Ang mga Panalangin sa Edukasyon sa Gilead Mikaylap sa Tibuok-Kalibotan

ANG edukasyon niining karaang kalibotan limitado lamang ang kaayohan. Tungod kay kana sa kadaghanan pinasikad sa tawhanong mga hunahuna inay sa kamatuoran sa Diyos, kana dili makahatag sa tinuod nga katuyoan sa kinabuhi. Apan ang Tunghaan sa Gilead lahi. Sa iyang pangbukas nga mga komento sa graduwasyon sa ika-93 nga klase sa Gilead, si Theodore Jaracz sa Nagamandong Lawas mipahayag nga kining tunghaan nagahatag edukasyon nga may tinuod nga kahulogan. Ang Salmo 119:160 nag-ingon, “ang diwa sa pulong sa [Diyos] maoy kamatuoran.” Busa dako ang kalipay sa hapit 6,000 nga mamiminaw nga mipatalinghog sa programa sa graduwasyon niadtong Septiyembre 13, 1992.

Ang unang pakigpulong sa buntag, nga gihatag ni Lon Schilling sa Watchtower Farms Committee, nag-ulohan ug “Padayon sa Pagdaog sa Kalibotan ug sa Iyang Magmamando.” Si Brader Schilling mitagad sa Pinadayag 12:11 ug mipunting nga ang bersikulo nagpakita ug tulo ka paagi sa pagdaog: (1) pinaagi sa dugo sa Kordero, (2) pinaagi sa pagwali, ug (3) pinaagi sa pagbaton ug nagasakripisyo-sa-kaugalingon nga espiritu. Iyang gipahinumdoman ang mga estudyante nga daghan sa mga alagad ni Jehova ang nakapasundayag sa maong espiritu ug ngani andam nga miatubang sa kamatayon sa paghupot sa ilang pag-unong ug integridad.

“Bantayi ang Inyong Maayong Pagsalig” maoy tema nga gipasiugda ni John E. Barr sa Nagamandong Lawas. Diha sa iyang tagsaon mainitong tono, iyang gitandi ang pagsalig tali kang Jehova ug sa iyang mga alagad uban sa pagsalig nga naugmad diha sa maayong kaminyoon. Pinaagi sa mga puntos gikan sa 2 Timoteo 1:12, 13, iyang gidasig ang mga estudyante nga bantayan ang ilang pagsalig pinaagi sa pagmahal sa “sundanan sa mga maayong pulong” sa Bibliya. Iyang gipasiugda nga ang personal nga pagtuon himoong usa ka hinungdanong bahin sa adlaw-adlawng eskedyul ug malulotong gipahinumdoman ang mga estudyante nga sa ilang pagkomento sa mga tigom dili kay basta lang makatubag kondili kanunay kanang himoong makahuloganon.

Si William Van De Wall sa Service Department Committee mihatag sa sunod nga pakigpulong, “Ipasundayag ang Mahigugmaong Pagtagad sa Karnerohong mga Tawo.” Iyang gisukna ang mga estudyante kon unsay gusto nila sa usa ka doktor sa pamilya ug gidasig sila sa pag-ugmad sa samang pagbati, kalulot, ug kaluoy nga ilang gipabilhan.

Si Daniel Sydlik sa Nagamandong Lawas madasigong misulti bahin sa temang “Ang Tanang Butang Posible sa Diyos.” Iyang gipahinumdoman ang mga estudyante nga gikataw-an ni Abraham ug Sarah ang morag imposibleng paglaom nga manganak ug lalaki sa ilang katigulangon. Daghan sa mga saad sa Diyos morag imposible gikan sa tawhanong panglantaw; apan sa gipangutana sa manulonda si Abraham, “aduna bay mga butang nga makuli alang kang Jehova?” (Genesis 18:14) Gitambagan ni Brader Sydlik ang mga estudyante sa pagpakitag pagtuo sa katakos sa Diyos sa paghimo sa imposible, nga dili gayod pasagdan kanang pagtuoha nga molubad o matuyatuya, sa bisag unsang mga pagsulay nga ilang atubangon.

Ang mga Instruktor Mitambag

Ang duha ka instruktor sa Gilead ang misunod sa pagsulti. Una, si Jack D. Redford nga mipalapad sa temang “Nagahimog Maayong Ngalan Uban sa Diyos.” Unsay nakahimo sa usa ka ngalan nga maayo o daotan, siya nangatarongan, mao ang tawo nga nagadala niana. Iyang gitandi ang mga ngalang Adan, Nimrod, Jezebel, Saul, ug Judas sa mga ngalang Noe, Abraham, Ruth, Pablo, ug Timoteo. Ang kada ngalan nagadalag daghang mga handurawan tungod sa kurso sa kinabuhi sa nagdala niana. Iyang gipangutana ang mga estudyante kon unsang matanga sa ngalan ang gusto nila sa 10, 100, o ngani 1,000 ka tuig sukad karon—kanang iyaha sa dili molahutay o reklamador o kanang iyaha sa matinumanong misyonaryo? Tagda ang mga sulbad ug mga tumong inay kay ang mga suliran, ang tambag niya kanila.

“Unsa ka Maayo Nimo Gibantayan ang Imong Pagtuo?” maoy makapakutaw sa panghunahuna nga tema nga gipalapad ni Ulysses V. Glass. Iyang gipakasama ang lig-ong pagtuo sa usa ka maayong compass nga kanunayng nagapunting sa hustong dalan. Ang usa ka compass sa kotse mahimong apektado sa laing mga natad sa bato-balani gawas nianang sa yuta, ug ang maong mga natad kinahanglang masumpo. Sa susama, kining karaang kalibotan mipatungha ug daghang mga impluwensiya nga makabuyo o makapahuyang sa atong pagtuo kon ato silang pasagdan. Samtang iyang gipasidan-an ang klase batok sa maong mga impluwensiya, si Brader Glass midayeg usab kanila tungod sa ilang pagkadaling makamatikod sa mga tinamdan ug mga pagbati sa uban.

Ang kataposang pakigpulong sa buntag gihatag ni Albert D. Schroeder, usa ka membro sa Nagamandong Lawas. Iyang gidasig ang mga estudyante nga “Padayong Huptan ang Misyonaryong Espiritu,” nga midayeg kanila tungod sa pagpakita sa samang misyonaryong espiritu ingon sa gipakita sa unang klase balik niadtong 1943, sa dihang siya nag-alagad ingong registrar sa tunghaan. Siya miingon nga sila makitawhanon, kinaiyanhong mga magwawali, nga gustong magpagiya sa espiritu sa Diyos. Padayon sa pag-ugmad niana nga espiritu, nga mogamit sa bug-os sa New World Translation sa personal nga pagtuon, awhag pa niya. Iyang gitapos kini pinaagi sa bersikulo-por-bersikulo nga paghisgot sa Salmo 24 ingong pananglitan.

Sunod, ang mga estudyante sa Gilead nahimong mga graduwado sa Gilead! Gitunol kanila ang ilang mga diploma samtang ang ilang mga misyonaryong asaynment gibasag kusog, nga gipalakpakan ug maayo sa mamiminaw.

Sa hapon, si Calvin Chyke sa Factory Committee maoy nagdumala sa Pagtuon sa Bantayanang Torre. Usa ka maanindot nga programa sa estudyante ang misunod, nga naghisgot bahin sa mga eksperyensiya sa kanataran sa mga estudyante sulod sa lima-ka-bulan nga kurso ug usab may gipasundayag nga mga slide sa pila ka nasod diin didto sila ipadala. Ingong dugang, usa ka edaran nang magtiayon ang giinterbiyu, ug ilang gipaambit ang pila ka kaalam ug eksperyensiya nga ilang nabatonan gikan sa daghang tuig ingong mga misyonaryo. Ang hapon gitapos sa usa ka tukma sa panahon nga drama nga nag-ulohang Do Not Be Misled or Mock God.

Ang mamiminaw mibiya nga malipayon, naukyab sa pagkakita kon unsa ang mahimo sa edukasyon sa kamatuoran sa Diyos ug nalipay sa pagkahibalo nga ang mga kaayohan sa maong edukasyon magapadayon nga mabati sa tibuok kalibotan. Samtang kining 48 ka misyonaryo nagbulag-bulag ngadto sa ilang mga asaynment, daghang mga pag-ampo ang gipahinungod kanila, nga nagapahayag sa kinasingkasing nga paglaom ug pagsalig nga kining mga matinumanon mahimong usa ka panalangin sa katawhan sa Diyos bisan asa sila moadto.

[Kahon sa panid 19]

Mga Estadistika sa Klase

Mga nasod nga gihawasan: 7

Mga nasod nga giasaynan: 18

Gidaghanon sa estudyante: 48

Gidaghanon sa magtiayon: 24

Aberids nga edad: 32.8

Aberids nga tuig sa kamatuoran: 15.3

Aberids nga tuig sa bug-os-panahong pag-alagad: 10.4

[Kahon sa panid 20]

MGA MIGRADUWAR SA EKSTENSIYON NGA KLASE SA GILEAD

Niadtong Hunyo 21, 1992, usa ka grupo sa 24 ka misyonero migraduwar gikan sa ika-upat nga klase sa Gilead Extension School sa Selters/Taunus, Alemanya. Ang klase, nga gilangkoban sa 11 ka minyong magtiayon ug 2 ka dalagang sister nga gikan sa pito ka nasod, miaberids ug 32 ang panuigon, 14 ka tuig sukad sa bawtismo, ug 8.5 ka tuig sa pag-alagad sa bug-os panahong pagwali nga buluhaton. Kapin sa 2,000 ang mitambong sa graduwasyon.

Si Brader Jaracz mibukas sa programa pinaagi sa paghisgot sa Proverbio 11:24, nga nagaingon: “Adunay nagasabulak ug nagadugang pa gayod.” Iyang giingon nga ang mga estudyante hapit nang ikatag ug seguradong modugang sa pag-uswag.

Makapadasig nga kasulatanhong mga pakigpulong ang gihatag nila ni Richard Kelsey, koordinetor sa Komite sa Sanga sa Alemanya; Wolfgang Gruppe sa Service Department; Werner Rudtke ug Edmund Anstadt, usab membro sa Komite sa Sanga; ug ang duha ka instruktor, Dietrich Förster ug Lothar Kaemmer. Si Albert Schroeder sa Nagamandong Lawas mihatag ug makaiikag nga pangunang diskurso nga nag-ulohang “Padayon nga Mahimong mga Tigpangita sa Espirituwal nga Mutya.” Ang kinapungkayan sa programa mao ang paghatag sa mga asaynment ngadto sa 11 ka nasod sa Aprika, Sentral Amerika, ug Sidlakang Uropa, nga tapos niana gibasa sa usa ka migraduwar ang usa ka sulat alang sa Nagamandong Lawas nga nagpahayag sa kinasingkasing nga apresasyon.

[Hulagway sa panid 18]

Ika-93 nga Klase nga Migraduwar sa Watchtower Bible School of Gilead

Sa listahan sa ubos, ang mga lumbay ginumerohan gikan sa atubangan paingon sa likod ug ang mga ngalan gilista gikan sa wala patuo sa matag lumbay.

(1) Hitesman, C.; West, P.; Evans, D.; Hipps, M.; Simonelli, N.; Wood, S.; Corkle, M.; Flores, C.; Thomas, J. (2) Jones, M.; Nissinen, J.; Sponenberg, M.; Zachary, K.; Ravn, G.; Backman, M.; Wettergren, A.; Evans, D.; Flores, R.; Caporale, G. (3) Simonelli, N.; Rechsteiner, M.; Rechsteiner, M.; Ruiz-Esparza, L.; Gerbig, B.; Simpson, C.; Zanewich, C.; Zachary, B.; Ricketts, L.; (4) Simpson, J.; Backman, J.; Corkle, G.; Gerbig, M.; Ricketts, B.; Bagger-Hansen, L.; Jones, A.; Zanewich, K.; Ravn, J.; Hipps, C. (5) Sponenberg, S.; Hitesman, A.; Caporale, L.; Ruiz-Esparza, S.; Thomas, R.; Bagger-Hansen, B.; Wood, M.; West, M.; Wettergren, C.; Nissinen, E.