Mga Magmamantala sa Gingharian Nagtaho

Sila Nakombinsir sa Kathmandu

USA ka pintor nga babaye nagsugod sa iyang pagpangita sa kamatuoran sa Brittany, Pransiya, niadtong 1980. Siya may mga panaghisgot kauban sa mga Pentekostal ug mituon sa Silanganhong mga relihiyon​—nga wala matagbaw. Dayon siya may mga panaghisgot uban sa usa sa mga Saksi ni Jehova apan sa wala madugay mihunong. Nahibalag niya ang laing pintor nga lalaki ug dayon misugod sa pagtrabaho ug pag-ipon uban niya.

Sa wala madugay niadto ang dili-kasadong parisan mihukom sa pagduaw sa Nepal. Sila nahingangha pag-ayo sa katahom ug kalinaw sa maong yuta apan nahigawad sa sistema sa kasta, nga daw dili makataronganon alang sa ilang Kasadpanhong panan-aw.

Sa paghibalik sa Pransiya, ang babaye misugyot ngadto sa iyang puyopuyo nga magtuon silang duha sa Bibliya, ug sa iyang katingala siya misugot. Ilang gipakigkitaan ang Saksi nga uban kaniya siya may mga panaghisgot duha ka tuig nga miagi. Sa sinugdanan gigamit lamang nila ang Bibliya, apan sa kadugayan misugot sila nga gamiton ang librong Ang Kamatuoran nga Motultol sa Kinabuhing Dayon ug sa ulahi ang librong Ikaw Mabuhing Walay Kataposan sa Paraiso sa Yuta. Sa usa ka tuig mihunong sila sa paggamit ug mga droga.

Tapos sa pagduaw pag-usab sa Nepal sa duha ka bulan, ang parisan mibalik sa Pransiya diin sila mipadayon sa pagtuon. Mihunong sila sa pagtabako ug pag-adto sa mga bar ug mga naytklab ug misugod sa pagtambong sa mga tigom sa mga Saksi ni Jehova. Ugaling, sa natapos nila ang librong Mabuhing Walay Kataposan, mihukom sila nga mohunong sa pagtuon.

Unya sila nangadto na usab sa Nepal, diin sila mipuyo sa usa ka gamayng balay sa tiilan sa Kabukiran sa Himalaya. Usa ka adlaw ang usa ka lalaking tigulang, nga nagsul-ob ug amerkana ug korbata, nanuktok sa ilang pultahan. Ang babaye nag-inusara sa balay, ug naghunahuna siya nga siya usa ka negosyante sa mga dibuho aron motan-aw sa ilang mga dibuho. Sa iyang katingala siya usa ka Saksi nga miduaw alang sa tawo nga nagtuon uban kanila sa Pransiya. Sa wala madugay nahibalik ang iyang kaipon, ug misunod ang duha ka oras nga panaghisgot.

Pila ka adlaw sa ulahi, ang parisan mitambong sa usa ka tigom sa mga Saksi ni Jehova sa Kathmandu ug nakadayeg kaayo sa hinlong panagway niadtong nanambong. Ilang napanid-an ang samang inigsoong gugma ug kalipay nga ilang nakita sa mga tigom sa Pransiya. Namatikdan usab nila ang panaghiusa sa katawhang Nepalese nga presente, bisan pag sila naggikan sa lainlaing mga kasta. Karon sila nakombinsir nga kini mao gayod ang organisasyon ni Jehova.

Usa ka bulan sa ulahi sila namalik sa Pransiya ug gipadayon dihadiha ang ilang pagtuon sa Bibliya ug pagtambong sa mga tigom. Sila nagpakasal, misugod sa pag-apil sa buluhatong pagsangyaw, ug sa kataposan nabawtismohan. Ang bana karon usa ka ministeryal nga alagad, ug ang iyang asawa regular nga nagapakig-ambit sa auxiliary payunir nga pag-alagad. Sa pagkamatuod, kadtong may matarong nga kahimtang sa kasingkasing tabangan sa espiritu ni Jehova nga mouswag ug mahimong iyang mga magsisimba.—Pinadayag 7:15-17.

[Kahon/Mapa sa panid 9]

NEPAL

Populasyon - 17,712,221

1990 Kinatas-ang Ihap sa Magmamantala - 63

Ratio, 1 Magmamantala sa - 281,146

Aberids Payunir Magmamantala - 10

Gidaghanon sa mga Kongregasyon - 1

Aberids Pagtuon sa Bibliya - 107

Tumatambong sa Memorial - 220

[Mapa]

(Alang sa aktuwal nga pagkahan-ay, tan-awa ang publikasyon)

NEPAL

INDIA

[Hulagway sa panid 9]

Esena sa Merkado sa Kathmandu, Nepal