Ang Gasa ba sa mga Dila Bahin sa Tinuod nga Kristiyanidad?

“GIBATI ko, samtang ako naminaw kaniya nga nag-ampo sa lain nga pinulongan, ingon sa daw dihay grabeng kaukyab sa palibot,” miingon si Bill human nga siya ug ang laing unom pa nagtigom atubangan sa usa ka predikador duol sa altar sa simbahan. Ang mao bang kasinatian nagsubli sa paglihok sa balaang espiritu sa unang-siglo? Kini ba nagpaila sa relihiyon sa Bibliya? Atong makaplagan ang makapatagbaw nga mga tubag pinaagi sa mainampingong pagsusi sa Kasulatan.

Ang rekord sa Bibliya nagpadayag nga sa dihang gipasa ang bisan unsang milagrosong gasa sa espiritu, labing menos presente ang usa sa 12 ka apostol o kaha si Pablo. Ang una sa tulo nga narekord nga mga hitabo sa pagsultig mga dila nahitabo diha sa 120 ka tinun-an ni Jesus nga nagtigom sa Jerusalem sa Pentekostes 33 K.P. (Buhat 2:1-4) Tulo ug tunga ka tuig sa ulahi, samtang ang usa ka grupo sa di-sirkunsadong mga Italyano naminaw sa pagsangyaw ni apostol Pedro, ilang nadawat ang espiritu ug misugod sa “pagsultig mga dila ug nanagdayeg sa Diyos.” (Buhat 10:44-48) Ug 19 ka tuig human sa Pentekostes, sa mga 52 K.P., si Pablo namulong ngadto sa usa ka grupo sa Efeso ug mipandong sa iyang mga kamot diha sa 12 ka tinun-an. Sila usab “misugod sa pagsultig mga dila ug nanagna.”​—Buhat 19:6.

Nganong May Gasa sa mga Pinulongan?

Sa hapit nang mokayab sa langit, giingnan ni Jesus ang iyang mga sumusunod: “Kamo makadawat ug gahom sa diha nga kakunsaran na kamo sa balaang espiritu, ug kamo mahimong akong mga saksi sa Jerusalem ug . . . hangtod sa kinatumyan sa yuta.” (Buhat 1:8) Matikdi nga siya mihatag ug timaan kon sa unsang paagi himoon kining dakong pagpanaksi nga buluhaton​—pinaagi sa tabang sa balaang espiritu.

Ang teknolohiya karon sa komunikasyon nga makahimo kanato sa pagpadalag mga mensahe sa tibuok yuta diha sa daghang mga pinulongan wala pa maglungtad niadtong panahona. Ang maayong balita gipakaylap sa binaba nga paagi, ug niini ang milagrosong gasa sa pagsulti sa langyaw nga mga dila mapuslanon kaayo. Mao kana ang kahimtang samtang nagsangyaw ang unang-siglong mga Kristohanon sa mga Hudiyo ug sa mga proselita sa Jerusalem sa Pentekostes 33 K.P. Ang mga Partianhon, mga Medianhon, taga Elam, Cretanhon, taga Arabia, mga molupyo sa Mesopotamia, Judea, Capadocia, Pontus, ug ang distrito sa Asia, ingon man ang mga dumuloong gikan sa Roma, nakadungog “sa dagkong mga butang sa Diyos” diha sa ilang kaugalingong pinulongan ug nakasabot sa gipanulti. Tulo ka libo ang nahimo dayong mga magtutuo.​—Buhat 2:5-11, 41.

Ang kanunayng masayloan nga kamatuoran mao nga ang pagsultig mga dila maoy usa lamang sa siyam ka paglihok sa balaang espiritu nga gihisgotan ni apostol Pablo diha sa iyang sulat ngadto sa mga Kristohanon sa Corinto. Bisag gilantaw ni Pablo ang mga pagpanultig-dila ingong mas ubos nga gasa, kadto bililhon alang sa unang kongregasyon sa pagpakaylap sa maayong balita mahitungod sa langitnong Gingharian sa Diyos. Kadto maoy usa sa “mga gasa” nga nakaamot sa dugang nga gidaghanon ug sa pagpalig-on sa bata pa nga kongregasyon sa mga Kristohanon.​—1 Corinto 12:7-11; 14:24-26.

Ang nagkalainlaing mga paglihok sa balaang espiritu sa unang siglo, lakip na ang pagsultig mga dila, maoy usa usab ka makitang pamatuod nga ang Diyos wala na mogamit sa 1,500-anyos nga kongregasyon sa Israel ingong iyang linaing katawhan. Dili-malalis, ang iyang pag-uyon karon anaa na sa bag-ong Kristohanong kongregasyon, nga gitukod sa iyang bugtong Anak.​—Itandi ang Hebreohanon 2:2-4.

Kining mga kapadayagan sa espiritu maoy pangunang mga sangkap sa pagtukod sa bata pang Kristohanong kongregasyon ug sa pagtabang niini sa pagtubo ngadto sa pagkahamtong. Gipatin-aw ni Pablo nga human nakaalagad niining katuyoana, kining milagrosong mga gasa matapos: “Kon duna may mga gasa sa pagpanagna, kini igahiklin ra unya; kon aduna may pagsultig mga dila, kini pagahunongon ra unya.”​—1 Corinto 13:8.

Oo, tin-aw ang Bibliya nga matapos ang gasa sa mga dila. Apan kanus-a? Ang Buhat 8:18 nagbutyag nga ang mga gasa sa espiritu nadawat “pinaagi sa pagpandong sa mga kamot sa mga apostol.” Nan, dayag uban sa pagkamatay sa kataposang apostol, ang pagpasa sa mga gasa sa espiritu mihunong​—lakip ang pagsultig mga dila. Busa, sa dihang kadtong nakadawat niining mga gasaha gikan sa mga apostol nahanaw usab sa talan-awon sa yuta, nahanaw usab ang milagrosong gasa. Sa maong panahon ang Kristohanong kongregasyon may igo nang panahon nga malig-on pag-ayo ug nakakaylap na ngadto sa daghang kayutaan.

“Wala-mailhing mga Dila” ug ang Ilang Interpretasyon

Ang presenteng-adlaw nga pagtunghag-balik sa pagsultig mga dila “giisip sa uban ingong emosyonal nga pagpatuyang sa mabalhinong mga tawo nga nakulangan ug pagtagad, samtang gilantaw kini sa uban nga kaamgid sa talagsaong panghitabo sa pagsultig mga dila sa panahon sa mga Apostol.” Diha sa modernong-adlaw nga panagkatigom sa simbahan nga diha niini mahitabo ang pagsultig “wala-mailhing mga dila,” kini sagad naglangkit ug maukyabong pagsinggit sa dili-masabtang mga tingog. Busa, usa ka tawo miangkon: “Sagad gamiton ko ang akong gasa sa mga dila sa pribado alang sa akong kaugalingong pagpamalandong. . . . Bation kog diyutayng kaulaw atubangan sa ubang mga tawo.” Ang lain pa miasoy: “Madunggan ko ang akong kaugalingong mga pulong, ako wala makasabot niini, apan bation ko nga daw gitulod ang akong dila sa pagsulti.”

Unsa nga impormasyon nga may tinuod nga bili ang gipasabot sa maong wala-mailhi nga pinulongan, ug unsay ikasulti bahin interpretasyon? Kadtong nangangkon nga makahubad niining sinultihana naghatag ug lahi nga mga katin-awan sa samang dili-masabtang mga pulong. Nganong lahi man? Ilang gipagamay ang maong kalainan pinaagi sa pag-ingon nga ang “Diyos naghatag sa usa ka tawo ug usa ka interpretasyon sa sinultihan ug ngadto sa laing tawo ug laing interpretasyon.” Usa ka indibiduwal midawat: “Nakamatikod ako ug mga higayon diin ang interpretasyon dili husto.” Si D. A. Hayes, diha sa iyang librong The Gift of Tongues, mihisgot ug usa ka hitabo diin midumili ang usa ka tawo sa paghubad sa sinultihan sa usa ka babaye nga misultig wala-mailhi nga dila tungod kay “ang pinulongan mangil-ad kaayo.” Pagkalahi kana sa pagsultig mga dila nga nahitabo sa unang siglo ug kadto sa pagkatinuod maoy sa pagpalig-on sa kongregasyon!​—1 Corinto 14:4-6, 12, 18.

Ang pipila karong adlawa nangangkon nga nakadungog ug kahibulongang mga interpretasyon, ug sila tingali sinserong nagtuo nga gamiton sa Diyos kining gasaha sa dihang siya “buot nga mohatag ug direktang mensahe sa mga tawo.” Apan unsang mensahea gikan sa Diyos ang atong gikinahanglan karong adlawa nga wala itagana ni Jesu-Kristo ug sa iyang mga apostol alang kanato? Si Pablo, nga mismo gigasahan sa balaang espiritu, miingon: “Ang tanang Kasulatan dinasig sa Diyos ug mapuslanon alang sa pagpanudlo, sa pagpamadlong, sa pagpanul-id sa mga butang, sa pagmatuto sa pagkamatarong, aron ang tawo sa Diyos mamahingpit, bug-os nga masangkapan alang sa tanang maayong buluhaton.”​—2 Timoteo 3:16, 17.

Ang kamatuoran mao, ang Kristohanong kongregasyon dili na bata pa, ug busa ang mga kapadayagan sa Diyos o milagrosong mga gasa sa espiritu wala na kinahanglana sa pagpamatuod sa papel niini. Ang Bibliya nagpahimangno: “Bisan pa kon kami o usa ba ka manulonda gikan sa langit magawali kaninyog maayong balita nga supak sa [“lahi sa,” The New English Bible] amo nang gikawali kaninyo ingong maayong balita, ipatunglo siya.”​—Galacia 1:8.

Ang milagrosong pagsultig mga dila dili na kinahanglanon, ug walay pasikaranan sa Bibliya aron tuohan nga kana maoy bahin sa matuod nga Kristiyanidad karong adlawa. Karon nga ang Bibliya kompleto na ug kaylap nga mabatonan, ato nang nabatonan ang atong gikinahanglan diha sa Pulong sa Diyos. Kini nagtugot kanato sa pagbaton ug tukmang kahibalo bahin kang Jehova ug sa iyang Anak nga motultol ngadto sa kinabuhing dayon.​—Juan 17:3; Pinadayag 22:18, 19.

Bisan sa unang siglo, si apostol Pablo napugos sa pagsulat sa kongregasyon sa Corinto sa pagtul-id sa ilang hunahuna kon nganong ang gasa sa mga dila gihatag ngadto sa unang mga Kristohanon. Tingali, ang pipila naikag sa gasa sa mga dila, ug sila milihok nga samag mga bata, dili-hamtong sa espirituwal. Gihatagan nila ug dakong importansiya ang sa “mga dila.” (1 Corinto 14:1-39) Gipasiugda ni Pablo nga dili tanang mga Kristohanon sa unang siglo ang nakasultig milagrosong mga dila. Kadto dili hinungdanon sa ilang kaluwasan. Bisan balik niadto sa naglungtad pa kini, ang gasa sa mga dila maoy ikaduha lamang sa milagrosong pagpanagna. Ang pagsultig mga dila kaniadto dili, ug sa karon dili, usa ka kinahanglanon alang sa mga Kristohanon aron makabaton ug kinabuhing dayon.​—1 Corinto 12:29, 30; 14:4, 5.

Ang Gahom sa Likod sa Wala-mailhing Dila Karong Adlawa

Ang uban nagtuo nga ang nagpalihok nga gahom sa likod sa mga tigsultig-dila mao ang mga lider sa simbahang karismatik kinsa nagaawhag sa ilang mga membro sa ilang panon sa pagkabaton niining katakosa. Sa pipila ka kaso kini gipahinabo tungod sa emosyonalismo ug pagkadili-timbang. Si Cyril G. Williams, diha sa Tongues of the Spirit, nag-ingon nga kini nahimo “diha sa kadaghanang mga higayon nga usa ka ilhanan sa mga alta-sosyedad diha sa grupo” ug mohatag sa tawo ug “posisyon ug awtoridad sa panan-aw sa grupo ug usab sa ilang kaugalingong mga mata.” Busa, ang motibo mahimong usa ka tinguha nga mahisakop sa inila nga grupo sa mga tigsultig-dila.

Ang presidente niadto sa Loyola University nga si Donald P. Merrifield miingon nga ang “mga dila mahimong usa ka daw-nabuangbuang nga kasinatian, o, matud pa sa uban, usa ka yawan-ong kasinatian.” Ang klero nga si Todd H. Fast miingon: “Ang mga dila maoy lantugionon. Ang yawa dunay daghang mga paagi sa pag-impluwensiya kanato.” Ang Bibliya mismo nagpasidaan nga si Satanas ug ang iyang mga demonyo makahimo sa pag-impluwensiya sa mga tawo ug sa pagkontrolar sa ilang pagpanulti. (Buhat 16:17, 18) Si Jesus milihok batok sa yawan-ong espiritu nga mipalihok sa tawo sa pagsinggit ug nahagsa sa salog. (Lucas 4:33-35) Si Pablo nagpasidaan nga ‘si Satanas makausab sa iyang kaugalingon sa pagkahimong manulonda sa kahayag.’ (2 Corinto 11:14) Kadtong nagatinguha karong adlawa sa gasa sa mga dila nga wala na ituga sa Diyos diha sa iyang katawhan sa pagkatinuod nagabukas sa ilang kaugalingon sa paglimbong ni Satanas, kinsa, kita gipasidan-an, nga mogamit sa “tanang matang sa gamhanang mga buhat ug bakak nga mga ilhanan ug mga kahibulongang buhat.”​—2 Tesalonica 2:9, 10.

Mga Dila​—Ug ang Tinuod nga Kristiyanidad

Ang unang-siglong mga Kristohanon nga nakadawat sa gasa sa pagsultig mga dila migamit niini sa pagpatin-aw sa dagkong mga butang sa Diyos. Gipasiugda ang panginahanglan sa tin-aw nga paghubad sa mensahe nga gipahayag sa mga dila aron kini masabtan sa tanan ug mapalig-on ang daghan. (1 Corinto 14:26-33) Si apostol Pablo mitambag: “Gawas kon kamo magasultig dila nga dali nga masabtan, unsaon man sa mga tawo pagkasayod kon unsay inyong gisulti? Kamo, sa ingon, magasulti lamang ngadto sa hangin.”​—1 Corinto 14:9.

Samtang ang espiritu sa Diyos mihatag sa unang mga Kristohanon ug gasa sa mga dila, kini wala mopasulti kanila ug dili-masabtan o dili-mahubad nga pagyamyam. Nahiuyon sa tambag ni Pablo, ang balaang espiritu mitaganag sinultihan nga nagpahimo sa maayong balita nga mas daling “masangyaw sa tanang binuhat sa silong sa langit.”​—Colosas 1:23.

Mahitungod niining kataposang mga adlaw sa presenteng sistema, si Jesu-Kristo nagsugo: “Ang maayong balita [sa natukod nga Gingharian] kinahanglang igawali una ngadto sa tanang kanasoran.” (Marcos 13:10) Sama sa unang siglo, ang tanang binuhat kinahanglang makabati sa mensahe sa Gingharian. Kini posible tungod kay ang Bibliya nahubad na karon, sa tibuok o sa bahin niini, ngadto sa halos 2,000 ka pinulongan. Ang samang espiritu nga nagdasig sa unang mga Kristohanon sa pagsulti nga maisogon ug madasigon karon nagapaluyo sa dako ug kahibulongang pagsangyaw nga buluhaton sa presenteng-adlaw nga kongregasyon sa mga Saksi ni Jehova. Pinaagi sa binaba ug pinaagi sa paggamit sa modernong teknolohiya sa pagpatik aron mabatonan ang kamatuoran sa Kasulatan pinaagi sa pinatik nga panid, sila nagasulti sa “putling pinulongan.” Kining mensahea nagaabot sa kapin sa 200 ka nasod ug kaislahan sa kadagatan. Ang mga Saksi ni Jehova lamang ang nagabarog ingong mga tawo nga ginapalihok sa espiritu sa Diyos sa pagpahibalo sa tanan sa dagkong mga butang sa Diyos.​—Sofonias 3:9; 2 Timoteo 1:13.

[Hulagway sa panid 7]

Pultahan-ug-pultahang pagsangyaw sa Hapon

Barko-ug-barkong pagsangyaw sa Colombia

Ubos: Pagtuon sa Bibliya sa Guatemala

Ubos: Pagsangyaw sa kabaryohan sa Netherlands