, ug unsa ang mosangpot alang kanila?

¹⁴ Makalilipay, napamatud-an nga daghan ang mga karnero niining kataposang mga adlaw. Ang dakong panon kanila nga mikabat ug minilyon mipatim-aw sa talan-awon sa kalibotan “gikan sa tanang nasod ug mga tribo ug mga katawhan ug mga pinulongan.” Sama sa ilang mga kaubanan, ang mga dinihogan, kining mga samag-karnero nahigugma sa kahayag. Ilang “gilabhan ang ilang tag-as nga biste ug gipaputi sa dugo sa Kordero,” ug sila nagasinggit sa makusog nga tingog: “Ang kaluwasan utang namo sa among Diyos, nga naglingkod sa trono, ug sa Kordero.” Tungod niini, ang dakong panon ingon nga usa ka grupo makadawat ug paborableng paghukom. Ang iyang mga membro “manggula gikan sa dakong kasakitan,” nga maluwas sa kalaglagan sa Armageddon niadtong nahigugma sa kangitngit.​—Pinadayag 7:9, 10, 14.

“Mga Anak sa Kahayag”

15. Sa unsang paagi ang atong mga linihokan nagpakita sa atong pagpasakop sa Hari, si Jesu-Kristo?

¹⁵ Apan, sa unsang praktikal nga paagi nga ang mga mahigugmaon sa kahayag, dinihogan man o ubang karnero, magpasakop kang Jesus ingon nga ang usa nga gientrono sa Diyos nga Hari ug nagsilbing Maghuhukom? Usa ka paagi mao ang pagpaningkamot nga mahimong mao ang matang sa mga tawo nga giuyonan ni Jesus. Sa dinhi sa yuta si Jesus nagpakita sa pagpabili sa mga hiyas sama sa pagkasinsero, pagkabug-os-kasingkasing, ug kadasig alang sa kamatuoran, ug iyang gipadayag kining mga hiyasa sa iyang kaugalingon. (Marcos 12:28-34, 41-44; Lucas 10:17, 21) Kon buot nato ang paborableng paghukom, kinahanglang ugmaron nato kanang mga hiyasa.

16. Nganong hinungdanon ang paghukas sa mga binuhatan nga nalangkit sa kangitngit?

¹⁶ Kini tinuod ilabina sanglit ang kangitngit sa kalibotan ni Satanas nagkabaga samtang nagkahiduol na ang kataposan. (Pinadayag 16:10) Busa ang mga pulong ni Pablo nga gisulat ngadto sa mga taga-Roma maoy tukma kaayo: “Ang kagabhion talitapos na; ang adlaw nagsingabot na. Busa hukason nato ang mga buhat sa kangitngit ug isul-ob ang mga hinagiban sa kahayag. Ingon sa maadlaw manlakaw kita nga maligdong, dili sa hudyaka-bahakhak ug sa mga bangga sa inom, dili sa pakighilawas ug luag nga panggawi, dili sa pakig-away ug pangabubho.” (Roma 13:12, 13) Samtang ang walay-kataposang kinabuhi maoy gasa gikan sa Diyos, ang pagkadalisay sa atong pagtuo ug atong gugma alang sa kahayag makita sa atong mga linihokan. (Santiago 2:26) Busa, ang paghukom nga atong madawat magdepende ug dako sa gilapdon sa atong pagbuhat sa maayong mga binuhatan ug pagsalikway sa daotang mga binuhatan.

17. Unsa ang kahulogan nga “isul-ob si Ginoong Jesu-Kristo”?

¹⁷ Human sa paghatag sa iyang tambag sa Roma 13:12, 13, si apostol Pablo mihinapos pinaagi sa pag-ingon: “Isul-ob ninyo si Ginoong Jesu-Kristo, ug ayaw ninyo paghunahunaa ang mga tinguha sa unod.” (Roma 13:14) Unsa ang ipasabot nga “isul-ob si Jesu-Kristo”? Kini nagkahulogan nga ang mga Kristohanon kinahanglan nga suod mosunod kang Jesus, nga isul-ob sa ilang kaugalingon, ingnon ta, ang iyang panig-ingnan ug kinaiya, nga manlimbasog nga mahimong samag-Kristo. “Niining panggawia gipanagtawag kamo,” miingon si Pedro, “tungod kay bisan si Kristo miantos alang kaninyo, nga nagbilin kaninyo ug panig-ingnan aron inyong suod nga pagasundon ang iyang mga lakang.”​—1 Pedro 2:21.

18. Unsang dagkong mga kausaban tingali ang gikinahanglan kon buot nato nga makadawat sa maayong paghukom?

¹⁸ Sagad naglangkit kini sa dagkong mga kausaban sa kinabuhi sa usa ka Kristohanon. “Kas-a kamo maoy kangitngit,” miingon si Pablo, “apan karon kamo maoy kahayag langkit sa Ginoo. Padayon sa paglakaw ingon nga mga anak sa kahayag, kay ang mga bunga sa kahayag naglangkob sa tanang matang sa pagkamaayo ug pagkamatarong ug kamatuoran.” (Efeso 5:8, 9) Si bisan kinsa nga nagabuhat sa mga binuhatan sa kangitngit dili mahigugmaon sa kahayag ug dili makadawat sa maayong paghukom gawas kon sila maghimog kausaban.

“Kamo ang Kahayag sa Kalibotan”

19. Sa unsang laing mga paagi nga ang usa ka Kristohanon makasumbalik-silaw sa kahayag?

¹⁹ Sa kataposan, ang paghigugma sa kahayag nagkahulogan sa pagpasumbalik-silaw sa kahayag aron ang uban makakita ug madani niana. “Kamo ang kahayag sa kalibotan,” si Jesus miingon. Ug siya midugang: “Ipasidlak ang inyong kahayag atubangan sa mga tawo, aron ilang makita ang inyong maayong mga binuhatan ug maghatag ug himaya sa inyong Amahan nga anaa sa mga langit.” (Mateo 5:14, 16) Ang maayong mga binuhatan sa usa ka Kristohanon naglakip sa pagpasundayag sa tanang matang sa pagkamaayo ug pagkamatarong ug kamatuoran, sanglit kanang maayo nga panggawi nagtagana ug gamhanang pamatuod alang sa kamatuoran. (Galacia 6:10; 1 Pedro 3:1) Kini ilabina naglakip sa pagpakigsulti sa uban mahitungod sa kamatuoran. Karong adlawa, kini nagkahulogan sa pagpakig-ambit sa tibuok-kalibotang kampanya sa pagsangyaw “niining maayong balita sa gingharian . . . sa tibuok pinuy-anang yuta alang sa pagpamatuod sa tanang nasod.” Nagkahulogan usab kini, sa mapailobong pagbalik-duaw sa mga interesado, sa pagtuon sa Bibliya uban kanila, ug sa baylo, pagtabang kanila sa pagpatungha ug mga binuhatan nga iya sa kahayag.​—Mateo 24:14; 28:19, 20.

20. (a) Unsa ka hayag ang kahayag nagasidlak karong adlawa? (b) Unsang mga datong panalangin ang gipahimuslan niadtong misanong sa kahayag?

²⁰ Sa atong adlaw, salamat sa madasigong pagsangyaw nga kalihokan sa mga matinumanong Kristohanon, ang maayong balita nadungog na sa kapin sa 200 ka kayutaan, ug ang kahayag nagasidlak sukad masukad. Si Jesus miingon: “Ako ang kahayag sa kalibotan. Siya nga nagasunod kanako dili magalakaw sa kangitngit, apan makabaton sa kahayag sa kinabuhi.” (Juan 8:12) Pagkamakalipay ang pagpakig-ambit sa katumanan niini nga saad! Ang atong mga kinabuhi labi pang tugob karon kay kita wala na mag-antos sa kangitngit sa kalibotan ni Satanas. Ug ang atong palaaboton maoy tinuod nga katingalahan samtang kita nagapanglantaw sa unahan sa maayong paghukom sa tinudlong Maghuhukom ni Jehova. (2 Timoteo 4:8) Pagkamakapasubo unya niana kon, kay nahidangat na sa kahayag, kita mahiganoy balik sa kangitngitan ug makadawat sa dili maayong paghukom! Sa sunod nga artikulo, atong hisgotan kon sa unsang paagi kita makapabiling lig-on sa pagtuo.

Makasaysay Ka Ba?

◻ Unsa ang pasikaranan sa paghukom sa Diyos?

◻ Unsang pangunang katungdanan ang nabatonan ni Jesus maylabot sa mga katuyoan sa Diyos?

◻ Sa unsang paagi atong ipasundayag nga kita nagpasakop kang Jesus ingon nga ang usang gientrono ni Jehova ingon nga Hari?

◻ Sa unsang paagi atong pamatud-an ang atong kaugalingon nga “mga anak sa kahayag”?

◻ Sa kangitngit niining kalibotana, sa unsang paagi nga nagasidlak nga labaw pa sukad masukad ang kahayag?

[Hulagway sa panid 10]

Sa dili madugay, ang tanang katawhan kinahanglang moila sa pagbulot-an ni Jesus

[Hulagway sa panid 12]

Kita nagpakita ug gugma sa kahayag sa dihang atong ipasumbalik-silaw kini sa uban