Hain nga Diyos ang Simbahon?
LAHI sa kahayopan, kita nga mga tawo dunay katakos sa pagsimba. Kini bahin sa atong kahulmahan sukad sa pagkatawo. Nagbaton usab kitag salabotan sa pamatasan o moral, usa ka tanlag nga mogiya nato bahin sa kon unsay matarong ug kon unsay daotan. Sa nagkalainlaing mga paagi gisunod natong tanan ang maong tanlag, ug sa pagbuhat niana, daghan nagasalig sa usa ka diyos o mga diyos alang sa giya.
Sa milabay nga usa o duha ka siglo, gilalis sa pila ka kalibotanong utokan ang paglungtad sa usa ka labing gamhanang Diyos ug Maglalalang. Sa 1844, gipahayag ni Karl Marx nga ang relihiyon mao “ang opio sa katawhan.” Sa ulahi, gipatungha ni Charles Darwin ang teoriya sa ebolusyon. Unya miabot ang Bolshevik nga rebolusyon. Sa Silangang Uropa ang ateyismo nahimong opisyal nga polisa sa estado, ug giangkon nga ang relihiyon mapuo duyog sa kaliwatan sa 1917. Apan kadtong mga ateyistaha dili makausob sa pagkagama nato nga mga tawo. Gipamatud-an kini sa paggimaw pag-usab sa relihiyon sa Silangang Uropa ning panahona.
Bisan pa niana, sumala sa ginaingon sa Bibliya, adunay daghan nga “gitawag nga ‘mga diyos,’ kon kaha sa langit o sa yuta, maingon nga adunay daghang ‘mga diyos’ ug daghang ‘mga ginoo.’” (1 Corinto 8:5) Latas sa kapanahonan gisimba sa katawhan ang kapid-ang mga diyos. Dihay mga diyos sa pagkamasanayon, sa gugma, sa gubat, ug sa bino ug hudyaka. Sa Hindu nga relihiyon lamang, ang mga diyos mokabat ug milyonmilyon.
Ang mga trinidad sa mga diyos nag-usbaw sa Babilonya, Asirya, ug Ehipto, ingon man diha sa Buddhistang kayutaan. Ang Kakristiyanohan usab nagbaton sa iyang “santisima” Trinidad. Ang Islam, nga nagsalikway sa Trinidad, “walay laing diyos kondili si Allah.” Dugang pa, bisan kadtong motamay sa ideya sa usa ka dili-makita, labing-gamhanang Diyos nagbaton sa ilang kaugalingong mga diyos. Pananglitan, sa Filipos 3:19, ang Bibliya nagaingon bahin sa mga tawo nga nalit-agan sa materyalistikanhong mga pangagpas: “Ang ilang tiyan mao ang ilang diyos.”
Kadaghanang tawo nagasimba sa diyos o mga diyos sa nasod o sa katilingban nga ilang natawhan. Mopatungha kinig mga pangutana. Ang tanan bang paagi sa pagsimba mosangko sa samang dapit—sama sa mga dalan patungas sa usa ka tuktok sa bukid? O daghan ba sa misteryosong mga dalan sa relihiyon mosangko sa katalagman—samag mga agianan padulong sa usa ka pangpang? Aduna bay daghang hustong paagi sa pagsimba o adunay usa lamang? Aduna bay daghang takos-dayegon nga mga diyos o adunay usa lamang ka Labing Gamhanang Diyos nga takos sa atong linaing paghalad ug pagsimba?
Ang Pagtungha sa Bakak nga mga Diyos
Ang mga pangutana sa itaas angay natong tugkaron pag-ayo. Ngano? Kay ang labing karaang nahisulat nga awtoridad sa relihiyon, ang Bibliya, nagbatbat kon giunsa pagdani sa usa ka bakak nga diyos, nga milihok pinaagi sa usa ka serpente, ang una natong mga ginikanan aron sa pagsubay sa dalan sa katalagman. Naagoman nato ang makapaguol nga sangpotanan sa iyang estratehiya hangtod ning adlawa. (Genesis 3:1-13, 16-19; Salmo 51:5) Si Jesus, “ang Anak sa Diyos,” naghisgot nianang masuklanon nga diyos ingong “ang magmamando niining kalibotana.” Usa sa mga apostol ni Jesus nagtawag niya “ang diyos niining sistema sa mga butang.” (Juan 1:34; 12:31; 16:11; 2 Corinto 4:4) Sa Pinadayag kapitulo 12, bersikulo 9, siya gibatbat ingong “ang unang serpente, ang usang gitawag Yawa ug Satanas, nga nagalimbong sa tibuok gipuy-an nga yuta.” Ang usa ka tibuok-kalibotang imperyo sa bakak nga relihiyon nailalom sa pagmando ni Satanas.
Si Satanas mao ang pangunang limbongan. (1 Timoteo 2:14) Malinglahon niyang gipahimudsan ang kinaiyanhong tinguha sa tawo sa pagsimba pinaagi sa pagpasiugda sa daghang matang sa mga diyos—mga espiritu sa katigulangan, mga imahen, mga larawan, mga Madonna. Gipasiugda pa niya ang pagsimba ug mga tawhanong diyos, sama sa gamhanang mga magmamando, madaogong mga heneral, ug mga bituon sa pelikula ug dula. (Buhat 12:21-23) Maayong kita magbantay, mohukom sa pagpangita ug pagsimba lamang sa matuod nga Diyos, si kinsa sa pagkatinuod “dili halayo gikan sa matag usa kanato.”—Buhat 17:27.
Nan, si kinsa ba kining linaing Diyos nga atong pagasimbahon? Mga 3,000 ka tuig kanhi, ang salmista sa Bibliya nagbatbat kaniya ingong “ang Labing Hataas . . . , ang Usa nga Makagagahom sa Tanan . . . , ang akong Diyos, nga kaniya ako mosalig,” ug nagtawag kaniya pinaagi sa iyang dungganon nga ngalan—“Jehova.” (Salmo 91:1, 2) Sayosayo, si Moises miingon bahin kaniya: “Si Jehova nga atong Diyos maoy usa ka Jehova.” (Deuteronomio 6:4) Ug ang propetang si Isaias mikutlo sa Diyos mismo ingong nag-ingon: “Ako mao si Jehova. Kana mao ang akong ngalan; ug ang akong himaya dili nako igahatag sa uban, ni ang akong pagdayeg ngadto sa linilok nga mga larawan.”—Isaias 42:8.
Katuyoan ni Jehova nga Diyos nga hinloan ang iyang ngalan sa tanang pakaulaw nga gidohig niana sa bakak nga diyos si Satanas. Gihulagway niya kon giunsa niya pagbuhat kini sa tuig 1513 W.K.P., sa gigamit niya ang iyang propetang si Moises aron sa pagluwas sa katawhan sa Israel gikan sa pagdaogdaog sa Ehipto. Niadtong okasyona, gilangkit sa Diyos ang iyang ngalang Jehova pinaagi sa mga pulong: “Ako mao man ang mao ako.” (Exodo 3:14, 15) Bayawon niya ang iyang kaugalingon batok kang Paraon sa Ehipto, apan gisultihan usa niya kadtong daotang magmamando: “Tungod niini gitipigan ko ikaw nga buhi, aron igapakita ko kanimo ang akong gahom ug aron ang akong ngalan igapahayag sa tibuok nga yuta.”—Exodo 9:16.
Susama ang kahimtang karong adlawa. Sama kang Paraon sa kakaraanan, ang diyos niining kalibotana, si Satanas, nagasupak kang Jehova nga Diyos ug sa kamalansison nagahimo sa espirituwal nga pakiggubat batok sa mga tawo nga nahigugma sa pagkamatarong ug sa kamatuoran. (Efeso 6:11, 12, 18) Sa makausa pa, may katuyoan ang Diyos nga ituboy ang iyang ngalan bisan pa sa pagsupak ni Satanas. Hinuon, sa dili pa ipakita ang iyang gahom pinaagi sa paglaglag kang Satanas ug sa tanan niyang binuhatan, ipadala ni Jehova ang iyang mga magsisimba sa pagpahayag sa Iyang ngalan sa tibuok nga yuta. Kini nga pagsangyaw sa iyang ngalan maoy usa ka bililhong bahin sa matuod nga pagsimba.
Nahiangay niana, ang Diyos mismo nag-ingon nga ang maong mga magsisimba maoy iyang mga saksi, ang mga Saksi ni Jehova, “ang katawhan si kinsa akong giumol alang sa akong kaugalingon, aron sila magasugilon sa akong pagdayeg.” (Isaias 43:10-12, 21) Sa unsang paagi sila magasugilon sa pagdayeg ni Jehova? Sila nagawali ug nagatudlo sa dayag ug gikan sa balay-balay, nga nagamantala sa maayong balita nga ang Gingharian ni Jehova, nga gimandoan sa iyang Anak, si Jesu-Kristo, mopatunghag walay-kataposang mga panalangin alang sa masinugtanong katawhan niining yutaa. Sa ingon, sila nagasimba sa Diyos “nga walay hunong,” sama sa gibuhat sa matuod nga mga Kristohanon sa unang siglo. (Buhat 5:42; 20:20, 21) Natagamtam ba nila ang balaang panalangin niini? Ang sunod nga mga panid magatubag.