Kon sa Unsang Paagi Makatabang ang mga Kristohanon sa mga Tigulang

“KAMI dili mohunong, apan bisan kon ang among pagkatawo sa gawas nagakadunot, ang among pagkatawo sa sulod dayag nga nagakabag-o adlaw-adlaw. . . . Kay gitutok namo ang among mga mata, dili sa mga butang makita, kondili sa mga butang nga dili makita. Kay ang mga butang nga makita lumalabay, apan ang mga butang nga dili makita walay kataposan.” Matud pa ni apostol Pablo diha sa iyang ikaduhang sulat ngadto sa mga taga Corinto.​—2 Corinto 4:16-18.

Sa karaang mga panahon, ang mga lalaki ug babaye sa pagtuo nagtutok sa ilang mga mata sa mga butang nga dili makita, nga naglakip sa tanang mga butang nga gisaad nga buhaton sa ilang Diyos, si Jehova, sa iyang tinudlo nga panahon. Diha sa basahon sa mga Hebreohanon, gidayeg ni Pablo ang maong mga tawo, nga naghupot sa ilang pagtuo hangtod sa panahon sa ilang kamatayon​—ug ang pipila kanila nabuhi nga tigulang na kaayo. Iyang gihisgotan sila ingong panig-ingnan alang kanato, nga nagaingon: “Sa pagtuo silang tanan nangamatay, bisag wala sila makadawat sa katumanan sa mga saad, apan nakita nila kana sa halayo ug nagaabiabi niana.”​—Hebreohanon 11:13.

Karong adlawa duol na kaayo kita sa katumanan niining mga saara. Apan kita may mga masakiton ug mga tigulang taliwala kanato kinsa wala makatino nga sila magpabiling buhi sa pagkakita sa kataposan niining daotang sistema. Tingali ang pipila kanila usab mamatay sa pagtuo nga dili makakita sa tanang katumanan sa mga saad sa ilang presenteng gitas-on sa kinabuhi. Usa ka dako nga pagdasig alang kanila ang mga pulong ni Pablo sa 2 Corinto 4:16-18.

Mahinumdom si Jehova sa tanan niyang maunongong mga alagad, lakip ang mga masakiton ug mga tigulang. (Hebreohanon 6:10) Ang matinumanong mga tigulang madungganong gihisgotan sa daghang bahin sa Bibliya, ug diha sa Kasugoan ni Moises, linain nga gihisgotan ang pagpasidungog nga ipakita sa mga tigulang. (Levitico 19:32; Salmo 92:12-15; Proverbio 16:31) Taliwala sa unang mga Kristohanon, ang mga tigulang gitamod pag-ayo. (1 Timoteo 5:1-3; 1 Pedro 5:5) Usa ka basahon sa Bibliya naundan sa matahom nga kahubitan sa mahigugmaong pag-atiman ug makapatandog nga pagsakripisyo sa kaugalingon nga gipakita sa usa ka batan-ong babaye ngadto sa iyang tigulang nga ugangan nga babaye. Ang basahon tukmang nagdala sa ngalan sa maong batan-ong babaye, si Ruth.

Usa ka Debotadong Katabang

Mapait ang kinabuhi alang sa nagkatigulang nga si Naomi. Tungod sa kagutmanan napugos siya, uban sa iyang gamayng pamilya, sa pagbiya sa mga higala ug panulondon sa Juda ug mipuyo sa silangan sa Subang Jordan sa yuta sa Moab. Dinhi namatay ang bana ni Naomi, gibiyaan siya uban sa iyang duha ka anak nga lalaki. Sila, sa ulahi, midako ug nagminyo, apan unya sila usab namatay. Gibiyaan si Naomi nga walay mga anak nga moatiman kaniya.

Siya tigulang na kaayo aron makasugod ug bag-ong pamilya, ug ang kinabuhi daw diyutay lang ang ikatanyag. Sa pagkadili-mahakogon, buot niya nga si Ruth ug Orpa, ang duha ka balo sa iyang duha ka anak nga lalaki, mopauli ngadto sa mga balay sa ilang ginikanan aron makapangita sila ug mga bana. Mopauli siyang mag-inusara ngadto sa iyang kaugalingong yuta. Karon, usab, ang pipila ka tigulang nagmasulob-on, ilabina kon sila namatyan ug mga minahal. Sama kang Naomi, sila nagkinahanglan nga dunay moatiman kanila, apan dili nila buot nga mahimong palas-anon.

Bisan pa, wala biyai ni Ruth ang iyang ugangan nga babaye. Gihigugma niya kining tigulang nga babaye, ug gihigugma niya si Jehova, ang Diyos nga gisimba ni Naomi. (Ruth 1:16) Busa sila misugod sa ilang panaw balik sa Juda. Nianang yutaa, dihay usa ka mahigugmaong kahikayan ubos sa Kasugoan ni Jehova nga ang kabos nga mga tawo makahagdaw, o makahipos, sa bisan unsa nga mabilin sa mga umahan human nga mahakot na ang mga naani. Si Ruth, nga mas batan-on, kinabubut-ong mitanyag nga maoy motrabaho niini, nga nag-ingon: “Paadtoa ako, palihog.” Siya makugihong nagtrabaho alang kanilang duha.​—Ruth 2:2, 17, 18.

Ang pagkamatinumanon ug gugma ni Ruth alang kang Jehova maoy dako nga pagdasig kang Naomi, kinsa misugod sa paghunahunag positibo ug praktikal nga paagi. Ang kahibalo niya sa Kasugoan ug sa mga kustombre sa nasod karon magamit na. Mihatag siya ug maalamong tambag ngadto sa iyang debotadong katabang aron nga ang batan-ong babaye, pinaagi sa pakigminyo sa igsoon sa iyang namatayng bana, makabawi sa panulondon sa pamilya ug makabatog anak aron magpadayon ang kaliwat sa pamilya. (Ruth, kapitulo 3) Si Ruth maoy usa ka maayong panig-ingnan sa mga tawong nagasakripisyo sa pag-atiman sa mga masakiton o sa mga tigulang. (Ruth 2:10-12) Sulod sa kongregasyon karon, dako ug mahimo ang susama nga pagtabang sa mga masakiton ug sa mga tigulang. Sa unsang paagi?

Pag-organisar Hinungdanon

Sa unang Kristohanong kongregasyon, adunay usa ka listahan sa mga balo nga nagkinahanglag materyal nga tabang. (1 Timoteo 5:9, 10) Sa ingon, karong adlawa, diha sa pipila ka kahimtang ang mga ansiano makahimog listahan sa mga masakiton ug sa mga tigulang nga nagkinahanglag linaing pagtagad. Diha sa pipila ka kongregasyon usa ka ansiano ang gihangyo sa pag-atiman niini ingong iyang linain nga kaakohan. Sanglit daghang mga tigulang, sama kang Naomi, dili kaayo gustong mangayog tabang, ang maong igsoon kinahanglang hanas sa pag-analisar sa kahimtang ug​—sa mataktikanhon ug maalamong paagi—​magatino nga nabuhat ang gikinahanglang mga butang. Siya makahimo, pananglitan, sa pagsusi kon ang Kingdom Hall may igong mga tagana alang sa mga masakiton ug sa mga tigulang. Kon praktikal, iyang tagdon ang mga butang sama sa hanayhay nga agianan alang sa mga wheelchair, maayong mga pasilidad sa kasilyas, mga earphone alang sa bungol-bungol na, ug usa ka dapit alang sa espesyal nga mga lingkoranan. Tinoon usab niining mga igsoona nga ang tanang dili makatambong sa Kingdom Hall makahulam ug teyp sa girekord nga mga miting o makapamati niini diha sa gikonektar nga linya sa telepono.

Hayan dunay panginahanglan usab alang sa transportasyon ngadto sa mga tigom ug sa mga kombensiyon. Usa ka tigulang nga igsoong babaye nagkaproblema tungod kay ang tigdala kaniya kanunay sa mga tigom dili man makahapit kaniya. Nanawag siya sa telepono sa daghang indibiduwal una pa niya makaplagi ang usa nga mohapit kaniya ug sa kataposan mibati nga siya usa ka palas-anon. Dili unta niya bation ang kaulaw kon gihimo pa sa ansiano ang usa ka kahikayan sa pag-atiman sa maong mga butang.

Kini nga ansiano makahangyo usab sa nagkalainlaing pamilya kon sila makahimo ba sa pagpulipuli sa pagduaw sa mga tigulang. Niining paagiha ang kabataan makakat-on nga ang pag-atiman sa mga tigulang maoy bahin sa Kristohanong kinabuhi. Maayong makakat-on ang kabataan sa pagpangabaga niini nga kaakohan. (1 Timoteo 5:4) Usa ka magtatan-aw sa sirkito miingon: “Sa akong naagian, diyutay ra kaayong kabataan o mga batan-on ang moduaw sa mga tigulang o masakiton nga walay mag-agda kanila.” Tingali wala lang nila kini hunahunaa, o tingali sila dili lang mahibalo kon unsay buhaton o isulti; ang mga ginikanan makatudlo kanila niini.

Apan, timan-i nga moapresyar ang kadaghanang tigulang nga mahibalong daan nga may moabot nga higala. Kini mohatag kanila ug dugang kalipay sa pagpaabot ug bisita. Kon ang mga bisita magdalag matimotimo, sama sa kape o keyk, ug dalidali nga manglimpiyo human niini, malikayan ang dugang kabug-at diha sa tigulang. Usa ka tigulang nga magtiayon, nga baskog pa, may regular nga adlaw sa matag semana nga diin magdala silag gamayng basket nga pangpiknik nga punog kalan-on ug mosugod sa pagduaw sa nagkalainlaing mga tigulang sa kongregasyon. Ang ilang mga pagduaw giapresyar gayod.

Alang sa kaayohan sa mga tigulang, daghang kongregasyon ang mihimog Pagtuon sa Libro sa Kongregasyon sa mga oras sa adlaw. Sa usa ka dapit ang pipila ka pamilya ug nag-inusarang mga magmamantala gihangyo kon buot ba nilang paluyohan ang maong grupo, ug ang resulta mao ang usa ka grupo sa pagtuon sa libro diin ang mga tigulang ug mga batan-on makaatiman sa usag usa.

Dili mga ansiano lang ang atong pasagdan nga maoy manguna niining bahina. Kitang tanan kinahanglang mahibalo sa mga panginahanglan sa mga masakiton ug sa mga tigulang. Atong komostahon sila diha sa Kingdom Hall ug mogahin ug panahon nga makig-estorya kanila. Ang pagdapit alang sa dili pormal nga panag-ubanay tingalig kahinangpan. O makadapit kita kanila sa pagkuyog kanato sa piknik o bisan sa bakasyon. Kanunay iuban sa usa ka Saksi ang tigulang nga mga magmamantala sa iyang kotse kon siya moadto sa siyudad diha sa mga pagduaw sa negosyo. Hinungdanon nga tabangan ang mga tigulang nga padayong mobating nalangkit. Ayaw tugoti sila nga magpalayo, nga mao untay himoon ni Naomi, nga magpadali sa proseso sa pagkatigulang o sa pagkaango-ango.

Ang mga batan-on nga baldado o masakiton nagkinahanglan usab ug pagtagad. Usa ka Saksi nga may tulo ka batang lalaki nga may sakit nga dili maayo, diin ang duha namatay na, miingon: “Malisdan ang kongregasyon sa pagpadayon sa pagpakitag pagtagad kon ang usa dugay nang nagkasakit. Nganong dili motudlog pipila ka kasaligan batan-ong mga magmamantala sa paghisgot sa adlaw-adlaw nga teksto ug sa pagbasag usa ka kapitulo gikan sa Bibliya kada adlaw uban sa ilang masakiton nga higala? Ang mga batan-on, lakip na ang mga payunir, makapulipuli.”

Kon ang Kamatayon Daw Dili na Kapugngan

Ang mga alagad ni Jehova kanunayng maisogong nagaatubang sa kamatayon, sakit man kana o paglutos. Dihang bation sa mga nagkasakit nga tingali hapit na silang mamatay, kinaiyanhon na nga ilang bation ang nagkalainlaing mga emosyon. Inigkamatay nila, ang ilang mga paryente moagi usab ug panahon sa pagpasibo, kasubo, ug pagdawat. Busa maayo sa tawong masakiton nga siya magmabukas sa paghisgot bahin sa kamatayon, sama kang Jacob, David, ug Pablo.​—Genesis, kapitulo 48 ug 49; 1 Hari 2:1-10; 2 Timoteo 4:6-8.

Usa ka doktor nga Saksi misulat: “Kinahanglang prangka kaayo kita niining ulohana. Sukad sa akong pagkadoktor wala pa gayod ako makakita nga makahatag ug kaayohan sa mga pasyente ang pagtago sa kamatuoran nga siya gitagalan na lamag mga adlaw.” Bisan pa, kinahanglang sabton nato nga ang pasyente mismo gustong mahibalo, ug kon kanus-a siya buot masayod niini. Ang ubang mga pasyente dayag nga mosulti nga sila nahibalo nga hapit na silang mamatay, ug kinahanglang ilang ipadayag ang ilang mga hunahuna ug mga pagbati bahin niini. Ang uban daw molaom gihapon, ug maayong moduyog usab kanila sa paglaom ang ilang mga higala.​—Itandi ang Roma 12:12-15.

Ang usa nga hapit nang mamatay tingali gikapoy na kaayo o naglibog nga maglisod siya sa pag-ampo. Ang maong pasyente hayan malipay nga masayod sa Roma 8:26, 27 nga ang Diyos nakasabot sa “mga pag-agulo nga dili mabungat.” Nahibalo si Jehova nga ubos sa maong kalisod siya maglisod sa pagpangitag mga pulong nga iampo.

Kon posible, hinungdanon ang pag-ampo uban sa pasyente. Usa ka igsoon miasoy: “Sa dihang himalatyon ang akong inahan ug nawad-an na ug kusog nga makasulti, gipaila niya kini pinaagi sa pagdapat sa iyang mga palad nga gusto niya nga mag-ampo kami uban niya. Human sa among pag-ampo, nanganta kami ug usa sa mga awit sa Gingharian, sanglit gusto kaayog musika ang akong inahan. Sa sinugdan, gilaylay lang namo ang tuno, ug unya hilom namong giawit ang mga pulong. Siya nalingaw gayod niana. Sa walay duhaduha, kining mga awita nga among gilangkit sa among kinabuhi ingong mga Saksi ni Jehova nagahawas sa mga pagbati nga lisod nga ikapahayag.”

Ang pagpakigsulti sa tawong hapit nang mamatay nagkinahanglag gugma, taktika, ug pagbati. Ang bisita makaandam ug makapadasig ug makapalig-ong mga butang nga ihisgot, ug siya kinahanglang alisto nga likayan ang negatibong butang kon maghisgot bahin sa ubang mga tawo ug sa ilang mga problema. Lain pa, ang gidugayon sa pagduaw kinahanglang ipasibo kon unsa ang makataronganon ug angay. Kon ang pasyente daw walay panimuot, maayong hinumdoman nga basig makadungog siya sa isulti. Busa pag-amping sa imong isulti.

Usa ka Kaakohan nga Atong Pakig-ambitan

Ang pag-atiman sa mga masakiton ug sa mga tigulang maoy usa ka mabug-at nga kaakohan. Alang sa mga tawong suod kaayo sa pasyente, kini malisod sa pisikal ug sa emosyonal. Sila nagkinahanglan ug angayan sa pagsabot ug tabang sa nahibilin sa kongregasyon. Ang mga tawong nagatagad sa masakitong membro sa pamilya o sa mga isigkamagtutuo nagabuhat sa matarong, bisan kon kini nagkahulogang dili makatambong sa pipila ka tigom o ang ilang pagpakigbahin sa ministeryo sa kanataran mous-os sa usa ka panahon. (Itandi ang 1 Timoteo 5:8.) Sila mapalig-on sa masinabtanong tinamdan sa kongregasyon. Usahay mahimong temporaryong pulihan sa usa ka igsoong lalaki o babaye ang regular nga tigbantay aron makatambong sa tigom o makatagamtam ug pipila ka makapahayahay nga mga oras sa buluhatong pagsangyaw.

Siyempre, kon ikaw mismo ang may sakit, may mabuhat ka usab. Ang kawalay paglaom ug kawalay mahimo bahin sa imong balatian, mohatag kanimog mapait nga pagbati, apan ang mapait nga pagbati magpalain sa usa ka tawo ug makapalayo sa uban. Paningkamot hinuon sa pagpahayag ug apresasyon ug kooperar. (1 Tesalonica 5:18) Pag-ampo sa uban nga anaa sa kasakit. (Colosas 4:12) Palandonga ang kahibulongang mga kamatuoran sa Bibliya ug ipahayag kini uban sa mga bisita. (Salmo 71:17, 18) Nunot nga maikagon sa makapalig-on sa pagtuong pag-uswag sa katawhan sa Diyos. (Salmo 48:12-14) Pasalamati si Jehova alang niining malipayong kaugmaran. Ang pagpalandong niining mga butanga makahatag, sama sa adlawng misalop nga naghatag ug mas dulom ug mas init nga silaw sa kahayag kay sa adlaw sa kaudtohon, sa kataposang mga adlaw sa atong kinabuhi ug katahom sa iyang kaugalingon.

Kitang tanan angay maningkamot nga huptan ang paglaom nga, ilabina sa masulayong mga panahon, magabantay sa atong mga hunahuna sama sa usa ka salokot. (1 Tesalonica 5:8) Maayong palandongon ang paglaom sa pagkabanhaw ug ang malig-ong pundasyon niini. Kita makalantaw sa unahan nga masaligon ug maikagong nagapaabot sa adlaw sa dihang wala na unyay sakit o kaluyahon tungod sa pagkatigulang. Unya, bation sa tanan ang kahimsog sa panglawas. Bisan ang nangamatay mobalik. (Juan 5:28, 29) Kining “dili makitang mga butang” atong nakita sa atong mga mata sa pagtuo ug sa atong kasingkasing. Ayaw gayod wad-a kini diha sa imong panan-aw.​—Isaias 25:8; 33:24; Pinadayag 21:3, 4.