‘Kinahanglan ba nga Ako Magpabawtismo?’

SA TANANG desisyon nga kinahanglan natong himoon sa kinabuhi, tingali wala nay mas importante pa kay niini: ‘Kinahanglan ba nga ako magpabawtismo?’ Nganong kana tuman ka importante? Kay ang atong desisyon maylabot ning pangutanaha adunay direktang epekto dili lang sa atong pagkinabuhi karon kondili diha usab sa atong walay-kataposang kaayohan.

Giatubang mo ba kining desisyona? Tingalig nagtuon ka na sa Bibliya uban sa mga Saksi ni Jehova sa taastaas nga panahon. O tingalig ang imong mga ginikanan nagtudlo kanimo sa Kasulatan sukad sa bata ka pa. Karon nahidangat ka sa punto diin kinahanglang modesidir ka kon unsay imong pagabuhaton. Aron makahimo ka sa hustong desisyon, kinahanglang imong hisabtan kon unsay nalangkit sa bawtismo ug kinsa ang kinahanglang magpabawtismo.

Kon Unsay Nalangkit sa Bawtismo

Nga susamag usa ka kasal, ang bawtismo maoy seremonyas nga magasaulog sa usa ka relasyon. Sa kaso sa kasal, ang lalaki ug babayeng nalangkit nakaugmad nag suod nga relasyon. Ang seremonyas sa kasal magapadayag lang sa katilingban kon unsay gikasabotan sa pribado, nga mao, silang duha sa pagkakaron nagasulod na sa aktuwal nga kaminyoon. Mag-abli usab kinig mga pribilehiyo nga mapahimuslan sa duruha ug magdalag mga responsabilidad nga kinahanglang abagahon nilang duha sa ilang pagkinabuhi.

Ang kahimtang susama sa bawtismo. Samtang ginatun-an nato ang Bibliya, atong makat-onan ang mahigugmaong mga butang nga gibuhat ni Jehova alang kanato. Siya wala lang maghatag kanato sa atong kinabuhi ug sa tanang butang nga atong gikinahanglan sa pagpatunhay niini apan usab sa iyang bugtong Anak sa pag-abli sa dalan aron ang mga tawo makasulod sa usa ka relasyon uban Kaniya ug makaangkon sa kinabuhing dayon diha sa usa ka paraisong yuta. Inigpalandong nato niining tanan, dili ba kita matukmod sa paglihok?

Unsay atong mahimo? Ang Anak sa Diyos, si Jesu-Kristo, nagasulti kanato: “Kon adunay buot mosunod kanako, kinahanglang magdumili siya sa iyang kaugalingon ug magpas-an sa iyang kahoy sa pagsakit ug magpadayon sa pagsunod kanako.” (Mateo 16:24) Oo, kita mahimong mga tinun-an ni Jesu-Kristo, nga magasunod sa iyang panig-ingnan sa pag-alagad sa intereses sa iyang Amahan, si Jehova. Hinuon, ang pagbuhat niana nanginahanglan sa atong ‘pagsalikway’ sa atong kaugalingon, nga mao, kinabubut-ong magahukom nga unahon pagbuhat ang kabubut-on sa Diyos kay sa atong kaugalingon; naglangkit kini sa paghalad, o pagpahinungod, sa atong kinabuhi sa pagbuhat sa iyang kabubut-on. Sa pagpahibalo niining kinabubut-on ug pribadong desisyon, himoon ang publikong seremonyas. Ang bawtismo sa tubig mao ang seremonyas sa pagpasimbolo sa dayag nga paagi sa atong pagpahinungod sa Diyos.

Kinsay Kinahanglang Mabawtismohan?

Gisugo ni Jesu-Kristo ang iyang mga sumusunod nga ‘panlakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagbantay sa tanang butang iyang gisugo kanila.’ (Mateo 28:19, 20) Tin-aw, gikinahanglan ang usa ka sukod sa kahamtong sa hunahuna ug kasingkasing niadtong pagabawtismohan. Pinaagi sa ilang personal nga pagtuon sa Pulong sa Diyos, sila nahidangat sa pag-ila sa panginahanglan nga ‘maghinulsol ug magbag-o’ gikan sa ilang kanhing pagkinabuhi. (Buhat 3:19) Unya, sila nakasabot sa panginahanglan nga himoon ang buluhaton sa pagwali nga gihimo ni Jesu-Kristo, nga mahimong iyang mga tinun-an. Kining tanan nahitabo una pa sa tikang sa bawtismo.

Nahidangat ka na ba niining ang-anga sa imong espirituwal nga pagtubo? Matinguhaon ka ba sa pag-alagad sa Diyos? Kon mao, palandonga nga mainampoon ang asoy sa Bibliya sa Etiopianong eunuko, sumala sa nahitala diha sa Buhat kapitulo 8. Sa dihang ang mga tagna mahitungod kang Jesus ang Mesiyas gipatin-aw ngadto sa maong tawo, iyang gisusi ang iyang hunahuna ug kasingkasing ug dayon nangutana: “Unsa pay makapugong sa akong pagpabawtismo?” Lagmit walay nakapugong kaniya; busa siya nabawtismohan.​—Buhat 8:26-38.

Karong adlawa daghan mangutana sa samang pangutana: “Unsa pay makapugong sa akong pagpabawtismo?” Ingong resulta, 300,945 ka bag-ong mga nagdedikar ang nabawtismohan niadtong 1991. Kini nakahatag ug dakong kalipay sa tanang katawhan ni Jehova, ug ang mga ansiano sa mga kongregasyon malipay sa pagtabang sa ubang mga matarong ug kasingkasing sa pag-uswag ug pagkab-ot sa mga kuwalipikasyon alang sa bawtismo.

Hinuon, tingali ang mga ansiano diha sa inyong kongregasyon mosugyot nga kamo maghulat. O, kon ikaw batan-on, ang imong mga ginikanan basin magtambag kanimo sa paghulat. Unya unsa man? Ayawg kaluya. Ibutang sa hunahuna nga ang pagsulod sa personal nga relasyon uban sa Labing Hataas usa ka seryoso kaayong butang. Kinahanglang makab-ot ug ipadayong mahuptan ang hatag-as nga mga sukdanan. Busa pamati sa mga sugyot nga gihatag ug ipadapat sila sa bug-os nga kasingkasing. Kon dili ka bug-os makasabot sa mga katarongang gihatag, ayaw kaulaw, apan mangutana hangtod imo gayong hisabtan kon unsang pagpangandam ang kinahanglan imong buhaton.

Sa laing bahin, ang pila ka tawo tingali magpanuko sa paghimo sa dakong tikang, sumala sa ilang pagtawag niana. Usa ka ba kanila? Siyempre, tingali adunay tinong mga katarongan nganong imong langanon ang pagpahinungod ug bawtismo. Apan kon ikaw kuwalipikado na ug sa gihapon nagpugong, maayo ang pagsukna sa imong kaugalingon: “Unsa pay makapugong sa akong pagpabawtismo?” Sa mainampoon analisaha ang imong kahimtang ug tan-awa kon tinuod nga adunay angay nga katarongan nga imong langanon ang pagsanong sa pagdapit ni Jehova nga mosulod sa usa ka personal nga relasyon uban kaniya.

‘Bata pa Ako’

Kon bata ka pa, basin maghunahuna ka, ‘Bata pa ako.’ Tinuod samtang ang mga batan-on magpabiling masinugtanon ug masanongon ngadto sa ilang Kristohanong mga ginikanan ug magpadapat sa Kasulatan sa labing maarangan nila, sila makasalig nga si Jehova magaisip kanila nga “balaan.” Ngani, ang Bibliya nagasulti kanato nga ang balaang pag-uyon sa matarong nga mga ginikanan moabot sa sakop pang mga anak. (1 Corinto 7:14) Bisan pa niana, walay limitasyon sa edad ang gihatag diha sa Bibliya kon kanus-a matapos ang maong yugto sa pagkasakop. Busa, hinungdanon nga palandongon nga ugdang sa Kristohanong mga batan-on ang pangutana: ‘Kinahanglan ba nga magpabawtismo ako?’

Ang Bibliya nagadasig sa mga batan-on sa ‘paghinumdom sa ilang Dakong Maglalalang sa mga adlaw sa ilang pagkabatan-on.’ (Ecclesiastes 12:1) Niining bahina, kita adunay panig-ingnan sa batan-ong si Samuel, kinsa “nag-alagad sa atubangan ni Jehova, samtang bata pa siya.” Anaa usab ang panig-ingnan ni Timoteo, kinsa sukad sa pagkabata nagbutang sa kasingkasing sa kamatuoran nga gitudlo sa iyang inahan ug iyang apohang babaye.​—1 Samuel 2:18; 2 Timoteo 1:5; 3:14, 15.

Mao usab karong adlawa, daghang batan-on nagpahinungod sa ilang mga kinabuhi sa pag-alagad kang Jehova. Si Akifusa, usa ka 15-anyos, miingon nga usa ka bahin sa Tigom sa Pag-alagad ang nakatabang niya sa paghimo sa iyang desisyon nga magpabawtismo. Si Ayumi nagpabawtismo sa dihang siya diyes anyos. Gusto niyang moalagad kang Jehova tungod kay nahigugma gayod siya kaniya. Karon siya 13 na ug bag-o pa gayod nakasinati sa pagkakita sa iyang ginatun-an sa Bibliya, nga nahigugma usab kang Jehova, nga gibawtismohan sa edad nga 12. Ang manghod nga lalaki ni Ayumi nga si Hikaru gibawtismohan usab sa edad nga napulo. “Ang pila miingon nga bata pa ako kaayo,” hinumdom niya, “apan si Jehova nasayod sa akong gibati. Ako determinado nga magpabawtismo sa dihang nakahukom ako sa pagpahinungod sa akong kinabuhi sa pag-alagad kaniya uban sa tanan nakong nabatonan.”

Ang panig-ingnan sa ginikanan usa usab ka katarongan, sumala sa makita gikan sa kasinatian sa usa ka batan-ong sister. Gidid-an sa iyang amahan ang iyang inahan sa pagtuon sa Bibliya uban kaniya ug sa iyang igsoong lalaki ug igsoong babaye. Latoson niya sila ug sunogon ang ilang mga libro. Apan tungod sa pagkamainantoson ug pagtuo sa inahan, nakasabot ang mga bata sa kahinungdanon sa pag-alagad kang Jehova nga Diyos. Kining batan-ong babaye nabawtismohan sa edad 13, ug ang iyang manghod nga lalaki ug igsoong babaye nagsunod sa iyang panig-ingnan.

‘Tigulang na Kaayo Ako’

Ang salmista miingon: “Kamong mga tigulang lalaki uban sa mga batang lalaki . . . dayega ninyo ang ngalan ni Jehova.” (Salmo 148:12, 13) Oo, ang mga tigulang kinahanglang mag-ila sa panginahanglan nga sila mobarog sa kiliran ni Jehova. Hinuon, ang pila ka tigulang makiling sa paglikay sa paghimog mga kausaban. Mobati sila nga ang mga tigulang lisod nga makakat-on ug butang bag-o. Bisan pa, hinumdomi nga ang matinuohong si Abraham maoy 75 anyos sa giingnan siya ni Jehova: “Pumahawa ka sa imong yuta ug sa imong mga paryente ug umadto ka sa yuta nga akong igapakita kanimo.” (Buhat 7:3; Genesis 12:1, 4) Si Moises 80 anyos sa dihang gisugo siya ni Jehova: “Kuhaa ang akong katawhan . . . gikan sa Ehipto.” (Exodo 3:10) Kining mga tawhana ug uban pa maayo nang pagkabutang sa ilang pamuyo sa diha nga gihangyo ni Jehova nga ipasundayag ang ilang gugma ug dedikasyon ngadto kaniya. Wala sila magpanuko sa pagsanong sa tawag ni Jehova.

Komosta karong adlawa? Si Shizumu usa ka Buddhista sulod sa 78 ka tuig sa dihang misugod siya sa usa ka pagtuon sa Bibliya. Supak kaniya ang iyang pamilya, nga wala gani motugot nga siya magtuon diha sa iyang balay mismo. Human sa usa lang ka tuig, nakasabot siya nga kinahanglang magpahinungod sa iyang kaugalingon kang Jehova, ug siya nagpabawtismo. Nganong siya nagbag-o? Siya miingon: “Sa daghang katuigan ako gilimbongan sa bakak nga relihiyon, ug buot ko nga ipadayon ang pagdawat sa kamatuoran gikan kang Jehova sa walay kataposan.”

‘Kana Karon Nagaluwas Kaninyo’

Talitapos na ang panahon. Ang mga kinabuhi, lakip ang imoha, nameligro. Dinalian nga imong palandongon nga seryoso ang butang sa pagpahinungod kang Jehova ug pagpasimbolo niana pinaagi sa bawtismo sa tubig. Gipasiugda kini ni apostol Pedro pinaagi sa pag-ingon: “Kana . . . usab nagaluwas kaninyo karon, nga mao, ang bawtismo.” Dugang niyang gipatin-aw nga ang bawtismo maoy “dili pagkuha sa kahugawan sa unod” (ang usa ka tawo nakahimo na niana sa dili pa makuwalipikado alang sa bawtismo) “kondili ang hangyo nga gihimo ngadto sa Diyos alang sa usa ka maayong tanlag.”​—1 Pedro 3:21.

Kay nakakab-ot sa mga kinahanglanon ni Jehova, ang bawtismadong tinun-an makaangkon ug maayong tanlag. Pinaagi sa pagpadayon sa pagbuhat sa iyang labing maarangan sa pag-alagad kang Jehova, siya nagapahimulos sa kalinaw sa hunahuna ug katagbawan. (Santiago 1:25) Labaw sa tanan, siya masaligon nga makapanlantaw sa walay-kataposang mga panalangin gikan kang Jehova sa bag-ong sistema nga moabot. Hinaot kana mahimong imong bahin samtang motubag kang positibo sa pangutana: ‘Kinahanglan ba nga ako magpabawtismo?’

[Hulagway sa panid 21]

Ingong usa ka batang lalaki, si Samuel nag-alagad sa atubangan ni Jehova

[Hulagway sa panid 22]

Si Moises 80 anyos na sa dihang siya gisugo ni Jehova

[Hulagway sa panid 23]

Karong adlawa ang bata ug tigulang nga magpabawtismo makapanlantaw sa walay-kataposang mga panalangin diha sa bag-ong sistema sa Diyos