Trabaho sa Usa ka Lalaki
“¡Ropa, zapato, casa, y comida!” Kining mga pulonga naggikan sa karaang kantang Kinatsila nga nagatala sa upat ka pangunang butang nga ipatagana sa usa ka lalaki sa iyang pamilya: biste, sapatos, balay, ug pagkaon. Ug ang labing kasaligang mga lalaki magarbohong maningkamot sa pagpas-an sa maong palas-anon.
Ugaling, kon ikaw usa ka lalaking depamilya, nagaatiman ka ba sa labi pang hinungdanong espirituwal nga mga panginahanglan sa inyong pamilya? O ikaw ba, sama sa daghang lalaki, naghunahuna nga ang pag-atiman sa relihiyosong mga butang sa balay dili gayod trabaho sa usa ka lalaki? Sa pila ka kultura wala gani dahoma nga ang mga lalaki mogahin ug panahon sa pagtudlo sa ilang mga anak mahitungod sa Diyos ug sa Bibliya.
Ang Pulong sa Diyos nagpahamtang ilabina sa lalaki sa panimalay sa responsabilidad sa pagsilsil diha sa iyang pamilya sa gugma sa Diyos ug lalom nga pagpabili sa balaang mga sukdanan. Pananglitan, sa Efeso 6:4, ang Kasulatan nagatambag sa Kristohanong mga lalaki sumala sa mosunod: “Kamo, mga amahan, ayaw ninyo pagpasuk-a ang inyong mga anak, apan ipadayon ninyo ang pagmatuto kanila sa disiplina ug pagdumala sa kaisipan nga iya ni Jehova.”
Ang pipila, bisan pag nasinati niining mga pulonga, tingali dili bug-os makapabili nga ang kasulatan tinong gitumong sa amahan, ang lalaki sa panimalay. Pananglitan, ang Kinatsila- ug Portuges-ug-sinultihang mga tawo tingali magsabot sa mga pulong sa Efeso nga nagatumong sa amahan ug sa inahan. Sa maong mga pinulongan ang pulong alang sa “mga amahan” ug alang sa “mga ginikanan” pareho. Ugaling, sa bersikulo 1 sa Efeso kapitulo 6, si apostol Pablo nagtumong sa amahan ug sa inahan pinaagi sa paggamit sa Gregong pulong go·neuʹsin, gikan sa go·neusʹ, nga nagkahulogang “ginikanan.” Apan sa bersikulo 4, ang Gregong pulong gigamit maoy pa·teʹres, nga nagkahulogang “mga amahan.” Oo, sa Efeso 6:4, gitumong ni Pablo ang iyang mga pulong nga laktud sa lalaki sa balay.
Hinuon, kon walay lalaki diha sa pamilya nga manguna, nan ang babaye ang magpas-an sa maong responsabilidad. Uban sa tabang ni Jehova, daghang inahan ang nagmalamposon sa pagmatuto sa ilang mga anak diha sa disiplina ug pagdumala-sa-kaisipan nga iya ni Jehova. Ugaling, sa dihang anaa ang Kristohanong lalaki, siya ang angay manguna. Kon pasagdan niya ang maong responsabilidad, labi pang lisod sa uban pa sa pamilya sa paghupot ug maayong programa sa espirituwal nga pagpakaon. Ug ang maong lalaki manubag kang Jehova tungod sa iyang pagpasagad.
Ang mga pagbati sa Diyos niining butanga dayag diha sa Kasulatanhong mga kuwalipikasyon nga gipahayag alang sa mga magtatan-aw ug ministeryal nga mga alagad diha sa Kristohanong kongregasyon. Ang Bibliya nagtino nga ang usang pilion alang sa maong katungdanan angay nga “usa ka lalaki nga nagadumala sa iyang panimalay sa maayong paagi, nga may mga anak nga nagpasakop uban sa bug-os nga kaugdang; (kon sa pagkatinuod may lalaki nga dili mahibalo kon unsaon pagdumala sa iyang kaugalingong panimalay, unsaon man niya sa pag-atiman sa kongregasyon sa Diyos?).”—1 Timoteo 3:4, 5, 12; Tito 1:6.
Ang lalaking depamilya kinahanglan andam mosakripisyo sa mga kalingawan ug personal nga kaharuhay tungod sa espirituwal nga kaayohan sa iyang mga anak. Usahay tingali kinahanglang kunhoran niya ang panahong igahin ngadto sa ubang mga kalihokan aron siya may igoigong panahon nga magugol uban sa iyang mga anak sa regular nga paagi. (Deuteronomio 6:6, 7) Bisan pa niana, dili niya itugyan sa uban ang maong hinatag-sa-Diyos nga asaynment. Ang iyang gugma ug interes sa iyang mga anak molapaw pa kay sa pagtaganag biste, sapatos, balay, ug pagkaon.
Usa ka dakong hagit ang pagmatuto sa mga anak “diha sa disiplina ug pagdumala-sa-kaisipan nga iya ni Jehova.” Kana ang hinungdan ang pangunang responsabilidad maoy iya sa lalaki. Sa dihang maayo ang paghimo sa Kristohanong amahan sa iyang katungdanan, nan siya makaisip sa iyang mahadlokon-sa-Diyos nga mga anak ingong panalangin gikan kang Jehova. Siya makaingon duyog sa salmista: “Sama sa mga udyong diha sa kamot sa usa ka tawong gamhanan, mao man usab ang mga anak sa pagkabatan-on. Malipayon ang tawong kusgan nga ang iyang baslayan napuno niana kanila.”—Salmo 127:4,5.