“Adto Ka sa Paraiso Uban Kanako”

SAMTANG siya nagbitay sa kahoyng patyanan, himalatyon sa kasakit, ang kriminal nagpakiluoy sa tawong tapad kaniya: “Jesus, hinumdomi ako inig-abot mo sa imong gingharian.” Si Jesus, bisag siya usab himalatyon na diha sa grabeng kasakit, mitubag: “Sa pagkatinuod magaingon ako kanimo karong adlawa, Adto ka sa Paraiso uban kanako.” (Lucas 23:42, 43) Pagkamakapalipay nga paglaom nga ikatanyag sa usa ka tawong himalatyon!

Apan, namatikdan mo ba nga ang New World Translation​—ang bersiyon nga gikutlo sa nag-unang parapo—​nagbutang ug panuldok human sa pulong “karong adlawa” sa dihang gihubad kining mga pulonga ni Jesus? Kini nagpasa sa ideya nga bisan sa adlaw sa iyang kamatayon, si Jesus nakahimo sa pagsaad ug kinabuhi sa Paraiso sa maong kriminal. Sa laing bahin, ang The New English Bible nagbutang ug tuldok sa mga pulong ni Jesus niining paagiha: “Sultihan ko ikaw: karong adlawa ikaw mahiuban kanako sa Paraiso.” Ang kadaghanan sa ubang mga hubad nagkauyon sa The New English Bible, nagpasa sa ideya nga si Jesus ug ang himalatyong kriminal mahiadto sa Paraiso niadtong adlawa mismo. Nganong dunay kalainan? Ug hain nga panuldok ang husto?

Sa pagkamatuod, walay panuldok ang makita diha sa labing unang Gregong mga manuskrito sa Bibliya. Busa, sa dihang gibutang ang panuldok, ang mga tigkopya sa Bibliya ug mga maghuhubad nagsal-ot niini sumala sa ilang pagsabot sa kamatuoran sa Bibliya. Nan, husto ba ang naandang hubad? Si Jesus ba ug ang mamumuhat ug daotan nahiadto sa Paraiso sa adlaw nga sila namatay?

Wala, sumala sa Bibliya, sila didto sa dapit nga gitawag sa Grego nga Haʹdes ug sa Hebreohanon Sheʹol, diin ang duha nagpunting sa komun nga lubnganan sa katawhan. (Lucas 18:31-33; 24:46; Buhat 2:31) Mahitungod niadtong anaa sa maong lugar, ang Bibliya nag-ingon: “Mahitungod sa mga patay, sila walay kasayoran sa bisan unsa . . . Walay buluhaton ni lalang ni kahibalo ni kaalam diha sa Sheʹol [Grego, Haʹdes], ang dapit diin ikaw moadto.” Tataw nga dili gayod usa ka paraiso!​—Ecclesiastes 9:5, 10.

Sa ikatulong adlaw na lamang nga si Jesus gibanhaw gikan sa Hades. Unya, sulod sa halos unom ka semana siya mipakita sa iyang mga sumusunod sa palibot sa yuta sa Palestina. Ang usa sa maong mga okasyon, si Jesus miingon kang Maria: “Wala pa ako makasaka ngadto sa akong Amahan.” (Juan 20:17) Busa, bisan sa maong panahon siya wala pa makaabot sa bisan haing dapit nga matawag nga paraiso.​—Pinadayag 2:7.

Sa ikatulong siglo K.P.​—sa dihang kusog ang panagtapo sa Kristohanong pagtulon-an uban sa Gregong pilosopiya—​si Origen mikutlo kang Jesus nga nag-ingon: “Karong adlawa adto ikaw uban kanako sa Paraiso sa Diyos.” Sa ikaupat nga siglo K.P., gilalisan sa mga manunulat sa iglesya ang pagbutang ug panuldok human sa “karong adlawa.” Kini nagpakita nga ang naandang paagi sa paghubad sa mga pulong ni Jesus adunay hataas nga kasaysayan. Apan kini nagpaila usab nga bisan sa ikaupat nga siglo K.P., ang mga pulong ni Jesus gibasa sa uban sumala sa paagi nga kini gihubad sa New World Translation.

Karong adlawa usab, bisag daghang maghuhubad nagbutang ug tuldok sa Lucas 23:43 sumala sa tradisyon sa simbahan, ang pipila nagbutang ug tuldok niini sama sa New World Translation. Pananglitan, diha sa Aleman nga hubad ni Propesor Wilhelm Michaelis, ang mga pulong ni Jesus mabasa: “Sa pagkatinuod, ako mohatag kanimo ug pasalig bisan karong adlawa: Ikaw (sa umaabot) mahiuban kanako sa Paraiso.”

Nan, unsay kahulogan sa mga pulong ni Jesus alang sa mamumuhat ug daotan? Siya tingali nakadungog sa mga pangangkon nga si Jesus mao ang gisaad nga Hari. Walay duhaduha, siya nahibalo sa titulong “hari sa mga Hudiyo” nga gipasulat ni Pilato ug gibitay sa ulohan ni Kristo. (Lucas 23:35-38) Bisag ang relihiyosong mga lider sa pagkagahig-ulo wala modawat kang Jesus, kining mahinulsolong kriminal mipahayag sa iyang pagtuo, nga miingon: “Jesus, hinumdomi ako inig-abot mo sa imong gingharian.” Siya wala magdahom nga momando uban kang Jesus, apan buot niyang makabatog kaayohan gikan sa pagmando ni Jesus. Busa, si Jesus, bisan sa maong labing malisod nga adlaw, misaad nga ang mamumuhat ug daotan mahiuban kaniya sa Paraiso.

Hain nga Paraiso? Diha sa Bibliya, ang orihinal nga Paraiso mao ang samag-parke nga tanaman sa Eden nga giwala sa atong unang mga ginikanan. Ang Bibliya nagsaad nga ang Paraiso sa yuta ipasig-uli unya ubos sa Gingharian sa Diyos, nga niini si Kristo mao ang Hari. (Salmo 37:9-11; Miqueas 4:3, 4) Busa, si Jesus mahiuban unya sa maong mamumuhat ug daotan ug sa dili-maisip nga mga patay sa dihang iyang banhawon sila gikan sa lubnganan ngadto sa kinabuhi sa paraiso sa yuta ug ngadto sa kahigayonan sa pagkakat-on sa pagtuman sa kabubut-on sa Diyos ug mabuhing walay kataposan.​—Juan 5:28, 29; Pinadayag 20:11-13; 21:3, 4.