Sa Unsang Paagi ang Tawo Anaa sa Dagway sa Diyos?

“ANG Diyos naglalang sa tawo sa iyang dagway, sa dagway sa Diyos gilalang niya sila; lalaki ug babaye iyang gilalang sila.” Mao kana ang giingon sa dinasig nga talaan, apan unsay kahulogan niana? Sa unsang paagi ang unang lalaki ug babaye gilalang diha sa dagway sa Diyos?​—Genesis 1:27.

Sila ba sa pisikal sama sa Diyos? Dili, imposible kana. Ang tawo maoy tawhanon, unodnon, gidesinyo nga magpuyo sa yuta. Ang Diyos espiritu, nga nagapuyo sa dili-mahanduraw nga langitnong himaya nga wala gani tawo nga makaduol. (Exodo 33:18-20; 1 Corinto 15:50) Nan, sa unsang paagi nga ang tawo gibuhat sa dagway sa Diyos? Sa pagkaagi nga ang tawo gihatagan ug katakos nga mopakita sa talagsaong mga hiyas sa Diyos​—gugma, hustisya, kaalam, ug gahom​—maingon man sa ubang mga hiyas.

Ang mga Hiyas ni Jehova

Ang mga hiyas ni Jehova nga Diyos gibanaag sa tanan niyang linalang, apan sila makahuloganong gipasundayag diha sa iyang mga pakiglabot sa unang tawhanong magtiayon, si Adan ug Eva. (Roma 1:20) Ang iyang gugma nakita sa pagkaagi nga gilalang niya ang yuta nga angayang puy-an sa tawo. Si Jehova naglalang alang sa tawo ug usa ka hingpit nga asawa nga mahimong iyang kauban ug inahan sa iyang mga anak. Gibutang niya silang duha sa usa ka matahom nga tanaman ug gihatagan sila ug kadagaya sa tanang butang nga gikinahanglan aron padayong mabuhi ug magmalipayon. Labi pang kahibulongan sa tanan, ang Diyos naghatag kanilag kahigayonan sa pagkabuhing walay kataposan.​—Genesis 2:7-9, 15-24.

Ang kaalam sa Diyos nakita sa iyang pagsulay sa unang tawhanong magtiayon. Aron sila magpabiling mga sakop sa unibersohanong pamilya ni Jehova ug aron sila mabuhing walay kataposan ingong mga ginikanan sa tawhanong rasa, kinahanglang mahimo silang mga panig-ingnan sa pagkamatinumanon ug sa matuod nga pagsimba. Busa, si Jehova naghatag kanilag kahigayonan sa pagpasundayag sa kahimtang sa ilang kasingkasing ilalom sa usa ka angayng pagsulay​—dili sila mokaon sa kahoy sa kahibalo sa maayo ug daotan. Pagkamaalamon sa bahin ni Jehova nga tugotan ang mga tawo sa pagpamatuod sa ilang pagkamasinugtanon ug gugma kaniya una sila hatagan ug kahibulongang mga pribilehiyo nga iyang giplano!

Ang hustisya sa Diyos nakita diha sa iyang pag-insistir sa hatag-as nga mga sukdanan diha sa iyang mga linalang ug sa dili niya pagkompromiso nianang mga sukdanana. Nakita kana sa iyang paghatag kang Adan ug Eva sa tanang kahigayonan nga mobuhat kon unsay husto. Ug sa dihang napakyas sila sa paghimo niana, ang iyang hustisya nakita sa iyang paghukom kanila nga mag-antos sa napahayag nga silot tungod sa pag-alsa.

Ang gahom ni Jehova nakita diha sa iyang pagpahinabo sa iyang hukom. Si Satanas, ang dakong rebelde, nagpasabot nga si Jehova bakakon, ug si Satanas nagtanyag ug dagkong mga butang kang Eva kon siya mosupak sa Diyos. (Genesis 3:1-7) Apan si Satanas wala makatuman sa iyang saad. Wala siya makapugong kang Jehova sa pagpalagpot kang Adan ug Eva gikan sa tanaman sa Eden, ug wala siya makapugong sa katumanan sa mga pulong sa Diyos kang Adan: “Kay abog ka ug sa abog ikaw mopauli.” (Genesis 3:19) Hinunoa, si Jehova wala dayon magpatuman sa hukom sa kamatayon, ug niini dugang pa niyang gipakita ang iyang gugma. Gihatagan niyag panahon si Adan ug si Eva sa pagpatunghag mga anak nga pinaagi niana ang iyang orihinal nga katuyoan alang sa katawhan sa ngadtongadto matuman.​—Genesis 1:28.

Sa kataposan, ang hustisya, gugma, gahom, ug kaalam ni Jehova nga Diyos gipasundayag diha sa iyang saad nga magtaganag usa ka binhi nga maglaglag sa mga buhat ni Satanas ug maghanaw sa makapasubong mga sangpotanan nianang unang pag-alsa batok sa diyosnong pagkasoberano. (Genesis 3:15) Pagkatalagsaong Maglalalang ang atong nabatonan!

Mga Paningkamot sa Pagsundog sa Diyos

Bisan tuod dili na hingpit, ang mga tawo makapadayag gihapon sa mga hiyas sa Diyos. Busa, gidasig ni Pablo ang mga Kristohanon sa iyang adlaw: “Pagkahimong mga tigsundog sa Diyos, ingon nga hinigugmang mga anak.” (Efeso 5:1) Hinuon, sa tibuok nga kasaysayan kadaghanan ang nagpasundayag ug dayag nga pagkawalay-pagtagad sa mga hiyas sa Diyos. Sa panahon ni Noe, ang mga tawo nahimong daotan kaayo nga si Jehova mihukom sa paglaglag sa tanang tawo gawas ni Noe ug sa iyang pamilya. Si Noe “usa ka matarong [maangayon] nga tawo. Gipamatud-an niya ang iyang kaugalingon nga walay sala taliwala sa iyang mga katalirongan,” ug iyang gipasundayag ang iyang gugma sa Diyos pinaagi sa pagtuman sa mga sugo sa Diyos.a “Si Noe mibuhat sa tanan nga gisugo sa Diyos kaniya. Gibuhat gayod niya kana.” (Genesis 6:9, 22) Si Noe nagpakitag gugma alang sa iyang isigkatawo ug sa iyang pagkamaunongon sa hustisya pinaagi sa pagkahimong “magwawali sa pagkamatarong.” (2 Pedro 2:5) Nagpakita siya ug kaalam ug hustong naggamit sa iyang pisikal nga gahom pinaagi sa pagsunod sa sugo sa Diyos nga magtukod ug usa ka dakong arka, magtipig ug pagkaon diha niana, magtigom sa mga mananap, ug mosulod sa arka sumala sa gisugo ni Jehova. Gipakita usab niya ang iyang gugma sa pagkamatarong pinaagi sa dili pagtugot sa iyang daotang mga silingan nga magdaot kaniya.

Ang Bibliya nagbatbat sa daghang uban pa kinsa sa susama nagpasundayag ug diyosnong mga hiyas. Ang panguna mao si Jesu-Kristo, kinsa sa hingpit anaa sa dagway sa Diyos ug busa makaingon: “Siya nga nakakita kanako nakakita sa Amahan.” (Juan 14:9) Sa mga hiyas nga gipakita ni Jesus, ang talagsaon mao ang iyang gugma. Ang gugma alang sa iyang Amahan ug alang sa katawhan nagtukmod kaniya sa pagbiya sa iyang langitnong pinuy-anan ug magpuyo ingong tawo sa yuta. Kana nagtukmod kaniya sa paghimaya sa iyang Amahan pinaagi sa iyang matarong nga panggawi ug sa pagsangyaw ngadto sa katawhan sa maayong balita sa kaluwasan. (Mateo 4:23; Juan 13:31) Unya, gugma ang nagpalihok kang Jesus sa pagtanyag sa iyang hingpit nga kinabuhi alang sa kaluwasan sa katawhan ug, labi pang hinungdanon, alang sa pagbalaan sa ngalan sa Diyos. (Juan 13:1) Sa pagpaningkamot nga sundogon ang Diyos, aduna pa bay mas maayong panig-ingnan nga sundon kay ni Jesu-Kristo?​—1 Pedro 2:21.

Sa Unsang Paagi Kita Labi Pang Mahisama sa Diyos Karon?

Sa unsang paagi kita, karon, makapadayag sa mga hiyas sa Diyos ug sa ingon molihok diha sa dagway sa Diyos? Aw, tagda una ang hiyas nga gugma. Si Jesus nag-ingon: “Higugmaon mo gayod si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.” Unsaon nato pagpakitag gugma sa Diyos? Si apostol Juan mitubag: “Kay ang paghigugma sa Diyos nagakahulogan niini, nga atong sundon ang iyang mga sugo; ug gani ang iyang mga sugo dili man mabug-at.”​—Mateo 22:37; 1 Juan 5:3.

Siyempre, aron matuman ang mga sugo ni Jehova, kinahanglan nato silang mailhan. Kana naglakip sa pagbasa, pagtuon, ug pagpalandong sa Pulong sa Diyos, ang Bibliya, ug sa literatura sa Bibliya. Sama sa salmista, kinahanglan kitang makaingon: “Oh hilabihan ang paghigugma ko sa imong kasugoan! Kini maoy akong gipalandong sa tibuok adlaw.” (Salmo 119:97) Samtang nagkalalom ug nagkalalom pa ang atong pagsabot sa Pulong sa Diyos, matugob kita sa paagi sa Diyos sa paghunahuna. Modangat kita sa paghigugma sa pagkamatarong ug sa pagdumot sa kalapasan. (Salmo 45:7) Diha niana si Adan nasayop. Nasayod siya sa kasugoan ni Jehova, apan wala siyay igong gugma niana aron siya magpabilin niana. Sa dihang magabasa sa Pulong sa Diyos, kinahanglang kanunay natong pangutan-on ang atong kaugalingon, ‘Sa unsang paagi kini mapadapat kanako? Unsay akong mahimo sa paghimo sa akong panggawi nga mas pang kaharmoniya sa mga hiyas sa Diyos?’

Si Jesus miingon usab: “Kinahanglang higugmaon nimo ang imong silingan sama sa imong kaugalingon.” (Mateo 22:39) Ang matag himsog nga indibiduwal nahigugma sa iyang kaugalingon ug buot sa kinamaayohan alang sa iyang kaugalingon. Dili kana sayop. Apan gipakita ba nato ang samang gugma alang sa atong silingan? Gisunod ba nato ang sugo sa Bibliya: “Ayaw ihikaw ang pagbuhat ug maayo gikan kanila diin kana gikinahanglan, sa dihang kini anaa sa gahom sa imong kamot ang pagbuhat niana”?​—Proverbio 3:27; Galacia 6:10.

Komosta ang hiyas nga kaalam? Ang atong paningkamot sa pagpasundayag niining hiyasa motultol kanato sa pagtuon sa Bibliya tungod kay kana maoy tipiganan sa diyosnong kaalam. Ang Salmo 119:98-100 mabasa: “Ang imong mga sugo nakapahimo kanako nga labi pang maalamon kay sa akong mga kaaway, kay kini ania kanako sa panahong walay tino. Aduna akoy labaw pang salabotan kay sa tanan ko nga mga magtutudlo, kay ang imong mga pahinumdom maoy akong gipalandong. Ako milihok nga labi pang masinaboton kay sa mga tigulang, tungod kay gituman ko ang imong mga lagda.” Sa Proverbio 3:18, ang kaalam gibatbat ingong “kahoy sa kinabuhi.” Kon makabaton kitag kaalam ug ipadapat kana, madawat nato ang pag-uyon sa Diyos ug ang ganti nga kinabuhing walay kataposan.​—Ecclesiastes 7:12.

Komosta ang hustisya? Niining daotang kalibotan, ang hustisya maoy hinungdanong hiyas alang niadtong mopahimuot sa Diyos. Si Jesus nahigugma sa pagkamatarong (hustisya) ug nagdumot sa pagkamalapason. (Hebreohanon 1:9) Ang mga Kristohanon karong adlawa naghimo sa susama. Ang hustisya magtukmod kanila sa pagpabili sa hustong mga hiyas. Gilikayan nila ang dili-matarong nga mga dalan niining kalibotana ug gihimo ang pagbuhat sa kabubut-on sa Diyos nga labing hinungdanong butang sa ilang mga kinabuhi.​—1 Juan 2:15-17.

Maylabot sa gahom, kitang tanan adunay usa ka sukod niini. Kita kinaiyanhong nakabaton ug pisikal ug intelektuwal nga gahom, ug samtang kita nagatubo ingong mga Kristohanon, maugmad nato ang gahom sa espirituwal nga diwa. Si Jehova nagdugang sa atong gahom ginamit ang iyang balaang espiritu sa sukod nga kita, bisan tuod maorag mahuyang, makatuman sa kabubut-on ni Jehova. Si Pablo miingon: “Sa tanang butang ako adunay kusog tungod kaniya nga nagahatag ug gahom kanako.” (Filipos 4:13) Ang samang kusog mabatonan nato kon kita moampo alang sa espiritu ni Jehova.

Pagsangyaw sa Maayong Balita

Ang atong pagpadayag sa upat ka dagkong mga hiyas sa Diyos makita pag-ayo sa atong pagtuman sa sugo: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagsunod sa tanang butang nga akong gisugo kaninyo. Ug, tan-awa! ako uban kaninyo sa tanang mga adlaw hangtod sa katiklopan sa sistema sa mga butang.” (Mateo 28:19, 20) Ang maong edukasyonal nga buluhaton magdala ug kinabuhi alang niadtong mosanong. Pagkamaayong pasundayag sa gugma alang niadtong kinsa, sa dakong bahin, mosugod pinaagi sa pagkahimong bug-os nga mga langyaw kanato!

Dugang pa, ang maong pagtudlo mao ang dalan sa kaalam. Kana magdala ug bunga nga molahutay. Unsa pang laing buluhaton nga ikaingon: “Pinaagi sa pagbuhat niini ikaw magluwas sa imong kaugalingon ug niadtong nagpatalinghog kanimo”? (1 Timoteo 4:16) Walay mga maparot diha sa paghimog-tinun-an nga buluhaton. Kadtong mamati ug kadtong nagtudlo parehong makabaton ug walay-kataposang mga panalangin.

Bahin sa hustisya, ang mga Kristohanon nagatudlo ug matul-id ug matarong nga mga prinsipyo ngadto sa ilang mga estudyante sa Bibliya. Kita nagatabang kanila nga moalagad kang Jehova, “ang Diyos sa hustisya.” (Malakias 2:17) Kadtong kinsa nagpahinungod karon sa ilang mga kinabuhi sa pag-alagad kang Jehova ug mopadayon diha sa pagkamatinumanon gipahayag nga matarong, maangayon, nga magatultol ngadto sa ilang kaluwasan sa Armageddon.​—Roma 3:24; Santiago 2:24-26.

Pagkadakong pasundayag sa gahom ang pagsangyaw ug pagtudlo sa maayong balita sa tibuok kalibotan! (Mateo 24:14) Nagkinahanglan ug paglahutay sa pagsangyaw nga mapinadayonon sa mga teritoryo diin ang kadaghanan dili buot maminaw. Apan si Jehova, pinaagi sa iyang espiritu, naghatag sa kusog nga gikinahanglan sa paglahutay hangtod sa kataposan.​—Isaias 40:30, 31; Mateo 24:13; Lucas 11:13.

Tinuod, ingong dili-hingpit nga mga anak ni Adan, kita dili makatuman sa hingpit niining maayong mga hiyas. Apan, hinumdomi, ang tawo gibuhat diha sa dagway sa Diyos, ug kon kita maningkamot nga sa dugang ug dugang pa mahisama sa Diyos, nan sa bahin kita nagatuman sa katarongan sa atong paglungtad. (Ecclesiastes 12:13) Kon kita maningkamot nga mobuhat sa labing maayo nga atong maarangan ug mangayog pasaylo sa dihang kita masayop, nan kita makalaom nga molabang buhi ngadto sa matarong nga bag-ong kalibotan sa Diyos, diin kita ngadtongadto makakab-ot sa kahingpitan. Unya, kita maanaa sa paraisong yuta nga puy-an sa hingpit nga mga tawo, nga ang tanan magpakita sa mga hiyas ni Jehova nga Diyos sa bug-os. Pagkamakapalipay! Sa kataposan, sa kinabug-osang diwa sa pulong, ang mga tawo anaa sa dagway sa Diyos.

[Mga footnote]

[Hulagway sa panid 25]

Si Jesus nagpakita kanato kon unsaon pag-ugmad ang balaang mga hiyas ni Jehova

[Hulagway sa panid 26]

Sa kataposan, ang mga tawo sa kinabug-osang diwa maanaa sa dagway sa Diyos