Ang Diyos Dili Makalimot sa “Gugma nga Inyong Gipakita Alang sa Iyang Ngalan”
“ANG Diyos dili hiwi nga kalimtan niya ang inyong buhat ug ang gugma nga inyong gipakita alang sa iyang ngalan, nga niana kamo nagaalagad sa mga balaan ug padayon nga nagaalagad.” (Hebreohanon 6:10) Kining mga pulong ni apostol Pablo tinuod gayod alang sa mga Saksi ni Jehova sa Kasadpang Uropa. Matinumanong nag-alagad sa intereses sa ngalan sa Diyos, sulod sa mga dekada sila dugay nang nag-antos ubos sa mga pagdili nga gipahamtang sa kanhing kontrolado-sa-Sobyet nga mga kagamhanan. Si Jehova naghinumdom sa ilang maayong mga buhat ug gibuboan sila ug mga panalangin sa Gingharian. Pananglitan, atong tan-awon ang milabayng tuig sa pagalagad gikan sa tulo lamang niining mga dapita.
Mga Teritoryo sa Kanhing Unyon Sobyet
Ang mga teritoryo sa kanhing Unyon Sobyet nagtaho nga sulod sa 1992 nga tuig sa pag-alagad, ang kinatas-ang gidaghanon sa mga magmamantala sa Gingharian miusbaw ug 35 porsiento—gikan sa 49,171 ngadto sa 66,211! Apan dili lang kana, tungod kay kadtong mga magmamantala aktibo kaayo, ingon sa gipakita sa maayong mga pag-uswag sa pagpahimutang sa mga literatura sa Bibliya, lakip na sa mga magasin. Napahimuslan nila pag-ayo ang mga brosyur ug mga pulyeto usab, nga nakapahimutang ug 1,654,559. Kapin kana sa triple sa miaging tuig nga gidaghanon nga 477,235! Unsay gisangpotan niining tanang mga pagpahimutang? Midoble ang gidaghanon sa mga pagtuon sa Bibliya sa balay. Karon 38,484 ka pagtuon sa Bibliya ang ginadumala.
Usab, ang pagpakig-ambit sa oksilyare payunir nga pag-alagad misulbong ug 94 porsiento. Dayag kini nakaamot sa tagsaong gidaghanon sa bag-ong nabawtismohan nga mga tinun-an, 26,986, kon itandi sa miaging tuig nga gidaghanon nga 6,570, usa ka makapakurat nga 311-porsiento nga pag-uswag!
Sa unsang paagi unang nainteres sa maayong balita ang pila ka bag-ong bawtismado? Usahay ang dulot nga kabalaka sa Saksi nga nagadumala sa pagtuon maoy hinungdan. Usa ka nagadumalang magtatan-aw gikan sa Moldova miasoy:
“Ako ug akong asawa miduaw sa usa ka babaye nga sa miagi nagpakitag interes sa kamatuoran sa Bibliya. Nasugdan ang pagtuon sa Bibliya uban kaniya. Ugaling, ang iyang bana wala magpakitag interes. Usa ka adlaw sa dihang kami moadtoay sa pagduaw kaniya sa pagpadayon sa pagtuon, ang klima tugnaw kaayo ug may niyebe. Walay tawo sa kadalanan, apan nakaabot ra kami sa iyang balay untop gayod sa gikasabotang panahon. Iyang giingnan ang iyang bana: ‘Nakita nimo kon unsa ka dako sa kabalaka ning mga tawhana kanato? Sila untop sa panahon bisan pa sa niyebe.’ Kining hitaboa nakapahinuktok sa iyang bana. Gibag-o niya ang iyang kaisipan ug miduyog sa pagtuon, ug karon siya ug ang iyang asawa mga bawtismadong Saksi na.”
Sa ubang mga panahon ang pagkamatinahuron sa mga Saksi mahimong makapukaw sa interes sa maayong balita. Usa ka ansiano, usab gikan sa Moldova, nakasinati niini:
“Usa ka tawo nga akong giduaw sa akong pagsangyaw sa teritoryo dili interesado sa mga Saksi ni Jehova. Matud niya siya usa ka Ortodokso, sama sa iyang amahan ug apohan. Busa iya akong gihangyo sa pagbiya sa lugar. Hinuon, sa wala pa ako molakaw, gihatagan niya akog higayon sa pagsulti kaniya sa katarongan sa akong pagduaw. Akong gipunting ang Mateo 28:19, nga nagaingon: ‘Busa panglakaw kamo ug himoa ninyong mga tinun-an ang tanang kanasoran, sa pagpamawtismo kanila sa ngalan sa Amahan ug sa Anak ug sa balaang espiritu.’ Unya gihatagan ko siya sa adres sa among tigomanan ug milakaw. Sa akong katingala, usa ka semana sa ulahi kining tawhana mitambong sa tigom! Nagpabilin siya hangtod natapos ang programa. Miingon siya nga sa tibuok semana, nagbasol siya kay siya dili mahigalaon kanako. Nasugdan ang pagtuon sa Bibliya dihadiha, ug karon siya usa na sa atong mga igsoon.”
Laing tagsaong bahin sa tuig sa pag-alagad mao ang dakong pagsanong alang sa mga panginahanglan sa atong kaigsoonan dihang dapita. Sa panahon sa tingtugnaw sa tuig 1991/92, mga 400 ka tonelada nga pagkaon ug daghang sapot alang sa lalaki, babaye, ug bata ang gipadala sa mga nanginahanglan. Kining mga taganaha gipang-apod-apod sa halos tanang dapit sa kanhing teritoryo sa Unyon Sobyet, ngani hangtod sa halayong Irkutsk sa Siberia ug Khabarovsk, duol sa Hapon. Sa pagkatinuod usa ka dakong ilhanan nga si Jehova wala makalimot sa gugma nga gipakita sa atong mga igsoon alang sa iyang ngalan! Kining pamatuod sa inigsoong gugma nga gipalihok sa espiritu ni Jehova misangpot usab sa paghiusa kanila uban sa ilang tibuok-kalibotang pamilya. Pananglitan, usa ka sister sa Ukraine misulat sa sangang buhatan:
“Ang tabang nga inyong gihatag kanamo dulot nga nakatandog sa among mga pagbati. Kami nakahilak ug nagpasalamat kang Jehova nga Diyos sa dili pagkalimot kanamo. Tinuod, naglisod kami sa materyal karon, apan tungod sa tabang nga miabot gikan sa among mga igsoon sa Kasadpan, nakabangon kami sa materyal nga paagi. Karon, tungod sa inyong tabang, ang among pamilya makagugol ug dugang panahon sa pag-alagad kang Jehova. Kon pagbuot ni Jehova, ang akong anak babaye ug ako mosulod sa pag-oksilyare payunir sa mga bulan sa ting-init.”
Dugang pa, ang hinabang nakahatag ug pamatuod sa mga taga-gawas kay ang mga tumatan-aw nakakita nga ang mga Saksi nagpasundayag sa gugma pinaagi sa ilang mga buhat. Usa ka pamilya sa laing kongregasyon misulat: “Among nadawat ang materyal nga tabang nga pagkaon ug sapot. Sobra na kaayo! Ang inyong tabang ug pagdasig maoy pagtulon-an alang kanamo aron kami usab kinahanglang mohimog maayo alang sa uban. Kining buhat sa gugma namatikdan sa mga dili-magtutuo, ingon man sa interesadong mga tawo ug ilang mga pamilya; kini usa ka dakong pamatuod bahin sa matuod nga panagsoonay.”
Ang lima ka distritong mga kombensiyon ug usa ka internasyonal nga kombensiyon nga gihimo niining miaging Hunyo ug Hulyo, nga may temang “Mga Tigdala sa Kahayag,” maoy laing pamatuod sa pagpanalangin ni Jehova sa kuging buhat sa iyang mga Saksi ug sa gugma nga ilang gipakita tungod sa pagpahibalo sa iyang ngalan. Ang mga kombensiyon gitambongan sa 91,673 ka tawo, ug 8,562 ang nabawtismohan. Ang kinadak-ang tumatambong maoy sa St. Petersburg, ang dapit nga gihimoan sa internasyonal nga kombensiyon, diin 46,214—lakip sa mga delegado gikan sa mga 30 ka nasod sa kalibotan—nagtigom sa Estadyum sa Kirov.
Sa Siberia usa ka lalaki nga mga 60 anyos ang edad miadto sa dapit sa kombensiyon sa Irkutsk aron lamang sa pagtan-aw. Siya miingon: “Ang tanang tumatambong maayog pamisti, nga may mapahiyomong mga nawong, ug malumo sa usag usa. Kining mga tawhana sama rag usa ka nahiusang pamilya. Makabati nga sila mga higala dili lamang diha sa estadyum kondili sa adlaw-adlawng kalihokan usab. Nakadawat ako ug ekselenteng literatura sa Bibliya ug mas nakakat-on ug maayo kon unsang matanga sa organisasyon kini. Buot nako nga makigkontak sa mga Saksi ni Jehova aron sa pagtuon sa Bibliya uban kanila.”
Sa samang kombensiyon sa Irkutsk, diin 5,051 ang mitambong, usa ka interesadong babaye gikan sa Republika sa Yakut, Siberia, mikomento: “Mitan-aw ako sa mga tawo, ug gusto kong mohilak sa kalipay. Mapasalamaton ako kaayo kang Jehova nga gitabangan niya ako sa pag-ila sa maong mga tawo. Dinhi sa kombensiyon, nakadawat ako ug literatura, ug gusto kong makigsulti sa uban mahitungod niana. Gusto gayod nako nga mahimong magsisimba ni Jehova.”
Ang direktor sa Central Stadium sa Alma Ata, Kazakhstan, diin ang 6,605 ang mitambong sa kombensiyon, miingon sa mosunod: “Nalipay ako sa inyong tinamdan. Karon kombinsido ako nga kamong tanan, bata ug tigulang, maoy talahorong mga tawo. Dili ako makaingon nga nagtuo ako sa Diyos, apan nagtuo ako sa mga balaang butang nga gipahibalo pinaagi sa inyong panagsoonay, sa inyong tinamdan sa espirituwal ug materyal nga mga butang.”
Usa ka polis sa kombensiyon sa Alma Ata nag-ingon: “Ako nakakontak na kaninyo sa duha ka beses, sa matag higayon sa kombensiyon. Makapahimuot gayod ang pagtrabaho uban sa mga Saksi ni Jehova.”
Romania
Si Jehova wala usab makalimot sa gugma nga gipakita sa mga igsoon sa Romania alang sa iyang ngalan. Kining miaging tuig sa pag-alagad nakakita ug daghang malipayong mga hitabo alang sa mga Saksi. Una, ang sangang buhatan sa makausa pa gitukod sa Bucharest. Ang kataposang legal nga kalihokan mihunong niadtong 1949. Ang buhatan adunay mga 20 ka brader ug sister nga nagtrabaho diha sa bag-ong mga pasilidad. Ang sangang buhatan nagaalagad sa 24,752 ka magmamantala—ang kinatas-ang nakab-ot nga naghawas sa 21-porsiento nga pag-uswag sa miaging tuig nga aberids.
Human sa mga tuig nga pagsangyaw sa tago, ang mga magmamantala nakapasibo nag maayo sa publikong pultahan-ug-pultahan nga pagwaling buluhaton. Usa ka kasinatian gikan sa Mureş County nagpakita kon sa unsang paagi gipahimuslan pag-ayo sa pila ka Saksi ang bisan unsang kahigayonan sa pagwali ngadto sa uban, bisan sa dihang magbiyahe sila. Ang sangang buhatan misulat:
“Usa ka magmamantala nakahukom sa pagwali gikan sa seksiyon sa tren ngadto sa lain. Ang reaksiyon sa kadaghanan sa mga tawo maayo, apan sa kataposang seksiyon, may mibangon nga pila ka suliran. Walay pasahero ang buot modawat ug kopya sa atong mga magasin. Sa kataposan, usa ka lalaki, nga morag nayugot, mitindog ug nagsinggit: ‘Ilabay ko kanang tanan nimong magasin sa bintana! Nganong gisamok mi nimog maayo nianang inyong relihiyon?’ Ang magmamantala malumong mitubag nga bisan kon iyang ilabay tinuod ang mga magasin, ubang tawo ang mabenepisyohan sa iyang himoon—ang mopunit sa mga magasin. Kay nakamatikod sa kakalma sa magmamantala, ang lalaki nakadayeg pag-ayo nga iyang gikuha ang mga magasin ug siya mismo ang nag-apod-apod sa ubang mga pasahero sulod sa tren. Katingalahan, silang tanan mikuhag magasin. Human sa pag-apod-apod kanila, walay nabilin nga mga kopya alang sa iyang kaugalingon. Busa, ang magmamantala misukna kaniya: ‘Sir, dili ba nimo gustog bisan usa ka kopya alang kanimo?’ Niana ang lalaki misakmit ug usa ka magasin gikan sa usa ka pasahero nga may duha ka kopya ug miingon: ‘Karon usa ka kopya nakaabot usab kanako!’”
Sa daghang nasod ang pagwali nga buluhaton sa mga Saksi ni Jehova usahay makaukay ug pagsupak sa klero sa Kakristiyanohan. Sa Romania, ang mga pari sa Ortodoksong Simbahan sa subsob nasuko sa mga Saksi. Apan kini dili makapugong kang Jehova sa pagpanalangin sa iyang katawhan tungod sa gugma nga ilang gipakita alang sa iyang ngalan. Usa ka magtatan-aw sa sirkito misulat:
“Kauban sa lokal nga kongregasyon, migula kami alang sa pag-alagad sa kabanikanhan. May mga usa ka gatos ka igsoon. Miabang kamig usa ka bus nga nagdala kanamo sa mga 50 kilometros ngadto sa banika, sa usa ka gamayng lungsod. Gidapit namo ang daghan alang sa publikong pakigpulong nga pagahimoon sa Cultural Home. Sa pagsugod sa tigom, ang paring Ortodokso miabot sa pagsamok sa tigom. Ang mga polis misulay sa pagpugong sa pari. Bisan pa niana, wala siya mokalma. Milampos siya sa pagpahunong sa tigom sa dihang iyang gibuak ang bildo sa pangunang ganghaan. Hinuon, daghan sa lokal nga mga molupyo ang wala mouyon sa gihimo sa pari. Usa ka bug-os nga pamatuod ang nahatag sa tanan nga mitambong, ug daghang literatura ang naapod-apod.”
Ikasubo, sa pila ka bahin sa nasod, adunay diyutay rang Saksi. Sa dihang usa ka regular nga payunir unang miabot sa lungsod sa Olt, siyam lamang ang nakaplagan niyang mga igsoon sa tibuok lungsod ug usa ka dakong teritoryo ang sangyawanan. Tapos sa usa ka tuig ang gidaghanon sa mga Saksi miuswag ngadto sa 27, nga lima kanila maoy naaktibo-pag-usab nga mga magmamantala. Nakakita ug kasak-an ang payunir sa siyudad sa Corabia, diin wala gayoy mga Saksi. Tapos lamang sa 45 ka adlaw nga miadto ang mga Saksi, ang lokal nga pari miprotesta sa radyo sa Craiova batok sa ilang buluhaton. Siya miingon nga ilang “gisulong” ang siyudad sa Corabia sa ilang mga pagtulon-an, nga misulay sa pagpausob sa mga tawo sa ilang relihiyon. Ang mga atake nagpadayon, nga ang tuyo undangon ang buluhaton ug daoton ang reputasyon sa mga Saksi niadtong dapita. Kanang tanan misangko sa dihang ang mga igsoon nagtigom sa Bucharest alang sa distritong kombensiyon. Ang Ortodoksong pari sa Corabia naghimog kusganong pahibalo tapos sa serbisyo sa iyang simbahan: “Kitang tanan mohimog demonstrasyon sa kalsada aron ukayon ang polis sa paghimog mga lakang batok sa mga Saksi, nga nagdaot sa tibuok dapit sa ilang mga publikasyon ug naghilo sa katawhan.” Apan sa gabii mismo una pa sa gihunahunang tigom, usa ka talagsaong butang nahitabo. Giguba sa usa ka grupo sa mga tawo ang katedral ug ang City Cultural Home. Busa, ang tigom sa pagprotesta wala gayod mahinayon!
Mga Teritoryo sa Kanhing Yugoslavia
Ang 1992 nga tuig sa pag-alagad usa ka labing lisod nga tuig alang sa mga igsoon sa dapit sa Yugoslavia. Hinuon, sa samang panahon sila may pila ka makalilipayng mga kasinatian. Salamat, si Jehova wala makalimot sa ilang buhat ug sa gugma nga ilang gipakita alang sa iyang ngalan.
Ang gubat misugod sa Slovenia, unya sa Croatia, ug sa ulahi sa Bosnia ug Herzegovina. Sulod sa usa ka tuig, gikan sa usa ka republika, lima ka bag-ong mga Estado ang naninguha sa pagtukod sa ilang kaugalingong utlanan, balaod, ug salapi. Gatos-gatos ka mga Saksi ang kinahanglang mobiya sa ilang mga balay ug midangop sa ilang mga igsoon sa ubang mga dapit. Susama sa ubang mga nasod sa Sidlakang Uropa, ang mga komite sa emerhensiya gitudlo diha sa dodagkong mga siyudad, aron sa pag-atiman ug mga sak-anan, pagkaon, ug sapot alang sa atong nanginahanglang mga igsoon. Sulod sa tuig sa pag-alagad, mga 55 ka toneladang mga pagkaon ang naapod-apod sa mga igsoon diha sa mga kongregasyon sulod sa samok nga mga dapit. Daghang sulat sa apresasyon ang nadawat.
Ang mga igsoon sa Dubrovnik nagbatbat sa ilang dakong pagpasalamat tungod sa nadawat nga hinabang. Samtang usa ka sister mipauli dala ang usa ka pinutos sa pagkaon, usa ka silingan nangutana kon diin siya mipalit sa mga itlog. Ang sister mitug-an kaniya nga ang iyang espirituwal nga mga igsoon sa laing sektor nagpadala niana. Ang silingan nahingangha. Sa laing okasyon usa ka wala hiilhing lalaki gikan sa Slovenia mitawag sa ansiano ug miingon: “Nadunggan nako nga ang mga Saksi ni Jehova nagpang-apod-apod ug pagkaon nga nadawat gikan sa ilang mga kaigsoonan sa hustong paagi. Nakapadala ako ug pipila ka putos ngadto sa mga tawo; ugaling, wala kadto moabot sa hingtungdan. Mahimo ba akong mopadala sa maong mga hinabang kanimo, ug ikaw ang moapod-apod kanila?” Usab, ang mga mantalaan ug radyo nagtahog maayo mahitungod sa atong buluhaton sa pagtabang.
Usa ka igsoon nga nabawtismohan sa internasyonal nga kombensiyon sa Zagreb niadtong 1991 nakaamgo sa nagatubong kalisdanan ug mipalit sa tanang pagkaon sa usa ka tindahan. Iyang gidala ang pagkaon sa iyang balay nga duol sa dapit nga may panagbugno. Samtang nagkagrabe ang kanihit sa pagkaon, kining abiyo nahimong usa ka tinuod nga panalangin sa mga kaigsoonan.
Posible ang pagkuha ug permiso alang sa usa ka dakong trak sa pagdala ug mga pagkaon sa nagkalisod nga mga kaigsoonan sa Sarajevo. Nalipay kami sa pagpahibalo nga ang paghatod nagmalamposon.
Ang gubat nakaangin ug mga sibilyan. Ikasubo, pagkatapos sa tuig sa pag-alagad, unom sa atong mga brader ug sister ug duha ka interesadong tawo ang nawad-an sa ilang kinabuhi, ug ang pila nangaangol.
Hinuon, daghang kasinatian nagpakita nga sa kasagaran, usa ka panalipod ang mahimong usa sa mga Saksi ni Jehova. Sa usa ka higayon ang mga brader mibiyahe ngadto sa usa ka distritong kombensiyon sa Belgrade sa dihang ang bus gipahunong sa mga sundalo, nga nangutana kon adunay membro sa usa ka relihiyon taliwala kanila. Ang mga brader mitubag nga wala. Kinahanglan nilang ipakita ang ilang mga kard sa pagpaila, ug ang pila kanila may mga ngalan nga daw nagpaila nga sila sakop nianang relihiyona. Giakusahan sila sa mga sundalo nga namakak, apan dala sa mga brader ang pahibalo sa ilang pagluwat gikan sa simbahan; bisan tuod sila natawo sa maong relihiyon, gipahayag nila nga sila karon mga Saksi ni Jehova na, nga nagbiyahe ngadto sa ilang kombensiyon. Tungod niini gitugotan sila sa mga sundalo sa pagpadayon.
Ang mga payunir nagpadayon sa ilang pag-alagad uban sa walay pagkapalong nga kasibot, ug kini napamatud-ang usa ka tinuod nga panukmod sa buluhaton. Ang Bantayanang Torre, uban sa iyang makapasadyang mga hapin nga de-kolor, dungan nga gihubad sa tanang pangunang mga pinulongan sa rehiyon. Kana sa regular nagatagana sa mga mahigugmaon sa kamatuoran ug pagkamatarong sa ilang espirituwal nga “pahat sa abiyong pagkaon sa tukmang panahon.” (Lucas 12:42) Sulod sa 1992 nga tuig sa pag-alagad, 674 bag-ong mga brader ug sister ang nabawtismohan.
Dayag, ang Diyos wala makalimot sa buhat sa mga igsoon sa Sidlakang Uropa ug sa gugma nga ilang gipakita alang sa iyang ngalan. Dugang pa, buot niya nga ang iyang tanang magsisimba, walay sapayan kon hain sila nagpuyo, mosunod sa maayong tambag nga sunod gihatag ni Pablo sa Hebreohanon 6:11, nga nagaingon: “Ug among gipanghinaot nga unta ang matag-usa kaninyo hangtod sa kataposan magapadayag sa samang pagkamasingkamoton sa pagkab-ot sa hingpit nga pagsalig sa paglaom.”