Nahinumdom Ka Ba?

Gipabilhan mo ba ang pagbasa sa dili pa dugayng mga isyu sa Ang Bantayanang Torre? Buweno, tan-awa kon matubag mo ang mosunod nga mga pangutana:

◻ Unsay gilandongan sa dugang mga pribilehiyo sa pag-alagad nga gihatag sa mga Nethinim ug sa mga anak nga lalaki sa mga sulugoon ni Solomon sa ilang pagpauli gikan sa pagkabihag sa Babilonya?

Karong adlawa, samtang ang nahibilin sa espirituwal nga Israel sa yuta nagakadiyutay, ang ubang karnero nagakadaghan. Ang uban niining samag-karnerong mga tawo, sama sa mga Nethinim ug sa mga anak nga lalaki sa mga sulugoon ni Solomon, karon gitudlo diha sa mabug-at nga mga responsabilidad ubos sa pagdumala sa nahibilin. (Isaias 61:5)​—4/15, panid 16-17.

◻ Unsay gipasabot ni propetang Sofonias sa dihang siya miingon: “Tingali ikaw pagatagoan sa adlaw sa kasuko ni Jehova”? (Sofonias 2:2, 3)

Alang sa pagpanalipod ni bisan kinsa sa panahon sa “dakong kasakitan,” kini dili usa ka kahimtang nga kas-ang naluwas, kanunayng naluwas. (Mateo 24:13, 21) Ang pagkanatagoan sa maong adlaw nagdepende sa pagpadayon sa usa ka tawo sa pagbuhat nianang tulo ka butang: Kinahanglang pangitaon niya si Jehova, pangitaon ang pagkamatarong, ug pangitaon ang pagkamaaghop.​—5/1, panid 15-16.

◻ Diha sa unsang diwa si Miguel “motindog” “sa panahon sa kataposan”? (Daniel 12:1, 4)

Sukad sa iyang pagkaentrono ingong Hari sa 1914, si Miguel “nagbarog” na alang sa katawhan ni Jehova. Apan sa dili madugay si Miguel “motindog” sa espesyal kaayo nga diwa​—ingong Ahente ni Jehova nga magahanaw sa tanang pagkadaotan gikan sa yuta ug ingong Manluluwas sa katawhan sa Diyos.​—5/1, panid 17.

◻ Diha sa unsa nagadepende ang matuod nga kalipay?

Ang matuod nga kalipay nagadepende sa atong hamiling relasyon uban kang Jehova, sa iyang pag-uyon, ug sa iyang panalangin. (Proverbio 10:22) Busa, ang matuod nga kalipay dili makab-ot nga bulag gikan sa pagsunod kang Jehova ug malipayong nagpasakop sa iyang kabubut-on. (Lucas 11:28)​—5/15, panid 16, 19.

◻ Sa dihang gihimo ni Jesus ang iyang mga milagro sa pagpang-ayo, ang pagtuo ba kinahanglanon alang sa usa nga giayo?

Usa ka sukod sa pagtuo ang gikinahanglan sa bahin sa kadaghanan aron makaduol kang Jesus aron maayo. (Mateo 8:13) Hinuon, walay pagpahayag sa pagtuo ang gikinahanglan ni Jesus alang sa paghimo sa iyang mga milagro, sama sa pag-ayo niya sa usa ka bakol nga lalaki nga wala ngani makaila kon kinsa si Jesus. (Juan 5:5-13) Nabalik ngani ni Jesus ang napalong nga dalunggan sa alagad sa hataas nga saserdote, kinsa nahiuban sa usa ka grupo sa mga kaaway ni Jesus. (Lucas 22:50, 51) Kining mga milagroha gihimo pinaagi sa gahom sa balaang espiritu sa Diyos, dili sa pagtuo sa masakitong indibiduwal.​—6/1, panid 3.

◻ Unsay gihawasan sa “pukot” nga gihisgotan sa ilustrasyon ni Jesus sa Mateo 13:47-50?

Ang “pukot” naghawas sa yutan-ong instrumento nga nagaangkon nga mao ang kongregasyon sa Diyos ug nga nagapanikop ug mga “isda.” Kini naglakip sa Kakristiyanohan ug sa kongregasyon sa dinihogang mga Kristohanon, ang ulahi nagpadayon sa pagdakop ug ‘maayong mga isda,’ ubos sa pagtultol sa mga manulonda, nga nahiuyon sa Mateo 13:49.​—6/15, panid 20.

◻ Unsa ang pipila ka mga prinsipyo nga kinahanglang ipadapat sa mga maghuhukom sa Israel sa pagtuman sa ilang mga buluhaton?

Angay-angay nga hustisya alang sa mga dato ug pobre, estrikto nga pagkawalay-pinalabi, ug walay pagdawat ug mga hiphip. (Levitico 19:15; Deuteronomio 16:19)​—7/1, panid 13.

◻ Unsa ang kinahanglang paningkamotan sa mga ansiano nga makab-ot diha sa hudisyal nga mga husay?

Ang usa ka tumong mao ang pagsusi sa mga panghitabo sa kaso, buhaton kini uban sa gugma. Sa dihang masayran na ang mga panghitabo, buhaton sa mga ansiano kon unsay gikinahanglan aron sa pagpanalipod sa kongregasyon ug paghupot niini sulod sa hataas nga mga sukdanan ni Jehova ug sa libreng pag-agos sa espiritu sa Diyos. Ang katuyoan sa husay mao usab ang pagluwas, kon posible ugaling, sa usa ka nameligrong makasasala. (Itandi ang Lucas 15:8-10.)​—7/1, panid 18-19.

◻ Nganong makadaot kaayo ang pagpanghanduraw labot sa gidiling sekso?

Tungod sa mga pulong ni Jesus sa Mateo 5:27, 28, ang tanan niadtong kinsa magpadayon sa pagpanghanduraw sa gidiling sekso sad-an sa pagpanapaw diha sa ilang mga kasingkasing. Ug dunay tinuod nga kapeligrohan nga ang maong mga panghanduraw moagak ngadto sa imoralidad.​—7/15, panid 15.

◻ Sa unsang mga paagi si Jehova tingalig motabang kanato sa paglantaw sa atong mga pagsulay sa hustong paagi ug busa makalahutay niana?

Ang Kasulatan mahimong dalhon sa atong pagtagad pinaagi sa kaubang mga magtutuo o sa panahon sa pagtuon sa Bibliya. Ang mga hitabo nga maniobrahon pinaagi sa paggiya sa Diyos makatabang kanato sa pagtino kon unsay buhaton. Ang mga manulonda nagapakigbahin sa pagtultol kanato, o mahimong madawat nato ang paggiya pinaagi sa balaang espiritu. (Hebreohanon 1:14)​—7/15, panid 21.

◻ Ang Konsilyo ba sa Nicaea sa 325 K.P. nagtukod o naglig-on sa Trinidad nga doktrina?

Wala, gipakasama lamang sa Konsilyo sa Nicaea ang Anak uban sa Amahan ingon “sa usa ka substansiya.” Ang ideya nga ang Amahan, Anak, ug balaang espiritu maoy ang matag usa matuod nga Diyos​—tulo ka persona sa usa ka Diyos​—wala tukora sa maong konsilyo ni sa unang mga Amahan sa Iglesya.​—8/1, panid 20.

◻ Si Job lang ba ang tawo nga nagmatinumanon kang Jehova sa panahong siya nabuhi? (Job 1:8)

Dili, ang basahon ni Job mismo nagpaila nga si Elihu gidawat sa Diyos. Lain pa, sa panahong si Job nabuhi, dihay daghang mga Israelinhon nga nagkinabuhi didto sa Ehipto, ug walay katarongan ang paghunahuna nga silang tanan dili matinumanon ug dili dalawaton sa Diyos.​—8/1, panid 31.