Mga Magmamantala sa Gingharian Nagtaho

Ang Pulong sa Diyos Gamhanang Nagalihok

“ANG pulong sa Diyos buhi ug gamhanang nagalihok.” (Hebreohanon 4:12) Kining mga pulonga makadaghang napamatud-an nga tinuod sa dihang ang mga tawo nga nalimbongan sa bakak nga relihiyon napailaila sa mga kamatuoran sa Bibliya. Ingon sa gipakita sa mosunod nga kasinatian gikan sa Dominican Republic, ang gahom sa Bibliya makausab sa mga kinabuhi sa mga tawo ug magahatag ug paglaom.

Ang mga Saksi ni Jehova miduaw sa usa ka inilang Katolikong babaye nga bag-o pa lang namatyan ug duha ka gagmayng mga bata. Naguol kaayo siya ug nagbangotan sa iyang trahedya adlaw-adlaw. Ang mga Saksi nagpakita kaniya kon unsay giingon sa Bibliya sa Juan 5:28, 29 mahitungod sa paglaom sa pagkabanhaw. Tapos sa dugang mga panaghisgot uban sa mga Saksi, dili lang kay nakakaplag siyag kahupayan diha sa paglaom sa pagkabanhaw kondili nakaamgo siya nga ang iyang Katolikong relihiyosong mga lider naglimbong kaniya.

Miluwat gilayon siya gikan sa Iglesya Katolika, ug midawat siya ug usa ka regular nga pagtuon sa Bibliya uban sa mga Saksi ni Jehova. Apan, ang iyang bana wala mouyon sa iyang mga panghunahuna. Sanglit siya usab usa ka inila kaayong Katoliko, gihikay niya nga ang iladong mga politiko ug relihiyosong mga higala moduaw sa iyang asawa sa pagsulay nga bugnawon siya sa iyang dalan ug pabalikon siya sa Katolisismo. Sa ulahi gihulga siya sa iyang bana nga diborsiyohan, sa usa ka higayon gipahibalo pa gani sa bana ang iyang mga paryente ug kaubang mga membro sa simbahan nga sila magdiborsiyo na.

Apan ang iyang laraw wala mosaler. Sa kasukwahi, ang asawa nahimong mas determinado pa sa pagpadayon sa iyang mga pagtuon sa Bibliya. Tungod sa iyang espirituwal nga pag-uswag ug sa iyang pag-ugmad sa maayong Kristohanong mga hiyas, ang bana mihukom nga magpabilin uban kaniya inay makigdiborsiyo. Usa ka adlaw miuyon pa gani siya sa pagsusi sa literatura sa Bibliya nga gitun-an sa iyang asawa​—apan sa usa ka kondisyon. Gusto niyang gamiton ang iyang kaugalingong Katolikong hubad sa Bibliya.

Sa iyang katingala, uban sa tabang sa literatura gikan sa mga Saksi ni Jehova, siya misugod sa pagkat-on sa bag-ong mga butang gikan mismo sa iyang kaugalingong Bibliya. Siya nakaamgo nga ang iyang asawa nakapili sa hustong dalan, ug sa wala madugay siya andam nang mosunod sa panig-ingnan sa iyang asawa. Sa pagkatinuod, nakita niya ang panginahanglan nga usbon ang iyang kaugalingong kinabuhi. Ang usa ka malisod nga suliran mao ang paghunong sa pagtabako. Human mabasa ang Hulyo 8, 1989, nga isyu sa magasing Pagmata! nga may ulohan sa hapin nga “Baligya nga Kamatayon​—Napulo ka Paagi sa Paghunong sa Pagtabako,” siya determinado nga moundang niining dili-kasulatanhong bisyo. Kapuli sa naandang pakete sa sigarilyo nga sagad makaplagan sa iyang bulsa, nagsugod na siya sa pagdaladala nianang isyuha sa Pagmata! Matag panahon nga gusto niyang motabako, iyang basahon ang mga artikulo bahin sa pagtabako. Misaler ang maong paagi! Tapos mabasa ang mga artikulo sa makadaghan, siya nakahunong sa pagtabako.

Karon ang bana ug asawa parehong nagaalagad kang Jehova ingong bawtismadong mga ministro. Kon itugot sa mga kahimtang, ang bana nagaalagad ingong bug-os-panahong ministro, nga nagagahin ug dakong bahin sa iyang panahon sa pagsangyaw sa maayong balita sa Gingharian sa Diyos, ug siya nagaalagad ingong ministeryal nga alagad sa lokal nga kongregasyon sa mga Saksi ni Jehova. Siya ug ang iyang asawa nagapaabot sa pagkabanhaw sa dihang ilang maabiabi ang ilang mga anak sa kinabuhi sa usa ka bag-ong kalibotan. Oo, ang Pulong sa Diyos, ang Bibliya, buhi ug gamhanang nagalihok!