Pag-ugmad sa Bunga sa Pagpugong sa Kaugalingon

“Ang bunga sa balaang espiritu mao ang gugma, kalipay, kalinaw, hataas-nga-pailob, kalulot, pagkamaayo, pagtuo, kaaghop, pagpugong sa kaugalingon. Kining mga butanga wala mahisupak sa bisan unsang balaod.”​—GALACIA 5:22, 23.

1. Kinsa ang mihatag kanatog labing maayong mga panig-ingnan sa pagpugong sa kaugalingon, ingon sa makita sa unsang mga teksto?

SI JEHOVA nga Diyos ug si Jesu-Kristo naghatag kanato sa kinamaayohang mga panig-ingnan sa pagpugong sa kaugalingon. Sukad pa sa pagsupil sa tawo sa tanaman sa Eden, si Jehova padayong nagpakita niining hiyasa. (Itandi ang Isaias 42:14.) Siyam ka beses sa Hebreohanong Kasulatan nga mabasa nato nga siya “mahinay sa kasuko.” (Exodo 34:6) Kana nagkinahanglag pagpugong sa kaugalingon. Ug dayag ang Anak sa Diyos mipakitag dakong pagpugong sa kaugalingon, kay “sa dihang siya gibiaybiay, wala siya mobalos sa pagbiaybiay.” (1 Pedro 2:23) Bisan pa, si Jesus makapangayo untag tabang sa iyang langitnong Amahan sa pagpadalag “kapin sa napulog-duha ka panon nga mga manulonda.”​—Mateo 26:53.

2. Unsang maayong mga panig-ingnan sa Kasulatan ang atong nabatonan sa pagpasundayag sa pagpugong sa kaugalingon sa mga tawong di-hingpit?

² Aduna usab kitay pipila ka maayong mga panig-ingnan sa Kasulatan sa pagpugong sa kaugalingon nga gipakita sa di-hingpit nga mga tawo. Pananglitan, kining hiyasa gipadayag sa usa ka tagsaong panahon sa kinabuhi ni Jose, anak nga lalaki sa patriarkang si Jacob. Pagkatalagsaong pagpugong sa kaugalingon ang gipakita ni Jose sa dihang gitintal siya sa asawa ni Potipar! (Genesis 39:7-9) Dihay maayong panig-ingnan usab sa upat ka Hebreohanong batan-on nga nagpakitag pagpugong sa kaugalingon pinaagi sa pagdumili sa pagkaon sa mga kalan-on sa hari sa Babilonya tungod kay gidili kini sa Kasugoan ni Moises.​—Daniel 1:8-17.

3. Kinsa ang ilado sa ilang maayong batasan, ingon sa gipakita sa unsang pamatuod?

³ Alang sa modernong mga panig-ingnan sa pagpugong sa kaugalingon, atong ikatudlo ang mga Saksi ni Jehova sa katibuk-an. Sila takos sa komendasyon nga gihatag kanila diha sa New Catholic Encyclopedia​—nga sila maoy “usa sa labing maayog-batasang mga pundok sa kalibotan.” Usa ka instruktor sa unibersidad sa Pilipinas miingon nga “diniyos gayod nga ginapadapat sa mga Saksi ang ilang nakat-onan sa Kasulatan.” Mahitungod sa kombensiyon sa mga Saksi sa Warsaw sa 1989, usa ka Polakong reporter misulat: “55,000 ka tawo wala motabakog usa ka sigarilyo sulod sa tulo ka adlaw! . . . Nakadayeg kaayo ako niini nga pasundayag sa labaw-tawhanong disiplina nga may sagol nga kataha.”

May Kahadlok sa Diyos ug Nagadumot sa Daotan

4. Unsa ang usa sa labing dakong tabang aron ikapasundayag nato ang pagpugong sa kaugalingon?

⁴ Ang usa sa labing dakong tabang sa pag-ugmad sa pagpugong sa kaugalingon mao ang kahadlok sa Diyos, ang maayong kahadlok nga dili mapahimut-an ang atong mahigugmaon langitnong Amahan. Ang pagkahinungdanon sa matinahurong pagkahadlok sa Diyos alang kanato makita diha sa kamatuoran nga gihisgotan kini sa Kasulatan makadaghan. Sa dihang ihalad na unta ni Abraham ang iyang anak nga si Isaac, ang Diyos miingon: “Ayaw ibakyaw ang imong kamot batok sa bata ug ayawg buhata ang bisan unsa ngadto kaniya, kay karon naila ko nga ikaw mahadlokon sa Diyos kay wala mo ihikaw ang imong bugtong anak, gikan kanako.” (Genesis 22:12) Walay duhaduha nga gibati niadtong okasyona ang hilabihang kasakit sa emosyon, busa nagkinahanglan gayod ug dakong pagpugong sa kaugalingon sa bahin ni Abraham ang pagtuman sa sugo sa Diyos hangtod sa punto sa pagbakyaw sa iyang kutsilyo sa pagpatay sa iyang hinigugmang anak si Isaac. Oo, ang kahadlok sa Diyos motabang kanato sa pagpugong sa kaugalingon.

5. Unsay papel ang gidula sa pagdumot sa daotan diha sa atong pagpugong sa kaugalingon?

⁵ Suod nga nalangkit sa pagkahadlok kang Jehova mao ang pagdumot sa daotan. Atong mabasa sa Proverbio 8:13: “Ang pagkahadlok kang Jehova maoy pagdumot sa daotan.” Sa baylo, ang pagdumot sa daotan usab motabang kanato sa pagpugong sa kaugalingon. Sa masubsob, ang Kasulatan nag-ingon kanato nga dumtan​—oo, kasilagan​—ang daotan. (Salmo 97:10; Amos 5:14, 15; Roma 12:9) Ang butang nga daotan mao hinooy makalilipay kaayo, madanihon kaayo, makabibihag kaayo nga kinahanglang atong pagadumtan kini aron mapalig-on ang atong kaugalingon batok niini. Kining tanang pagdumot sa daotan may epektong mopalig-on sa atong determinasyon sa pagpugong sa kaugalingon ug busa magsilbing panalipod kanato.

Pagpugong sa Kaugalingon, ang Dalan sa Kaalam

6. Nganong dalan sa kaalam ang pagsumpo sa atong hakog nga mga hilig pinaagi sa pagpasundayag ug pagpugong sa kaugalingon?

⁶ Ang laing dakong tabang sa atong pagpugong sa kaugalingon mao ang pagpabili sa kaalam sa pagpadayag niining hiyasa. Si Jehova nagahangyo kanato nga magpugong sa kaugalingon alang sa atong kaugalingong kaayohan. (Itandi ang Isaias 48:17, 18.) Ang iyang Pulong naundan sa daghang tambag nga nagpakitang pagkamaalamon ang pagsumpo sa atong hakog nga mga hilig pinaagi sa pagpugong sa kaugalingon. Kita sa yano dili makalikay sa di-mausab nga kasugoan sa Diyos. Ang iyang Pulong nag-ingon kanato: “Bisan unsay ipugas sa tawo, kini iyang pagaanihon; kay ang nagapugas sa iyang kaugalingong unod magaanig pagkadunot, apan ang nagapugas alang sa espiritu magaanig kinabuhing dayon gikan sa espiritu.” (Galacia 6:7, 8) Ang dayag nga pananglitan niini mao ang sobrang pagkaon ug pag-inom. Daghang sakit ang moresulta tungod kay ang mga tawo sobrang makakaon ug makainom. Ang pagpadaog sa kahakog makawala sa tawo sa iyang pagtahod-sa-kaugalingon. Dili lang kana, kon ang usa ka indibiduwal magpadaog sa kahakog madaot usab ang iyang relasyon sa uban. Labing seryoso sa tanan, ang kakulang sa pagpugong sa kaugalingon makadaot sa atong relasyon sa atong langitnong Amahan.

7. Unsa ang pangunang tema sa basahon sa Proverbio, ingon sa gipakita sa unsang teksto sa Bibliya?

⁷ Busa, kinahanglang padayon natong sultihan ang atong kaugalingon nga ang kahakog makapildi-sa-kaugalingon. Ang talagsaong tema sa basahon sa mga Proverbio, nga nagpasiugda sa disiplina-sa-kaugalingon, mao nga walay kaayohang makuha ang pagkahimong hakog apan dunay kaalam ang pagpugong sa kaugalingon. (Proverbio 14:29; 16:32) Ug angay matikdan nga ang pagdisiplina-sa-kaugalingon naglakip ug labaw pa kay sa yanong paglikay sa daotan. Ang pagdisiplina-sa-kaugalingon, o pagpugong sa kaugalingon, kinahanglan usab sa pagbuhat ug matarong, nga tingalig malisod tungod kay batok man kini sa atong makasasalang mga hilig.

8. Unsang eksperyensiya ang nagpasiugda sa kaalam sa pagpugong sa kaugalingon?

⁸ Nagailustrar sa kaalam sa pagpugong sa kaugalingon mao ang kaso sa usa sa mga Saksi ni Jehova nga nagbarog diha sa linya sa usa ka bangko sa dihang midutdot ang usa ka tawo sa iyang atubangan. Bisag napikal ug diyutay ang Saksi, siya nagpugong sa kaugalingon. Niadtong adlawa may pakigkitaan siya nga usa ka enhinyero sa pagpapirma sa pipila ka plano sa Kingdom Hall. Ug kinsa kining maong enhinyero? Aw, ang tawo mismo nga midutdot sa iyang atubangan diha sa bangko! Dili lamang mahigalaon kaayo ang enhinyero kondili gamay kaayo ang iyang gipabayad sa Saksi nga halos usa sa ikanapulong bahin sa iyang regular nga singil. Pagkadako sa kalipay sa Saksi nga siya nagpugong sa kaugalingon sayo niadtong adlawa, nga wala siya magpadala sa kasuko!

9. Unsa ang dalan sa kaalam kon makaengkuwentro kita ug mainsultohong mga reaksiyon diha sa ministeryo?

⁹ Sa makadaghang higayon sa dihang kita mogawas sa balay ug balay sa pagsangyaw sa maayong balita sa Gingharian sa Diyos o magbarog diha sa eskina sa dalan nga naningkamot nga makuha ang interes sa mga lumalabay sa atong mensahe, makaengkuwentro kita ug mainsultohong sinultihan. Unsa ang dalan sa kaalam? Kining maalamong tambag ang gipahayag sa Proverbio 15:1: “Ang tubag nga malumo makapahupay sa kapungot.” Sa laing pagkasulti, kita kinahanglang magpugong sa kaugalingon. Ug dili kay mga Saksi ni Jehova lamang ang nakakaplag niini nga tinuod kondili ang uban usab. Ang makaayong bili sa pagpugong sa kaugalingon dugang ug dugang nga gipabilhan sa medikal nga propesyon.

Di-mahakogong Gugma Makatabang

10, 11. Nganong ang gugma maoy usa ka tinuod nga tabang sa pagpugong sa kaugalingon?

¹⁰ Ang paghubit ni Pablo bahin sa gugma sa 1 Corinto 13:4-8 nagapakita nga ang gahom niini makatabang kanato sa pagpugong sa kaugalingon. “Ang gugma hataas-ug-pailob.” Ang pagbaton ug hataas-nga-pailob nagkinahanglag pagpugong sa kaugalingon. “Ang gugma dili abughoan, dili manghambog, dili tigpaburot.” Ang hiyas sa gugma makatabang kanato sa pagpugong sa atong mga hunahuna ug mga emosyon, sa pagsumpo sa bisan unsang kiling sa pagpangabugho, sa pagpanghambog, o pagpaburot. Ang gugma mopalihok kanato nga mahimong kabaliskaran, mopahimo kanatong mapaubsanon, maaghop ug hunahuna, sama kang Jesus.​—Mateo 11:28-30.

¹¹ Si Pablo nagpadayon sa pag-ingon nga ang gugma “dili bastos.” Nagkinahanglag pagpugong sa kaugalingon usab ang paggawing maligdong sa tanang panahon. Ang hiyas sa gugma nagapahilayo kanato gikan sa kadalo, gikan sa ‘pagpangita sa atong kaugalingong kaayohan’ lamang. Ang gugma “dili daling masuko.” Pagkadali nga kita masuko tungod sa isulti o buhaton sa uban! Apan ang gugma motabang kanato sa pagpugong sa kaugalingon ug dili mosulti o mobuhat ug mga butang nga atong basolan sa ulahi. Ang gugma “dili modumot.” Ang tawhanong kinaiya hilig mohambin ug kasuko o kasilag. Apan ang gugma motabang kanato sa pagwakli niining mga hunahunaa gikan sa atong mga kaisipan. Ang gugma “dili magakalipay sa mga butang nga dili matarong.” Nagkinahanglag pagpugong sa kaugalingon ang dili pagkalipay sa daotan, sama sa pornograpiya o malaw-ayng mga drama sa TV. Ang gugma usab “mopailob sa tanang butang” ug “moantos sa tanang butang.” Nagkinahanglag pagpugong sa kaugalingon ang pag-antos sa mga butang, sa pag-antos sa masulayon o mabudlay nga mga butang ug dili nato tugotang paluyahon kita niini, nga mopahinabo kanato sa pagbalos, o moimpluwensiya kanato sa paghunong sa pag-alagad kang Jehova.

12. Unsa ang usa ka paagi sa pagpakita sa atong pagpabili sa tanang nahimo kanato ni Jehova nga Diyos ug ni Jesu-Kristo?

¹² Kon tinuod natong gihigugma ang atong langitnong Amahan ug pabilhan ang iyang kahibulongang mga hiyas ug ang tanang iyang nahimo kanato, buot natong magpahimuot kaniya pinaagi sa pagpugong sa kaugalingon sa tanang panahon. Usab, kon tinuod natong gihigugma ang atong Ginoo ug Agalon, si Jesu-Kristo, ug pabilhan ang tanan niyang nahimo kanato, atong patalinghogan ang iyang sugo sa ‘pagpas-an sa atong kahoy sa pagsakit ug padayong mosunod kaniya.’ (Marcos 8:34) Kana sa tino nagkinahanglan nga kita magpugong sa kaugalingon. Ang gugma alang sa atong Kristohanong mga igsoong lalaki ug babaye nagapugong usab kanato nga sakiton ang ilang hunahuna pinaagi sa pagsubay ug mahakogong dalan.

Pagtuo ug Pagpaubos Ingong mga Katabang

13. Nganong ang pagtuo motabang kanato sa pagpasundayag sa pagpugong sa kaugalingon?

¹³ Ang laing dakong tabang sa pagpakitag pagpugong sa kaugalingon mao ang pagtuo sa Diyos ug sa iyang mga saad. Ang pagtuo makahimo kanato sa pagsalig kang Jehova ug sa pagpaabot sa iyang takdang panahon sa pagtul-id sa mga butang. Si Pablo mihimog samang punto sa dihang siya miingon diha sa Roma 12:19: “Mga hinigugma, ayaw ninyo himoa ang panimalos, . . . kay kini ang nahisulat: ‘Akoa ang panimalos; ako ang magabayad, nagaingon si Jehova.’” Niining bahina, ang pagpaubos usab makatabang kanato. Kon kita mapaubsanon, kita dili daling masuko tungod sa hinanduraw o tinuod nga mga kadaot. Dili kita magdalidali nga kita ang maningamot sa pagsilot, apan magpugong sa kaugalingon ug andam sa paghulat kang Jehova.​—Itandi ang Salmo 37:1, 8.

14. Unsang eksperyensiya ang nagpakita nga ang pagpugong sa kaugalingon mahimong mabatonan bisan niadtong dakog kakulangan niini?

¹⁴ Nga atong matun-an ang pagpugong sa kaugalingon tin-awng gipasiugda sa usa ka eksperyensiya labot sa usa ka tawo nga mapintas ug kinaiya. Aw, siya tinuod gayod nga mapintas kay sa dihang gipatawag ang mga polis tungod sa kagubot nga gipahinabo niya ug sa iyang amahan, nawad-ag panimuot ang tulo ka polis nga iyang gisuntok sa wala pa siya mabuntog! Apan, sa ulahi, siya nakahimamat ug mga Saksi ni Jehova ug nakakat-on sa pagpugong sa kaugalingon, ang usa sa mga bunga sa espiritu sa Diyos. (Galacia 5:22, 23) Karon, 30 ka tuig na ang milabay, kining tawhana matinumanon gihapong nag-alagad kang Jehova.

Pagpugong sa Kaugalingon Sulod sa Panimalay

15, 16. (a) Unsay motabang sa bana sa pagpasundayag sa pagpugong sa kaugalingon? (b) Ang pagpugong sa kaugalingon ilabinang gikinahanglan diha sa unsang kahimtang, ingon sa makita gikan sa unsang kasinatian? (c) Nganong ang pagpugong sa kaugalingon gikinahanglan sa usa ka asawa?

¹⁵ Ang pagpugong sa kaugalingon gikinahanglan gayod sulod sa panimalay. Aron higugmaon sa bana ang iyang asawa sama sa iyang kaugalingon nagkinahanglag dakong pagpugong sa iyang mga hunahuna, mga pulong, ug mga aksiyon. (Efeso 5:28, 29) Oo, nagkinahanglag pagpugong sa kaugalingon alang sa mga bana sa pagpamati sa mga pulong ni apostol Pedro diha sa 1 Pedro 3:7: “Kamong mga bana, ipahiuyon ninyo sa kaalam ang inyong pagpuyo uban sa inyong mga asawa.” Ilabinang nagkinahanglan ang bana ug pagpugong sa kaugalingon kon dili-magtutuo ang iyang asawa.

¹⁶ Sa pag-ilustrar: Dihay usa ka ansiano nga may mangil-ad kaayog kinaiyang asawa nga di-magtutuo. Apan, siya mapugnganon sa kaugalingon, ug nakabenepisyo kaayo kini kaniyag dako nga ang iyang doktor miingon kaniya: “John, tingali kinaiya mo na nga mapailobon ka kaayo o kaha ikaw may gamhanan kaayo nga relihiyon.” Kita sa pagkamatuod adunay gamhanang relihiyon, kay “kita wala hatagi sa Diyos ug espiritu sa katalaw, kondili usa ka espiritu sa gahom ug sa gugma ug sa maayong hunahuna,” nga nagapahimo kanatong mapugnganon sa kaugalingon. (2 Timoteo 1:7) Dugang pa, nagkinahanglag pagpugong sa kaugalingon sa bahin sa asawa ang magpasakop, ilabina kon ang iyang bana di-magtutuo.​—1 Pedro 3:1-4.

17. Nganong ang pagpugong sa kaugalingon hinungdanon sa relasyon sa ginikanan-ug-anak?

¹⁷ Ang pagpugong sa kaugalingon gikinahanglan usab diha sa relasyon sa ginikanan-ug-anak. Aron may mga anak nga mapugnganon sa kaugalingon, ang mga ginikanan mismo kinahanglang mao ang unang magpakitag maayong panig-ingnan. Ug sa dihang gikinahanglan nga ang anak disiplinahon sa usa ka matang o sa lain, kini kanunay gayod nga ipadapat uban ang kakalma ug gugma, nga nagkinahanglag tinuod nga pagpugong sa kaugalingon. (Efeso 6:4; Colosas 3:21) Unya usa pa, aron ikapasundayag sa mga anak nga tinuod gayod nilang gihigugma ang ilang mga ginikanan nagkinahanglag pagkamasinugtanon, ug ang pagsugot siyempre nagkinahanglag pagpugong sa kaugalingon.​—Efeso 6:1-3; itandi ang 1 Juan 5:3.

Pahimusli ang Tabang nga Gitagana sa Diyos

18-20. Unsa ang tulo ka espirituwal nga mga tagana nga atong pahimuslan aron maugmad ang mga hiyas nga motabang kanato sa pagpugong sa kaugalingon?

¹⁸ Aron motubo diha sa kahadlok sa Diyos, diha sa di-mahakogong gugma, diha sa pagtuo, sa pagdumot sa daotan, ug sa pagpugong sa kaugalingon, kinahanglang atong pahimuslan ang tanang tabang nga gitagana ni Jehova nga Diyos. Atong tagdon ang tulo ka espirituwal nga mga tagana nga motabang kanato sa pagpasundayag sa pagpugong sa kaugalingon. Una sa tanan, anaa ang hamiling pribilehiyo sa pag-ampo. Dili gayod nato buot nga magmapuliki kaayo aron makaampo. Oo, angay natong tinguhaon nga “moampo nga walay hunong,” nga “molahutay sa pag-ampo.” (1 Tesalonica 5:17; Roma 12:12) Himoon natong butang sa pag-ampo ang pag-ugmad sa pagpugong sa kaugalingon. Apan kon kita mapakyas sa pagpakitag pagpugong sa kaugalingon, kita sa mabasolon mangamuyo sa atong langitnong Amahan alang sa kapasayloan.

¹⁹ Ang ikaduhang tabang sa pagpasundayag sa pagpugong sa kaugalingon mao ang pagkuhag tabang nga moabot gikan sa pagkaon sa Pulong sa Diyos ug sa mga literatura nga makahimo kanato sa pagsabot ug pagpadapat sa Kasulatan. Pagkasayon kaayo nga mapasagdan kining bahina sa atong balaang pag-alagad! Kita kinahanglang magpugong sa kaugalingon ug padayong sultihan nato ang atong kaugalingon nga wala nay labi pang hinungdanong balasahon kay sa Bibliya nga gitagana “sa matinumanon ug maalamong ulipon,” ug busa kini ang atong unang hatagan ug pagtagad. (Mateo 24:45-47) May maayong panultihon nga ang kinabuhi dili kini ug kana kondili kini o kana. Kita ba tinuod nga espirituwal nga mga lalaki ug mga babaye? Kon kita mabalak-on sa atong espirituwal nga panginahanglan, kita nagkinahanglag pagpugong sa kaugalingon sa pagpalong sa TV ug mangandam sa atong mga tigom o basahon ang Ang Bantayanang Torre nga tingali mao pay pag-abot sa koreyo.

²⁰ Ikatulo, anaa ang bahin sa paghatag apresasyon sa atong mga panagkatigom sa kongregasyon ug sa dagkong mga asembliya ug mga kombensiyon. Hinungdanon ba kaayo kanato kining mga tigoma? Kita ba motambong nga andam makigbahin ug mokomento kon kita may higayon? Kon unsa ang gidak-on sa atong apresasyon sa atong mga panagkatigom, mao usab ang gidak-on nga atong mapalig-on ang atong determinasyon nga magpugong sa kaugalingon ubos sa tanang mga kahimtang.

21. Unsa ang pipila ka ganti nga atong maangkon tungod sa pag-ugmad sa bunga sa espiritu nga pagpugong sa kaugalingon?

²¹ Unsang mga ganti ang atong madahom sa pagpaningkamot aron mapasundayag ang pagpugong sa kaugalingon sa tanang panahon? Sa usa ka butang, dili gayod kita makaani ug mapait nga mga bunga sa kahakog. Kita makabatog pagtahod-sa-kaugalingon ug usa ka mahinlong tanlag. Atong mapahilayo ang atong kaugalingon sa daghan kaayong mga kasamok ug magpabilin diha sa dalan sa kinabuhi. Dugang pa, atong mahimo ang kinamaayong butang nga mahimo nato ngadto sa uban. Labaw sa tanan, atong masunod ang Proverbio 27:11: “Magmaalamon ka anak ko, ug lipaya ang akong kasingkasing, aron matubag ko siyang nagatamay kanako.” Ug kana ang kinadak-ang ganti nga mahimo natong mabatonan​—ang pribilehiyo sa pagpahimuot sa kasingkasing sa atong mahigugmaong Amahan, si Jehova!

Nakahinumdom Ka Ba?

◻ Sa unsang paagi ang kahadlok sa Diyos motabang kanato nga magpugong sa kaugalingon?

◻ Nganong ang gugma motabang kanato sa pagpasundayag sa pagpugong sa kaugalingon?

◻ Sa unsang paagi ang pagpugong sa kaugalingon motabang diha sa mga relasyon sa pamilya?

◻ Unsang mga tagana ang angay natong pahimuslag maayo kon buot natong maugmad ang pagpugong sa kaugalingon?

[Hulagway sa panid 15]

Si Jose nagpugong sa kaugalingon sa dihang gitintal

[Hulagway sa panid 17]

Ang pagdisiplina sa bata nga ipadapat uban ang kakalma ug gugma nagkinahanglag tinuod nga pagpugong sa kaugalingon