Pagpadayag ug Pagtuo Pinasukad sa Kamatuoran

“Kon walay pagtuo dili gayod mahimo ang pagpahimuot kaniya, kay bisan kinsa nga magaduol sa Diyos kinahanglang magatuo sa iyang pagkaanaa ug nga siya magabalos ra sa mga magapangita kaniya.”—HEBREOHANON 11:6.

1, 2. Sa unsang paagi nasulayan ang pagtuo ni Adan, ug uban sa unsang resulta?

ANG pagtuo nagkinahanglan ug labaw pa sa pagtuo nga ang Diyos nagalungtad. Ang unang tawo, si Adan, wala magduhaduha bahin sa paglungtad ni Jehova nga Diyos. Ang Diyos nakigkomunikar kang Adan, lagmit gayod pinaagi sa Iyang Anak, ang Pulong. (Juan 1:1-3; Colosas 1:15-17) Apan, nawala ni Adan ang palaaboton sa kinabuhing walay kataposan tungod kay siya napakyas sa pagsugot kang Jehova ug sa pagpadayag ug pagtuo kaniya.

² Ang umaabot nga kalipay ni Adan mipatim-aw nga nadaot sa dihang ang iyang asawa, si Eva, misupak kang Jehova. Aw, bisan ang paghunahuna nga siya mawala gikan kaniya naghatag pagsulay sa pagtuo sa unang tawo! Masulbad ba sa Diyos kini nga suliran sa usa ka paagi nga mapaneguro ang padayong kalipay ug kaayohan ni Adan? Pinaagi sa pagduyog kang Eva sa pagpakasala, gipakita ni Adan nga siya sa dayag wala maghunahuna sa ingon. Siya misulay sa pagsulbad sa suliran sa iyang paagi, inay kay tinguhaon ang pagpangita sa balaang paggiya. Napakyas sa pagpadayag ug pagtuo kang Jehova, si Adan nakahatag kamatayon kaniya mismo ug sa tanan niyang kaliwat.​—Roma 5:12.

Unsa ang Pagtuo?

3. Sa unsang paagi ang kahubitan sa pagtuo sa Bibliya lahi gikan nianang gihatag sa usa ka diksiyonaryo?

³ Usa ka diksiyonaryo naghubit sa pagtuo ingong “hugot nga pagtuo sa usa ka butang nga walay pamatuod.” Halayo sa pagsuportar niana nga ideya, hinunoa, lahi ang gipasiugda sa Bibliya. Ang pagtuo gipasukad sa mga pamatuod, sa katinuoran, sa kamatuoran. Ang Kasulatan nag-ingon: “Ang pagtuo mao ang masaligon nga pagpaabot sa mga butang gilaoman, ug tataw nga pagpanghimatuod sa pagkaanaa sa mga butang nga dili makita.” (Hebreohanon 11:1) Ang tawo nga may pagtuo adunay garantiya nga ang tanang gisaad sa Diyos sama ra nga natuman na. Malig-on kaayo ang makapakombinsir nga pamatuod sa pagkaanaa sa mga butang nga dili makita nga ang pagtuo ginaingong katumbas sa maong ebidensiya.

4. Sa unsang paagi ang usa ka reperensiyang basahon mipaluyo sa kahubitan sa Bibliya sa pagtuo?

⁴ Diha sa New World Translation, ang causative nga porma sa Hebreohanong berbo ’a·manʹ usahay gihubad nga “pagpadayag ug pagtuo.” Sumala sa Theological Wordbook of the Old Testament, “ang kahulogan sa gamot mao ang ideya sa pagkatino . . . nga lahi sa modernong mga ideya sa pagtuo ingong usa ka butang posible, malaomon nga tinuod, apan dili tino.” Ang samang basahon nag-ingon: “Ang linanggikit nga pulong ’āmēn ‘sa pagkatinuod’ nadala ngadto sa Bag-ong Testamento diha sa pulong amēn nga mao [ang] Ingles nga pulong ‘amen.’ Si Jesus migamit kanunay sa pulong (Mat 5:18, 26, ubp.) sa pagpasiugda sa pagkatino sa butang.” Ang pulong nga gihubad “pagtuo” sa Kristohanon Gregong Kasulatan nagkahulogan usab ug pagtuo sa butang nga malig-ong gipasukad diha sa kamatuoran.

5. Sa unsang paagi ang Gregong pulong gihubad “masaligon nga pagpaabot” sa Hebreohanon 11:1 gigamit sa karaang mga dokumento sa negosyo, ug unsay kahulogan niini alang sa mga Kristohanon?

⁵ Ang Gregong pulong (hy·poʹsta·sis) nga gihubad nga “masaligon nga pagpaabot” diha sa Hebreohanon 11:1 maoy kasagarang gigamit sa karaang papiro nga mga dokumento sa negosyo sa pagpasa sa ideya sa butang nga nagagarantiya sa umaabot nga pagpanag-iya sa butang. Ang mga eskolar nga si Moulton ug Milligan misugyot sa hubad: “Ang pagtuo maoy dokumento sa titulo sa mga butang gilaoman.” (Vocabulary of the Greek Testament) Dayag, kon ang tawo nakapanag-iyag dokumento sa titulo sa propidad, siya may “masaligon nga pagpaabot” nga may adlaw ra nga ang iyang paglaom sa pagpanag-iya niini matuman.

6. Unsay kahulogan sa Gregong pulong nga gihubad “tin-aw nga pagpanghimatuod” diha sa Hebreohanon 11:1?

⁶ Sa Hebreohanon 11:1, ang Gregong pulong nga gihubad “tin-aw nga pagpanghimatuod” (eʹleg·khos) nagapasag ideya sa pagpresentar sa ebidensiya sa pagpanghimatuod sa usa ka butang, labina sa usa ka butang nga lahi sa kon unsay mipatim-aw nga daw maong butang. Ang positibo o lig-ong ebidensiya nagatin-aw sa butang nga sa miagi wala kaayo masabti, mao nga nagpanghimakak sa kon unsay mipatim-aw nga daw maong butang. Busa sa Hebreohanon ug sa Gregong Kasulatan, ang pagtuo dili maoy “hugot nga pagtuo sa usa ka butang nga walay pamatuod.” Sa kasukwahi, ang pagtuo gipasukad gayod sa kamatuoran.

Gipasukad sa Paninugdang nga mga Kamatuoran

7. Giunsa paghubit ni Pablo ug David ang mga tawong wala modawat sa paglungtad sa Diyos?

⁷ Gipahayag ni apostol Pablo ang usa ka hinungdanong kamatuoran dihang siya misulat nga ang sa Maglalalang nga “dili-makitang mga kinaiya tin-aw nga makita sukad pa sa pagkatukod sa kalibotan, sanglit sila naila pinaagi sa mga butang nga iyang nabuhat, bisan ang iyang walay kataposang gahom ug pagka-Diyos, mao nga ang [mga magsusupak sa kamatuoran] walay ikapangulipas.” (Roma 1:20) Oo, “ang kalangitan nagapahayag sa himaya sa Diyos,” ug “ang yuta napuno sa [iyang] mga bahandi.” (Salmo 19:1; 104:24) Apan kumosta kon ang tawo dili andam sa pagpalandong sa ebidensiya? Ang salmistang David miingon: “Ang daotan tungod sa iyang garbo [“sa iyang pagkahambogiro,” The New English Bible] dili mangusisa; ang tanan niyang hunahuna mao: ‘Walay Diyos.’” (Salmo 10:4; 14:1) Sa bahin, ang pagtuo gipasukad sa sukaranang kamatuoran nga ang Diyos naglungtad.

8. Kadtong nagapadayag ug pagtuo nakabaton ug unsang pasalig ug pagsabot?

⁸ Si Jehova dili lamang basta naglungtad; siya usab kasaligan, ug kita makasalig sa iyang mga saad. Siya miingon: “Sa pagkamatuod ingon sa akong nahunahuna, ingon niana ang mahitabo; ug ingon sa akong gitinguha, mao man ang mamatuman.” (Isaias 14:24; 46:9, 10) Kini dili kay way-kahulogang mga pulong. Dunay tin-aw nga pamatuod nga natuman ang gatosang mga tagna nga nasulat diha sa Pulong sa Diyos. Uban niini nga kahayag, kadtong nagapadayag ug pagtuo makasabot usab sa daghan padayong nagakatuman nga mga tagna sa Bibliya. (Efeso 1:18) Pananglitan, sila nakakita sa katumanan “sa ilhanan” sa presensiya ni Jesus, lakip ang gipakusgan nga pagsangyaw sa natukod nga Gingharian, ingon man sa gitagnang pagpadako sa matuod nga pagsimba. (Mateo 24:3-14; Isaias 2:2-4; 60:8, 22) Sila nahibalo nga sa dili madugay ang kanasoran mosinggit “Kalinaw ug Kasegurohan!” ug nga human gayod niana ang Diyos “molaglag niadtong nagalaglag sa yuta.” (1 Tesalonica 5:3; Pinadayag 11:18) Pagkadako sa panalangin nga makabatog pagtuo pinasukad sa matagnaong mga kamatuoran!

Usa ka Bunga sa Balaang Espiritu

9. Unsa ang kalangkitan sa pagtuo ug sa balaang espiritu?

⁹ Ang kamatuoran diin ang pagtuo gipasukad makaplagan diha sa Bibliya, ang bunga sa balaang espiritu sa Diyos. (2 Samuel 23:2; Zacarias 7:12; Marcos 12:36) Nan, makataronganon nga ang pagtuo dili maglungtad nga bulag gikan sa paglihok sa balaang espiritu. Mao nga si Pablo misulat: “Ang bunga sa balaang espiritu [naglakip] sa . . . pagtuo.” (Galacia 5:22) Apan daghan ang nagasalikway sa balaang kamatuoran, naghugaw sa ilang mga kinabuhi uban sa unodnong mga tinguha ug mga punto de vista nga nagpasubo sa espiritu sa Diyos. Busa, ang “pagtuo wala mabatoni sa tanang mga tawo,” kay sila walay pasikaranan sa pagpalambo niini.​—2 Tesalonica 3:2; Galacia 5:16-21; Efeso 4:30.

10. Sa unsang paagi ang unang mga alagad sa Diyos nagpakita nga sila may pagtuo?

¹⁰ Apan, taliwala sa mga kaliwat ni Adan, ang pipila ka mga indibiduwal nagpadayag ug pagtuo. Ang Hebreohanon kapitulo 11 naghisgot kang Abel, Enoc, Noe, Abraham, Sara, Isaac, Jacob, Jose, Moises, Rahab, Gideon, Barak, Samson, Jepte, David, ug Samuel, apil sa daghang wala hinganli nga mga alagad ni Jehova, kinsa “gipanghimatud-an pinaagi sa ilang pagtuo.” Matikdi ang nahimo “tungod sa pagtuo.” Tungod sa pagtuo si Abel “mitanyag sa Diyos ug usa ka halad” ug si Noe “mitukod ug arka.” Tungod sa pagtuo si Abraham “misugot sa pag-adto sa usa ka dapit nga gitagana kaniya ingong usa ka panulondon.” Ug tungod sa pagtuo, si Moises “mibiya sa Ehipto.”​—Hebreohanon 11:4, 7, 8, 27, 29, 39.

11. Unsay gipadayag sa Buhat 5:32 labot sa mga tawong nagasugot sa Diyos?

¹¹ Sa dayag, kadtong tanang mga alagad ni Jehova mibuhat ug labaw pa kay sa pagtuo lamang nga naglungtad ang Diyos. Nagpadayag ug pagtuo, sila misalig kaniya ingong Usa kinsa mao ang “magbabalos sa tanang magapangita kaniya.” (Hebreohanon 11:6) Sila mibuhat sa gisugo sa espiritu sa Diyos nga ilang buhaton, milihok subay sa tukmang kahibalo sa kamatuoran nga mabatonan sa maong panahon, bisag kini limitado. Pagkalahi gikan kang Adan! Siya wala molihok sa pagtuo nga gipasukad sa kamatuoran o nahiuyon uban sa pagtultol sa balaang espiritu. Ang Diyos mohatag sa iyang espiritu ngadto lamang sa nagasugot kaniya.​—Buhat 5:32.

12. (a) Diha sa unsa si Abel may pagtuo, ug giunsa niya pagpakita kini? (b) Bisan pa sa ilang pagtuo, unsay wala madawat sa una-Kristohanong mga saksi?

¹² Dili sama sa iyang amahan, si Adan, ang diyosnong si Abel may pagtuo. Dayag gikan sa iyang mga ginikanan, iyang nakat-onan ang unang tagna nga gibungat: “Ibutang ko [Jehova nga Diyos] ang panagkaaway sa taliwala mo ug sa babaye, ug sa taliwala sa imong kaliwat ug sa iyang kaliwat. Siya magasamad sa imong ulo ug ikaw magasamad kaniya sa iyang tikod.” (Genesis 3:15) Ang Diyos sa ingon nagsaad nga iyang laglagon ang pagkadaotan ug ipasig-uli ang pagkamatarong. Kon sa unsang paagi kining tagnaa matuman, si Abel wala mahibalo. Apan ang iyang pagtuo nga ang Diyos mao ang Magbabalos niadtong magapangita Kaniya may igong kalig-on nga maoy mipalihok kaniya sa pagtanyag ug usa ka halad. Siya lagmit namalandong pag-ayo sa tagna ug nagtuo nga ang pag-ula sa dugo kinahanglan aron matuman ang gisaad ug sa pagtuboy sa katawhan ngadto sa kahingpitan. Busa, tukma ang halad nga hayop ni Abel. Hinunoa, bisan pa sa ilang pagtuo, si Abel ug ang ubang una-Kristohanong mga saksi ni Jehova “wala managpakadawat sa katumanan sa gisaad.”​—Hebreohanon 11:39.

Paghingpit sa Pagtuo

13. (a) Unsay nakat-onan ni Abraham ug David bahin sa katumanan sa saad? (b) Nganong ikaingon nga “ang kamatuoran miabot pinaagi ni Jesu-Kristo”?

¹³ Sa matag karon ug unya sa kasiglohang nanglabay, gipadayag sa Diyos ang dugang kamatuoran bahin sa kon sa unsang paagi ang saad mahitungod sa ‘binhi sa babaye’ matuman. Si Abraham giingnan: “Pinaagi sa imong binhi ang tanang kanasoran pagapanalanginan sa ilang kaugalingon.” (Genesis 22:18) Sa ulahi, giingnan si Haring David nga ang gisaad nga Binhi motungha diha sa iyang harianong kaliwat. Sa 29 K.P., ang maong Binhi mitungha sa persona ni Jesu-Kristo. (Salmo 89:3, 4; Mateo 1:1; 3:16, 17) Sa pagtandi sa walay pagtuo nga si Adan, “ang kataposang Adan,” si Jesu-Kristo, panig-ingnan sa pagpakitag pagtuo. (1 Corinto 15:45) Siya nagkinabuhi sa debotadong kinabuhi sa pag-alagad kang Jehova ug gituman ang daghang mga tagna bahin sa Mesiyas. Sa ingon gihimo ni Jesus nga mas tin-aw ang kamatuoran mahitungod sa gisaad nga Binhi ug gituman ang mga butang nga gilandongan sa Kasugoan ni Moises. (Colosas 2:16, 17) Busa ikaingon nga “ang kamatuoran miabot pinaagi ni Jesu-Kristo.”​—Juan 1:17.

14. Giunsa pagpakita ni Pablo sa mga taga Galacia nga ang pagtuo dunay bag-ong mga bahin?

¹⁴ Karon nga ang kamatuoran miabot pinaagi ni Jesu-Kristo, may napadakong pundasyon nga maoy gipasikaran sa pagtuo “sa saad.” Ang pagtuo labi pang nalig-on, duna nay bag-ong mga bahin, pagaingnon pa. Labot niini giingnan ni Pablo ang isigka-dinihogang mga Kristohanon: “Apan sa ilalom sa sala gipabilanggo sa Kasulatan ang tanang butang, aron ang gisaad nga pinasukad sa pagtuo kang Jesu-Kristo ikahatag ngadto kanila nga nanagpanuo. Hinunoa, sa wala pa moabot ang pagtuo, kita gibilanggo ilalom sa kasugoan, pinugngan hangtod nga ang pagtuo igapadayag. Busa ang Kasugoan nahimong atong mag-aagak ngadto kang Kristo, aron kita ipahayag nga matarong pinasukad sa pagtuo. Apan karon nga ang pagtuo miabot na, wala na kita mailalom sa mag-aagak. Kay kamong tanan, sa pagkamatuod, mga anak na sa Diyos pinaagi sa inyong pagtuo diha kang Kristo Jesus.”​—Galacia 3:22-26.

15. Sa unsang paagi lamang mamahingpit ang pagtuo?

¹⁵ Ang mga Israelinhon may pagtuo sa mga pakiglabot sa Diyos kanila pinaagi sa pakigtugon sa Kasugoan. Apan karon kini nga pagtuo kinahanglang dugangan. Sa unsang paagi? Pinaagi sa pagtuo diha sa dinihogan sa espiritu nga si Jesus nga kaniya ang Kasugoan gilaraw sa pagtultol kanila. Niana lamang nga paagi nga ang una-Kristohanong pagtuo mamahingpit. Pagkahinungdanon alang niadtong unang mga Kristohanon nga ‘motutok pag-ayo kang Jesus, ang Pangulong Ahente ug Maghihingpit sa ilang pagtuo’! (Hebreohanon 12:2) Sa pagkamatuod, ang tanang mga Kristohanon kinahanglang mobuhat sa ingon.

16. Sa unsang paagi ang balaang espiritu miabot sa mauswagong paagi, ug ngano?

¹⁶ Tungod sa nagauswag nga kahibalo sa balaang kamatuoran ug sa gisangpotan sa nahingpit nga pagtuo, ang balaang espiritu ba usab moabot sa mauswagong paagi? Oo. Sa Pentekostes 33 K.P., ang espiritu sa Diyos, ang gisaad nga magtatabang nga gihisgotan ni Jesus, gibubo diha sa iyang mga tinun-an. (Juan 14:26; Buhat 2:1-4) Ang balaang espiritu niadto milihok diha kanila sa bug-os bag-ong paagi ingong dinihogang mga igsoon ni Kristo. Ang ilang pagtuo, usa ka bunga sa balaang espiritu, napalig-on. Kini nagsangkap kanila alang sa dakong paghimog tinun-an nga buluhaton nga anaa sa unahan.​—Mateo 28:19, 20.

17. (a) Sa unsang paagi miabot ang kamatuoran ug sa unsang paagi ang pagtuo nahingpit sukad sa 1914? (b) Unsang ebidensiya ang atong nabatonan nga nagalihok ang balaang espiritu sukad sa 1919?

¹⁷ Ang pagtuo miabot sa dihang si Jesus mipadayag sa iyang kaugalingon ingong Tinudlong-Hari kapin sa 1,900 ka tuig sa miagi. Apan karon nga siya mao na ang nagamandong langitnong Hari, ang atong pasukaranan sa pagtuo​—gibutyag nga kamatuoran—​miuswag sa hilabihan, sa ingon naghingpit sa atong pagtuo. Sa susama, ang paglihok sa balaang espiritu gipauswag. Dihay tin-aw nga ebidensiya niini niadtong 1919, sa dihang ang balaang espiritu nagbuhi pag-usab sa dedikadong mga alagad sa Diyos gikan sa usa ka kahimtang nga halos way-kalihokan. (Ezekiel 37:1-14; Pinadayag 11:7-12) Ang patukoranan niadto napahimutang alang sa usa ka espirituwal nga paraiso, diin diha sa misunod nga mga dekada nahimong mas dayag ug mas mahimayaon matag paglabay sa tuig. Aduna pa bay laing mas dakong pamatuod nga nagalihok ang balaang espiritu sa Diyos?

Nganong Susihon ang Atong Pagtuo?

18. Sa unsang paagi ang Israelinhong mga espiya lahi gikan sa usa ug usa bahin sa pagtuo?

¹⁸ Wala magdugay human giluwas ang mga Israelinhon gikan sa pagkaulipon sa Ehipto, 12 ka lalaki ang gisugo sa pagtiktik sa yuta sa Canaan. Bisan pa, napulo kanila kulang sa pagtuo, nagduhaduha sa katakos ni Jehova sa pagtuman sa iyang saad sa paghatag sa yuta sa Israel. Sila gipalihok pinaagi sa makita, pinaagi sa pisikal nga mga butang. Sa 12, si Josue ug Caleb lamang ang mipakita nga sila milakaw pinaagi sa pagtuo, dili sa makita. (Itandi ang 2 Corinto 5:7.) Tungod sa pagpadayag ug pagtuo, sila lamang taliwala niadtong mga tawhana ang nakalahutay sa pagsulod sa Yutang Saad.​—Numeros 13:1-33; 14:35-38.

19. Sa unsang paagi ang pundasyon nga pagatukoran sa pagtuo labi pang lalom karon kay sa niadto, ug busa unsa ang angay natong buhaton?

¹⁹ Karong adlawa, kita nagbarog na sa mga utlanan sa bag-ong kalibotan sa Diyos sa pagkamatarong. Kon kita buot nga mosulod niana, ang pagtuo kinahanglan. Makalilipay, ang pundasyon sa kamatuoran nga diha niana gipasukad ang pagtuo labi pang milalom. Ania kanato ang bug-os nga Pulong sa Diyos, ang panig-ingnan ni Jesu-Kristo ug ang iyang dinihogang mga sumusunod, ang pagpaluyo sa minilyong espirituwal nga mga igsoong lalaki ug babaye, ug ang pagpaluyo sa balaang espiritu sa Diyos diha sa wala pa sukad hitumbasi nga sukod. Bisan pa, maayo nga atong susihon ang atong pagtuo ug mohimog mga lakang sa pagpalig-on niini samtang makaarang pa kita.

20. Unsang mga pangutana ang tukmang ibangon sa atong kaugalingon?

²⁰ ‘O, ako nagtuo nga kini mao ang kamatuoran,’ basin ikaw miingon. Apan unsa kalig-on ang imong pagtuo? Suknaa ang imong kaugalingon: ‘Ang langitnong Gingharian ba ni Jehova ingon ka tinuod sa tawhanong kagamhanan alang kanako? Giila ko ba ug bug-os nagapaluyo sa makitang organisasyon ni Jehova ug sa Nagamandong Lawas niini? Uban ang mga mata sa pagtuo, nakita ko ba ang kanasoran nga karon gimaniobra na ngadto sa kataposang posisyon alang sa Armageddon? Ang akong pagtuo ba ikatandi uban nianang “panganod sa mga saksi” nga gihisgotan sa Hebreohanon kapitulo 11?’​—Hebreohanon 12:1; Pinadayag 16:14-16.

21. Sa unsang paagi ang pagtuo nakapalihok niadtong nakabaton niini, ug sa unsang paagi sila gipanalanginan? (Ilakip ang mga komento sa kahon sa panid 13.)

²¹ Kadtong may pagtuo nga gipasukad sa kamatuoran natukmod sa paglihok. Sama sa dalawatong halad nga gitanyag ni Abel, ang ilang mga halad sa pagdayeg makapahimuot sa Diyos. (Hebreohanon 13:15, 16) Sama kang Noe, nga usa ka magwawali sa pagkamatarong kinsa misugot sa Diyos, sila nagpadayon sa dalan sa pagkamatarong ingong magwawali sa Gingharian. (Hebreohanon 11:7; 2 Pedro 2:5) Sama kang Abraham, kadtong may pagtuo nga gipasukad sa kamatuoran mosugot kang Jehova bisan pa sa kapit-os ug bisan sa labing masulayong mga kahimtang. (Hebreohanon 11:17-19) Sama sa matinumanong mga alagad sa Diyos sa karaang mga panahon, kadtong may pagtuo karong adlawa madagayaong gipanalanginan ug ginaatiman sa ilang mahigugmaon langitnong Amahan.​—Mateo 6:25-34; 1 Timoteo 6:6-10.

22. Sa unsang paagi ang pagtuo mapalig-on?

²² Kon usa ikaw ka alagad ni Jehova apan nakakaplag nga huyang ang imong pagtuo sa usa ka paagi, unsay imong mahimo? Palig-ona ang imong pagtuo pinaagi sa masibotong pagtuon sa Pulong sa Diyos ug tugotang ang imong baba mobulabula sa mga tubig sa kamatuoran nga mopuno sa imong kasingkasing. (Proverbio 18:4) Kon ang imong pagtuo dili palig-onon, kini mohuyang, mourong, o kaha mamatay. (1 Timoteo 1:19; Santiago 2:20, 26) Paneguroa nga kini dili mahitabo sa imong pagtuo. Pangayoa ang tabang ni Jehova, mag-ampo: “Tabangi ang pagtuo ko nga nakulangan!”​—Marcos 9:24.

Unsay Imong mga Tubag?

◻ Unsa ang pagtuo?

◻ Nganong ang pagtuo dili molungtad nga bulag gikan sa kamatuoran ug sa balaang espiritu?

◻ Sa unsang paagi si Jesu-Kristo nahimong Maghihingpit sa atong pagtuo?

◻ Nganong angay natong susihon kon unsa ka lig-on ang atong pagtuo?

[Kahon sa panid 13]

KADTONG MAY PAGTUO. . .

◻ Mosulti mahitungod kang Jehova.—2 Corinto 4:13.

◻ May mga binuhatan nga sama sa iya ni Jesus.—Juan 14:12.

◻ Maoy mga tuboran ug pagdasig sa uban.—Roma 1:8,11, 12.

◻ Modaog sa kalibotan.—1 Juan 5:5.

◻ Walay katarongan nga mahadlok.—Isaias 28:16.

◻ Anaa sa kahimtang nga makadawat ug kinabuhing dayon.—Juan 3:16.