Nakahinumdom Ka Ba?

Gipabilhan mo ba ang pagbasa sa dili pa dugayng mga isyu sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

▫ Unsang praktikal nga tabang ang ikahatag sa mga masakiton ug sa mga tigulang sulod sa kongregasyon karong adlawa?

Sa unang Kristohanong kongregasyon, adunay usa ka listahan sa mga balo nga nagkinahanglag materyal nga tabang. (1 Timoteo 5:9, 10) Sa ingon karong adlawa, ang mga ansiano mahimong maghimog listahan sa mga masakiton ug sa mga tigulang nga nagkinahanglag linaing pagtagad. Apan, dili mga ansiano lang ang pasagdan nga maoy manguna niining bahina. Ang tanan diha sa kongregasyon kinahanglang mahibalo sa maong mga panginahanglan. (1 Timoteo 5:4-8)​—8/15, panid 28-9.

▫ Dili ba katuohan ang sugilanon sa Bibliya bahin kang Jonas nga gilamoy sa usa ka hayop sa dagat?

Dili, bisan ang sperm whale (matang sa balyena), ang dako puti nga iho, o ang whale shark makalamoy ug tawo. Dugang pa, si Jesus mismo nagpamatuod nga ang asoy mahitungod kang Jonas tinuod. (Mateo 12:39, 40)​—8/15, panid 32.

▫ Unsang kadaot ang mosangpot gikan sa matuotuohong paggamit sa mga anting-anting ug mga panagang?

Ang paggamit niini sa pagkatinuod makapaluya sa mga tawo sa pag-atubang sa ilang mga suliran sa intelihenting paagi ug magdasig kanila nga mosalig sa suwerte ingong tambal sa tanan. Kini nagahatag usab sa mga tiggamit ug bakak nga pagbati sa kasegurohan. Labawng hinungdanon, ang tawong motuo sa gahom sa mga anting-anting ug mga panagang nga mohatag ug suwerte nagtugyan sa iyang kinabuhi sa pagmando sa dili-makita demonyohanong mga gahom.​—9/1, panid 4.

▫ Unsa ang upat ka elemento nga makatabang sa paghimo sa kaminyoon nga magmalungtaron?

Kini mao ang kaandam mamati, ang katakos sa pagpangayog pasaylo, ang kapasidad sa pagtaganag makanunayong emosyonal nga pagpaluyo, ug ang tinguha nga mohikap nga mabination. (1 Corinto 13:4-8; Efeso 5:33; Santiago 1:19)​—9/1, panid 20.

▫ Unsa ang usa ka paagi nga itagana ni Jehova ang pagkamalahutayon niadtong magaatubang ug mga pagsulay?

Buhaton kini ni Jehova pinaagi sa mga panig-ingnan sa paglahutay nga narekord diha sa iyang Pulong, ang Bibliya. (Roma 15:4) Samtang atong palandongon kini, kita madasig sa paglahutay, ug kita usab makakat-on ug daghan kon unsaon sa paglahutay.​—9/15, panid 11-12.

▫ Unsa ang diyosnong debosyon?

Ang diyosnong debosyon nagtumong sa debosyon ngadto kang Jehova nga nagapalihok kanato sa pagbuhat sa butang nga makapahimuot kaniya, bisan atubangan sa malisod nga mga pagsulay, tungod kay atong gihigugma ang Diyos gikan sa kasingkasing.​—9/15, panid 15.

▫ Sa unsang paagi lantawon nato ang kaluoy sa Diyos?

Dili gayod nato pakamenoson ang dakong kaluoy sa Diyos. Kita angay mahisama kang Pablo ug ipakita ang atong pagpabili pinaagi sa pagpakigbisog batok sa atong kaugalingong mga pagkadili-hingpit. (1 Corinto 9:27) Niining paagiha atong ikapasundayag, bisan atubangan sa mga kalisod, nga aduna kitay tinuod nga tinguha sa pagbuhat sa matarong.​—10/1, panid 23.

▫ Nganong tukma nga gilista ni Pablo ang hataas-nga-pailob ingong unang bahin sa gugma?

Ginaingon nga wala gayod untay Kristohanong pag-ubanay kon walay hataas-nga-pailob, o walay mapailobong pag-antos sa usag usa. Tungod kana kay kitang tanan dili man hingpit, ug ang atong mga pagkadili-hingpit ug mga kahuyangan mohatag ug pagsulay sa uban. Busa, ang hataas-nga-pailob hinungdanon kon ang gugma maglungtad tali sa mga igsoon.​—10/15, panid 21.

▫ Gigamit ba sa unang mga Kristohanon ang ngalan sa Diyos?

Ang ebidensiya nagaingon nga oo. Gitudloan ni Jesus ang iyang mga sumusunod sa pag-ampo ngadto sa Diyos: “Balaanon unta ang imong ngalan.” (Mateo 6:9) Ug sa kataposan sa iyang ministeryo, siya miampo: “Gipadayag ko ang imong ngalan ngadto sa mga tawo nga kanako imong gitugyan gikan sa kalibotan.” (Juan 17:6) Gawas pa, ang unang mga kopya sa Septuagint naundan sa ngalan sa Diyos diha sa pormang Hebreohanon nga Tetragrammaton.​—11/1, panid 30.

▫ Unsang mga panig-ingnan sa Bibliya ang nagpakita nga ang paagi sa atong pagdumala sa atong mga sayop makaapektar sa atong mga kinabuhi?

Si Haring Saul sa kagahig-ulo wala modawat sa tambag, ug ang iyang mga sayop nagdaghan, nga sa ulahi misangko sa iyang kamatayon sa dili pag-uyon sa Diyos. (1 Samuel 15:17-29) Sa laing bahin, bisan pa sa iyang mga sayop ug mga sala, si Haring David mahinulsolong midawat ug pagtul-id ug nagpabiling matinumanon kang Jehova. Kini nga mga panig-ingnan sa Bibliya nagpakita nga ang pagdawat sa atong mga sayop motabang kanato sa paghupot sa usa ka maayong relasyon uban sa Diyos ug busa makabaton ug palaaboton nga kinabuhing walay kataposan. (Salmo 32:1-5)​—11/15, panid 29-30.

▫ Sa unsang paagi motabang si Jehova sa iyang katawhan sa dihang anaa sila sa kasakitan tungod sa kinaiyanhong mga katalagman o sa ubang mga hinungdan?

Si Jehova motabang, dili pinaagi sa milagrosong pagbali sa mga gahom sa kinaiyahan o pinaagi sa pipila ka laing labaw-tawhanong buhat, apan pinaagi sa laing gahom nga dili gayod hisabtan sa kinabag-ang tawo​—ang gugma. Oo, si Jehova nahigugma pag-ayo sa iyang katawhan, ug siya nag-ugmad sa ilang taliwala sa gugma alang sa usag usa nga kusganon kaayo nga maarangan niya ang pagbuhat alang kanila sa butang nga halos maorag milagroso. (1 Juan 4:10-12, 21)​—12/1, panid 10.