Ugmara ang Pagkamakataronganon

“Ipaila ang inyong pagkamakataronganon ngadto sa tanang tawo. Haduol na ang Ginoo.”​—FILIPOS 4:5.

1. Nganong usa ka hagit ang pagkahimong makataronganon sa kalibotan karong adlawa?

“ANG tawong makataronganon”​—ang Ingles nga magsusulat nga si Sir Alan Patrick Herbert nagtawag kaniya nga tawo sa sugilambong. Sa tinuoray, usahay mopatim-aw nga wala nay nahibilin nga tawong makataronganon niining gibungkag-sa-away nga kalibotan. Gitagna sa Bibliya nga niining lisod nga “kataposang mga adlaw,” ang mga tawo mahimong “mabangis,” “gahig-ulo,” ug “dili ikasabot”​—sa laing mga pulong, dili gayod makataronganon. (2 Timoteo 3:1-5) Bisan pa niana, gitamod pag-ayo sa matuod nga mga Kristohanon ang pagkamakataronganon, kay nahibalong kini maoy usa ka timaan sa balaang kaalam. (Santiago 3:17) Kita mibati nga dili imposible nga mahimong makataronganon diha sa dili-makataronganong kalibotan. Hinuon, sa walay duhaduha atong gidawat ang hagit diha sa dinasig nga tambag ni apostol Pablo nga makita sa Filipos 4:5: “Ipaila ang inyong pagkamakataronganon ngadto sa tanang tawo.”

2. Sa unsang paagi ang mga pulong ni apostol Pablo sa Filipos 4:5 motabang kanato sa pagtino kon kita ba makataronganon?

² Matikdi kon giunsa sa mga pulong ni Pablo pagtabang kanato sa pagsusi kon kita maoy makataronganon. Ang isyu dili kaayo mahitungod sa kon giunsa nato pag-isip ang atong kaugalingon; kini maoy usa ka isyu kon giunsa kita pag-isip sa uban, kon sa unsang paagi kita nailhan. Ang hubad ni Phillips naghubad niining bersikuloha: “Magbaton sa dungog sa pagkamakataronganon.” Matag usa kanato maayong mangutana, ‘Sa unsang paagi nailhan ako? Ako ba may dungog sa pagkamakataronganon, mapahiuyonon, ug malumo? O ako ba nailhan ingong estrikto, isog, o gahig-ulo?’

3. (a) Unsay kahulogan sa Gregong pulong nga gihubad nga “makataronganon,” ug nganong kining hiyasa madanihon? (b) Sa unsang paagi ang usa ka Kristohanon makakat-on nga mahimong mas makataronganon?

³ Ang atong dungog niining bahina yanong mobanaag sa gidak-on sa atong pagsundog kang Jesu-Kristo. (1 Corinto 11:1) Sa dinhi sa yuta, si Jesus hingpit nga nagbanaag sa kinalabwang panig-ingnan sa iyang Amahan sa pagkamakataronganon. (Juan 14:9) Ngani, sa misulat si Pablo mahitungod sa “kalumo ug kalulot sa Kristo,” ang Gregong pulong nga iyang gigamit alang sa kalulot (e·pi·ei·kiʹas) nagkahulogan usab nga “pagkamakataronganon” o, sa literal, “pagkamapahiuyonon.” (2 Corinto 10:1) Ang The Expositor’s Bible Commentary nagtawag niini nga “usa sa talagsaong mga pulong sa kabatbatan sa kinaiya diha sa B[ag-ong] T[estamento].” Kini nagbatbat sa usa ka hiyas nga madanihon kaayo nga ang usa ka eskolar naghubad sa pulong nga “matam-is nga pagkamakataronganon.” Busa, atong hisgotan ang tulo ka paagi diin si Jesus, sama sa iyang Amahan, si Jehova, nagpasundayag sa pagkamakataronganon. Sa ingon mahimong makat-onan nato kon sa unsang paagi kita mahimong mas makataronganon sa atong kaugalingon.​—1 Pedro 2:21.

“Andam sa Pagpasaylo”

4. Sa unsang paagi si Jesus nagpakita sa iyang kaugalingon nga “andam sa pagpasaylo”?

⁴ Sama sa iyang Amahan, si Jesus nagpakitag pagkamakataronganon pinaagi sa pagkahimong “andam sa pagpasaylo” sa masubsob. (Salmo 86:5) Tagda ang panahon sa dihang si Pedro, usa ka suod nga kauban, naglimod kang Jesus sa makatulo sa gabii nga gidakop ug gihusay si Jesus. Si Jesus mismo nagpahayag sayosayo niana: “Si bisan kinsa nga dili-moangkon kanako atubangan sa mga tawo, ako usab dili-moangkon kaniya atubangan sa akong Amahan.” (Mateo 10:33) Si Jesus ba sa kaestrikto ug kawalay-kaluoy nagpadapat sa maong lagda kang Pedro? Wala; human sa Iyang pagkabanhaw, sa linawas si Jesus miduaw kang Pedro, sa walay duhaduha aron paghupay ug paglig-on sa maong mahinulsolon, naguol nga apostol. (Lucas 24:34; 1 Corinto 15:5) Wala madugay human niadto, si Jesus mitugot nga si Pedro makabaton ug dakong responsabilidad. (Buhat 2:1-41) Ang matam-is nga pagkamakataronganon sa kinalabwan gipasundayag dinhi! Dili ba makahupay ang paghunahuna nga gitudlo ni Jehova si Jesus ingong Maghuhukom ibabaw sa tanang tawo?​—Isaias 11:1-4; Juan 5:22.

5. (a) Unsang dungog ang angay batonan sa mga ansiano taliwala sa mga karnero? (b) Unsang kasayoran ang mahimong sublion sa mga ansiano sa dili pa maghusay sa hudisyal nga mga kaso, ug ngano?

⁵ Sa dihang ang mga ansiano mahimong mga maghuhukom diha sa kongregasyon, sila maningkamot sa pagsunod sa makataronganong panig-ingnan ni Jesus. Dili nila gusto nga ang mga karnero mahadlok kanila ingong mga magsisilot. Hinuon, sila magtinguha sa pagsundog kang Jesus aron ang mga karnero mobating luwas uban kanila ingong mahigugmaong mga magbalantay. Sa hudisyal nga mga kaso, sila maningkamot gayod nga mahimong makataronganon, andam sa pagpasaylo. Sa dili pa maghusay sa usa ka butang, ang pila ka ansiano nakakaplag nga makatabang ang pagsubli sa Hulyo 1, 1992, nga mga artikulo sa Bantayanang Torre nga “Si Jehova, ang Dili-Madapigong ‘Maghuhukom sa Tibuok Yuta’” ug “Mga Ansiano, Panghukom Uban ang Pagkamatarong.” Sa ingon ilang mahinumdoman ang sumaryo sa paagi ni Jehova sa paghukom: “Kalig-on diin gikinahanglan, kaluoy diin posible.” Dili sayop nga mokiling sa kaluoy diha sa paghukom sa dihang adunay makataronganong pasikaranan sa paghimo niana. (Mateo 12:7) Pagkagrabeng sayop ang pagkahimong mabangis o walay-kaluoy. (Ezekiel 34:4) Busa ang mga ansiano makalikay nga masayop pinaagi sa aktibong pagpangita sa labing mahigugmaon, maluluy-ong dalan kutob sa mahimo sulod sa mga utlanan sa hustisya.​—Itandi ang Mateo 23:23; Santiago 2:13.

Pagkamapasiboon Atubangan sa Nausob nga mga Kahimtang

6. Sa unsang paagi si Jesus nagpasundayag sa pagkamakataronganon sa pagpakiglabot sa Hentil nga babaye kansang anak babaye gidemonyohan?

⁶ Sama kang Jehova, si Jesus napamatud-an nga daling mag-usob sa direksiyon o magpahiuyon sa bag-ong mga kahimtang inigtungha niini nila. Sa usa ka higayon usa ka babayeng Hentil ang nagpakiluoy kaniya sa pag-ayo sa iyang anak babaye nga grabeng gidemonyohan. Sa tulo ka lainlaing paagi, sa sinugdan gipaila ni Jesus nga dili siya motabang kaniya​—nahauna, pinaagi sa dili pagtubag kaniya; ikaduha, pinaagi sa deretsong pagpahayag nga siya gipadala, dili ngadto sa mga Hentil, kondili ngadto sa mga Hudiyo; ug ikatulo, pinaagi sa paghatag ug usa ka ilustrasyon nga malulutong nagpahayag sa samang punto. Ugaling, ang babaye milahutay bisan pa nianang tanan, nga mihatag ug pamatuod sa talagsaong pagtuo. Sa pagtagad niining talagsaong kahimtang, si Jesus nakasabot nga kadto dili panahon aron ipatuman ang usa ka malangkobong lagda; panahon kadto nga magpasibo ingong pagsanong ngadto sa mas hatag-as nga mga prinsipyo.a Sa ingon, tukmang gibuhat ni Jesus kon unsay gipaila niya sa tulo ka beses nga dili niya buhaton. Iyang giayo ang anak babaye niadtong bayhana!​—Mateo 15:21-28.

7. Sa unsang mga paagi ang mga ginikanan mahimong makapakitag pagkamakataronganon, ug ngano?

⁷ Kita ba samang nailhan sa atong kaandam sa pagpahiuyon kon nahiangay? Ang mga ginikanan sagad kinahanglan nga magpakita sa ingon nga pagkamakataronganon. Sanglit ang matag bata maoy linain, ang mga metodo nga molampos sa usa ka bata tingali dili angay alang sa lain. Dugang pa, samtang managko ang mga bata, mausob ang ilang mga panginahanglan. Kinahanglan bang usbon ang gibaod sa mga ginikanan nga oras sa pagpauli sa mga bata sa balay? Ang panagtuon sa pamilya makabenepisyo ba sa mas bibo nga estilo? Sa dihang ang ginikanan maghingapin pagsanong sa usa ka gamayng kalapasan, siya ba andam nga magpaubos ug magtul-id sa mga butang? Ang mga ginikanan nga mapahiuyonon nianang mga paagiha maglikay sa pagpasuko sa way-hinungdan sa ilang mga anak ug magpahilayo kanila gikan kang Jehova.​—Efeso 6:4.

8. Sa unsang paagi ang mga ansiano sa kongregasyon makapanguna sa pagpasibo sa mga panginahanglan sa teritoryo?

⁸ Ang mga ansiano usab kinahanglang mopasibo inigtungha sa bag-ong mga kahimtang, samtang dili gayod magkompromiso sa tinong mga balaod sa Diyos. Sa pagdumala sa buluhaton sa pagsangyaw, ikaw ba listo sa mga kausaban diha sa teritoryo? Samtang mausob ang paagi sa pagkinabuhi sa silinganan, tingali ang pagsangyaw sa gabii, pagsangyaw sa kadalanan, o pagsangyaw pinaagig telepono angay ipasiugda. Ang pagpahiuyon sa maong mga paagi motabang kanato sa pagtuman nga mas epektibo sa atong tinudlong-buluhaton sa pagsangyaw. (Mateo 28:19, 20; 1 Corinto 9:26) Si Pablo usab nagtino nga magpahiuyon sa tanang matang sa katawhan diha sa iyang ministeryo. Gibuhat ba nato ang sama, pananglitan, pinaagi sa pagkakat-on ug igo mahitungod sa lokal nga mga relihiyon ug mga kultura aron makatabang sa katawhan?​—1 Corinto 9:19-23.

9. Nganong ang usa ka ansiano angay dili mopugos sa pagdumala kanunay sa mga suliran sa paagi nga gibuhat niya sa nangagi?

⁹ Samtang kining kataposang mga adlaw nahimong mas lisod, ang mga magbalantay tingali kinahanglan usab nga mopahiuyon sa makapalibog nga kakuti ug pagkadili-makapahimuot sa pipila sa mga sulirang ginaatubang karon sa ilang panon. (2 Timoteo 3:1) Mga ansiano, karon maoy dili panahon sa pag-inistrikto! Sa pagkamatuod ang usa ka ansiano dili moinsister sa pagdumala sa mga suliran sama sa gibuhat niya sa nangagi kon ang iyang mga paagi maoy dili-epektibo o kon “ang matinumanon ug maalamong ulipon” nakahukom nga kinahanglang ipatik ang bag-ong kasayoran bahin sa maong mga ulohan. (Mateo 24:45; itandi ang Ecclesiastes 7:10; 1 Corinto 7:31.) Usa ka matinumanong ansiano sa sinsero nanlimbasog pagtabang sa usa ka naguol nga igsoong babaye nga nagkinahanglan pag-ayo ug maayong tigpatalinghog. Ugaling, wala niya isipa nga seryoso kaayo ang iyang depresyon ug siya mihatag ug mga yanong solusyon. Unya ang Watch Tower Society mipatik ug pila ka binase-sa-Bibliyang impormasyon nga naghisgot sa iyang suliran mismo. Gihukom sa ansiano nga makigsulti pag-usab kaniya, nga sa maong panahon ang bag-ong kasayoran gipadapat ug ang empatiya gipakita alang sa iyang kahimtang. (Itandi ang 1 Tesalonica 5:14, 15.) Pagkamaayong panig-ingnan sa pagkamakataronganon!

10. (a) Sa unsang paagi ang mga ansiano magpakitag mapahiuyonong tinamdan ngadto sa usag usa ug ngadto sa lawas sa mga ansiano sa katibuk-an? (b) Sa unsang paagi angay isipon sa lawas sa ansiano kadtong nagpakitag pagkadili-makataronganon?

¹⁰ Ang mga ansiano kinahanglan usab nga magpakitag mapahiuyonong tinamdan ngadto sa usag usa. Inigtigom sa lawas sa mga ansiano, hinungdanon kaayo nga walay usa ka ansiano nga mopatigbabaw sa tigom! (Lucas 9:48) Ang nagadumala nagkinahanglan ilabina sa pagpugong niining bahina. Ug kon ang usa o duha ka ansiano dili mouyon sa usa ka desisyon sa katibuk-ang lawas sa mga ansiano, sila dili mopugos nga ipatuman ang ilang paagi. Hinuon, basta walay Kasulatanhong prinsipyo nga ginalapas, sila mopahiuyon, kay mahinumdom nga ang mga ansiano kinahanglang magmakataronganon. (1 Timoteo 3:2, 3) Sa laing bahin, ang lawas sa mga ansiano angay mahinumdom nga si Pablo nagbadlong sa kongregasyon sa Corinto tungod sa ‘pag-antos sa mga tawong dili makataronganon’ nga nagpadayag sa ilang kaugalingon ingong “maayong-laki nga mga apostol.” (2 Corinto 11:5, 19, 20) Busa kinahanglang andam sila sa pagtambag sa kaubang ansiano nga magagawi sa gahian, dili-makataronganong paagi, apan kinahanglang sila malumo ug maluluton sa pagbuhat niana.​—Galacia 6:1.

Pagkamakataronganon sa Paggamit ug Awtoridad

11. Unsa ang kalainan tali sa paagi sa paggamit sa awtoridad sa Hudiyong relihiyosong mga pangulo sa adlaw ni Jesus ug sa paggamit ni Jesus?

¹¹ Sa nabuhi si Jesus sa yuta, ang iyang pagkamakataronganon mibanaag gayod sa paagi sa iyang paggamit sa iyang hinatag-sa-Diyos nga awtoridad. Pagkalahi niya gikan sa relihiyosong mga pangulo sa iyang adlaw! Tagda ang usa ka panig-ingnan. Ang balaod sa Diyos nagmando nga walay buluhaton, bisan gani pagpangahoy, ang pagabuhaton sa Igpapahulay. (Exodo 20:10; Numeros 15:32-36) Ang relihiyosong mga pangulo matinguhaon nga maoy magbuot kon sa unsang paagi ipadapat sa katawhan ang maong balaod. Busa ilang gipangako ang paghukom sa tukma kon unsay mahimong alsahon sa usa ka tawo sa Igpapahulay. Sila naglagda: dili ang bisan unsang mas bug-at kay sa duha ka nauga nga igos. Giluwatan pa gani nila ang usa ka pagdili sa sandalyas nga tinaorag mga lansang, nga miangkon nga ang pag-alsa sa ekstrang gibug-aton sa mga lansang maoy buluhaton! Giingon nga, tanantanan, ang mga rabbi nagdugang ug 39 ka lagda ngadto sa balaod sa Diyos bahin sa Igpapahulay ug unya naghimog way-kataposang mga dugang sa maong mga lagda. Si Jesus, sa laing bahin, wala magtinguha nga gamhan ang mga tawo pinaagi sa kaulawan pinaagi sa pagpahamtang ug way-kataposang mga lagda nga mapig-oton o pinaagi sa paghatag ug estrikto, dili-makab-ot nga mga sukdanan.​—Mateo 23:2-4; Juan 7:47-49.

12. Nganong kita makaingon nga si Jesus wala matarog kon bahin sa matarong nga mga sukdanan ni Jehova?

¹² Nan, pagatuohan ba nato nga si Jesus wala magpasiugda sa malig-ong paagi sa matarong nga mga sukdanan sa Diyos? Siya nagpasiugda gayod! Siya nakasabot nga ang mga balaod maoy labing epektibo sa dihang ibutang sa mga tawo sa kasingkasing ang mga prinsipyo nga nagpaluyo nianang mga balaora. Samtang ang mga Pariseo mabalak-on sa pagsulay paggahom sa mga tawo pinaagi sa di-maihap nga mga lagda, si Jesus nagtinguha sa pag-abot sa mga kasingkasing. Pananglitan, siya nasayod pag-ayo nga walay pagpahiuyon kon bahin na sa mga balaod sama sa “kalagiw sa pakighilawas.” (1 Corinto 6:18) Busa si Jesus nagpasidaan sa mga tawo bahin sa mga panghunahuna nga mahimong mohatod sa imoralidad. (Mateo 5:28) Ang maong pagpanudlo nagkinahanglag labaw nga kaalam ug pag-ila kay sa yanong pagpahamtang ug estrikto, de-pormula nga mga lagda.

13. (a) Nganong ang mga ansiano magalikay sa pagmugnag dili-mapasiboong mga balaod ug mga lagda? (b) Unsa ang pipila ka bahin diin hinungdanon ang pagtahod sa konsensiya sa indibiduwal?

¹³ Ang sinaligang mga igsoong lalaki karong adlawa samang interesado sa pag-abot sa mga kasingkasing. Busa, sila maglikay sa pagpahamtang ug mahariharion, dili-mapasiboong mga lagda o sa paghimo nga balaod sa ilang personal nga mga punto de vista ug mga opinyon. (Itandi ang Daniel 6:7-16.) Matag karon ug unya, ang malulutong mga pahinumdom kabahin sa biste ug pamostura tingali nahiangay ug tukma-sa-panahon, apan ang usa ka ansiano tingali magdaot sa iyang dungog ingong tawong makataronganon kon magpunay siyag hisgot nianang mga butanga o mosulay sa pagpahamtang kon unsay mga timailhan ilabina sa personal niyang gusto. Sa pagkatinuod, ang tanan sa kongregasyon angay molikay sa pagsulay paggahom sa uban.​—Itandi ang 2 Corinto 1:24; Filipos 2:12.

14. Giunsa pagpakita ni Jesus nga siya makataronganon kon bahin sa iyang gidahom gikan sa uban?

¹⁴ Ang mga ansiano mahimong gusto nga magsusi sa ilang kaugalingon bahin sa laing butang: ‘Makataronganon ba ako sa kon unsay akong gidahom gikan sa uban?’ Si Jesus mao gayod. Siya makanunayong nagpakita sa iyang mga sumusunod nga ang iya lang gidahom mao ang ilang tibuok-kalag nga paningkamot ug kini gipabilhan pag-ayo niya. Gidayeg niya ang kabos nga babayeng balo tungod sa paghatag niya sa iyang mga sensilyo nga gamayg bili. (Marcos 12:42, 43) Gibadlong niya ang iyang mga tinun-an sa dihang gisaway nila ang mahal nga amot ni Maria, nga nag-ingon: “Pasagdi siya. . . . Siya nagbuhat sa iyang maarangan.” (Marcos 14:6, 8) Siya makataronganon bisan pa sa dihang ang iyang mga sumusunod nagpakyas kaniya. Pananglitan, bisan pag iyang giawhag ang iyang tulo ka labing suod nga mga apostol sa pagpabiling nagmata ug magpadayon sa pagbantay uban kaniya sa gabii sa pagdakop kaniya, sila nagpakyas kaniya pinaagi sa pagkatulog nga balikbalik. Bisan pa, siya mipahayag nga mabination: “Ang espiritu, sa dayag, maikagon, apan ang unod maluya.”​—Marcos 14:34-38.

15, 16. (a) Nganong ang mga ansiano angay magbantay nga dili pit-oson o hadlokon ang panon? (b) Sa unsang paagi ang usa ka matinumanong sister nahidangat sa pagpasibo sa kon unsay iyang gidahom gikan sa uban?

¹⁵ Tinuod, gidasig ni Jesus ang iyang mga sumusunod nga ‘manlimbasog kamo.’ (Lucas 13:24) Apan wala gayod siya magpit-os kanila aron buhaton kana! Siya nag-inspirar kanila, naghatag ug panig-ingnan, nanguna, ug nagtinguha sa pag-abot sa ilang mga kasingkasing. Siya misalig sa gahom sa espiritu ni Jehova sa pagbuhat sa uban pa. Ang mga ansiano karong adlawa angay usab magdasig sa panon sa pag-alagad kang Jehova sa tibuok kasingkasing apan angay molikay sa paghadlok kanila pinaagi sa pagpabati sa sala o kaulaw, nga magpasabot nga ang ilang gibuhat sa pagkakaron sa pag-alagad kang Jehova sa usa ka paagi maoy kulang o dili madawat. Ang inistrikto, pugosong “buhata ang labaw pa, buhata ang labaw pa, buhata ang labaw pa!” nga paagi basin makapaluya niadtong nagabuhat sa tanan nilang maarangan. Pagkamakapasubo unya kon ang usa ka ansiano nakaugmad ug dungog sa pagka “lisod pahimut-an”​—nga halayo kaayo gikan sa pagkamakataronganon!​—1 Pedro 2:18.

¹⁶ Kitang tanan angay nga magmakataronganon diha sa kon unsay atong gidahom gikan sa uban! Usa ka sister, human sa pagbiya niya ug sa iyang bana sa ilang misyonaryong asaynment aron atimanon ang iyang masakitong inahan, misulat: “Karong mga panahona lisod gayod alang kanamong mga magmamantala dinhi sa mga kongregasyon. Kay nag-alagad niadto sa buluhatong sirkito ug distrito, nga napanalipdan gikan sa daghang ingong mga kapit-osan, kami sa kalit ug makapaguol nga paagi gipaamgo niini. Pananglitan, kaniadto ako tighunahuna, ‘Nganong kadtong maong sister wala magtanyag sa tukmang basahon niining bulana? Wala ba siya magbasa sa Ministeryo sa Gingharian?’ Karon nasayod na ako kon ngano. Alang sa pipila kini lang ang ilang maarangan aron makagawas [sa pagsangyaw].” Pagkamaayo pa ang pagdayeg sa atong mga igsoon tungod sa ilang gihimo inay paghukom kanila tungod sa kon unsay wala nila mahimo!

17. Sa unsang paagi si Jesus naghatag ug panig-ingnan alang kanato kon bahin sa pagkamakataronganon?

¹⁷ Tagda ang kataposang panig-ingnan kon giunsa ni Jesus paggamit ang iyang awtoridad sa makataronganong paagi. Sama sa iyang Amahan, si Jesus wala sa kaigihan magbantay sa iyang awtoridad. Siya usab maoy batid nga tigtugyan, nga nagtudlo sa iyang matinumanong ulipong matang sa pag-atiman sa “tanan niyang kabtangan” dinhi sa yuta. (Mateo 24:45-47) Ug siya wala mahadlok nga magpatalinghog sa mga ideya sa uban. Siya kanunayng nangutana sa iyang mga mamiminaw: “Unsay inyong hunahuna?” (Mateo 17:25; 18:12; 21:28; 22:42) Kana usab ang angay taliwala sa tanang sumusunod ni Kristo karong adlawa. Walay gidak-on sa awtoridad ang angay nga maghimo kanilang dili-andam sa pagpatalinghog. Mga ginikanan, magpatalinghog! Mga bana, magpatalinghog! Mga ansiano, magpatalinghog!

18. (a) Sa unsang paagi mahimong masusi nato kon kita adunay dungog sa pagkamakataronganon? (b) Unsa ang maayong ihukom natong tanan?

¹⁸ Sa tino, matag usa kanato gustong “magbaton sa dungog sa pagkamakataronganon.” (Filipos 4:5, Phillips) Apan sa unsang paagi masayran nato kon nabatonan nato ang maong dungog? Aw, sa dihang si Jesus maikagon kon unsay gisulti sa mga tawo bahin kaniya, gisukna niya ang sinaligan niyang mga kauban. (Mateo 16:13) Nganong dili sundon ang iyang panig-ingnan? Makasukna ka sa usa nga imong kasaligan sa pagkamatinud-anon kon kaha ikaw nakabaton sa dungog nga usa ka tawong makataronganon, mapahiuyonon. Seguradong dako ang mahimo natong tanan sa pagsundog nga mas suod sa hingpit nga panig-ingnan ni Jesus sa pagkamakataronganon! Ilabina kon kita nagbaton sa usa ka sukod sa awtoridad ibabaw sa uban, sundon nato kanunay ang panig-ingnan ni Jehova ug ni Jesus, nga sa kanunay magagamit niana sa makataronganong paagi, nga andam kanunay sa pagpasaylo, pagpasibo, o pagpahiuyon kon nahiangay. Sa pagkatinuod, hinaot ang matag usa kanato manlimbasog nga “mahimong makataronganon”!​—Tito 3:2.

[Footnote]

Unsaon Nimo Pagtubag?

◻ Nganong ang mga Kristohanon gustong mahimong makataronganon?

◻ Sa unsang paagi ang mga ansiano makasundog kang Jesus sa pagkaandam sa pagpasaylo?

◻ Nganong angay nga kita manlimbasog nga mahimong mapasiboon sama kang Jesus?

◻ Sa unsang paagi kita makapasundayag sa pagkamakataronganon sa paagi sa atong paggamit ug awtoridad?

◻ Sa unsang paagi makasusi kita sa atong kaugalingon kon kaha kita tinuod nga makataronganon?

[Hulagway sa panid 15]

Si Jesus nagpasaylo dayon sa mahinulsolong si Pedro

[Hulagway sa panid 16]

Sa dihang ang usa ka babaye nagpakitag talagsaong pagtuo, gitino ni Jesus nga kadto dili panahon aron ipatuman ang usa ka malangkobong lagda

[Hulagway sa panid 18]

Mga ginikanan magpatalinghog!

[Hulagway sa panid 18]

Mga bana magpatalinghog!

[Hulagway sa panid 18]

Mga ansiano magpatalinghog!