Nakahinumdom Ka Ba?

Maampingon mo bang gipamalandong ang bag-ong mga isyu sa Ang Bantayanang Torre? Kon mao, tingali maikag ka sa paghinumdom sa mosunod:

◻ Sa unsang paagi ang asoy sa Bibliya bahin sa mga gubat ni Jehova mohatag kanato ug pagsalig sa pag-atubang sa “dakong kasakitan”? (Mateo 24:21)

Kanunay nga nagagahom, si Jehova nakapasundayag nga labaw siya ug hunahuna sa iyang mga kaaway ug makapamaniobra sa mga kahimtang alang sa kaluwasan sa iyang katawhan.​—8/15, panid 27.

◻ Unsa ang kinahanglang maandam nga buhaton sa mga ginikanan aron mahuptan ang komunikasyon tali kanila ug sa ilang mga anak?

Ang mga ginikanan kinahanglang mogugol ug panahon alang sa ilang mga anak. Usab, kinahanglang andam silang mohimog mga pagsakripisyo alang sa ilang mga anak tungod ug alang sa ilang mental, lawasnon ug espirituwal nga pagtubo.​—9/1, panid 22.

◻ Unsay kahulogan sa pagkausab sa dagway ni Jesus alang kanato karong adlawa? (Marcos 9:2-4)

Ang pagkausab sa dagway makatukod sa pagtuo diha sa matagnaong pulong ni Jehova ug makalig-on sa atong pagtuo diha kang Jesu-Kristo ingong Anak sa Diyos ug sa gisaad nga Mesiyas. Kini mopalig-on usab sa atong pagtuo sa pagkabanhaw ni Jesus ngadto sa espirituhanong kinabuhi ug mopadako sa atong pagtuo diha sa kagamhanan sa Diyos.​—9/15, panid 23.

◻ Unsay kahulogan “sa makadiyut” diha sa Isaias 11:6?

Ang maampingong paghubad niini nga bersikulo nagpakita nga ang lobo ug ang nating karnero dili mag-uban kanunay diha sa bag-ong kalibotan. Tingali kining mga hayopa duna gihapoy lahi nga mga puy-anan ug busa nailalom sa mga matang sa ‘anad nga mga hayop ug ihalas nga mga mananap’ sama sa pagkalungtad diha sa orihinal nga Paraiso. (Genesis 1:24) Apan, ang mga hayop may kalinaw sa usag usa ug mahimong magkauban nga walay kapeligrohan.​—9/15, panid 31.

◻ Unsa ang yawi sa tinuod nga Kristiyanidad?

Ang gugma mao ang yawi sa matuod nga Kristiyanidad. Ang pagtuo, mga binuhatan, ug hustong panag-uban maoy hinungdanon, apan kon walay gugma ang ilang bili dili mabatonan. Mamao kini tungod kay si Jehova labaw sa tanan mao ang Diyos sa gugma. (1 Corinto 13:1-3; 1 Juan 4:8)​—10/1, panid 20.

◻ Ang ekspresyon ba nga “may panahon sa pagkatawo ug panahon sa pagkamatay” sa Ecclesiastes 3:2 nagpaluyo sa ideya nga gitino na sa Diyos ang panahon sa atong kamatayon?

Wala. Si Solomon sa yano naghisgot lamang sa padayong siklo sa kinabuhi ug kamatayon nga maagoman sa di-hingpit nga mga tawo. Ang Ecclesiastes 7:17 nag-ingon: “Dili ka magpalabi sa pagkadaotan, ni magbinuangbuang ikaw. Ngano man nga magpakamatay ka sa dili pa ang imong panahon?” Unsay kahulogan niining tambaga kon ang panahon sa kamatayon sa usa gitino na?​—10/15, panid 5, 6.

◻ Unsay pamatuod nga si apostol Pablo dili mao ang unang obispo sa Roma?

Wala gayoy pamatuod nga si Pedro nakaduaw sa siyudad sa Roma; ug si Pedro wala gayoy gihisgotan bahin sa iyang kaugalingon gawas lamang nga siya usa ka apostol ni Kristo. (2 Pedro 1:1)​—10/15, panid 8.

◻ Angay ba nga magpadala ang mga Kristohanon ug mga bulak alang sa paglubong?

Kon nabantog nga ang usa ka batasan (o usa ka desinyo, sama sa krus) dunay bakak relihiyosong kahulogan diha sa inyong lugar, kinahanglang likayan gayod kini. Sa ingon ang mga Kristohanon dili magpadalag bulak nga pormag krus o gamiton kini sa pipila ka pormal nga paagi nga tino gayod nga dunay bakak relihiyosong kahulogan. Apan, karong panahona sa daghang kayutaan, ang batasan sa pagtaganag mga bulak nga walay relihiyosong kalangkitan maoy kaylap. Ang ubang mga Kristohanon nakapadalag mga bulak aron makadugang ug igong kasaya sa masulob-ong okasyon ug sa pagpakitag simpatiya ug kabalaka.​—10/15, panid 31.

◻ Unsay gipatin-aw sa opisyal nga kahubitan mahitungod sa Trinidad?

Ilang gipatin-aw nga ang doktrina sa Trinidad dili usa ka yano nga ideya. Hinunoa, kini maoy komplikadong hugpong sa mga ideya nga gihiusa ug gitingob sa daghang kasiglohan. Daghang eskolar, lakip sa mga nagtuo ug Trinidad, miangkon nga ang Bibliya sa aktuwal wala kasudlig doktrina sa Trinidad.​—11/1, panid 21, 22.

◻ Nganong ang 29 K.P. usa ka lisoanang petsa sa kasaysayan sa Bibliya?

Tungod kay pinaagi sa pagtipon sa tukmang impormasyon sa Bibliya uban sa sekular nga pagpetsa sa panahon sa pagmando ni Tiberio, mabanabana sa mga estudyante sa Bibliya nga nagsugod ang ministeryo ni Juan sa tingpamulak sa 29 K.P. ug nga unom ka bulan sa ulahi, sa tinghunlak sa 29 K.P., gibawtismohan ni Juan si Jesus.​—11/15, panid 31.

◻ Unsay kahulogan sa “pagsimba” alang sa Hebreohanon ug pinulongang katawhan, ug sa unsang paagi kini aplikado sa mga Saksi ni Jehova karong adlawa?

Ang Hebreohanong katumbas sa pulong “pagsimba” mahimong hubaron nga “pag-alagad.” Busa, sa hunahuna sa mga Hebreohanon, ang pagsimba nagkahulogang pag-alagad. Kini ang nasabtan sa mga Saksi ni Jehova karong adlawa, busa ang usa ka hinungdanon kaayong timaan sa matuod nga relihiyon mao ang diyosnong pag-alagad sa pagsangyaw.—12/1, panid 19.