Mga Magmamantala sa Gingharian Nagtaho

Ang Pagkamatinud-anon Nagpaila sa Atong Ministeryo

ANG pagkamatinud-anon maoy usa ka pangunang kinahanglanon alang sa mga Kristohanon. Si apostol Pablo misulat sa Hebreohanon 13:18: “Kami masaligon nga kami nagbaton ug pagkamatinud-anon, kay kami nagtinguha nga magagawi nga matinud-anon sa tanang butang.” Ang pagpadapat nato sa pagkamatinud-anon ‘nagdayandayan sa pagtulon-an sa atong Manluluwas, ang Diyos, diha sa tanang butang.’ (Tito 2:10) Ang pagkamatinud-anon, ingon man ang pagwali sa Gingharian, sa duha ka Kristohanon sa gingharian sa Tonga sa Habagatang Pasipiko nagahatag ug kusganong pamatuod. Ang sangang buhatan sa Watch Tower Society sa Western Samoa miasoy:

“Sa daghang katuigan ang usa ka Saksing magtiayon naghisgot bahin sa Gingharian sa Diyos ngadto sa katawhan sa upat ka balangay sa ilang pulo apan walay dayag nga mga resulta. Unya, samtang nagmasakiton ang iyang bana, ang asawa maoy nag-atiman sa ilang kalubihan ug naglugit ug nagbulad sa kopras, ang ilang bugtong pangabuhian. Sa pag-abot sa panahon sa pagsusi sa mga maninimbang ug kopras, ang sako sa laing tawo nasagol sa iyang lima ka sako. Giagda siya sa mga tagabalangay nga hiposon ang ekstrang sako ug isipon kanang panalangin gikan sa Diyos. Hinunoa, ang sister mibalibad ug, bisan pag unom ka sako ang gibayran, midawat lamang sa kantidad nga angay kaniya. Ang iyang pagkamatinud-anon namatikdan.

“Sa ulahi, sa dihang ang bana mibiyahe ngadto sa laing pulo, ang tag-iyag tindahan mihangyo kaniya sa pagpalit ug pila ka butang alang kaniya. Ang Saksi nagbuhat sumala sa gihangyo ug giuli ang sukli sa tawo. Ang tawo natingala. Siya miingon nga kadto mao ang unang panahong may nag-uli ug sukli. Ang uban nga iyang gihangyo sa pagpalit ug mga butang kanunayng nagtago sa sukli. Sa laing panahon, sa dihang ang Saksi may gikinahanglan gikan sa tindahan sa maong tawo, ang tawo naghatag kaniya sa yawi sa tindahan, nga nagtugon sa pagkuha kon unsay iyang gikinahanglan ug ibilin ang bayad sa tindahan. Ang ubang presente nangutana sa tag-iyag tindahan nganong iyang gihatag ang yawi sa tindahan ngadto sa Saksi ug dili ngadto kanila. Ang tag-iya misaysay nga sa balangay ang Saksi lamang ang iyang kasaligan.

“Ang maayong batasan sa maong magtiayon ginahisgotan sa mga tagabalangay. Ang mga Saksi ilado tungod sa ilang pagkamatinud-anon, ilang neyutral nga baroganan bahin sa politika, ug ilang pagsangyaw mahitungod sa Gingharian sa Diyos, nga nagpadayag sa kalainan tali sa mga tinuohan sa mga tagabalangay ug sa mga pagtulon-an sa Bibliya. Karon sa dihang ang mga pangutana motungha mahitungod sa Bibliya, ang mga tawo kasagarang moduol sa mga Saksi alang sa mga tubag. Ang bana nakabangon gani sa gabii, nakaadto sa usa ka miting sa balangay, ug nakatubag sa mga pangutana nga gipatungha bahin sa usa ka ulohan sa Bibliya. Inigtambong ug mga lubong sa balangay, kasagarang siya hangyoon sa pagpakita kon unsay ginaingon sa Bibliya mahitungod sa kamatayon, ug ang iyang mga pahayag ginatuohan.”

Busa ang pagkamatinud-anon sa maong Saksing magtiayon ug ang ilang pagwali sa Gingharian nagahatag ug maayong pamatuod niining nindot nga pulo sa Habagatang Pasipiko. Sila naglaom nga ang uban motuon sa Bibliya ug mobarog dapig sa kamatuoran. Kon himoon nila kana, si Jehova nga Diyos seguradong magapanalangin kanila.​—Juan 8:32.