Mga Talan-awon Gikan sa Yutang Saad

Pag-adto sa Shilo—Maayo ug Daotang mga Bata

INIGPALANDONG nimo bahin sa mga siyudad, mga lungsod, o mga lugar sa Yutang Saad, mosantop ba sa imong alimpatakan ang pila ka iladong mga lalaki ug mga babaye? Lagmit gayod, kay kadaghanang asoy sa Bibliya naglangkit sa mga dagkong tawo. Apan komosta ang mga bata kaniadto? Makahanduraw ka ba nila diha sa mga talan-awon?

Ang talan-awon sa itaas makatabang nato sa paghatag ug bug-os nga pagtagad sa mga asoy nga naglangkit sa mga batan-on, nga ang pipila kanila maayong mga panig-ingnan alang sa mga Kristohanon ug ang uban kanila mga pasidaan. Ang linginong bungtod sa tunga lagmit mao ang dapit sa Shilo.a

Lagmit mahinumdoman nimo nga sa dihang ang Israel misulod sa Yutang Saad, gipahimutang nila pag-una ang tabernakulo sa Diyos sa Gilgal duol sa Jerico. (Josue 4:19) Apan sa gibahin ang yuta, kining sagradong balongbalong​—ang sentro sa pagsimba sa Israel—​gibalhin gikan dinhi ngadto sa Shilo. (Josue 18:1) Kadto mga 30 kilometros amihanan sa Jerusalem sa bukirong rehiyon sa Efraim. Ang kalalakin-an ug kababayen-an gikan sa tibuok Israel mingpanaw paingon sa Shilo; mga panon sa mga tawo makatigom sa walog habagatan sa dapit diin lagmit nagbarog ang tabernakulo. (Josue 22:12) Mahanduraw mo ba ang mga bata nga nangadto didto?

Ang uban nangadto. Ang labing iladong panig-ingnan nga angay natong masayran mao ang batang si Samuel. Ang iyang mga ginikanan, si Elkana ug si Ana, nagpuyo sa usa ka lungsod didto sa kabungtoran pakasadpan. Kada tuig sila moanhi dinhi, tingali kuyog ang pila ka anak sa laing asawa ni Elkana. Sa kataposan gipanalanginan ni Jehova si Ana ug usa ka anak lalaki, kinsa ginganlang si Samuel. Sa ngadtongadto gidala siya sa iyang mga ginikanan aron sa pagpuyo sa Shilo aron siya makaalagad sa tabernakulo uban sa hataas nga saserdote si Eli.​—1 Samuel 1:1–2:11.

Ang batang lalaki may mga buluhaton sa balay sa Diyos, ug siya daghag kahigayonan sa pagbaktas sa duol nga kabungtoran. (1 Samuel 3:1, 15) Ang pipila kanila maoy hinagdan ug punog mga kahoyng olibo, sumala sa makita sa hulagway sa panid 9. Matikdi ang gamay bantayanang torre nga binuhat sa bato. Ang nahilit nga mga mag-uuma o mga magbalantay sa karnero makabantay gikan sa maong bantayanang torre, apan makahanduraw ka sa batang si Samuel nga mikatkat sa itaas aron molantaw usab. (Itandi ang 2 Cronicas 20:24.) Kini mahimong maayong bantaaw nga dapit nga gikan dinha mabantayan ang ihalas nga kahayopan.

Niadto, may daghang kakahoyan kay sa karon, ngani kalasangan diin ang ihalas nga kahayopan nagsuroysuroy. (Josue 17:15, 18) Atong nasayran kini gikan sa usa ka hitabo sa dihang si Eliseo nahimong pangunang propeta sa Diyos. Si Eliseo naglakaw gikan sa Jerico paingon sa Bethel, mao nga siya didto sa maong dapit, mga 16 kilometros habagatan sa Shilo. Unsang pagdawat ang iyang mabatonan gikan sa katawhan sa Bethel, nga nahimong sentro sa pagsimba sa bulawang baka? (1 Hari 12:27-33; 2 Hari 10:29) Lagmit ang mga dagkong tawo suko sa propeta ni Jehova, ug ang ilang tinamdan morag nahitakod sa ilang mga anak.

Ang 2 Hari 2:23, 24 nagsugilon kanato nga usa ka pundok sa mga batan-on nagyagayaga sa propeta sa Diyos: “Tumungas ka, ikaw nga upawon! Tumungas ka, ikaw nga upawon!” Sa pagtubag, si Eliseo “nanghimaraot kanila diha sa ngalan ni Jehova. Dayon duha ka oso nga baye miggula sa kakahoyan ug mikuniskunis sa kap-atag-duha ka bata sa ilang gidaghanon.” Ang maong Siryanhong brawon nga mga oso mahimong pintas sa dihang makalitan o sa dihang ang ilang mga itoy morag nameligro. (2 Samuel 17:8; Proverbio 17:12; 28:15) Gigamit sila sa Diyos sa pagpahamtang ug balaang hustisya batok niadtong grabeng nagtamay sa iyang hawas ug sa ingon nagtamay kang Jehova mismo.

Nga ang usa ka bata mahimong makatagbo sa maong ihalas nga linalang sa kabungtoran palibot sa Shilo magatabang kanato sa pagpabiling labaw pa sa pagtuo nga gipakita sa mga ginikanan ni Samuel sa pagdala kaniya aron sa pag-alagad sa tabernakulo.

Laing matuod nga magsisimba sa sayosayo nagpakitag susamang pagtuo ug debosyon​—si Maghuhukom Jepte. Siya nagpuyo sa kabungtoran sa Gilead sa silangang bahin sa Jordan. Kay madasigon dapig kang Jehova batok sa kaawayng mga Amonhanon, si Jepte nanaad nga ang unang mogawas gikan sa iyang balay aron sa pagsugat kaniya ihalad kang Jehova. Ang iyang ulay nga anak babaye mao ang unang migawas. Busa gidala niya ang iyang bugtong anak ngadto sa sangtuwaryo sa Diyos sa Shilo, diin siya nagpuyo ug nag-alagad nga matinumanon sa daghang katuigan.​—Maghuhukom 11:30-40.

Ang matinumanong debosyon nga gipadayag ni Samuel ug sa anak babaye ni Jepte diha sa dapit sa Shilo tinong usa ka maayong kaatbang sa negatibong panig-ingnan sa 42 ka masupilon nga nagtamay sa propeta ni Jehova diha sa mao mismong rehiyon.​—Itandi ang 1 Corinto 10:6, 11.

[Footnote]

[Picture Credit Line sa panid 8]

Pictorial Archive (Near Eastern History) Est.

[Picture Credit Line sa panid 9]

Pictorial Archive (Near Eastern History) Est.

[Picture Credit Line sa panid 9]

Safari Zoo, Ramat-Gan, Tel Aviv