Mga Magmamantala sa Gingharian Nagtaho
“Malipayon ang Tawo nga Nakakaplag sa Kaalam”
KINING proverbioha napamatud-ang tinuod sa Korea, diin karon adunay kapin sa 71,000 ka malipayong mga Saksi ni Jehova. (Proverbio 3:13) Ug hunahunaa ra, 42 porsiento niining mga ministroha anaa sa bug-os-panahong pag-alagad! Ang mosunod nga mga kasinatian magapakita nga malipayon kadtong nangita sa tinuod nga kaalam.
Usa ka babaye sa Pusan ang nagsimba sa usa sa mga simbahan sa Kakristiyanohan sulod sa 16 ka tuig. Naobserbahan niya ang daghan kaayong dili-kasulatanhong mga binuhatan nga tungod niana misugod siya sa paghunahuna nga wala gayoy Diyos. Sa laing bahin, dili siya makapangulipas sa paglungtad sa Diyos, busa ugdang siyang miampo sa Diyos nga unta iyang mapalgan ang tinuod nga simbahan kon ugaling adunay naglungtad nga ingon. Niining puntoha kalit nga misantop sa iyang hunahuna ang mga Saksi ni Jehova, ug iyang nahinumdoman nga ang iyang simbahan nagtamay kanila ug nagpasidaan sa mga magsisimba batok kanila tungod lagi kay ang mga Saksi dili man motuo sa Trinidad, kalayonhong-impiyerno, ug ubang mga doktrina sa Kakristiyanohan. Tingali ug kini mao ang tinuod nga simbahan? Pinaagi sa tabang sa usa ka silingan, iyang nakit-an ang dapit sa Kingdom Hall. Sa misunod gayod nga adlaw, mitambong siya sa tigom.
Nahingangha siya sa kahusay sa tigom. Walay panatikong pagsinggit o emosyonal nga pag-awit sama sa nagakahitabo sa iyang simbahan. Gipailaila siya sa usa ka Saksi nga andam sa pagdumalag pagtuon sa Bibliya uban kaniya, ug ang unang pagtuon giabtag daghang oras tungod sa iyang mga pangutana. Sa ikaduhang pagtuon, iyang gipahibalo nga moluwat siya gikan sa iyang simbahan ug mahimong usa ka Saksi. Iyang giingnan ang igsoong babaye nga dili na siya kinahanglang motuon uban kaniya, kay motambong na lamang siyag mga tigom. Ugaling, gipakita kaniya ang bili sa pagbaton ug usa ka personal nga pagtuon sa Bibliya ingong dugang sa pagtambong sa mga tigom. Iyang gidawat ang sugyot, nagmakugihon sa iyang mga pagtuon, ug sa pag-abot sa panahon nabawtismohan.
Karon malipayon siya kaayo nga iyang nakaplagan ang kaalam sa matuod nga Diyos, si Jehova, ug nakabaton ug paglaom nga mabuhing walay kataposan sa bag-ong kalibotan sa Diyos.
Retiradong Heneral Nakakat-on sa Kamatuoran
Ang asawa sa usa ka heneral sa armi nabawtismohan niadtong 1962. Sa sinugdan gisupak siya sa iyang bana, apan sa ulahi mihunong siya sa pagsupak kaniya, ug sa putolputol nga paagi sulod sa misunod nga 28 ka tuig, lainlaing igsoong lalaki ang nagdumalag pagtuon sa Bibliya uban kaniya, nga nagsulay sa pagpukaw sa iyang interes sa kamatuoran. Mitambong siya sa pila ka tigom ug mga kombensiyon, apan usa siya niadtong wala maghatag ug seryosong pagtagad sa kamatuoran. Niadtong 1990 siya ug ang iyang asawa miadto sa Hapon, diin mitambong sila sa usa ka distritong kombensiyon. Niining higayona naminaw siyag maayo sa mga pakigpulong—usa ka butang nga wala niya himoa kaniadto. Siya nakuratan sa maisogong mga pakigpulong nga nagyagyag sa bakak nga relihiyon, apan kini nagbukas gayod sa iyang mga mata ngadto sa pagkasalingkapaw sa Kakristiyanohan. Siya nakadayeg sa kahusay ug kalipay sa katawhan sa Diyos didto sa Hapon, nga sama ra gayod sa iyang nakit-an sa Korea. Sa pagbalik sa Korea, gisugdan niya ang usa ka seryosong pagtuon sa Bibliya ug sa ulahi nabawtismohan.
Busa human sa iyang bawtismo unsa may iyang buhaton? Iyang gibiyaan ang iyang katungdanan ingong presidente sa usa ka iladong hotel pangturista ug miduyog sa iyang asawa diha sa bug-os-panahong pag-alagad ingong payunir. Gibati niya nga ang pagkahimong usa ka regular payunir mao ang labing maayong paagi aron mabayran ang giusikan niyang 28 ka tuig nga pagpugong.
Karon iyang nasabtan nga ang proverbiong “malipayon ang tawo nga nakakaplag sa kaalam” mapadapat usab kaniya!