Ang Tuboran sa Dili-Mapakyas nga Kaisog

“USA ka nagsagitsit nga tingog ang nagpahunong kanamo sa among pagduol. Unya, diha sa kasagbotan sa among wala, duha ka langgam ang mipaingon sa paghasmag kanamo nga ang mga pako nagbukhad. Sa atubangan namo, adunay duha ka itlog diha sa gamayng lungag sa yuta. Gibabagan kami sa mga langgam gikan sa aksidenteng pagtamak sa ilang salag. Sa matag higayon nga mosulay kami sa pagduol ug sa pagkuhag letrato sa maanindot nga mga itlog nga may puntik-puntik nga kapeg kolor, himoon pag-usab sa mga langgam ang ilang pasundayag sa paghulga. ‘Pagkaisog,’ kami naghunahuna.”

Kana mao ang kasinatian sa upat ka tawo sa dihang miduol sa salag sa spotted dikkop. Ang mas gamay nga langgam mao ang blacksmith plover. Diha sa librong Everyone’s Guide to South African Birds, ang mga batid sa langgam nga si Sinclair ug Mendelsohn mibatbat: “Maisogong panalipdan sa nangitlog nga mga paris ang ilang salag ug kuyabog ug mahimong agresibo kaayo kon duolon sa bisan unsang manunugok. Sila dili mahadlok sa gidak-on sa manunugok ug molupad nga may mahasiong tingog, nga sa walay kahadlok sakdopan bisan ang mga tawo sa pagsulay sa pag-abog kanila.”

Ang uban nakakita ug tagsa ka dagkong mga elepante nga wala tuyoa nagpaingon sa direksiyon sa usa ka salag sa blacksmith plover, nga nakapukaw sa paghana sa langgam sa pag-atake. Ang elepante kasagaran molikay na lang pinaagi sa pagsimang sa laing agianan.

Diin man kuhaa sa mga langgam ang dayag nga kaisog? Kini nagagikan sa Usa nga naglalang kanila. Giprograma ni Jehova nga Diyos kining gagmayng mga linalang nga may kinaiyanhong mekanismo sa pagsanta sa mas dagkong mga mananap sa pagdaot sa ilang mga salag o sa mga kuyabog.

Usa ka Pagtulon-an Alang sa mga Kristohanon

Ang mga Kristohanon makakat-on ug pagtulon-an gikan niini, bisan pag gusto nilang molapas sa yanong kinaiyanhong kaisog. Sila gihangyo sa pagsundog sa ilang Agalon, si Jesu-Kristo, kinsa sa kamaisogon nagsugot sa mga sugo sa Diyos. (Hebreohanon 12:1-3) Gihukman sa Bibliya ang mga talawan nga mosibog sa pag-alagad sa Diyos. (Hebreohanon 10:39; Pinadayag 21:8) Sa samang panahon, si Jehova nakasabot sa atong dili-hingpit nga pagkagama ug nahibalo nga usahay kita makasala o mawad-ag kaisog nga gikinahanglan sa bug-os nga pagtuman sa iyang kabubut-on. (Salmo 103:12-14) Unsay mahimo sa usa ka tawo kon ang kahadlok magpugong kaniya sa dili pagbuhat kon unsa ang matarong?

Ang usa ka Kristohanon kinahanglang mainampoong modangop sa Diyos alang sa kalig-on sa pag-atubang sa mga pagsulay ug sa pagpadayon sa pagtuman sa kabubut-on sa Diyos. Ang Bibliya naundan niining mapasaligong mga saad ni Jehova sa tabang: “Siya nagahatag ug gahom niadtong gikapoy; ug kaniya nga walay kabaskog nagadugang siya ug kusog. Ang mga batang lalaki kapuyan ug maluya, ug ang mga batan-ong lalaki mangapukan gayod, apan kadtong nagalaom kang Jehova mabag-o sa ilang kusog. Sila manglupad sama sa mga agila. Sila managan ug dili kapuyan; sila manglakaw ug dili mangaluya.” (Isaias 40:29-31) Daghang dili-hingpit nga mga tawo ang nakasinati sa kamatuoran niining mga pulonga ug ‘gikan sa maluya nga kahimtang nahimong gamhanan.’ (Hebreohanon 11:34) Usa ka maayong pananglitan mao ang Kristohanong si apostol Pablo, kinsa misulat: “Ang Ginoo mibarog haduol kanako ug mituga ug gahom kanako, aron nga pinaagi kanako ang pagwali bug-os nga mahimo ug ang tanang kanasoran makadungog niini.”​—2 Timoteo 4:17.

Bisan ang bag-o pang interesadong mga tawo kinsa buot nga mahimong mga sumusunod ni Jesu-Kristo nakasinati sa maong makapalig-ong tabang. Tagda ang usa ka lalaki nga ginganlag Henry nga taga-Habagatang Aprika, nga mao ang tresurero sa iyang simbahan ug nagpuyo tapad sa iyang pastor. Si Henry nagpangita sa kamatuoran. Bisan pa sa iyang kalangkitan sa simbahan, usa ka adlaw niana gidawat niya ang tanyag sa usa ka libreng pagtuon sa Bibliya sa balay uban sa mga Saksi ni Jehova. Sa paglabay sa panahon, gipahayag niya ang iyang tinguha nga mahimong usa ka Saksi ug nangutana kon unsang mga lakang ang iyang himoon aron makab-ot ang maong tumong. Gipatin-aw nga mopahawa una siya sa iyang simbahan. (Pinadayag 18:4) Sanglit ang pastor iyang silingan ug higala, gibati ni Henry nga dili siya makahimo sa pagsulat lamang ug usa ka sulat sa pagretiro apan nagkinahanglan nga ipatin-aw ang butang nga inatubangay. Gihimo niya kini nga maisogon.

Ang pastor nakuratan ug sa ulahi gidala ang tsirman sa sinodo ug ubang mga membro sa simbahan sa pagduaw kang Henry. Buot silang masayod kon nganong mibiya siya sa ilang simbahan aron mahimong usa ka membro sa usa ka relihiyon nga, matud nila, walay balaang espiritu sa Diyos. “Sa sinugdan, ako nahadlok sa pagtubag kanila,” miingon si Henry, “tungod kay sila dako kaayo ug impluwensiya kanako. Apan ako nag-ampo kang Jehova alang sa tabang, ug iya akong gitabangan sa paghimo niini nga depensa: ‘Sa tanang internasyonal nga mga relihiyon, kinsa lamang ang nagagamit sa ngalan sa Diyos, si Jehova? Dili ba ang mga Saksi ni Jehova? Nagtuo ba kamo nga ang Diyos magtugot kanila sa pagdala sa iyang ngalan ug dili usab maghatag kanila sa iyang balaang espiritu?’” Ang mga opisyal sa simbahan wala makatubag sa maong pangatarongan. Mapasalamaton sa kahibalo ug kalig-on nga ginatagana sa Diyos, si Henry karon maisogong nagapakig-ambit uban sa mga Saksi ni Jehova diha sa pultahan-ug-pultahang ministeryo.

Oo, ang pagkahimong matuod nga Kristohanon nagkinahanglag kaisog. Samtang nagakahiduol na ang kataposan niining kalibotana, ang mga pagsulay sa pagtuo mouswag. Buot ni Satanas nga hikawan ang mga alagad sa Diyos sa ilang kahibulongang paglaom sa walay kataposang kinabuhi pinaagi sa pagsulay sa pagbungkag sa ilang pagkamaunongon ngadto kang Jehova. (Itandi ang Pinadayag 2:10.) Apan dili gayod kita mosurender. Bisan pag antoson nato ang temporaryong kaluya tungod sa kahadlok, si Jehova makatabang kanato nga maulian. Padayon sa paglantaw kaniya alang sa kalig-on aron makapadayon sa pagtuman sa iyang kabubut-on. Hinumdomi, siya nga naglalang sa maisog nga mga langgam mao ang Tuboran sa dili-mapakyas nga kaisog. Sa pagkatinuod, ang matuod nga mga Kristohanon kinahanglang “magmaisogon ug moingon: ‘Si Jehova ang akong magtatabang; dili ako mahadlok. Unsay arang mahimo sa tawo kanako?’”​—Hebreohanon 13:6.