Pahibalo

Tabang Alang sa mga Komite sa Nagamandong Lawas

Ang mga membro sa Nagamandong Lawas sa mga Saksi ni Jehova, sa pagkakaron may gidaghanong 12, nga padayong nagaalagad nga matinumanon sa ilang mga tinudlong-buluhaton. Sila mapasalamaton kanunay sa maunongong mga membro sa nagakadaghang “dakong panon” alang sa ilang madasigong pagtabang. (Pinadayag 7:9, 15) Tungod sa dakong pag-uswag sa tibuok-kalibotan, daw angay karong panahona ang pagtagana sa Nagamandong Lawas ug pila ka dugang nga tabang. Busa nahukom ang pagdapit ug daghang mga katabang, nga sa dakong bahin kuhaon gikan sa dakong panon, aron makaambit sa mga tigom sa matag usa sa mga Komite sa Nagamandong Lawas, sa ato pa, ang Personnel, Publishing, Service, Teaching, ug Writing nga mga Komite. Busa, ang gidaghanon sa nagatambong sa mga tigom sa matag usa niining mga komiteha dugangan ug pito o walo. Ubos sa pagdumala sa mga sakop sa komite sa Nagamandong Lawas, kini nga mga katabang makigbahin sa mga diskusyon ug magabuhat ug nagkalainlaing mga tinudlong-buluhaton nga ihatag kanila sa komite. Kining bag-o nga kahikayan epektibo sa Mayo 1, 1992.

Sa daghan nang mga tuig karon, ang gidaghanon sa nahibilin sa dinihogang mga Saksi nagakadiyutay, samtang ang gidaghanon sa dakong panon midaghan nga wala gayod nato dahoma. (Isaias 60:22) Pagkadako sa atong pasalamat kang Jehova alang niining katingalahang pag-uswag! Sa dihang ang bag-ong ngalan, mga Saksi ni Jehova, mapasalamatong gidawat niadtong 1931, ang kinatas-ang gidaghanon sa mga magmamantala sa Gingharian maoy 39,372, ang kadaghanan kanila nagaangkong dinihogang mga igsoon ni Kristo. (Isaias 43:10-12; Hebreohanon 2:11) Kan-unam ka tuig sa ulahi, sa 1991, ang tibuok-kalibotang kinatas-ang gidaghanon sa mga magmamantala maoy 4,278,820, nga taliwala kanila aduna lamay 8,850 ka nagaangkong mga dinihogang nanghibilin. Sama sa madahom sumala sa kahayag sa Kasulatan, ang “dakong panon” mas daghan karon kay sa nahibilin sa “gamayng panon” nga kapin sa 480 ngadto sa 1. (Lucas 12:32; Pinadayag 7:4-9) Sa pag-atiman sa nagauswag nga intereses sa Gingharian, ang nanghibilin sa pagkamatuod nagkinahanglan ug magapabili sa kooperasyon ug pagpaluyo sa dakong panon.

Sumala sa gipatin-aw niining gulaa sa Ang Bantayanang Torre, adunay usa ka pundok nga nag-alagad uban sa espirituwal nga Israel karong adlawa nga mahimong ikatandi sa Nethinim ug sa mga anak sa mga ulipon ni Solomon nga mibalik gikan sa pagkabihag sa Babilonya uban sa nanghibiling Hudiyohanon; kadtong dili mga Israelinhon mas daghan kay sa namalik nga mga Levihanon. (Esdras 2:40-58; 8:15-20) Ang “mga hinatag” gikan sa taliwala sa dakong panon karong panahona maoy hamtong nga Kristohanong mga lalaki nga may igong kasinatian ingong resulta sa pag-atiman sa pagkamagtatan-aw sa mga sanga, diha sa nagapanaw nga buluhaton, ug sa taliwala sa 66,000 ka kongregasyon nga natukod karon sa tibuok kalibotan.

Dili pa dugay, ang mga Kingdom Ministry School gihimo sa tibuok-kalibotan aron matudloan ang mga magtatan-aw ug ang ilang katabang nga mga ministeryal nga mga alagad. Sa Tinipong Bansa lamang, 59,420 ka magtatan-aw ang nakatambong. Kining “mga tigulang” sa ingon nasangkapan sa pagtuman sa ilang mga kaakohan nga mas epektibo.​—1 Pedro 5:1-3; itandi ang Efeso 4:8, 11.

Diha sa mga hedkuwarter sa Brooklyn sa mga Saksi ni Jehova, may pipila ka “mga hinatag” ang nakaalagad sa daghan nang katuigan. Kini nag-apil sa hamtong nga mga magtatan-aw gikan sa dakong panon nga nakabaton ug bahandi sa katakos ug kasinatian. Busa, ang Nagamandong Lawas nakapili ug pipila sa maong mga magtatan-aw sa pagtabang sa mga tigom sa mga komite sa Nagamandong Lawas. Kini sila dili kinahanglang mao ang mga lalaki nga may labing dugay nga rekord sa pag-alagad. Hinunoa, sila maoy hamtong, eksperyensiyadong mga lalaki nga may mga kuwalipikasyon nga sila takos sa paghatag ug tabang sa partikular nga mga natad. Ang ilang pagkanatudlo sa buluhaton uban sa usa ka komite wala maghatag kanila ug espesyal nga kahimtang. Sama sa gipamulong ni Jehova mahitungod sa iyang mga tinun-an, “kamong tanan mga igsoon.” (Mateo 23:8) Apan, dako ang ipiyal ngadto niining mga tawhana, ug busa “dako ang gikinahanglan” gikan kanila.​—Lucas 12:48.

Kami nalipay sa abanteng pagmartsa sa organisasyon ni Jehova karong adlawa. Sa nangaging napulo ka tuig, halos adunay 100 porsiento nga pag-uswag sa gidaghanon niadtong nag-alagad sa kanataran, nga nahiuyon sa tagna labot sa Dakong David, si Jesu-Kristo: “Sa kauswagan sa iyang kagamhanan ug sa pakigdait walay kataposan.” (Isaias 9:7, King James Version) Sa samang paagi nga ang Nethinim nagtrabaho duyog sa mga saserdote sa pag-ayo sa mga kuta sa Jerusalem, sa ingon karong adlawa ang tagna mahitungod sa organisasyon ni Jehova nagakatuman: “Ug ang mga langyaw maoy motukod sa imong mga kuta.” (Isaias 60:10; Nehemias 3:22, 26) Ang modernong-adlaw nga Nethinim angay sa komendasyon sa kasibot nga ilang gipakita sa pagtukod sa matuod nga pagsimba, nagatabang “sa mga saserdote ni Jehova” sa bisan unsang buluhaton o pag-alagad nga itudlo diha sa tibuok-kalibotang organisasyon ni Jehova.​—Isaias 61:5, 6.