Mga Magmamantala sa Gingharian Nagtaho
Si Jehova Nagaganti sa Usa ka Matinumanong Batan-on
ANG matinumanong mga batan-on mahal kaayo sa panan-aw ni Jehova. Ang mosunod nga kasinatian sa usa ka matinumanong batan-ong lalaki angay magdasig sa ubang batan-on sa paghupot sa ilang integridad samtang sila nagaalagad kang Jehova.
Sa Argentina usa ka 11-anyos nga batang lalaki ug iyang manghod nga lalaki nagtuon sa librong Ang Kamatuoran nga Motultol sa Kinabuhing Dayon uban sa ilang lola. Dihadiha, ang mga ginikanan sa mga batang lalaki nagpadayag ug pagsupak, ug gidid-an nila ang mga batang lalaki sa pagtambong sa mga tigom sa Kingdom Hall. Sulod sa usa ka panahon, aron makatambong ug mga tigom, ang mga batang lalaki nangikyas agi sa bentana sa banyo, nanglukso ngadto sa patyo, ug ngadto sa Kingdom Hall. Dayon may nagtug-an sa ilang inahan nga sila nagtambong ug mga tigom sa mga Saksi ni Jehova. Gihulga sila sa inahan nga kastigohon, ug kadto nakapahadlok sa batabatang lalaki, kinsa mihunong sa pagtuon. Apan ang magulang mipadayon. Sulod sa lima ka tuig siya nakahimo sa pagtambong ug mga tigom nga wala mahibalo ang iyang mga ginikanan.
Sa dihang siya 16 anyos na, buot siyang mokuhag usa ka kurso sa hayskul nga wala itanyag diha sa iyang lungsod. Ang pagkalayo sa balay maghatag niyag mas dakong kagawasan sa pagpadayon sa pagtuon sa kamatuoran. Misugot ang iyang mga ginikanan sa pagpalakaw kaniya, ug ang tanan maayo sulod sa tulo ka bulan. Dayon gipahibalo sa prinsipal sa tunghaan ang iyang mga ginikanan nga ang ilang anak lalaki dili mosaludar sa bandera o moawit sa nasodnong awit. Atubangan sa namating prinsipal, iyang mga ginikanan, usa ka sekretaryo, usa ka abogado, ug napulo ka propesor, ang batan-ong lalaki nakahatag ug ekselenteng pamatuod kon nganong siya dili makahimo sa maong mga buhat sumala sa tanlag. (Exodo 20:4, 5) Nasuko ang mga ginikanan. Ang inahan nagbaton ug rebolber, sa tuyo nga pusilon ang apohang-babaye, si kinsa giisip niya maoy nakaingon. Apan siya dili gayod makakita niyang nag-inusara.
Sa ulahi, sa sugyot sa usa ka higala sa pamilya ug uban sa pag-uyon sa prinsipal sa tunghaan, gihukom sa mga ginikanan nga ibutang ang batan-on sa usa ka klinika alang sa may sakit sa utok, sa paghunahuna nga ang sikyatrikong pagtambal magpabiya niya sa iyang pagtuo. Ang mga trabahante sa klinika nagdala sa batang lalaki sa gilay-ong 100 kilometros sakay sa usa ka kotse ug giineksiyonan siyag daghang insulin ug ubang droga hangtod nga siya mawad-ag panimuot. Sa pagkahigmata, siya bug-os nga mawala sa kaugalingon, walay mailhan, ug makaagom ug dili-bug-os nga amnesia. Tapos sa daghang pagsusi ang mga doktor wala makakitag sakit sa utok diha kaniya. Apan ang klinika nagpadayon ra sa pagtambal. Sa dihang may alamag, ang batang lalaki moampo nga mapinadayonon kang Jehova nga dili siya biyaan ug mangayo kaniyag kusog nga makaantos. Si Jehova nagpanalipod gayod kaniya, ug sa kadugayan siya gipagawas na sa klinika.
Sa usa ka okasyon ang prinsipal sa tunghaan nangutana sa batan-ong lalaki kon siya andam na bang mobakwi. Sa miingon siyang dili, giingnan sa prinsipal ang mga ginikanan nga ibalik siya sa klinika kay siya mas buang pa kay sa nangagi. Gidala siya sa iyang mga ginikanan ngadto sa usa ka balay-kaserahan ug gitugon ang tag-iya sa kaserahan sa pagtino nga siya dili motambong sa mga tigom sa mga Saksi ni Jehova. Sa pagbiya sa mga ginikanan, pagkadako sa katingala sa batang lalaki! Ang mga tag-iya sa balay-kaserahan maoy mga Saksi ni Jehova! Sa kataposan gipaundangan siya sa iyang mga ginikanan sa sikyatrikong pagtambal, kay kombinsidong ang mga doktor namakak kanila. Kasamtangan ang Korte Suprema sa Argentina mihukom nga ang mga anak sa mga Saksi ni Jehova dili mapalagpot gikan sa tunghaan tungod sa dili pagsaludar sa bandera.
Ang mao bang mga pagsulay nakahatag kaayohan sa maong matinumanong batan-on? Oo. Siya miingon: “Ako nakahatag ug dakong pamatuod ngadto sa mga doktor, mga propesor, mga kauban sa tunghaan, mga ginikanan, ug mga paryente, sa pagkamatuod ngadto sa tibuok siyudad. Ang akong mga ginikanan dili na kaayo supak ug nagbaton ug mas maayong pagtuo bahin sa mga Saksi. Karon, sa dihang lingion ko ang akong pagkabata, akong nakita unsa ka kahibulongan ug kamabination ang atong Diyos diha sa pag-atiman sa usang nagapabiling maunongon kaniya. Kini maoy sumala sa giingon sa salmista sa Salmo 27:10: ‘Kon ugaling ako biyaan sa akong kaugalingong amahan ug sa akong kaugalingong inahan, si Jehova mismo magadawat kanako.’”
Kining batan-ong lalaki karon maoy 23 anyos na, minyo, ug aktibo kaayo sa pag-alagad kang Jehova. Tinuod, ang gahom sa pagpaluyo ni Jehova maoy walay kinutoban.—Salmo 55:22.