Pagpabili sa Bililhong Gasa sa Kinabuhi

KINABUHI​—pagkamahal nga kabtangan! Kon wala kini kita walay mabuhat. Sa diha nga kini mawala, kini dili mapasig-uli pinaagi sa bisan unsang tawhanon nga paagi. Kon mameligro ang atong kinabuhi, buhaton nato ang tanan nga posible sa pagtipig niini. Oo, ang pipila mosangpit pa sa labaw-tawhanong panabang sa panahon sa kalisdanan!

Mapahinumdoman kita sa asoy sa Bibliya mahitungod sa usa ka barko nga nasakpan ug kusog nga bagyo sa dagat. Sa diha nga hapit na kanang malunod, “ang mga manlalayag nangahadlok ug nanawag ug tabang, ang matag usa ngadto sa iyang diyos.” Sa ulahi, silang tanan misangpit sa matuod nga Diyos: “Ug, karon, Oh Jehova, hinaot pa unta nga kami dili mangamatay.” Ang asoy sa Bibliya nag-ingon usab: “Ilang gipanglabay sa dagat ang mga butang diha sa barko, aron kana magaan.”​—Jonas 1:4-6, 14; itandi ang Buhat 27:18, 19.

Kadtong mga manlalayag andam ganing mosakripisyo sa gimahal materyal nga mga butang sa paningkamot nga maluwas ang ilang mga kinabuhi. Ang materyal nga mga butang atong kapulihan​—apan ang kinabuhi dili. Ug kay sa kinaiyanhon gimahal nato ang atong mga kinabuhi, kita mopahilayo sa kapeligrohan. Pakan-on, bistehan, ug galmon nato ang atong mga lawas. Kita magpatambal sa diha nga kita magkasakit.

Bisan pa niana, ang Maghahatag ug kinabuhi nanginahanglan ug labaw pa gikan kanato kay sa yano nga pagsunod sa atong magapanalipod-sa-kaugalingon nga mga kinaiyahan. Kon buot sabton, ang kinabuhi usa ka bililhon kaayong gasa, ug nagagikan kini sa labing importanteng Persona sa tibuok nga uniberso. Tungod sa sinsero nga pagpabili sa Maghahatag ug sa gasa, dili ba angay nga mahalon nato ang kinabuhi? Ug dili ba kana maglakip sa pagbatog pagtahod sa mga kinabuhi sa uban?

Nan, dili kinahanglan nga kita matingala nga ang Kasugoan nga gihatag ni Jehova nga Diyos sa nasod sa Israel naglakip ug mga sugo nga gidesinyo sa pagpanalipod sa mga kinabuhi ug maayong panglawas sa uban. (Exodo 21:29; Deuteronomio 22:8) Ang mga Kristohanon karong adlawa sa susama kinahanglang magmabalak-on sa lawasnon nga kaluwasan. Pananglitan, kon ikaw may mga bata sa inyong balay, sa kadanghag pasagdan ba nimo nga makab-ot ang mga butang sama sa beads, mga alperel, dinagom, hirpin, o hait nga mga butang nga grabe nga makasamad sa usa ka bata nga sa kainosente magdula o magtulon kanila? Ang peligroso bang mga kemikal ug mga tambal gipondo nga dili makuha sa mga bata? Kon mayabo ang tubig sa salog, dali ka bang maghinlo niana aron masanta ang aksidente? Gitagad ba nimo ang dihadihang pag-ayo sa daot nga mga kasangkapang dekoryente? Ang imo bang sakyanan regular nga ginaayo? Ikaw ba drayber nga mahunahunaon sa kaluwasan? Kon gipabilhan gayod nimo ang kabililhon sa kinabuhi, matukmod ka sa paghimog makataronganong mga panagana niining bahina ug sa susamang mga kahimtang.

Hinuon, ikasubo nga isulti nga ang pipila dili maghatag gibug-aton sa ilang kinabuhi mismo. Pananglitan, kinsa karong adlawa ang wala mahibalo nga ang pagsigarilyo dili maayo sa lawas? Bisan pa, milyonmilyon naulipon sa bisyo, samtang nagkadaot ang ilang panglawas sa matag panahon nga sila mosuyop sa makahilong aso. Ang uban nagaabusar sa mga droga, ug ang uban pa gayod sa alkohol, ang tanan sa ilang kadaotan. Ang AIDS usa ka makapatay nga sakit nga wala pay hisayran nga tambal. Apan daghan ang makalikay unta nga hitakdan sa sakit kon molikay sila sa seksuwal nga imoralidad, sa pila ka matang sa pag-abusar sa droga, ug mga abuno sa dugo. Pagkagrabe nga kakulang sa pagpabili sa kinabuhi!​—Roma 1:26, 27; 2 Corinto 7:1.

Posible ang Pag-usab!

Kadtong si kinsa nagapabili sa ilang Dakong Maglalalang, si Jehova, adunay kusganong katarongan sa pag-isip sa kinabuhi ingong bililhon. Ang kinabuhi maoy iyang sagradong gasa. Busa sila andam sa paghimo sa bisan unsang kausaban nga kinahanglanon sa pag-isip niana nga usa ka balaang gasa. Tagda ang kasinatian ni Kwaku, usa ka maestro sa Ghana. Usa ka mapatuyangong alkoholiko, siya nag-usik-usik sa iyang kinabuhi.

Si Kwaku nahinumdom: “Gisulayan ko pagpugos ang akong asawa sa pagtahod kanako, nga sagad mosangpot sa mainitong mga panaglalis ug mga away, ilabina sa diha nga hubog ako. Tungod sa pagpatuyang sa ilimnong alkoholiko, ako kanunay nga walay kuwarta, ug sa subsob mapakyas sa pagtaganag kuwarta para sa pagsuportar sa pamilya. Hisabtan, kadto nakapalagot kaayo sa akong asawa. Sa diha nga ako mahutdan ug kuwarta (ug kini subsob kaayong mahitabo), buhaton ko ang bisan unsang mahimo nako sa pagsuportar sa akong bisyo. Kausa gigamit ko pa sa personal ang kuwarta nga akong nakolekta gikan sa akong mga estudyante alang sa katuyoan nga irehistro sila alang sa usa ka publikong pasulit. Ako nagpatuyang sa pag-inom ug gibangkahan ko pa ang akong mga kauban sa inom. Sa wala madugay ang adlaw sa panudya nakaapas kanako. Kon dili pa tungod sa tukma-sa-panahong pagsalga sa prinsipal nako sa eskuylahan, mawad-an na unta akog trabaho.

“Gubot kaayo ang akong kinabuhi. Naulaw ako, apan sa wala madugay wala na ako mobati niana. Dayon nakahunahuna ako sa paghikog kay gibati nako nga pakyas ako sa kinabuhi. Sa gihapon, ako wala makabulag sa pagkaadikto sa alkohol. Apan sa dihang usa ka adlaw sa usa ka bar ako nalangkit sa usa ka away tungod sa kahubog ug nadugmakan, sa kangil-ad nakaamgo ako nga ang akong gugma sa alkohol may adlaw nga maoy mopatay kanako.

“Sulod niana nga panahon, ang mga Saksi ni Jehova sa panapanahon moduaw sa among balay, nga mosulay sa pagpaikag kanamo sa Bibliya. Ang akong asawa ug ako sa kanunay molikay kanila kay abi namog sila samokan. Ugaling, usa ka panahon gihukom nako nga mamati kanila tungod sa kaluoy. Ang usa ka pagtuon sa Bibliya sa wala madugay nakapaamgo kanako sa kahibulongang paglaom nga mabuhing walay kataposan sa bag-ong sistema sa Diyos. Sa dugang gitun-an ko ang Bibliya uban sa tabang sa mga Saksi ni Jehova, sa halalom ang akong pagpabili mitubo alang kang Jehova ingong atong Maghahatag-Kinabuhi ug sa iyang gasa sa kinabuhi, ug sa dugang ako nahingangha sa pagkapraktikal sa tambag sa Bibliya. Kadto sa dugang midasig nako sa paghinlo sa akong kinabuhi. Dili kadto sayon, kay kinahanglang suklan ko nga mapinadayonon ang isog nga ilimnon ingon man ang akong karaang mga barkada. Si Jehova, ang Tigpatalinghog sa pag-ampo, nakakita sa hugot nga hukom sa akong kasingkasing ug midungog nako.a

“Ang akong asawa, bisan pag dili usa sa mga Saksi ni Jehova, karon dako ug pagtahod kanako ug sa akong relihiyon tungod sa dakong pagkabalhin nga iyang napanid-an sa akong kinabuhi ug sa among relasyon ingong magtiayon. Ang among mga silingan dili na kinahanglang mopatunga sa mga away tali sa akong asawa ug kanako. Gimahal ko ang kalinaw sa hunahuna nga ako karong gitagamtam. Sa pagkatinuod, ang pagpabili kang Jehova nga Diyos ingong atong Maghahatag-Kinabuhi, pagsagop sa iyang punto de vista mahitungod sa pagkabililhon sa kinabuhi, ug pagsugot sa iyang mga pahimangno kon unsaon pagkinabuhi mao ang bugtong mapuslanon nga dalan sa kinabuhi.”

Tanyag sa Diyos nga Kinabuhing Dayon

Ang libolibo, sama kang Kwaku, natabangan sa mga Saksi ni Jehova sa “pagsul-ob sa bag-ong pagkatawo nga nalalang sumala sa kabubut-on sa Diyos diha sa matuod nga pagkamatarong ug pagkamaunongon.” (Efeso 4:24) Sila nakapabili dili lamang sa ilang kinabuhi karon apan sa paglaom usab nga kinabuhing dayon sa usa ka yutan-ong paraiso. Ang Bibliya nagasaad nga sa maong Paraiso nga hinimo sa Diyos, walay molupyo sa yuta ang makasinati pag-usab sa makutkoton nga kahapdos sa kagutmanan, kay “si Jehova sa mga panon mohimo gayod alang sa tanan nga mga katawhan . . . sa usa ka kombira sa matambok nga mga pagkaon.”​—Isaias 25:6.

Sa pagkakaron, ang kinabuhi, bisan pag kahibulongan nga gasa, mao lamay temporaryo. Ginaatubang sa tanan ang kamatayon, ug pagkamakapaguol nga hampak ang kamatayon! Ang pagtan-aw nga ang usa nga imong gihigugma mahanaw gikan sa mga buhi nga manaog ngadto sa kahilom sa lubnganan makapaguol kaayo, nga walay pagpanobra sa pagsulti. Apan ubos sa Gingharian sa Diyos, nga gimandoan ni Kristo, ang saad ni Jehova matuman: “Ang kamatayon mawala na, ni may pagbalata ni paghilak ni kasakit pa. Ang unang mga butang miagi na.”​—Pinadayag 21:4.

Sa maong panahon ang gasa sa kinabuhi igahatag sa kahibulongan nga paagi. Ang mga makalabang-buhi sa kataposang kasakitan niining yutaa may kahigayonan nga makasulod sa kahingpitan sa kinabuhi. Ug unya, pinaagi sa pagkabanhaw, usa ka pagpasig-uli sa kinabuhi, ipasig-uli ni Jehova nga Diyos ang iyang bililhon kaayong gasa ngadto niadtong nangatulog sa kamatayon. (Juan 5:24, 28, 29) Kini magkahulogan sa paghibalik sa namatay nga mga minahal ug sa mahadlokon-sa-Diyos nga mga tawo sa karaan!

Kini bang tanan maayo kaayo aron matinuod? Dili, kay “sa Diyos walay pahayag ang dili mahitabo.”​—Lucas 1:37; itandi ang Job 42:2.

Dugang pa, si Jehova nga Diyos mismo naghatag sa katawhan ug usa ka pasalig nga kining tanan mahitabo. Sa unsang paagi? Pinaagi sa paghalad sa usa nga labing minahal sa iyang kasingkasing, ang iyang minahal nga Anak, si Jesu-Kristo, sa paglukat kanato gikan sa sala ug kamatayon. Ang Roma 8:32 nagapasalig kanato: “Siya [Jehova nga Diyos] si kinsa wala gani magpahigawas sa iyang kaugalingong Anak kondili nagtugyan kaniya alang kanatong tanan, dili ba usab nga pinaagi kaniya sa maluluton igahatag niya kanato ang tanan nga ubang butang?” Ang Bibliya nagasugilon kanato nga kini mag-apil sa paghinlo sa katawhan gikan sa moral nga kadunotan ug pagpapas sa tanang matang sa inhustisya, krimen, ug kabangisan. (Isaias 11:9) Ang kinabuhi dili na gayod pagaisipon pag-usab nga barato.

Bisan karon, ubos sa dili-hingpit nga mga kahimtang, ang kinabuhi mamahimong makalingaw pag-ayo. Kinsay dili malingaw sa makaibog nga kahumot sa pagkaon, sa pagbatyag sa mabugnaw nga huyohoy sa igang nga adlaw, sa pagkakita ug usa ka habog nga bukid, sa matahom nga pagtunod sa adlaw, sa hinayng agos sa sapa, sa kahibulongang buloknong kabulakan, sa mananoy nga honi, o sa awit sa kalanggaman? Pamalandong sa makadiyut. Hunahunaa, sama unya sa unsa ang pagkalingaw nianang mga butanga sa panahong walay kataposan?

Nan, makataronganon ba ang paglabay sa bililhon nga pribilehiyo sa pagkinabuhing walay kataposan tungod sa umalagi nga kalipay nga tingali itanyag sa binuang, mapatuyangon-sa-kaugalingon nga dalan sa kinabuhi? (Itandi ang Hebreohanon 11:25.) Sa kamaalamon, ang Bibliya nagaawhag kanato ‘nga magkinabuhi sa nahibilin natong mga kinabuhi, dili na alang sa mga pangibog sa mga tawo, kondili alang sa kabubut-on sa Diyos.’ (1 Pedro 4:2) Sa kinasingkasing kami nagadasig kanimo, oo, nagaagda kanimo, sa pagbuhat niana pinaagi sa pagtuon sa Pulong sa Diyos, ang Bibliya, ug pagpadapat sa mga butang nga imong nakat-onan. (Juan 13:17) Sa ingon mahidangat ka sa usa ka maayong relasyon uban kang Jehova, ang Diyos nga hupong sa pagkamaayo ug kaluoy, kinsa makaganti kanimo ug kinabuhing dayon!

[Footnote]

[Hulagway sa panid 5]

Ang imong estilo sa kinabuhi nagpabanaag ba sa pagpabili sa kinabuhi?

[Hulagway sa panid 7]

Ang bag-ong kalibotan sa Diyos motugot nato sa pagkalingaw sa mga kalipayan sa kinabuhi sa walay kataposan!