Watchtower ONLINE NGA LIBRARYA
Watchtower
ONLINE NGA LIBRARYA
Cebuano
  • BIBLIYA
  • PUBLIKASYON
  • MGA TIGOM
  • w92 7/1 p. 4-7
  • Paglaom Mopukgo sa Kawalay-Kalaoman!

Walay video nga available.

Sorry, dunay problema sa pag-load sa video

  • Paglaom Mopukgo sa Kawalay-Kalaoman!
  • Ang Bantayanang Torre Nagapahayag sa Gingharian ni Jehova—1992
  • Sub-ulohan
  • Susamang Materyal
  • Ang Pasikaranan sa Paglaom
  • Paglaom​—“Tino ug Malig-on”
  • Paglaom​—“Usa ka Sinipit Alang sa Kalag”
  • “Pangupot nga Hugot”!
  • Padayong Palig-ona ang Imong Paglaom
    Ang Bantayanang Torre Nagapahayag sa Gingharian ni Jehova (Tun-anan)—2022
  • Ang Imong Paglaom Dili Moresultag Kahigawad
    Ang Bantayanang Torre Nagapahayag sa Gingharian ni Jehova (Tun-anan)—2023
  • Asa Ka Makakaplag ug Tinuod nga Paglaom?
    Pagmata!—2004
  • Paglaom
    Pagtugkad sa Kasulatan, Tomo 2
Uban Pa
Ang Bantayanang Torre Nagapahayag sa Gingharian ni Jehova—1992
w92 7/1 p. 4-7

Paglaom Mopukgo sa Kawalay-Kalaoman!

DIHA sa Webster’s Ninth New Collegiate Dictionary, ang kadesperado o kawalay-paglaom gibatbat ingong “tuman nga nawad-ag paglaom.” Nan, tin-aw nga sa pagpukgo sa kadesperado, atong gikinahanglan ang paglaom!

Ang alaot intawong tawo nga nagpuyo sa asiras dili bug-os madesperado kon siya adunay paglaom. Ang paglaom makahatag gani sa mga nag-antos ug depresyon sa kaisog ug kusog sa pag-antos. Apan ang paglaom kinahanglan nga masaligan! Unsay ipasabot niini?

Ang Pasikaranan sa Paglaom

Tagda ang nahitabo kang Sara, ang asawa sa patriarka nga si Abraham. Siya, nga hapit nang mag-90 anyos, sa gihapon wala makapanganak ug dugay nang nawad-ag paglaom nga manganak. Bisan pa, sa diha nga ang iyang bana maoy 99 anyos, gisubli ni Jehova ang usa ka saad nga iyang gipahayag katuigan nga miagi​—si Abraham makabaton gayod ug usa ka “binhi,” o manununod. Si Abraham nasayod nga kadto usa ka kasaligan nga saad. Pagkadako gayod sa kalipay ni Sara sa dihang, sa milagrosong paagi, ang malipayong okasyon nahitabo, ug siya nanganak kang Isaac! (Genesis 12:2, 3; 17:1-4, 19; 21:2) Ang pagsalig ni Abraham sa Diyos wala masayop pagkapahimutang, sumala sa gisaysay ni apostol Pablo: “Tungod sa saad sa Diyos [si Abraham] wala matarog tungod sa kakulang ug pagtuo, apan nahimong gamhanan pinaagi sa iyang pagtuo, nga mihatag sa Diyos ug himaya.”​—Roma 4:20.

Sa pagsulat ngadto sa mga Hudiyo nga nahimong mga Kristohanon sa iyang adlaw, si Pablo nangatarongan nga sila makasalig sa saad sa Diyos nga kaluwasan pinaagi kang Jesus tungod sa duha ka maayong katarongan. Sa paghisgot sa saad sa Diyos kang Abraham ug sa Iyang nag-ubang balaang panumpa, ang apostol nangatarongan: “Ang mga tawo magapanumpa pinaagi sa usa nga dako, ug ang panumpa mao ang kataposan sa tanang lantugi, kay kini usa ka legal nga pasalig alang kanila. Niining paagiha ang Diyos, sa dihang iyang gituyo nga ipasundayag nga madagayaon pa ngadto sa mga manununod sa saad ang pagkawalay-pagkausab sa iyang tambag, miapil uban sa usa ka panumpa, aron nga, pinaagi sa duha ka walay-pagkausab nga mga butang diin dili mahimo sa Diyos ang pagbakak, kita nga mingkalagiw ngadto sa dalangpanan makabaton untag lig-on nga kadasig sa pagpangupot sa paglaom nga gibutang sa atong atubangan.” (Hebreohanon 6:16-18) Oo, ang mga saad sa Diyos matuod ug kasaligan. Si Jehova labing gamhanan ug sa linain makaarang sa pagpasalig sa katumanan sa iyang kaugalingong pulong.

Paglaom​—“Tino ug Malig-on”

Si Pablo misulat nga ang Kristohanong paglaom “tino ug malig-on.” (Hebreohanon 6:19) Si Pablo nahibalo kon diin gipasukad ang iyang paglaom. Siya misaysay: “Kini [ang paglaom] nagasulod sa tabil.” Unsay kahulogan niini? Si Pablo dayag nagtumong sa karaang templo sa Jerusalem. Sulod niadto mao ang Labing Balaan nga lawak, nga gibulag sa ubang bahin sa gambalay pinaagi sa usa ka tabil. (Exodo 26:31, 33; Mateo 27:51) Hinuon, ang literal nga templo sa Jerusalem dugay nang naguba. Busa, karong adlawa, unsa ang katumbas niining Labing Balaan?

Sa langit mismo, diin ang Diyos mismo naentrono! Gipatin-aw kini ni Pablo sa miingon siya nga human sa iyang pagkayab si Jesus “misulod, dili sa usa ka dapit nga balaan nga binuhat sa mga kamot [sa templo sa Jerusalem], nga maoy usa ka hulad sa kamatuoran, kondili sa langit mismo, aron sa maong panahon moatubang didto sa persona sa Diyos alang kanato.” (Hebreohanon 9:24) Busa ang Kristohanong paglaom, nga motabang kanato sa pagbugno sa kawalay-paglaom, nagdepende dili sa tawhanong mga politiko kondili sa langitnong kahikayan. Nagdepende kini sa Usa si kinsa gitudlo sa Diyos, si Jesu-Kristo, si kinsa mihatag sa iyang kinabuhi ingong usa ka lukat alang sa atong mga sala ug karon anaa sa atubangan sa Diyos alang kanato. (1 Juan 2:1, 2) Dugang pa, sumala sa subsob gipakita diha sa mga lindog niining magasina, kining mao mismong Jesus mao ang usang tinudlo nga balaanon aron magmando ingong Hari sa langitnong Gingharian sa Diyos ug nagamando na sukad sa 1914. Kining langitnong Gingharian duol nang maghanaw sa mga butang nga nagatukmod sa daghan sa pagkanawad-ag paglaom.

Paglaom​—“Usa ka Sinipit Alang sa Kalag”

Sa pagkombinsir sa iyang mga magbabasa nga ang ilang paglaom sa kaluwasan pinaagi kang Jesus maayo ug patukoranan, gigamit ni Pablo ang usa ka pagtandi. “Kini nga paglaom,” mipatin-aw siya, “atong nabatonan ingon nga sinipit alang sa kalag.”​—Hebreohanon 6:19.

Ang mga sinipit o angkla ilado sa mga biyahedor nga sama kang Pablo. Ang karaang mga angkla susama ra sa mga modernong angkla, nga kasagaran binuhat sa puthaw nga may duha ka samag-ngipong mga tumoy nga mohawid sa ilalom sa dagat. Sa pagpaingon sa Roma sa mga tuig 58 K.P., ang sakayan ni Pablo nameligro nga masangyad. Apan samtang ang sakayan nagpaingon sa mabaw pang katubigan, ang mga manlalayag “nagtambog ug upat ka angkla gikan sa ulin.” Salamat niadtong mga angklaha, ang sakayan naluwas sa bagyo.​—Buhat 27:29, 39, 40, 44.

Nan, unsay kinahanglang imong buhaton aron himoon ang imong paglaom nga sama ka lig-on sa angkla aron ikaw makasagubang sa kalisdanan sa pangabuhi, sakit sa lawas o emosyon, o bisan unsang ubang “mga bagyo” nga moabot tingali sa imong kinabuhi? Nahauna, pasaligi ang imong kaugalingon nga kasaligan ang mga saad sa Bibliya. “Tinoa ang tanang butang.” (1 Tesalonica 5:21) Pananglitan, sa dihang ang mga Saksi ni Jehova makigsulti kanimo sa sunod panahon, pamati sa ilang igasulti. Kon talagsa ra silang moduaw sa dapit nga imong gipuy-an, pangitaa sila sa labing duol nga Kingdom Hall. Ikaw dili pugson sa pagkuyog kanila, apan ikaw dapiton sa pagdawat ug libreng kurso sa pagtuon sa Bibliya, nga hikayon nga dumalahon sa bisan diin ug bisan kanus-a nga kombenyente alang kanimo.

Ang maong pagtuon magpasalig kanimo nga ang Diyos “mahimong tigganti niadtong maikagon nga nagapangita kaniya.” (Hebreohanon 11:6) Imong hisayran nga sa dili madugay ang Gingharian sa Diyos ubos sa Hari, si Kristo Jesus, maghanaw sa kadunotan ug pagkawalay-panag-angay nga nagpahinabo sa pagkawala sa paglaom sa daghan kaayo karong adlawa. Ubos nianang Ginghariana, kining yutaa ipasig-uli nga usa ka paraiso, ug ang Diyos maghatag ug kinabuhing dayon niadtong nahigugma kaniya. (Salmo 37:29; Pinadayag 21:4) Pagkamahimayaon nga paglaom!

Basaha pag-ayo ang Bibliya sa pagtan-aw nga kining paglaoma matuod. Unya magkugi sa pag-ugmad ug suod nga relasyon uban sa Diyos, nga mahimong iyang higala sama kang Abraham. (Santiago 2:23) Sanglit si Jehova mao ang “Tigpatalinghog sa pag-ampo,” sultihi siya sa imong mga kabalaka. Sa dihang ang imong pagduol maoy tim-os, ang imong pag-ampo magtabang nimo sa pagwagtang sa imong mga palas-anon ug mapukgo ang imong tuman nga kawalay-paglaom. Ang espiritu sa Diyos basin magbukas ug dalan sa pag-usab sa kahimtang nga nakapaguol kanimo.​—Salmo 55:22; 65:2; 1 Juan 5:14, 15.

“Pangupot nga Hugot”!

Human sa pagsugyot nga ang iyang kaubang mga tinun-an “magtino sa tanang butang,” si Pablo midugang: “Pangupot nga hugot sa maayo.” (1 Tesalonica 5:21) Usa ka paagi sa pagbuhat niini mao ang pagpakig-uban sa mga tawo nga nangupot nga hugot sa Kristohanong paglaom. Ang makinaadmanong Haring Solomon nagpasidaan: “Siya nga nagalakaw kauban sa mga tawong makinaadmanon mahimong maalamon, apan siya nga nagapakiglabot sa mga buangbuang mosangpot sa kadaotan.” (Proverbio 13:20) Ayaw itugot nga ang pagkamapihigon magpugong nimo sa pagpangitag maayong panag-uban. Pananglitan, taliwala sa mga Saksi ni Jehova anaa ang katawhan nga sa nangagi walay paglaom. Apan ang ilang pagtuon sa Bibliya, inubanan sa malipayong pakig-uban sa kaubang mga magtutuo, naglig-on sa ilang relasyon uban kang Jehova ug nagtagana kanila ug kasaligan, samag-angkla nga paglaom. Kini ba tinuod mopukgo sa kawalay-paglaom? Tinuod gayod.

Tagda ang kaso ni Annmarie, si kinsa nawad-ag paglaom tungod sa pagkaagom sa kapintasan sa iyang bana. “Mihukom ako sa pagtapos sa akong kinabuhi,” mipatin-aw siya, “apan tungod sa usa ka hinungdan mihukom ako sa pag-ampo una sa Diyos. Ako nahinumdom nga miingon, ‘Nganong dili ka man makatabang kanako? Sa dugay na ako naglaom kanimo, apan walay kapuslanan.’ Gitapos ko ang akong pag-ampo nga naghunahunang walay katuyoan ang kinabuhi, busa mas maayo pa nga ako mamatay. Niadtong gutloa may nanuktok sa pultahan. Mihukom ako sa dili pagtagad niadto, kay naglaom nga si bisan kinsa ang didto sa kadugayan molakaw ra.

“Ang pagtuktok nagpadayon, ug ako gisamokan. Gipahiran ko ang akong mga luha ug miadto sa pultahan sa pagtan-aw kon kinsa ang didto, nga naglaom nga makalingkawas dayon ako aron mabuhat ko ang akong giplano. Apan,” matud ni Annmarie, “salamat kang Jehova, wala kana mahitabo, kay sa akong pagbukas sa pultahan, akong nakaplagan ang duha ka babaye nga nagbarog didto. Tinuod, nalibog kaayo ako, ug wala ako makasabot kon unsay ilang gipanulti. Apan gitanyagan nila akog usa ka libro nga magpatin-aw nga ang kinabuhi adunay katuyoan. Kadto mao gayod ang akong gikinahanglan sa paghaling sa akong interes sa kinabuhi.” Gihikay sa iyang mga bisita ang regular nga pagtuon sa Bibliya uban kaniya. Nakat-onan ni Annmarie ang pagkahimong higala sa Diyos. Kini, sa baylo, mihatag kaniyag katuyoan sa kinabuhi. Karon, siya nagatabang sa uban sa pag-ugmad ug pagsalig sa Diyos.

Tingali naglaom ka nga matapos na ang kawalay-paglaom nga wala makaamgo sa tanan nga nalangkit. Apan kon ikaw nakaampo sukad: “Umanhi ang imong gingharian. Matuman ang imong kabubut-on, ingon didto sa langit, mao usab sa yuta,” nan ikaw nag-ampo nga moabot ang Gingharian sa Diyos ubos kang Jesu-Kristo, nga maoy magawagtang sa mga butang nga magtukmod sa katawhang matarong ug kasingkasing sa kawalay-paglaom. (Mateo 6:10) Ang imong personal nga pagtuon sa Bibliya ug regular nga pakig-uban sa uban nga nagbaton sa samang pagsalig molig-on sa imong pangupot sa paglaom nga moabot ang Gingharian ni Jehova ug dad-on ang Paraiso sa atong yuta. (1 Timoteo 6:12, 19) Kini mao ang mahimayaong paglaom nga ginapahayag niining magasina sa matag isyu. Sagopa ang paglaom nga kinasingkasing sa pagpakigbisog batok sa kawalay-paglaom. Sa pagkatinuod, ang paglaom “dili motultol sa kahiubos.”​—Roma 5:5.

[Hulagway sa panid 7]

Ang pagtuon sa Bibliya nagahatag kanatog paglaom nga nagasilbing “usa ka sinipit alang sa kalag”

    Cebuano Publications (1983-2025)
    Log Out
    Log In
    • Cebuano
    • Ipasa
    • Setting
    • Copyright © 2025 Watch Tower Bible and Tract Society of Pennsylvania
    • Kondisyones sa Paggamit
    • Polisa sa Pribasiya
    • Mga Setting sa Pribasiya
    • JW.ORG
    • Log In
    Ipasa