Mga Saksi ni Jehova—Ang Organisasyon Luyo sa Ngalan

NIADTONG Oktubre 6, 1990, ang panon nga halos 5,000 nagtigom sa Assembly Hall of Jehovah’s Witnesses sa Siyudad sa Jersey, New Jersey, T.B.A., alang sa tinuig nga miting sa Watch Tower Bible and Tract Society hapit nang masorpresa. Ang tsirman, si John E. Barr, nagpahibalo sa mamiminaw sa pagluwat sa usa ka 55-minutos nga video nga may ulohang Jehovah’s Witnesses​—The Organization Behind the Name. Kadto ang unang video nga sukad naggama sa Sosyedad, apan sa tino dili ang kataposan.

Ang video nagpakita sa unsang paagi ang katawhan ni Jehova giorganisar sa pagpamatuod sa balaang ngalan ug pagmantala sa “maayong balita sa gingharian.” (Mateo 24:14) Ang hedkuwarter sa Brooklyn, New York, ug ang mga pasilidad sa Umahang Watchtower gipasiugda. Kapig 500,000 ka kopya diha sa Ingles ang naggama, ug kini karon (o sa dili madugay) mabatonan sa 26 ka laing pinulongan.a

Unsa ba ang Sanong?

Unsay sanong ngadto sa video sa mga tawo nga dili mga Saksi ni Jehova? Usa ka negosyanteng lalaki misulat:

“Nakita ko nga ang teyp ekselenteg kalidad. Ako nakadayeg ilabina sa kasanag ug maayo kaayong pagkaedit sa video. Ako nakiling sa pagkalimot nga kadto usa ka teyp ug labaw nga naghunahuna nga kadto usa ka sine. Ang maong teyp sa pagkatalagsaon mapuslanon gayod sa pagsaysay sa katuyoan sa inyong hedkuwarter sa New York. Pahalipay alang niining talagsaong buhat.”​—J. J.

Kadtong nagatuon sa Bibliya uban sa mga Saksi ni Jehova nakabatog kaayohan sa pagtan-aw sa video. Ang mosunod nga asoy nagapatin-aw ngano:

“Ako nagtuon sa Bibliya uban sa usa ka batan-ong lalaki nga 20 anyos ug nagatungha sa lokal nga unibersidad. Siya nabalaka sa nagkadaotang kahimtang sa kalibotan. Apan tapos sa pagtan-aw sa teyp ug pagkakita niadtong tanang buotang batan-ong mga brader sa Bethel nga may tinuod nga katuyoan sa kinabuhi, ang tibuok niyang tinamdan nabag-o. Mitambong siya sa atong Adlaw sa Espesyal nga Asembliya ug mihangyo nga tun-an ang Bibliya kaduha sa semana. Ang laing estudyante sa Bibliya, usa ka magtutudlo sa hayskul, mihulam sa video aron ipakita sa iyang mga paryente. Abi nilag ang mga Saksi ni Jehova maoy huyang lang, dili-popular, gamay nga organisasyon. Sila nakurat sa tibuok-yutang kinaiyahan sa atong buluhaton ug sa kalamposang ilang naangkon, salamat kang Jehova.”​—J. B.

“Ang mga pulong dili makapahayag sa kalipay nga akong gibati sa dihang ang usa ka babaye nga akong gitun-an sa Bibliya nakahilak sa kalipay ug apresasyon tapos makakita sa maong video. Siya miingon nga may mga luha: ‘Nganong adunay dili makasabot nga kini mao ang organisasyon sa matuod nga Diyos, si Jehova? Wala gayod ako mahibalo nga naglungtad ang maong katawhan.’ Ug dayon siya miingon: ‘Buot kong magpabawtismo.’”​—C. D.

“Nabatonan namo ang daghang kalamposan sa paggamit sa video uban sa mga estudyante sa Bibliya. Kagabii ang bana sa usa sa mga estudyante sa Bibliya sa akong asawa miari sa balay. Siya supak kaayo niadto. Mitan-aw siya sa video. Human niadto siya daghag pangutana ug milakaw nga dala ang usa ka Bibliya ug ang libro alang sa pagtuon sa Bibliya nga Ikaw Mabuhing Walay Kataposan sa Paraiso sa Yuta. Sa nangagi siya nagsunog sa tanang basahon sa Bibliya sa iyang asawa!”​—D. H.

Ang mga batan-on nalingaw usab kaayo sa video, sumala sa gipakita sa mosunod nga mga komento:

“Ako unom ka tuig ug tunga. Gusto ko ang parte mahitungod sa mga Bibliya ug sa dihang tulin kaayo ang pag-abante sa mga karton.”​—K. W.

“Ang among mga bata nag-ingon nga kadto mas nindot kay sa bisan unsang programa nga ilang nakita sa TV.”​—R. C.

“Human sa pagtan-aw sa video sa ikaduhang panahon, ang among singko-anyos nga batang lalaki, nga namati pag-ayo sa katibuk-an, nangutana, ‘Mahimo bang tan-awon nako kini kada adlaw?’ Ang among tres-anyos nga batang babaye mikomporme uban sa, ‘Gusto kong moadto sa Bethel ug manggamag mga libro!”​—M. E.

“Ang akong mga anak, si Robin ug Shannan, 12 ug 9 anyos, nagbalikbalik sa pagpasalida sa maong teyp. Ang akong kinamanghorang batang babaye tapos makakita sa teyp mipahayag, ‘Gusto kong mogawas sa pagsangyaw. Makalingaw kaayo kana.’ Gibati namo nga ang maong video may direktang epekto diha sa among pamilyahanong kinabuhi. Pagkamaayo sa pagbati ang pagpasalida sa usa ka programa sa telebisyon nga gibati nimong luwas nga tan-awon!”​—N. B.

“Ako 13 ¹⁄2 anyos. Ang bag-ong video nakapaamgo nako nga gipakawaybili nako ang kahibulongang mga tagana gikan kang Jehova. Usa ka pribilehiyo nga mahimong usa sa katawhan sa Diyos.”​—K. W.

“Ako 16 anyos, ug ang maong video nakatabang sa paglig-on diha sa akong kaisipan nga ginahimo ang usa ka tibuok-yutang buluhaton.”​—A. M.

“Ang among mga anak miingon nga ang regular nga programa sa TV dili na kaayo makadani kanila ingong sangpotanan sa pagkakita kon sama sa unsa ang tinuod teokratikanhong kalingawan. Naglig-on usab kana sa ilang tinguha sa pagsulod sa bug-os-panahong pag-alagad.”​—L. M.

Bisan kadtong mga Saksi ni Jehova na sa daghang katuigan natandog sa ilang nakita.

“Kon ang video naghatag ug dakong epekto kanato nga katawhan ni Jehova, unsa kaha ang epekto niini unya sa uban? Sa dihang kining sistemaha mahimong lisod kaayo nga sagubangon, mogahin akog usa ka oras sa akong panahon ug duawon ang Bethel sa kahayahay sa akong sala!”​—K. B.

“Human sa akong pagkakita sa pag-amping ug kaeksakto nga ihatag sa matag buluhaton, gibati ko nga gusto kong mosulod sa akong kuwarto ug halogon ang akong mga basahon sa Bibliya.”​—L. P.

Ginadasig ka, usab, namo sa paggahin ug panahon sa pagtan-aw sa video nga Jehovah’s Witnesses​—The Organization Behind the Name. Mohatag kini kanimog laing panglantaw sa kinabuhi ug motabang kanimo nga magmasaligon sa kaugmaon nga may kasegurohan.

[Footnote]