Mga Pangutana Gikan sa mga Magbabasa

◼ Unsay buhaton sa usa ka Kristohanong pamilya kon ang ilang anak kinahanglang motungha sa tunghaang ginapugos ang relihiyosong pagtudlo?

Dili buot sa Kristohanong mga ginikanan nga matudloan ang ilang mga anak sa mga pagtulon-an sa bakak nga relihiyon. Apan dunay mga situwasyon tingali nga dili malikayan sa mga anak nga makatambong sa klase dihang itudlo ang relihiyon, bisag dili sila makig-ambit sa bakak nga mga buhat o mga seremoniya sa relihiyon.

Ang higala sa Diyos nga si Abraham naghatag ug usa ka maayong sumbanan bahin sa relihiyosong pagtudlo sa kabataan. Iyang gipadako ang iyang mga anak sa Canaan, diin sila gilibotan sa relihiyosong kabakakan ug sa talamayon “sagradong” mga buhat. (Itandi ang Exodo 34:11-15; Levitico 18:21-30; Deuteronomio 7:1-5, 25, 26; 18:9-14.) Bisan pa niana, siya ang tuboran sa relihiyosong instruksiyon sa iyang panimalay. Ang Diyos masaligon nga si Abraham “magtudlo sa iyang mga anak ug ang iyang umaabot nga panimalay aron ilang bantayan ang dalan ni Jehova pinaagi sa pagbuhat sa matarong.”​—Genesis 18:19.

Ingong usa ka batan-on, si Jesus usab nakabatog kaayohan gikan sa pamilya ug pagtudlo sa kongregasyon diha sa matuod nga pagsimba. Busa, siya “mitubo sa kinaadman ug sa lawas ug gikahimut-an siya sa Diyos ug sa mga tawo.”​—Lucas 2:52.

Sa kadaghanang bahin sa yuta, ang Kristohanong mga batan-on nakadawat ug sekular nga edukasyon sa mga tunghaang publiko. Dili ang tanang gitudlo bug-os nahiuyon sa kamatuoran sa Bibliya ug sa napamatud-ang kamatuoran. Pananglitan, daghang kaliwatan sa Kristohanong mga batan-on nakatungha sa mga klase sa siyensiya o biolohiya ingong bahin sa ilang normal nga kurikulum. Ang kadaghanan kanila sa ingon naladlad sa kaylap nga mga teoriya sa ebolusyon ug sa nalangkit nga mga hunahuna bahin sa “kinaiyanhong” gigikanan sa kinabuhi sa yuta.

Kini nga pagkaladlad, hinunoa, wala magpaliso niining Kristohanong mga batan-on sa pagkahimong mga sumusunod sa walay-diyos nga ebolusyon. Ngano? Tungod kay diha sa balay ug sa Kristohanong mga tigom, sila nakabaton na ug tukmang impormasyon nga gipasukad sa dinasig nga Pulong sa Diyos, nga nakatabang kanila nga mabansay ang ilang ‘mga gahom sa pagsabot sa pag-ila sa husto o sayop.’ (Hebreohanon 5:14) Gitun-an sa daghang ginikanan ang ilang mga anak ug timbang nga pagkobre sa ebolusyon diha sa makapalig-on sa pagtuo nga librong Life​—How Did It Get Here? By Evolution or by Creation?a Busa kay nasangkapan, kining nagtunghang kabataan dili modawat ingong katuohan ang mga gitudlo sa klasehanan bahin sa ebolusyon. Apan mahimong motubag sila diha sa mga klase ug sa mga eksamin nga sila namati ug makakat-on sa mga detalyeng gipresentar. Ang uban gani nakahatag ug kapiliang katin-awan nga nahiuyon sa mga kamatuoran nga gipadayag diha sa Bibliya pinaagi sa Maglalalang sa tawo.​—1 Pedro 3:15.

Apan, komusta ang bahin sa klase nga gigahin sa pagtudlo mahitungod sa pangunang lokal nga relihiyon o bisan relihiyon sa katibuk-an?

Malagmit gayod nga ang maong pagtudlo dili itanyag nga neyutral, ingong impormasyon lamang. Tingali mao kanay relihiyon sa magtutudlo ug sa ingon mosulay sa pag-impluwensiya sa mga hunahuna ug mga kasingkasing sa mga estudyante. Busa ang mga Saksi ni Jehova mopalabi nga ang ilang kabataan pagawason gikan sa mga klase sa pagtudlo bahin sa relihiyon. Kini makaarang sa ilang mga anak sa paggamit sa panahon sa tunghaan nga mapuslanon sa pagtapos sa mga asaynment alang sa ubang mga klase o sa pagtuon diha sa librarya sa tunghaan.

Diha sa ubang mga dapit, hinunoa, ang maong mga hangyo gidumilian; ang tunghaan o publikong mga awtoridad nag-awhag pa nga ang tanang kabataan motambong ug kompletohon ang kurso sa relihiyon aron makagraduwar. Ang matag pamilya na ang personal nga mohukom kon unsay buhaton niining bahina.

Ang ubang mga alagad ni Jehova sa nangagi sa dili-kinabubut-on nakaagom usab ug mga kahimtang diin ilang giantos ang pagkaladlad sa relihiyosong mga pagtulon-an o mga buhat samtang nagpabiling maunongon sa matuod nga Diyos. Tingali mao kanay nahitabo kang Moises. Siya gipadako ingong apo ni Paraon sa Ehipto, ug siya “gitudloan sa tanang mga kaalam sa mga Ehiptohanon.” (Buhat 7:20-22) Kana lagmit lakip sa mga pagtuo ug relihiyosong mga batasan nga komun sa Ehipto. Apan si Moises napanalipdan sa superyor nga instruksiyon nga dayag nga iyang nadawat gikan sa iyang pamilya ug tingali sa ubang mga Hebreohanon.​—Exodo 2:6-15; Hebreohanon 11:23-26.

Tagda usab ang panig-ingnan sa tulo ka batan-ong mga Hebreohanon, mga kauban ni Daniel, kinsa gihatagan ug linaing instruksiyon sa Babilonya ug gihimong mga empliyado sa kagamhanan. (Daniel 1:6, 7) Sila walay kagawasan sa pagbuhat o sa pagdumili sa pagbuhat ug bisan unsa nga ilang gusto. Sa usa ka okasyon misugo si Haring Nabucodonosor nga sila magtipon uban sa ubang mga opisyal atubangan sa bulawang imahen nga iyang gitukod diha sa walog sa Dura, nga dinhi himoon ang mga buhat sa pagsimba sa nasod. Unsay gihimo sa tulo ka Hebreohanon? Kita makatino nga nagtinguha sila nga magpalayo didto, apan kadto dili posible.b Apan sila nagpabiling matinumanon sa ilang pagtuo ug sa Labing Gamhanang Diyos. Ang ilang diyosnong mga tanlag nagtugot kanila sa pagtambong nga sa samang panahon hugot nga midumili sa pagpakigbahin, o sa personal makig-ambit, sa bisan unsang buhat sa bakak nga relihiyon.​—Daniel 3:1-18.

Sa dihang pugson ang tanang mga estudyante sa pagtambong sa usa ka relihiyosong klase ug tingali sa pagkat-on aron makapasar sa sukdanang mga pasulit, ang kabataan gikan sa mga pamilya sa matuod nga mga Kristohanon mahimong motambong, sama sa gihimo niadtong tulo sa sugo ni Nabucodonosor. Apan unahon sa Kristohanong mga batan-ong ang Diyos. Dili na kinahanglang ilang supakon ang matag sayop nga pahayag nga ihatag o matag dili-kasulatanhong mga bubat nga ginahimo sa uban, sama sa tulo ka Hebreohanon nga wala mosulay sa pagbabag sa dihang ang uban miyukbo sa bulawang imahen. Apan, ang Kristohanong mga batan-on dili makig-ambit uban nila sa mga buhat sa pagsimba, sa pagduyog sa pag-ampo, sa pag-awit ug relihiyosong mga awit, ug susama niana.

Kining mga batan-ona angay magkugi sa ubang mga panahon sa pagkuhag makapalig-ong kahibalo ‘gikan sa balaang kasulatan nga makaarang kanila sa pagkahimong maalamon alang sa kaluwasan pinaagi sa pagtuo kang Kristo Jesus.’ (2 Timoteo 3:15) Pinaagi sa pakigkomunikar uban sa ilang mga anak, kinahanglang susihon kanunay sa mga ginikanan ang diwa sa gitudlo sa klase. Kini motabang sa hamtong nga mga Kristohanon sa pagkakita kon unsa ang kinahanglang tul-iron o tinoon gikan sa Bibliya aron ang ilang mga anak dili-maglibog o mahisalaag.

[Mga footnote]