Aduna bay Kaikyasan sa Makasasalang Kahimtang sa Tawo?
UBAN sa iyang upat ka tin-edyer nga anak, tiglimpiyo ug mga kasilyas sa publiko kaniadto si Chisako diha sa usa ka siyudad nga 600 ka kilometrong gilay-on gikan sa iyang balay. Samtang nagtrabaho, mangadyi siya ug sutra, diin ang kahulogan niini wala niya hisabti. Kadto maoy usa sa mga praktis sa usa ka relihiyosong grupo nga nanlimbasog sa pagpangita sa tinuod nga dugokan sa tanang mga relihiyon.
“Bisag padayong nagpraktis sa higpit nga kinabuhi,” nahinumdom si Chisako, “dili ako makausab sa akong personalidad. Sulod sa akong kasingkasing, dili ako makapasaylo sa uban ug dili makapakitag gugma nga may sinsero nga motibo.”
Bisan diha sa kayutaan sa Oryente, diin ang kadaghanang tawo walay ideya bahin sa sala sumala sa gitudlo diha sa Bibliya, daghan mibati ug pagtulisok sa konsensiya labot sa ilang mga kiling sa pagpakasala, sama ni Chisako. (Roma 2:14, 15) Kinsay wala mag-antos ug mabug-at nga mga pagbati tungod kay wala makapakitag kalulot sa usa ka tawo nga anaa sa makaluluoyng kahimtang o wala magbasol tungod sa mga sulti nga dili unta angay ibungat? (Santiago 4:17) Ug dili ba ang mangil-ad nga dagway sa kasina nagapanghipi diha sa kinasuloran sa mga batan-on ug sa mga tigulang?
Nganong may magubot man nga mga pagbati ang mga tawo? Tungod kay, nakaamgo man sila o wala, sila adunay kinasuloran nga pagbati sa sayop, o sa sala. Sa pagkatinuod, nahibalo man o wala ang mga tawo sa pagtulon-an sa Bibliya, ang tanan apektado sa makasasalang mga kiling. Ang usa ka eksperto bahin niining ulohana mihinapos: “Ang tanan nakasala ug nakabsan sa himaya sa Diyos.”—Roma 3:23.
Mapala ba ang Sala?
Daghang tawo karong adlawa, ilabina diha sa Kakristiyanohan, puliki sa pagsulay sa pagpapas sa mga pagbati sa sala ug pagkasad-an gikan sa ilang mga konsensiya. “Ang mismong pulong ‘sala’ . . . hapit nang mawagtang,” miingon si Dr. Karl Menninger diha sa iyang librong Whatever Became of Sin? Apan, ang paglikay sa paggamit sa pulong “sala” dili kaayo makatabang sama sa paglikay sa usa ka tawong tigulang sa pulong “tigulang.” Kinahanglang atong atubangon ang kamatuoran nga kita adunay makasasalang mga kiling ug nagkinahanglang luwason gikan nianang miserableng kahimtang. Apan pinaagi ni kinsa?
Gibangon sa Kristohanong apostol Pablo kanang pangutanaha human gidawat ang iyang kaugalingong mga kiling sa pagpakasala bisan pa sa tinguha sa pagbuhat sa husto. “Alaot ako nga tawo! Kinsay mopagawas kanako gikan niining lawasa nga iya sa kamatayon?” Dayon si Pablo mipadayon sa pagtubag: “Salamat sa Diyos pinaagi kang Jesu-Kristo nga atong Ginoo!” Ngano? Tungod kay ang Diyos naghikay ug kapasayloan sa sala pinaagi sa halad lukat ni Jesus.—Roma 7:14-25.
Apan, nakita sa kadaghanan sa 3,500,000,000 ka mga dili-Kristohanon sa kalibotan (duha ka pilo sa gidaghanon sa gitawag nga mga Kristohanon) ang ideya bahin sa lukat nga lisod kaayong sabton. Pananglitan, ang doktrina bahin sa lukat nahimong labing dakong babag sa usa ka Muslim nga nagpuyo sa Hapon nga nagtuon makadiyut sa Bibliya. Alang sa kadaghanan sa mga taga Oryente ang ideya nga ang usa ka tawo mahimong mamatay alang sa tanan maoy talagsaon.
Kini masabtan, kay bisan ang uban diha sa Kakristiyanohan naglisod man sa pagsabot niining paninugdan nga doktrina. “Ang teolohiya bahin sa Pagtubos,” miadmiter ang New Catholic Encyclopedia, “sa pila ka bahin dili-makab-ot ug nagpadayon ingong usa ka gumonhap sa teolohiya.”
Ang pagkalibog bahin niining doktrinaha maayong pagkailustrar sa mga pulong sa relihiyosong magsusulat nga si N. H. Barbour: “Ang kamatayon ni Kristo dili makabayad sa sala sa tawo sama ra nga ang pagtusok ug dinagom sa lawas sa usa ka langaw ug paantoson kini ug patyon dili maisip sa usa ka yutan-ong ginikanan ingong matarong nga bayad sa sala sa iyang anak.” Ang kauban niadto ni Barbour mao si Charles T. Russell, kinsa nakakita sa dinaliang panginahanglan sa pagdepensa sa pagtulon-an bahin sa lukat. Siya mibulag gikan kang Barbour ug unya sa 1879 misugod sa pagpatik ug usa ka bag-ong magasin, nga sa ulahi nahimong basahon nga imong gibasa. Sukad pa sa pagsugod niini, Ang Bantayanang Torre nahimong maglalaban sa halad lukat ni Jesu-Kristo.
Apan kini bang doktrinaha madawat sa mga tawong dili “Kristohanon” ug kagikan? Aron masayran, atong tan-awon sa duol kining pagtulon-ana bahin sa usa ka tawong namatay alang sa tanan.