“Maayong Buntag! Nahibalo Ka ba Kon Unsay Ngalan sa Diyos?”
SA SANGANG-BUHATAN sa mga Saksi ni Jehova sa Brazil, ang mosunod nga sulat nadawat gikan sa 12-anyos nga kaluhang managsoon sa siyudad sa Fortaleza:
“Niadtong 1990 sa dihang kami diha pa sa kinto grado, ang among tunghaan nag-organisar sa usa ka siyensiya, arte, ug kultural nga pasundayag. Gisaysay namo sa magtutudlo nga buot namong ang among presentasyon malahi sa giplanong andamon sa ubang estudyante. Sanglit nakadungog siya nga kami naghisgot kang Jehova ug sa Bibliya sa miagi, siya misugyot: ‘Nan makasulat kamo bahin sa inyong Diyos!’
“Gisabot namo nga kadto usa ka higayon sa paghatag ug pamatuod ug gihukom nga hikayon ang usa ka eksibit sa mga basahon sa Bibliya nga nagsentro sa ngalan ni Jehova. Giandam namo ang dakong reproduksiyon sa mga pulong sa Salmo 83:18 ug gipapilit kana sa hulagway sa usa ka abling Bibliya. Gawas pa, gibutang namo sa ibabaw sa usa ka lamesa ang lainlaing hubad sa Bibliya nga may ngalang Jehova. Sa samang lamesa, gipasundayag namo ang nagkadaiyang mga basahon sa Bibliya. Sa tumoy sa lamesa, gibutang namo ang VCR ug TV sa pagpakita sa mga bisita sa usa ka panig-ingnan diin ang ngalang Jehova gigamit sa popular kaayong pelikula.
“Panahon sa pasundayag, sa dihang ang usa ka tawo moanha sa among lamesa, kami moingon: ‘Maayong buntag! Nahibalo ka ba kon unsay ngalan sa Diyos?’ Human hatagig higayon ang bisita sa pagtubag, kami mopadayon: ‘Tan-awa ra dinhi! Ang daghang hubad sa Bibliya nagapakita nga ang iyang ngalan maoy Jehova,’ nga ipunting ang ngalan diha sa lainlaing mga Bibliya, sama sa iya ni João Ferreira de Almeida, The Jerusalem Bible, ug New World Translation. Dayon ipasalida namo ang esena diin ang bida sa pelikula nagpasiugda sa Jehova ingong ngalan sa Diyos. Sa dihang ang mga tawo magpakitag interes, amo silang hatagag usa ka magasin o tract nga may dugang impormasyon.
“Usa sa mga batan-on nga mianha sa among lamesa nangayo sa librong Mga Pangutanang Gisukna sa mga Batan-on—Mga Tubag nga Mosaler. Gisusi sa among magtutudlo ang librong Paghimo sa Imong Pamilyahanong Kinabuhi nga Malipayon ug mipatugbaw: ‘Ay! Pagkamakaiikag nga libro!’ Sa pagkatapos sa pasundayag, kami nakapahimutang ug 7 ka libro, 18 ka tract, ug 67 ka magasin. Gigantihan kamig ikatulong dapit sa pasundayag. Apan labaw sa tanan, kami nalipay kaayo sa pribilehiyo sa pagpaila sa balaang ngalan, Jehova.”