Ang Bibliya—Unsa ang Tinuod nga Bili Niini?

“ANG Bibliya maoy usa ka misteryo, usa ka libro nga gilarawng dili masabtan,” miangkon ang usa ka tagbalay. Ang laing tagbalay miingon: “Nasayod ako nga ang Bibliya maoy usa ka hinungdanong libro, apan diyutay ra ang akong nahibaloan bahin niana. Lisod kining sabton.”

“Daghang Kristohanon nahibalo . . . ug diyutay bahin sa Bibliya,” mipahayag ang The Toronto Star. Usa ka Katolikong babaye miingon: “Maayo ang akong pagbati nga adunay Bibliya. Kini nagapahinabog kalinaw sa kahiladman.” “Ang Bibliya sama sa usa ka kompas nga nagagiya sa usa ka tawo latas sa baloron, unoson nga dagat sa kinabuhi paingon sa usa ka luwas nga dapit,” miingon ang usa ka mangingisda. Sa mga pulong sa usa ka kanhing Hindu, “ang Bibliya maoy Pulong sa Diyos ug usa ka gasa ngadto sa katawhan ug maoy tambal alang sa espirituwal nga balatian.”

Daghan ug nagkadaiya ang mga hunahuna bahin sa tinuod nga bili sa Bibliya. Apan, unsa ang tinuod nga bili niini?

Ang Bibliya mao ang labing hinungdanon ug kaylap nga pagkapanagtag nga libro nga nagalungtad. Sa mga panid niini anaa ang mga tubag sa makalibog kaayong mga problema nga nasinati sa tawo o atubangon pa. Ang pagkapraktikal sa tambag niini dili hitupngan. Ang moral nga mga sukdanan nga gipaluyohan niini dili hilabwan. Ang mensahe niini gamhanan ug mapuslanon. Kining labing bililhong libro angayng kuhaon gikan sa atong mga estante ug hatagag mainampingong pagtagad ug pagsusi.

Makapakli kita sa Bibliya nga may bug-os nga pagsalig nga kini sa hingpit maoy tukma, kasaligan, ug matuod. Ang makasaysayanhong mga hitabo nga nasulat niini gipalig-on sa sekular nga kasaysayan. Sa balikbalik, ang arkeolohikanhong mga kaplag nagapamatuod nga ang Bibliya tinuod ug matinud-anon. Ang pagkaprangka sa mga 40 ka magsusulat sa Bibliya nagpaila kanila ingong mga tawo nga matinud-anon ug may integridad. Ang kaharmoniya sa mga unod sa Bibliya nagapakita nga kini dili gikan sa tawo. Tinuod ang mga hitabo nga nasulat niini. Tinuod ang mga tawo nga gihisgotan niini. Tinuod ang mga lugar ug mga dapit nga gihisgotan niini. Dugang pa, ang Bibliya naundan sa talagsaong mga tagna nga nagpaila gayod kang Jehova nga Diyos ingong Awtor sa Bibliya.​—2 Pedro 1:21.

Ang atong Dakong Instruktor nagtino nga ang kahibalo bahin sa iyang kabubut-on ug mga katuyoan mabatonan niadtong buot masayod niana. Sa pagkatinuod, si Jehova nagtug-an kanato sa tin-awng pinulongan nga iyang kabubut-on nga ang tanang matang sa mga tawo magtuon sa iyang Pulong ug “makadangat sa tukmang kahibalo sa kamatuoran.” (1 Timoteo 2:3, 4; Proverbio 1:5, 20-33) Kini maoy usa sa labing hinungdanong mga butang nga atong mahimo sa atong kinabuhi. Kini maoy usa ka hagit nga kinahanglang atubangon nato. Ang unang mga Kristohanon nakasabot niini. Usa kanila ang napalihok sa pag-ingon: “Mao kini ang padayon kong ginaampo, nga ang inyong gugma modagaya nga labi ug labi pa gayod uban ang tukmang kahibalo ug bug-os mailahong pagpanabot; aron inyong matino ang mas hinungdanong mga butang.”​—Filipos 1:9, 10; Colosas 1:9, 10.

Ang Bibliya mao ang pangunang paagi sa Maglalalang sa pagpahayag sa iyang kabubut-on ug katuyoan ngadto sa tawhanong pamilya, ug kini nagasaysay kon sa unsang paagi kita sa tagsatagsa mohaom nianang maong katuyoan. Dinhi niini natala ang nangaging mga hitabo, ug nagahatag kini ug tin-awng hulagway sa umaabot. Ang Bibliya nagalaraw sa hustong mga pagtulon-an ug nagatul-id kanato sa kon unsay angay ug dili angay natong tuohan. (Buhat 17:11; 2 Timoteo 3:16, 17) Kini nagataganag mga lagda sa pamatasan nga pinaagi niana ang tawo magakinabuhi, ug kini nagatultol sa mga tawo diha sa dalan sa kalamposan ug kalipay. (Mateo, mga kapitulo 5 hangtod sa 7) Kini nagapasiugda sa Gingharian sa Diyos ingong bugtong paglaom sa tanang katawhan ug nagapakita kon sa unsang paagi ang iyang gingharian maoy galamiton sa pagbalaan sa iyang ngalan ug pagbindikar sa iyang pagkasoberano. Ang Bibliya nagapatin-aw sa dalan nga kinahanglang subayon nato aron makapahimulos ug suod, mahigugmaong relasyon uban sa atong Maghahatag-Kinabuhi, si Jehova.

Dugang pa, ang Bibliya mao lamang ang basahon nga motultol kanimo ngadto sa kinadak-ang ganti nga madawat sa katawhan sukad​—kinabuhing walay kataposan sa paraiso sa yuta ingong hingpit nga mga tawo. (Roma 6:23) Ang bugtong Anak ni Jehova nagtug-an kanato: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Segurado nga ang librong ingon niana kabililhon kinahanglang magapalihok kanato sa pagkat-on kon unsay atong buhaton aron makabaton sa ganti nga kinabuhing walay kataposan. Ang Bibliya maoy usa ka librong gilaraw nga masabtan, sumala sa ipakita sa mosunod nga artikulo.