Prinsipyo o Popularidad—Hain Niini ang Imong Giya?
SAMTANG diha pa sa ikaunom nga ang-ang sa elementarya si Norihito misalmot sa usa ka bangga sa esport. Wala damha, kinahanglan siyang modesisyon. Ang tanang estudyante gikinahanglan nga moduyog sa patriotikong seremonyas. Moduyog ba siya sa iyang kaubang mga estudyante niining daw naandang buhat?
Nakat-onan ni Norihito gikan sa Bibliya nga sayop ang pagduyog sa bisan unsang buhat sa pagsimba ngadto sa usa ka diyos gawas kang Jehova. (Exodo 20:4, 5; Mateo 4:10) Nasayod usab siya nga ang mga Kristohanon kinahanglan magpabiling neyutral sa tanang politikal nga kalihokan sa kalibotan. (Daniel 3:1-30; Juan 17:16) Busa bisan kon ang iyang kaubang mga estudyante nag-awhag kaniya sa pag-apil, siya maisogon apan matinahurong mibarog. Unsa may imong buhaton sa ingon nianang kahimtang?
Ang Tinguha nga Mohaom
Ang Kasulatan nagpakita nga ang mga tawo gilalang sa Diyos aron nga makighigala, aron nga magsinabtanay sa usag usa, ug aron magkalipay sa pagbuhat sa mga butang nga magkauban. Kinaiyanhon lamang nga makig-uban sa isigkaingon, nga mahimong dinawat, nga mohaom. Ang maong mga pagbati makapahimo sa kinabuhi nga labi pang makalipay ug makaamot sa kalinaw ug kaharmoniya sa atong pagpakiglabot sa uban.—Genesis 2:18; Salmo 133:1; 1 Pedro 3:8.
Ang kinaiyanhong tinguha nga mohaom gibanaag diha sa pagpasiugda pag-ayo sa pagpahiuyon nga makita sa pila ka kultura bisan karong adlawa. Pananglitan, ang mga batang Hapon gibansay gikan sa linghod nga panuigon aron makaamgo ug mopahiuyon sa mga mando sa kadaghanan. Ang ilang tradisyon nagtudlo kanila nga usa sa ilang kinadagkoang mga katungdanan mao ang pagpakig-uyon sa komunidad. “Ang mga Hapon lagmit labi pang motrabaho nga ginurupo kay sa mga taga-Kasadpan,” miingon si Edwin Reischauer, kanhing embahador sa T.B. sa Hapon ug usa ka dulot nga tigpaniid sa mga batasan sa mga Hapon. Siya midugang: “Samtang ang mga taga-Kasadpan tingali sa labing menos magpakita ug pagkaindependente o pagkinaugalingon, kadaghanang Hapon makontento na sa pagpahiuyon sa pamiste, kagawian, estilo sa kinabuhi, ug bisan sa ilang panghunahuna ngadto sa sukdanan sa ilang pundok.” Hinuon, ang tinguha nga mopahiuyon dili lamang limitado sa mga Hapon. Kini kaylap sa tibuok kalibotan.
Mga Pagpit-os Aron Mopahiuyon
Bisan kon tilinguhaon ang paghimo sa labing maayo aron magkasinabtanay sa uban, adunay kapeligrohan sa binuta nga pagpahiuyon sa kon unsay popular. Ngano? Kini tungod kay ang giisip nga popular sa pundok kasagaran supak sa kon unsay dalawaton sa Diyos. “Ang tibuok kalibotan nahiluna sa gahom sa daotan,” ang Bibliya nagtug-an kanato. (1 Juan 5:19) Si Satanas malipotong mogamit sa tanang paagi nga magamit niya—materyalismo, ubos nga moral, pagpihigpihig sa rasa, relihiyosong pagkapanatiko, nasyonalismo, ug uban pa—aron sa pag-impluwensiya sa katawhan ug pagpatalikod kanila sa Diyos. Ang pagpahiuyon sa maong mga binuhatan, sa pagkatinuod, makapahimo sa usa ka tawo nga magsusupak kang Jehova nga Diyos ug sa iyang mga katuyoan. Maoy hinungdan nga ang mga Kristohanon gitambagan: “Hunong na kamo sa pagpahiuyon niining kahikayan sa mga butang, apan magbag-o kamo pinaagi sa pagbag-o sa inyong hunahuna, aron kamo makapamatuod sa inyong kaugalingon sa maayo ug dalawaton ug hingpit nga kabubut-on sa Diyos.”—Roma 12:2.
Kay nagkinabuhi niining kahikayana sa mga butang, ang mga Kristohanon nailalom sa kanunayng pagpit-os aron mopahiuyon sa kon unsay popular. Ang mga batan-on ilabinang huyang niining bahina. Ang tinguha nga mahisama sa panagway ug linihokan sa ilang mga eskolmet hilabihan ka kusganon. Nagkinahanglan gayod ug tinuod nga kaisog sa ilang bahin sa pagsaysay sa ilang mga isigkaingon nganong dili sila moapil sa pila ka kalihokan. Hinunoa, ang pagkapakyas sa pagpahayag nga maisogon sa ilang baroganan magkahulogan ug espirituwal nga katalagman alang kanila.—Proverbio 24:1, 19, 20.
Ang mga hamtong nag-atubang usab sa maong mga pagpit-os sa ilang trabahoan. Sila tingali gidahom nga moapil sa pila ka sosyal nga kalihokan pagkahuman sa trabaho o panahon sa pila ka pangilin. Ang pagdumili sa pagsunod tingali makapahimo kanilang daw dili matinagdanon ug dili matinabangon, nga magpahinabog dili-maayong atmospera sa trabahoan. Ang pipila tingali mapugos sa pag-obertaym tungod kay ang uban nagbuhat niana ug kana maoy gidahom kanila. Ang pagnunot sa maong mga butang makadaot sa ilang espirituwalidad ug makapugong kanila sa pagtuman sa ilang ubang mga obligasyon.—1 Corinto 15:33; 1 Timoteo 6:6-8.
Ang mga pagpit-os nga mopahiangay presente bisan gawas sa eskuylahan o trabahoan. Usa ka Kristohanong inahan miasoy nga sa usa ka higayon wala niya disiplinaha ang iyang anak, bisan kon kadto gikinahanglan kaayo, tungod kay iyang gibati nga ang ubang mga asawa nga presente dili mouyon.—Proverbio 29:15, 17.
Ang Panon Mahimong Sayop
Ang Bibliya naghatag kanato ug laktod nga tambag mahitungod sa pagsunod sa panon. Pananglitan, ang nasod sa Israel giingnan: “Ayaw pagsunod sa panon nga may daotang tinguha; ug dili ka magsaksi mahitungod sa usa ka buruka aron mahisimang nga mokuyog sa panon sa pagtuis sa katarongan.” (Exodo 23:2; itandi ang Roma 6:16.) Kining tambaga dili kanunayng ginasunod. Usa ka higayon, di pa dugay human sa pagbiya sa Ehipto, samtang wala si Moises, ang pila ka tawo nag-impluwensiya kang Aaron ug sa katawhan sa paghimog bulawang baka ug simbahon kana sa “usa ka piyesta kang Jehova.” Ang mga tawo nangaon ug nanginom ug nagkalipay diha sa pag-awit ug pagsayaw samtang naghalad ngadto sa bulawang baka. Tungod niining malinapason, idolatrosong buhat, mga 3,000 ka tigpasiugda ang gipamatay. Apan daghan sa uban pang katawhan ang gihampak usab ni Jehova tungod sa ilang walay-paghunahunang pagsunod sa panon.—Exodo 32:1-35.
Laing hitabo sa pagsunod sa panon sa daotang mga tinguha nahitabo sa unang siglo maylabot sa kamatayon ni Jesu-Kristo. Kay nadani sa nasinang mga pangulo sa relihiyon, daghan sa katawhan miduyog sa pagpapatay kang Jesus. (Marcos 15:11) Sa dihang gipunting ni Pedro ang ilang bug-at nga kasaypanan panahon sa Pentekostes human sa pagkabanhaw ug pagkayab ni Jesus, daghan ang “gisakitan sa kasingkasing” ug nakaamgo sa ilang gibuhat sa pagsunod sa panon.—Buhat 2:36, 37.
Labi Pang Maayo ang mga Prinsipyo sa Bibliya
Segon sa tin-awng gipakita niining maong mga asoy, ang binutang pagsunod kon unsay popular mahimong motultol sa peligrosong mga sangpotanan. Pagkalabi pang maayo ang pagsunod sa Bibliya ug tugotan ang mga prinsipyo niini nga maoy mogiya sa atong kinabuhi! “Kay maingon nga ang mga langit hataas kay sa yuta, mao man ang akong mga dalan labi pang hataas kay sa inyong mga dalan, ug ang akong mga hunahuna kay sa inyong mga hunahuna,” nag-ingon si Jehova. (Isaias 55:9) Maylabot sa moral ug tawhanong relasyon—sa pagkatinuod, sa tanang mga desisyon sa kinabuhi—subli-subling gipakita nga ang pagsunod sa mga dalan ni Jehova labi pang maayo kay sa pagsunod kon unsay popular. Mao kana ang yawi sa mas malipayon ug mas himsog nga dalan sa kinabuhi.
Matikdi, pananglitan, ang panig-ingnan ni Kazuya. Bisan kon siya nagtuon sa Bibliya sa pila ka panahon, siya padayong misunod sa popular nga dalan—ang pagpaningkamot nga madato ug makakab-ot ug kalamposan. Ang iyang paningkamot sa pagpahimuot sa iyang mga labaw ug aron nga maayo ang paghunahuna sa mga kauban sa trabaho kaniya mitultol sa paghuboghubog hangtod sa kaadlawon. Nahimo siyang mapugsanon, matig-a, ug masuk-anon. Ang iyang mapatuyangong estilo sa kinabuhi sa wala madugay mitultol sa iyang pagka-estrok, nga nakaparalisar sa bahin sa iyang lawas. Samtang nagpauli siya sa lawas sa ospital, nakahigayon siya sa pagpamalandong sa iyang nakat-onan sa Bibliya ug sa paagi sa iyang pagkinabuhi. Siya mihukom nga panahon na sa pagpadapat sa iyang nakat-onan. Siya miundang sa pagkamanedyer ug nagbag-o sa iyang mga kaubanan. Naningkamot usab siya pag-ayo nga isul-ob ang Kristohanong personalidad ug ipasibo ang iyang panglantaw sa materyal nga kabtangan. Ingong sangpotanan, nausab ang iyang mga prinsipyo, ug miarang-arang ang iyang panglawas. Sa kataposan, iyang gipahinungod ang iyang kinabuhi kang Jehova ug nabawtismohan.
Aron molampos sa pagsunod sa dili-popular nga dalan, kinahanglan ang usa makahibalo sa mga prinsipyo nga nalangkit ug makombinsir sa bug-os nga sila husto. Ang nasinati ni Masaru nagpakita niini. Samtang diha siya sa ikaunom nga ang-ang sa elementarya, girekomendar siya sa iyang mga klasmet ingong kandidato sa pagkapresidente sa konseho sa estudyante. Maulawon siyang nahinumdom nga tungod sa dili bug-os nga pagsabot sa mga prinsipyo sa Bibliya nga nalangkit, wala siya makasaysay sa iyang mga klasmet kon nganong dili siya modagan sa politikal nga katungdanan. Ang iyang kahadlok sa tawo nakapugong kaniya sa pagpadayag nga siya usa ka Kristohanon. Ang nabuhat lang niya mao ang pagduko sa iyang ulo ug miingon pag-usab uban sa mga luha, “Dili ko makabuhat niana.”
Kining masulob-ong kasinatian nakaaghat kaniya sa pagsusi nganong ang usa ka Kristohanon dili moapil-apil sa politikal nga mga kalihokan. (Itandi ang Juan 6:15.) Sa ulahi, sa dihang tersero anyo na siya sa hayskul, mitungha ang susamang kahimtang. Hinuon, niadtong panahona andam na siya sa pagsaysay sa iyang baroganan uban sa hugot nga pagtuo ngadto sa iyang magtutudlo. Gidawat sa magtutudlo ang iyang saysay, maingon man sa pila ka klasmet niya nga nangutana kaniya mahitungod sa iyang binase-sa-Bibliya nga pagtuo.
Sa Dihang ang Tanan Mobuhat Kon Unsay Matarong
Sa umaabot nga bag-ong kalibotan ubos sa pagmando ni Kristo, ang popular nga butang pagabuhaton mao ang matarong butang nga pagabuhaton. Hangtod nianang panahona, kinahanglan kitang magbantay batok sa awhag nga mopahiangay sa kon unsay popular. Makakuha kitag pagdasig sa tambag ni Pablo: “Sanglit ginalibotan man kita sa ingon ka mabagang panganod sa mga saksi, iwakli ta ang tanang kabug-at ug ang sala nga nagapiit paglikos kanato, ug dalaganon ta nga malahutayon ang lumba nga gibutang sa atong atubangan.”—Hebreohanon 12:1.
Sa dihang ang mga isyu ug mga hagit moabot kanimo, unsay imong buhaton? Ikaw ba magpadala sa kahadlok sa mga tawo ug mobuhat kon unsay popular? O moliso ka ba sa Pulong sa Diyos, ang Bibliya, ug mosunod sa mga prinsipyo niana? Ang pagpili sa ulahing dalan dili lamang makahatag nimog kaayohan karon apan maghatag usab nimo ug palaabuton nga mahimong lakip niadtong “pinaagi sa pagtuo ug pailob nagapanunod sa mga saad.”—Hebreohanon 6:12.