Mga Saksi ni Jehova sa Tibuok Kalibotan—Ang Bahamas

ANG Nasod sa Bahamas​—usa ka kapupud-an sa 3,000 ka isla ug gagmayng mga pulo—​nahimutang nga samag kulintas nga korales latas sa 900 ka kilometros nga asulong-berde nga dagat sa tunga sa Florida ug Cuba. Lakip sa 267,000 ka molupyo niini mao ang nagtubo nga koro sa mga magmamantala sa Gingharian. Ang ilang awit sa pagdayeg makapahinumdom sa Isaias 42:10-12: “Pag-awit kang Jehova ug usa ka bag-ong awit, ang iyang pagdayeg gikan sa kinatumyan sa yuta, kamo nga mangadto sa dagat ug nianang nagapuno niini, kamong mga isla ug kamong nagapuyo niana. . . . Gikan sa tumoy sa kabukiran pasinggita ang mga tawo. Pasagdi silang mohatag ug himaya kang Jehova, ug diha sa mga pulo ipasangyaw kanila ang iyang pagdayeg.”

Bag-ong Pagtuo Gihagit

Sa Hulyo 1992, usa ka regular payunir (usa ka bug-os panahong magmamantala sa Gingharian) nakapahimutang sa usa ka kaila sa negosyo ug tabang sa pagtuon sa Bibliya nga Ikaw Mabuhing Walay Kataposan sa Paraiso sa Yuta. Human mabasa sa maong tawo ang libro, gisultihan niya ang iyang kaugalingon, ‘Kining relihiyona mao ang angay nakong susihon.’ Sa misunod nga duha ka Dominggo, siya mitambong sa mga tigom sa duha ka nagkalainlaing Kingdom Hall sa mga Saksi ni Jehova. Sunod, gisugdan ang pagtuon sa Bibliya uban kaniya. Ugaling, unom pa lamang ka semana sa iyang pagtuon sa Bibliya, mitungha ang usa ka hagit nga magsulay sa iyang bag-ong pagtuo​—ang mga pagsaulog sa adlawng natawhan.

Ang pamilya sa negosyante gusto kaayong mosaulog sa maong mga selebrasyon, apan ang iyang gugma alang sa Pulong sa Diyos nagdasig kaniya sa pagpadayon sa iyang mga pagtuon sa Bibliya. Samtang nag-uswag ang iyang kahibalo sa kamatuoran sa Kasulatan, nag-uswag usab ang iyang pagsabot sa mga pagsaulog sa adlawng natawhan ug sa kalibotanong mga selebrasyon ug sa panglantaw ni Jehova niini.

Sa dihang ang asawa niining tawhana naghimog salosalo alang sa Father’s Day, siya matinahurong mibalibad sa pagtambong. Apan, gibati sa iyang asawa nga siya wala na mahigugma kaniya ug giuna hinuon ang iyang relihiyon kay kaniya ug sa pamilya. Iyang malulutong gipatin-aw nga ang pagpadapat sa iyang nakat-onan gikan sa Bibliya nagtabang kaniya sa pagbag-o ngadto sa usa ka mas maayong bana ug amahan. Sa kataposan, midako ang iyang apresasyon sa gugma sa iyang bana sa kamatuoran sa Kasulatan ug misugot nga magtuon sa Bibliya. Karon ang bana nagadumala sa pagtuon sa Bibliya uban sa iyang pamilya. Ug pagkadako sa iyang kalipay sa “Diyosnong Pagtulon-an” nga Distritong Kombensiyon niining miaging tuig! Ang iyang asawa ug anak nga babaye mitambong ug nakakita kaniya nga gibawtismohan.

Mga Lalin Nakadungog sa Bag-ong Awit

Libolibong Haitiano nga mga lalin nakig-angay sa katilingban sa Bahamas. Sila usab kinahanglang makadungog sa bag-ong awit sa kamatuoran sa Gingharian. Ang mga Saksi nga nagpuyo sa Bahamas mapasalamaton sa duha ka Haitiano-Amerikanong magtiayon nga miabot. Kining mga tawhana mitabang sa pagpalig-on sa bag-ong naporma nga Haitianong mga grupo diha sa mga isla sa Grand Bahama ug Abaco.

Ingong dugang tabang sa mga Haitiano nga interesado sa mensahe sa Gingharian, ang unang distritong kombensiyon sa Creole nga unang gihimo diha sa Bahamas nahitabo niadtong Hulyo 31 ngadto sa Agosto 1, 1993. Ang mitambong miabot ug 214, uban sa tulo ka bag-ong nagpahinungod nga nabawtismohan. Daghang Haitiano nga nakakat-on sa kamatuoran sa Bahamas ang mibalik na ngadto sa ilang gipuy-ang isla o mibalhin sa laing dapit aron idugang ang ilang mga tingog sa lokal nga mga Saksi sa pag-awit ug pagdayeg kang Jehova.

[Kahon sa panid 8]

LARAWAN SA NASOD

1993 Tuig sa Pag-alagada

KINATAS-ANG GIDAGHANONG NAGSANGYAW: 1,294

PROPORSIYON: 1 ka Saksi sa 197

TUMATAMBONG SA MEMORYAL: 3,794

ABERIDS NGA PAYUNIR NGA MGA MAGMAMANTALA: 186

ABERIDS NGA MGA PAGTUON SA BIBLIYA: 1,715

GIDAGHANON SA NABAWTISMOHAN: 79

GIDAGHANON SA MGA KONGREGASYON: 22

SANGANG BUHATAN: NASSAU

[Footnote]

[Hulagway sa panid 9]

Ang unang Kingdom Hall, uban sa sangang buhatan ug pinuy-anan sa mga misyonaryo

[Hulagway sa panid 9]

Mga Saksi nga masibotong nagmantala sa maayong balita

[Hulagway sa panid 9]

Si Milton G. Henschel ug si Nathan H. Knorr uban sa mga misyonaryo sa Nassau mga 45 ka tuig kanhi

[Hulagway sa panid 9]

Ang bag-ong sangang buhatan, nga gipahinungod niadtong Pebrero 8, 1992