Mga Ilustrasyon—Usa ka Yawi sa Pag-abot sa mga Kasingkasing

SI David miikyas alang sa iyang kinabuhi. Ang iyang kaaway mao si Saul, dinihogang hari sa Israel. Apan, gikayugtan pag-ayo ni Saul si David, nga tuhop sa kasina. Sa iyang tinguha sa pagpatay, ang hari karon nagdalag 3,000 ka sundalo. Kay diyutay ra kaayo, si David ug ang iyang mga tawo nanago sa kailadman sa usa ka langob sa kamingawan.

Samtang si David ug iyang mga tawo nagtapok diha sa kangitngit, dihay katingalahang situwasyon nga mitungha. Si Haring Saul misulod sa mismong langob tungod sa sugo sa lawas. Hilom nga giduol ni David ang iyang way-mahimong kaaway, may bitbit nga hinagiban. Apan sa kahibulong sa mga tawo ni David, wala niya patya ang hari. Iya lang gitabasan ang sidsid sa sapot ni Saul. Nagbasol bisan sa pagbuhat niini, si David miingon: “Dili ko gayod kini mahimo, kay si Jehova nagadili nga buhaton ko kining butanga sa akong ginoo, ang dinihogan ni Jehova, pinaagi sa pagbakyaw sa akong kamot batok kaniya, kay siya mao ang dinihogan ni Jehova.”​—1 Samuel 24:1-6.

Kini nga asoy sa Bibliya nagtudlo kanato ug usa ka halalom nga pagtulon-an mahitungod sa pagtahod sa hinatag-sa-Diyos nga awtoridad. Kini usab nagaabot sa kasingkasing, tingali mas epektibo pa kay sa direktang tambag. Ingon niana ang gahom sa mga asoy nga gitala diha sa Pulong sa Diyos sa pagtudlo kanato.​—Roma 15:4.

Sa susama, ang mga Saksi ni Jehova naningkamot sa pagbuhat ug labaw pa kay sa pagpakita sa mga pamatuod dihang sila nagasangyaw sa maayong balita, nagadumalag pagtuon sa Bibliya, paghatag mga pakigpulong sa Kasulatan, o pagsangyaw sa dipormal nga paagi. Sila naningkamot sa pag-abot sa mga kasingkasing pinaagi sa pag-asoy ug mga eksperyensiya ug paggamit sa mga ilustrasyon. Ang ilang Giya sa Tunghaan sa Teokratikanhong Ministeryo nagaingon: “Ang mga ilustrasyon nagapalihok sa interes ug nagapasiugdag importanteng mga ideya. Kini nagapukaw sa mga proseso sa panghunahuna sa usa ug sayong masabtan ang bag-ong mga ideya. Ang maayong pagkapili nga mga ilustrasyon nagahiusa sa kamadanihon ngadto sa salabotan ug emosyonal nga puwersa. . . . Usahay, ang ilustrasyon magamit sa pagwagtang sa pagdapigdapig.”a​—Panid 168.

Sa iyang librong Essentials of Public Speaking, si Warren DuBois miingon: “Pasagding ang manunulat o mamumulong mopahayag sa iyang mga ideya pinaagig mga aksiyon o mga pulong sa mga tawo, ug ang dili-makapainteres nga ulohan makabatog kinabuhi o kahulogan.” Busa, ang pagdugag kinabuhi ug kahulogan sa usa ka mensahe nga puwersado na ug makahatag-kinabuhi tinong makatabang sa Kristohanong mga ministro sa pag-abot sa kasingkasing.

Mga Ilustrasyon nga Nagatudlo

Unsang matanga sa ilustrasyon ang mosaler pag-ayo? Sa kasagaran, kanang gipasukad sa usa ka butang nga masabtan dayon sa mga mamiminaw. Si Jesu-Kristo naghatag ug maayong panig-ingnan niining bahina. Sa iyang Wali sa Bukid, si Jesus naghisgot bahin sa komung mga butang sama sa asin, mga lampara, ug mga langgam. (Mateo 5:1–​7:29) Pananglitan, ang kadaghanan sinati sa mga lampara nga gipasiga sa lana sa olibo ug nga usahay ibutang diha sa tangkawan. Busa, ang mga tinun-an ni Jesus nakaamgo gayod nga sila angay maoy mga magdadala sa espirituwal nga kahayag sa dihang siya miingon kanila: “Ang mga tawo dili modagkot sa usa ka lampara aron ibutang kini sa ilalom sa usa ka takalan, kondili diha sa tangkawan, ug kini magaiwag kanilang tanan nga anaa sa sulod sa balay. Sa ingon pasigaa ang inyong kahayag atubangan sa mga tawo aron makita nila ang inyong maayong buhat ug dayegon nila ang inyong Amahan nga atua sa mga langit.” (Mateo 5:15, 16) Ang yanong mga ilustrasyon nga haom sa usa ka ulohan motabang sa Kristohanong mga ministro sa pagpatin-aw sa mga ideya ug mga pagtulon-an sa Bibliya.

Tingali ang labing kusganong mga ilustrasyon ni Jesus nagpunting sa mga tawo. Tagda kadtong gitala diha sa Lucas mga kapitulo 15 ug 16. Ang mga eskriba ug mga Pariseo misaway kang Jesus sa pag-abiabi sa mga makasasala ug sa mga maniningil sa buhis. Ingong sanong, siya miasoy ug makapatandog nga mga sugilanon mahitungod sa mga tawo. Naghisgot siya bahin sa usa ka magbalantay kinsa nakakaplag sa iyang nawalang karnero, usa ka babaye nga nakakita sa iyang usa ka nawalang sensilyo, usa ka usikang anak nga mipauli, ug usa ka daotang piniyalan.

Ang realistikong mga ilustrasyon ug tinuod-kinabuhing mga kasinatian mapuslanon kaayo sa usa ka Kristohanong ministro. Pananglitan, matikdi kon giunsa ni Alexander H. Macmillan, nga nakabiyaheg daghang mga lugar ingong usa ka mamumulong publiko sulod sa 60 na ka tuig, nagpatin-aw sa kamatuoran sa Bibliya bahin sa patay. Dili pa dugay sa wala pa mamatay ang iyang amahan, kinsa nagtuo nga ang kalag dili gayod mamatay, si Macmillan nakigkokabildo mahitungod niini uban kaniya:

“Gipangutana ako sa akong amahan ug prangkang pangutana: ‘Anak, ako ba magmamingawon sa lubnganan samtang magpaabot ako sa gingharian nga mosugod sa iyang buluhaton sa pagpuno sa yuta uban ang kahingpitan?’

“Kadto maoy usa ka pangutana nga dili dayon matubag sa usa ka bayong nga makatagbaw sa usa ka edaran nga wala gayod magtuo nga mamatay ang kalag.

“Sa pagtubag gipangutana nako siya: ‘Pa, nakatulog ka bag maayo kagabii?’

“Siya mitubag, ‘Oo, anak ko, nakatulog ko ug maayo human nga gihatagan ako sa doktor ug pipila ka pildoras nga pangpatulog.’

“‘Mibati ka bag kamingaw samtang ikaw natulog?’

“‘Wala, wala ko batia kana. Maayo unta ug matulog na lang ako kanunay, kay wala akoy bation nga sakit.’”

Dayon gibasa ni A. H. Macmillan ang Job 14:13-15 ug 3:17-19 sa iyang amahan ug miingon: “Busa imong nakita, pa, nga ang mga patay natulog sa kamatayon ug walay nahibaloan samtang anaa nianang kondisyona, busa unsaon nila pagbati ang kamingaw?”

Pagkaepektibo nga pagtudlo! Kon ikaw usa sa mga Saksi ni Jehova, imong magamit usab ang mga teksto ug mga ilustrasyon sa pagdani sa hunahuna ug kasingkasing.

Pagpangitag mga Ilustrasyon

Apan asa ka mangitag epektibong mga ilustrasyon o tinuod-kinabuhing mga kasinatian? Daghan ang makuha mo gikan sa imong natipigang personal nga kasinatian. Pananglitan, kinahanglan mo bang ipasundayag ang mga panalangin sa pagtuo, ang gahom sa pag-ampo, o ang kalipay sa ministeryo? Kon ikaw usa ka dedikadong Kristohanon, malagmit makaasoy ka sa nagkalainlaing mga hitabo sa imong kinabuhi. Ikaw tingali nakadungog ug maayong mga kasinatian diha sa mga miting sa kongregasyon o dihang nakigsulti sa kaubang mga Kristohanon. O mahimong mabasa mo ang makapadasig nga eksperyensiya diha sa Yearbook of Jehovah’s Witnesses. Ngani, ang Watch Tower Publications Index motudlo sa pinatik nga mga eksperyensiya nga gikan sa tibuok kalibotan.

Unsaon mo pag-asoy nga epektibo ang kasinatian? Alang sa usa ka butang, ang pagmugna ug igong kaikag motabang kanimo nga makuha ang pagtagad sa imong mga mamiminaw. Imo tingaling masugdan ang kasinatian pinaagi sa pag-ingon: “Usa ka payunir mismo nakakat-on sa unang higayon kon sa unsang paagi si Jehova mopanalangin niadtong kinsa mosalig kaniya.” Dihadiha, ang imong mga mamiminaw mahibulong kon unsang mga panalangin ang natagamtam sa bug-os panahong magwawali sa Gingharian. Seguradoa nga isugid kini kanila.

Sulay sa pag-asoy ug eksperyensiya sa imong kaugalingong mga pulong. Ihatag ang mga detalye, kay ang pagbuhat niana modugang sa puwersa sa sugilanon. Pinaagi sa paghatag ug tin-awng larawan sa mga pulong sa mga sirkumstansiyang nalangkit, mas dali mo nga mapukaw ang imong mga mamiminaw. Apan paneguroa nga dili ka kaayo malangkit sa pag-asoy sa sugilanon nga sila dili na hinoon makasabot kon nganong nag-asoy ka ug eksperyensiya. Usab, likayi ang paghinobra, kay bisag kini dugang mopaikag sa sugilanon, kini makadaot sa imong pagkakatuohan. Alang sa samang hinungdan, ayaw pagpasag hungihong o pag-asoy ug mga eksperyensiya nga dili nimo kapamatud-an.

Himoang Buhi ang Bibliya

Ang labing matulon-anong mga kasinatian makaplagan diha sa Bibliya mismo. Pananglitan, ingnon ta gusto mong ipakita sa usa ka estudyante sa Bibliya o usa ka tumatambong nga ang kabataan mahimong makabarog alang kang Jehova nga Diyos. Ikaw tingali modesider sa paggamit sa asoy sa wa-hinganling batang babaye kinsa misulti sa asawa ni Naaman bahin sa propeta ni Jehova nga si Eliseo. Una, basaha ang asoy sa 2 Hari 5:1-5. Unya ikaw mahimong mangutana: “Unsa ka lisod kadto sa imong hunahuna alang niining batang babaye nga maampingan ang kamaunongon sa Diyos diha sa usa ka yuta nga bakak ang pagsimba? Dili ba nagkinahanglan kadto ug kaisog aron siya makasulti nga makakabig mahitungod kang Jehova ug sa iyang propeta?”

Ang pasiunang panukiduki motabang kanimo sa paghimo sa asoy nga buhi. Tingali nakakita kag nakatabang nga impormasyon ubos sa mga ulohang NAAMAN, SYRIA, ug ELISHA diha sa Watch Tower Publications Index. Ang mga cross-reference diha sa New World Translation of the Holy Scriptures mahimong motultol kanimo gikan sa asoy sa 2 Hari ngadto sa Salmo 148:12, 13, diin atong mabasa: “Kamong batan-ong mga lalaki ug mga ulay, mga tigulang nga lalaki ug mga bayong. Padayega silang tanan sa ngalan ni Jehova, kay ang iyang ngalan lamang ang labaw sa tanan. Ang iyang himaya maoy labaw sa yuta ug kalangitan.” Pagkamakapadasig alang sa mga batan-on nga mosulti sa pulong sa Diyos uban ang kaisog!​—Buhat 4:29-31.

Kon usa ikaw ka Kristohanong ministro, ‘tagda ang imong pagpanudlo’ niining bahina. (1 Timoteo 4:16) Ayaw lamang isulti ang kamatuoran​—iilustrar kana. Himoa ang asoy sa Bibliya nga buhi ug makahuloganon. Gamita ang tukmang mga eksperyensiya ug mga ilustrasyon. Kini mao ang mga paagi nga maabot ang kasingkasing.

[Footnote]

[Hulagway sa panid 29]

Sama kang Jesus, ang presenteng-adlawng Kristohanong mga ministro makagamit ug tin-aw nga mga ilustrasyon sa pagpadayag sa ilang mensahe ug sa pag-abot sa mga kasingkasing