Ginapabilhan Mo ba ang Bibliya?
KAPIN lamag 200 ka tuig ang miagi, natawo si Mary Jones sa Llanfihangel, usa ka hilit nga balangay sa Wales nga dili kaayo layo sa baybayon sa Atlantiko. Ang iyang mga ginikanan maoy kabos nga mga maghahabol—kabos kaayo sa pagbaton ug Bibliya. Apan gitisok nila diha sa ilang anak nga babaye ang paghigugma sa Diyos pinaagi sa pagsugilon kaniya sa mga estorya sa Bibliya ug gisubli ang mga teksto nga ilang mahinumdoman. Si Mary mobasa kanunay sa Welsh nga Bibliya sa silingan ug misugod sa pagtigom ug gamayng kuwarta kutob sa iyang mahimo, nga determinado sa pagpalit ug usa alang sa iyang kaugalingon.
Sa tuig 1800, sa dihang 16 anyos si Mary, iyang nadungog nga may pipila ka gibaligyang Welsh nga Bibliya mga 40 kilometros ang gilay-on sa gamayng lungsod sa Bala. Sa walay kahadlok, siya midesider sa pagbaktas paingon didto. Kini iyang gihimo, nga nagtiniil latas sa kabungtoran. Sa panahong siya miabot, hinunoa, nahalin na ang tanang kopya. Nahibaloan usab ni Mary nga ang kantidad sa salapi nga iyang natigom gamay ra kaayo.
Ang pastor sa maong dapit natandog gayod sa kahibalo ug gugma ni Mary sa Bibliya. Sa pagkakita sa iyang mga luha sa kabalo human sa tanang paningkamot nga iyang nahimo, malulutong gihatag niya ang iyang kaugalingong kopya, nga nag-ingon: “Basaha kini pag-ayo, pagkugi sa pagtuon niini, itisok ang balaang mga pulong sa imong panumdoman, ug ipadapat sa imong kinabuhi ang mga pagtulon-an niini.”
Kini nga sugilanon giasoy sa ulahi diha sa usa ka miting sa Committee of the Religious Tract Society sa London. Didto gihimo ang desisyon sa pagsuplay ug mga hubad sa Bibliya dili lamang alang sa katawhan sa Wales kondili ngadto sa tibuok kalibotan. Gikan niining yanong sinugdanan mitungha ang una sa daghang sosyedad sa Bibliya sa ika-19ng siglo. Human niadto, ang mga kopya sa Bibliya sa langyawng pinulongan misugod sa pagtungha nga may nag-uswag nga kasubsob.
Karong adlawa, ang Watch Tower Bible and Tract Society, nga gihimong korporasyon niadtong 1884, nagapatik ug mga Bibliya ug mga tabang sa pagtuon sa Bibliya sa kapin sa 200 ka pinulongan. Sa tibuok yuta, kini nakaapod-apod ug 72 ka milyong kopya sa modernog-pinulongang New World Translation of the Holy Scriptures. Gihubad gikan sa orihinal nga Hebreohanon ug Grego, ang New World Translation mabatonan karon sa tibuok o sa bahin niini diha sa 18 ka pinulongan ug sa pagkakaron ginahubad ngadto sa dugang 12 ka pinulongan.
Karon nga ang Bibliya halos mabatonan na sa tanan, unsay imong panglantaw niini? Ginapabilhan mo ba ang Bibliya? Aduna ka bay kopya nga gipakahamili ug ginabasa?
[Picture Credit Line sa panid 3]
Gikan sa librong The Story of Mary Jones and Her Bible