Salig Kang Jehova sa Pagtuman sa Iyang Katuyoan
“Ang matarong magapanunod sa yuta, ug sila magapuyo diha niini sa walay kataposan.”—SALMO 37:29.
1. Unsa ang katuyoan ni Jehova alang sa katawhan ug alang niining yutaa?
SA DIHANG gilalang ni Jehova ang atong unang mga ginikanan, si Adan ug Eva, iyang gibuhat sila nga hingpit. Ug iyang gilalang sila aron sila mahimong mabuhi sa walay kataposan niining yutaa—kon mosunod sila sa iyang mga kasugoan. (Genesis 1:26, 27; 2:17) Dugang pa, gibutang sila sa Diyos diha sa paraisonhon nga palibot. (Genesis 2:8, 9) Si Jehova miingon kanila: “Sumanay ug dumaghan kamo ug pun-on ninyo ang yuta ug magagahom kamo niini.” (Genesis 1:28) Sa ingon, ang ilang mga anak sa ngadtongadto mokaylap sa tibuok yuta, ug kini nga planeta mahimong usa ka paraiso nga mapuno sa hingpit, malipayong rasa sa katawhan. Pagkamaayo nga pagsugod ang nabatonan sa tawhanong pamilya! “Nakita sa Diyos ang tanang butang nga iyang gibuhat ug, tan-awa! kini maayo kaayo.”—Genesis 1:31.
2. Ang kahimtang sa tawhanong mga kalihokan nagpatunghag unsang mga pangutana?
2 Bisan pa, ang kahimtang sa tawhanong kalihokan nga naglungtad sa kaliboan ka tuig dili kaamgid sa orihinal nga katuyoan sa Diyos. Ang katawhan layo na kaayo gikan sa kahingpitan ug dili gayod malipayon. Ang mga kahimtang sa kalibotan makapasubo, ug sama sa gitagna, kini misamot hinuon ka grabe sa atong panahon. (2 Timoteo 3:1-5, 13) Busa sa unsang paagi makasalig kita nga ang katuyoan sa Diyos alang sa katawhan matuman sa haduol nga umaabot? Moagi pa ba ang dugang hataas nga panahon uban sa padayon makapasubong mga kahimtang?
Unsay Hinungdan sa Nagkagrabeng mga Kahimtang?
3. Nganong wala dayon taposa ni Jehova ang pag-alsa sa katawhan?
3 Kadtong adunay tukmang kahibalo bahin sa dinasig nga Pulong sa Diyos nahibalo kon nganong gitugotan ni Jehova kining daotang mga kahimtang sa yuta. Sila nahibalo usab kon unsay iyang himoon niini. Gikan sa asoy sa Bibliya, ilang nahibaloan nga giabusohan sa atong unang mga ginikanan ang katingalahang gasa sa libreng pagpili sa kaugalingong dalan nga gihatag sa Diyos sa katawhan. (Itandi ang 1 Pedro 2:16.) Sayop nilang gipili ang dalan sa pagkinaugalingon gikan sa Diyos. (Genesis, mga kapitulo 2 ug 3) Ang ilang pag-alsa nagpatugbaw sa mga pangutana nga dako kaayo, sama sa: Ang Soberano ba sa Uniberso adunay katungod sa pagmando sa katawhan? Ang iya bang pagmando labing maayo alang kanila? Ang tawhanong pagmando molampos ba nga walay paggiya sa Diyos? Ang labing seguradong paagi aron makaplagan ang mga tubag niining mga pangutanaha mao ang pagtugot sa pagpalabay sa daghang siglo sa tawhanong pagmando. Ang sangpotanan mopadayag sa walay duhaduha kon ang tawo magmalamposon ba nga bulag gikan sa ilang Maglalalang.
4, 5. (a) Unsay gisangpotan sa pagsalikway sa tawo sa pagmando sa Diyos? (b) Unsay tinong gipakita sa paglabay sa panahon?
4 Sa dihang si Adan ug Eva mibiya sa Diyos, wala na siya mosuportar kanila diha sa kahingpitan. Walay iyang pagpaluyo, sila nagakadaot. Ang resulta mao ang pagkadili-hingpit, pagkatigulang, ug sa kataposan kamatayon. Tungod sa mga balaod sa pagpanunod, gipasa sa atong unang mga ginikanan ang maong makadaot nga mga kinaiyahan ngadto sa tanan nilang mga anak, apil na kita. (Roma 5:12) Ug komosta ang resulta sa libolibo ka tuig sa tawhanong pagmando? Kini malaglagon, sama sa tinuod nga gipamulong sa Ecclesiastes 8:9: “Ang tawo nagamando sa tawo alang sa iyang kadaotan.”
5 Tinong gipakita sa paglabay sa panahon nga walay katakos ang tawo sa pagdumalang malamposon sa ilang mga kalihokan nga bulag gikan sa ilang Maglalalang. Ang dinasig nga magsusulat sa Bibliya nga si Jeremias miingon: “Ako nahibalo, Oh Jehova, nga ang dalan sa tawo wala diha sa iyang kaugalingon. Kini wala sa tawo nga molakaw aron sa pagtultol gani sa iyang lakang.”—Jeremias 10:23; Deuteronomio 32:4, 5; Ecclesiastes 7:29.
Ang Katuyoan sa Diyos Wala Mausab
6, 7. (a) Ang libolibong katuigan sa kasaysayan nag-usab ba sa katuyoan sa Diyos? (b) Unsay nalakip diha sa katuyoan ni Jehova?
6 Ang paglabay ba sa libolibong katuigan sa tawhanong kasaysayan—nga puno kaayo sa pagkadaotan ug pag-antos—nag-usab sa katuyoan sa Diyos? Ang iyang Pulong nag-ingon: “Kini mao ang giingon ni Jehova, ang Maglalalang sa mga langit, Siya mao ang matuod nga Diyos, ang Mag-uumol sa yuta ug Magbubuhat niini, Siya ang Usa nga lig-ong nagtukod niini, nga wala maglalang niini alang sa walay kapuslanan, kinsa nagaumol niini aron pagapuy-an.” (Isaias 45:18) Busa giumol sa Diyos ang yuta aron puy-an sa mga tawo, ug mao gihapon kana ang iyang katuyoan.
7 Dili lamang gilalang ni Jehova ang yuta aron pagapuy-an kondili mao usay iyang katuyoan nga kini mahimong usa ka paraiso nga pagapahimuslan sa hingpit, malipayong katawhan. Maoy hinungdan nga gitagna sa Bibliya nga aduna unyay “usa ka bag-ong yuta,” usa ka bag-ong tawhanong katilingban, diin ang “pagkamatarong magapuyo.” (2 Pedro 3:13) Ug sa Pinadayag 21:4, ang Pulong sa Diyos nagsulti kanato nga diha sa iyang bag-ong kalibotan, “iyang pagapahiran ang matag luha sa mga mata [sa katawhan], ug ang kamatayon mawala na, ni may pagminatay ni paghilak ni may kasakit pa.” Alang sa maong katarongan nga si Jesus nakahisgot mahitungod nianang bag-ong kalibotan sa yuta ingong “Paraiso.”—Lucas 23:43.
8. Nganong kita makaseguro nga tumanon ni Jehova ang iyang katuyoan?
8 Sanglit si Jehova ang makagagahom sa ngatanan ug maalamon sa ngatanan nga Maglalalang sa uniberso, walay usa ang makasanta sa iyang katuyoan. “Si Jehova sa mga panon nanumpa, nga nagaingon: ‘Sa pagkamatuod ingon sa akong nahunahuna, ingon niana ang mahitabo; ug ingon sa akong gitinguha, mao man ang mamatuman.’” (Isaias 14:24) Busa, kon ang Diyos miingon nga iyang himoon kining yutaa nga usa ka paraiso nga pagapuy-an sa mga tawong hingpit, mao gayod kana ang mahitabo. Si Jesus miingon: “Malipayon ang mga malumog-buot, sanglit magapanunod sila sa yuta.” (Mateo 5:5; itandi ang Salmo 37:29.) Kita makaseguro nga matuman ang maong saad. Sa pagkamatuod, mahimo pa natong ikatahan ang atong kinabuhi alang niana.
Sila Misalig Kang Jehova
9. Unsay gihimo ni Abraham nga nagpakita sa iyang pagsalig kang Jehova?
9 Daghang tawong mahinadlokon sa Diyos sa tibuok kasaysayan ang nagtahan sa ilang mga kinabuhi sa katuyoan sa Diyos alang sa yuta tungod kay kombinsido gayod sila nga iya kining pagatumanon. Bisan tuod ug limitado ang ilang kahibalo, sila misalig sa Diyos ug nagtukod sa ilang mga kinabuhi sa pagtuman sa iyang kabubut-on. Pananglitan, anaa si Abraham, kinsa nabuhi sa mga 2,000 ka tuig sa wala pa maglakaw si Jesus sa yuta—dugay pa kaayo nga panahon una pa sugdi ang pagsulat sa Bibliya. Siya misalig kang Jehova nga motuman sa Iyang mga saad. Malagmit, si Abraham nahibalo bahin sa Maglalalang gikan sa iyang matinumanong kagikanan nga si Shem, nga gitudloan ni Noe. Busa sa dihang gisultihan sa Diyos si Abraham sa pagbalhin gikan sa mauswagong Ur sa mga Caldeanhon ngadto sa dili-pamilyar ug peligrosong lugar sa Canaan, ang maong patriarka nahibalo nga siya makasalig kang Jehova, ug busa siya miadto. (Hebreohanon 11:8) Sa ulahi, si Jehova miingon kaniya: “Himoon ko ikaw nga usa ka dako nga nasod.”—Genesis 12:2.
10, 11. Nganong andam si Abraham sa paghalad sa iyang bugtong-anak, si Isaac?
10 Unsay nahitabo human nga natawo si Isaac kang Abraham? Si Jehova mipahayag kang Abraham nga pinaagi ni Isaac ang iyang kaliwat mahimong usa ka dako nga nasod. (Genesis 21:12) Busa, daw may panagsumpaki sa dihang gisugo ni Jehova si Abraham, agig usa ka pagsulay sa iyang pagtuo, sa paghalad sa iyang anak nga si Isaac. (Genesis 22:2) Bisan pa, uban sa bug-os nga pagsalig kang Jehova, si Abraham mihimog lakang sa pagsunod, nga aktuwal nga mikuha sa iyang punyal sa pagpatay kang Isaac. Sa kataposang yugto, gipadala sa Diyos ang usa ka manulonda sa pagpugong kang Abraham.—Genesis 22:9-14.
11 Nganong masinugtanon man kaayo si Abraham? Ang Hebreohanon 11:17-19 nagpadayag: “Tungod sa pagtuo si Abraham, sa dihang siya gisulayan, sama sa nakahalad na kang Isaac, ug ang tawo nga malipayong midawat sa mga saad misulay sa paghalad sa iyang bugtong-anak, bisan tuod gikaingon na kaniya: ‘Ang tawgon nga “imong binhi” maoy pinaagi kang Isaac.’ Apan iyang giisip nga ang Diyos makahimo sa pagbangon kaniya bisan gikan sa mga patay; ug gikan didto siya midawat usab kaniya sa masambingayong paagi.” Ang Roma 4:20, 21 susamang miingon: “Tungod sa saad sa Diyos [si Abraham] wala magduhaduha diha sa kawalay pagtuo, . . . nga bug-os kombinsido nga kon unsa ang gisaad [sa Diyos] siya usab makahimo sa pagtuman.”
12. Sa unsang paagi gigantihan si Abraham sa iyang pagtuo?
12 Si Abraham gigantihan tungod sa iyang pagtuo dili lamang sa pagpalingkawas kang Isaac gikan sa kamatayon ug sa pagbaton ug usa ka “dakong nasod” nga magagikan kaniya kondili sa laing paagi usab. Gisultihan sa Diyos si Abraham: “Pinaagi sa imong binhi mapanalanginan ang tanang kanasoran sa yuta tungod kay namati ka sa akong tingog.” (Genesis 22:18) Sa unsang paagi? Ang Hari sa langitnong Gingharian sa Diyos moabot diha sa linya sa kaliwat ni Abraham. Kana nga Gingharian magadugmok niining daotan nga kalibotan nga ilalom ni Satanas. (Daniel 2:44; Roma 16:20; Pinadayag 19:11-21) Unya, diha sa usa ka nahinloang yuta ubos sa pagmando sa Gingharian, ang Paraiso pagaugmaron sa tibuok kalibotan, ug gikan sa “tanang kanasoran” ang mga tawo nga magatuman sa kabubut-on sa Diyos magatagamtam ug hingpit nga panglawas ug kinabuhi nga walay kataposan. (1 Juan 2:15-17) Ug bisan tuod limitado lamang ang kahibalo ni Abraham mahitungod sa Gingharian, siya misalig sa Diyos ug nagpaabot nga matukod kini.—Hebreohanon 11:10.
13, 14. Nganong si Job misalig sa Diyos?
13 Gatosan ka tuig sa ulahi, anaa si Job, nga nabuhi tali sa mga ika-17 ug ika-16 nga siglo W.K.P. sa gitawag karon nga Arabia. Siya usab nabuhi una pa sugdi pagsulat ang Bibliya. Si Job “napamatud-ang walay-sala ug matarong, ug mahinadlokon sa Diyos ug nagpahilayo sa daotan.” (Job 1:1) Sa dihang gipatakboyan ni Satanas ug mangilngig, masakit nga balatian si Job, ang maong tawong matinumanon “wala gayod mobungat ug usa ka makasala nga pulong” sa tibuok panahong gisakit siya. (Job 2:10, The New English Bible) Si Job misalig sa Diyos. Ug bisag wala siya mahibalo sa mga detalye kon nganong nag-antos siya sa hilabihan, iyang gitahan ang iyang kinabuhi sa Diyos ug sa Iyang mga saad.
14 Si Job nahibalo nga bisag mamatay pa siya, moabot ra ang adlaw nga ibalik kaniya sa Diyos ang kinabuhi pinaagi sa pagkabanhaw. Iyang gipakita kini nga paglaom sa dihang siya miingon ngadto kang Jehova nga Diyos: “Oh nga sa Sheol [ang lubnganan] unta tagoan mo ako, . . . nga imo akong tagalan ug panahon ug hinumdoman mo ako! Kon ang tawo mamatay mabuhi pa ba siya pag-usab? . . . Ikaw motawag, ug ako mismo motubag kanimo.” (Job 14:13-15) Bisan sa kasakit, gipasundayag ni Job ang pagtuo sa pagkasoberano ni Jehova, nga nag-ingon: “Hangtod nga ako mamatay dili ko gayod isalikway ang akong integridad gikan kanako!”—Job 27:5.
15. Sa unsang paagi gipahayag ni David ang iyang pagsalig sa katuyoan ni Jehova?
15 Sa mga unom ka siglo human kang Job ug mga usa ka libo ka tuig una pa mianhi si Jesus sa yuta, gipahayag ni David ang iyang pagsalig sa bag-ong kalibotan. Siya miingon diha sa mga salmo: “Kadtong nagalaom kang Jehova mao ang makapanunod sa yuta. Ug sa dili madugay, ug ang mga daotan mangawala . . . Apan ang mga maaghop mismo magapanunod sa yuta, ug sila makakaplag gayod ug kalipay tungod sa kadagaya sa pakigdait. Ang mga matarong mismo magapanunod sa yuta, ug sila magapuyo diha niana sa walay kataposan.” Tungod sa iyang malig-ong paglaom, si David miawhag: “Salig kang Jehova . . . Usab magkalipay kang Jehova, ug iyang ihatag kanimo ang mga pangandoy sa imong kasingkasing.”—Salmo 37:3, 4, 9-11, 29.
16. Unsang paglaom ang nabatonan sa ‘usa ka dakong panganod sa mga saksi’?
16 Sa daghang kasiglohang nanglabay, ang matinumanong mga lalaki ug mga babaye adunay sama niini nga paglaom nga walay kataposang kinabuhi dinhi sa yuta. Sa pagkamatuod, sila gilangkoban sa ‘usa ka dakong panganod sa mga saksi’ kinsa sa literal nagtahan sa ilang mga kinabuhi diha sa mga saad ni Jehova. Daghan niadtong karaang mga saksi ni Jehova gisakit ug gipamatay tungod sa ilang pagtuo, “aron nga sila makabaton ug mas maayong pagkabanhaw.” Sa unsang paagi? Diha sa bag-ong kalibotan, pagagantihan sila sa Diyos ug usa ka mas maayong pagkabanhaw ug sa palaaboton nga kinabuhing walay kataposan.—Juan 5:28, 29; Hebreohanon 11:35; 12:1.
Kristohanong mga Saksi May Pagsalig sa Diyos
17. Unsa ka lig-on ang pagsalig sa unang-siglong mga Kristohanon kang Jehova?
17 Sa unang siglo K.P., gipadayag ni Jehova sa bag-ong natukod nga Kristohanong kongregasyon ang dugang mga detalye mahitungod sa Gingharian ug sa pagmando niini ibabaw sa yuta. Pananglitan, gidasig sa iyang espiritu si apostol Juan sa pagsulat nga ang gidaghanon nga makauban ni Jesu-Kristo sa Gingharian sa langit maoy 144,000. Kini sila maoy matinumanong mga alagad sa Diyos kinsa “gipalit gikan sa katawhan.” (Pinadayag 7:4; 14:1-4) Sila magmando ibabaw sa yuta “ingong mga hari” uban kang Kristo sa langit. (Pinadayag 20:4-6) Malig-on gayod nga misalig kadtong unang-siglong mga Kristohanon kang Jehova nga motuman sa iyang saad alang sa langitnong Gingharian ug sa yutan-ong dominyo niini nga sila andam nga mamatay alang sa ilang pagtuo. Daghan kanila ang mihimo gayod niana.
18. Sa unsang paagi gisundog sa mga Saksi ni Jehova karong adlawa ang ilang mga katugbang sa karaang panahon?
18 Karong adlawa, duolan sa lima ka milyong mga Saksi ni Jehova ang adunay samang pagsalig sa Diyos sama sa ilang mga katugbang kinsa nabuhi kasiglohan nga una pa kanila. Kining presenteng-adlaw nga mga Saksi nagtahan usab sa ilang mga kinabuhi diha sa mga saad sa Diyos. Ilang gipahinungod ang ilang mga kinabuhi ngadto kaniya ug adunay kompletong Bibliya sa paglig-on sa ilang pagtuo. (2 Timoteo 3:14-17) Kining modernong-adlaw nga mga Saksi ni Jehova nagasundog sa unang-siglong mga sumusunod ni Jesus kinsa miingon nga sila “magasunod sa Diyos ingong magmamando inay sa mga tawo.” (Buhat 5:29) Niining sigloha daghan niining Kristohanong mga Saksi ang mapintasong gilutos. Ang pipila gipatay tungod sa ilang pagtuo. Ang uban nangamatay tungod sa sakit, aksidente, o pagkatigulang. Sama sa matinumanong mga saksi sa karaang panahon, hinunoa, sila misalig sa Diyos tungod kay sila nahibalo nga iyang ipasig-uli sila sa kinabuhi diha sa iyang bag-ong kalibotan pinaagi sa pagkabanhaw.—Juan 5:28, 29; Buhat 24:15; Pinadayag 20:12, 13.
19, 20. Unsay atong mailhan bahin sa tagna sa Bibliya alang sa atong adlaw?
19 Ang mga Saksi ni Jehova nakasabot nga ang pagkuha kanila gikan sa tanang kanasoran ngadto sa pagkahimong usa ka tibuok kalibotan nga panag-igsoonay dugay na kaayong gitagna diha sa tagna sa Bibliya. (Isaias 2:2-4; Pinadayag 7:4, 9-17) Ug gipabuhat ni Jehova kanila ang tibuok-kalibotan nga buluhatong pagsangyaw sa pagtigom ngadto sa iyang pabor ug panalipod ang uban pang mga matinud-anon ug kasingkasing. (Proverbio 18:10; Mateo 24:14; Roma 10:13) Silang tanan nagbutang sa ilang bug-os nga pagsalig kang Jehova, kay nasayod nga siya sa dili madugay magpahiluna sa iyang katingalahang bag-ong kalibotan.—Itandi ang 1 Corinto 15:58; Hebreohanon 6:10.
20 Ang mga tagna sa Bibliya nagpaila nga ang kalibotan ni Satanas anaa na sa iyang kataposang mga adlaw nga duolan sa 80 na ka tuig karon, sukad sa hinungdanong tuig 1914. Kining kalibotana nagkaduol na sa iyang kataposan. (Roma 16:20; 2 Corinto 4:4; 2 Timoteo 3:1-5) Busa ang mga Saksi ni Jehova masaligon tungod kay sila nahibalo nga sa dili madugay ang Gingharian sa Diyos mao na unyay bug-os nga modumala sa tanang kalihokan sa yuta. Pinaagi sa pagtapos niining presenteng daotan nga kalibotan ug sa pagpahiluna sa iyang matarong nga bag-ong kalibotan, bug-os nga wad-on sa Diyos ang daotang kahimtang nga naglungtad sa yuta sa daghan na kaayong kasiglohan.—Proverbio 2:21, 22.
21. Nganong magkalipay kita bisan unsa pa ang mga suliran karon?
21 Unya, hangtod sa kahangtoran, ipakita sa Diyos ang iyang dakong pagtagad kanato pinaagi sa pagbubo ug mga panalangin nga labaw pang makabawi sa bisan unsang kasakit nga atong naagoman sa miagi. Daghan kaayong maayong mga butang ang mahitabo kanato diha sa bag-ong kalibotan nga ang atong mga kalisod sa miagi mapala na gikan sa panumdoman. Pagkamakapalipay ang pagkasayod nga si Jehova unya ‘magabukhad sa iyang kamot ug magatagbaw sa tinguha sa matag buhing butang.’—Salmo 145:16; Isaias 65:17, 18.
22. Nganong ibutang nato ang atong bug-os nga pagsalig kang Jehova?
22 Diha sa bag-ong kalibotan, ang matinumanong katawhan makakita sa katumanan sa Roma 8:21: “Ang kalalangan mismo usab igapagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.” Ilang makitang matuman kini nga pag-ampo nga gitudlo ni Jesus sa iyang mga sumusunod: “Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.” (Mateo 6:10) Busa ibutang ang imong bug-os nga pagsalig kang Jehova tungod kay ang iyang dili-mapakyas nga saad mao: “Ang matarong magapanunod sa yuta, ug sila magapuyo diha niini sa walay kataposan.”—Salmo 37:29.
Unsaon Nimo Pagtubag?
◻ Unsa ang katuyoan ni Jehova alang sa katawhan ug alang niining yutaa?
◻ Nganong gitugotan sa Diyos ang daotang mga kahimtang sa yuta?
◻ Sa unsang paagi ang matinumanong mga tawo sa karaan nagpakita sa ilang pagsalig kang Jehova?
◻ Nganong ang mga alagad sa Diyos karong adlawa may pagsalig kang Jehova?
[Hulagway sa panid 16]
Gilalang sa Diyos ang tawo aron mabuhing walay kataposan sa kalipay diha sa usa ka paraisong yuta
[Hulagway sa panid 18]
Misalig si Abraham sa katakos ni Jehova sa pagbanhaw sa mga patay