Pag-antos sa Tawo—Matapos ba Gayod Kini?

MAKALILISANG nga mga esena tapos sa pagbuto sa usa ka bomba sa usa ka nagsiot nga tiyanggihan sa Sarajevo; pagpamatay ug kagubot sa Rwanda; gikuraw nga mga bata nga nagayangongo ug pagkaon sa Somalia; nakugang nga mga pamilya nga nagsusi kon unsa ka daghan ang nawala kanila tapos sa usa ka linog sa Los Angeles; walay-mahimo nga mga biktima sa gibahaan nga Bangladesh. Ang maong mga eksena sa pag-antos sa tawo makita nato adlaw-adlaw sa TV o sa mga magasin ug mga mantalaan.

Ang usa ka makasubong epekto sa pag-antos sa tawo mao nga kini nagapahinabo ug pagkahanaw sa pagtuo sa pipila ka tawo sa Diyos. “Ang paglungtad sa pagkadaotan kanunayng nagatagana ug labing ugdang nga babag sa pagtuo,” sumala sa pahayag nga gipatik sa usa ka Hudiyong komunidad sa Tinipong Bansa. Ang mga magsusulat naghisgot sa mga nangamatay sa Nazi nga mga kampo konsentrasyon sama sa Auschwitz ug gumikan sa mga bomba sama sa usa nga mibuto ibabaw sa Hiroshima. “Ang pangutana kon sa unsang paagi ang matarong ug gamhanang Diyos makatugot sa paghunos sa daghan kaayong inosenteng mga kinabuhi naghasol sa konsensiya sa usa ka relihiyosong tawo ug makalibog kaayo,” matud sa mga awtor.

Ikasubo, ang subsob kaayong mga taho bahin sa mga trahedya mahimong nakapakubalan na sa mga pagbati sa tawo. Basta dili lang malangkit ang mga higala ug mga paryente, daghan ang dili kaayo matandog sa pag-antos sa uban.

Apan, ang kamatuoran nga kita may pagbati sa kaluoy, bisan na lamang sa atong mga minahal, kinahanglang magtug-an kanato ug usa ka butang bahin sa atong Magbubuhat. Ang Bibliya nag-ingon nga ang tawo gilalang “sa dagway sa Diyos” ug “sumala sa [iyang] dagway.” (Genesis 1:26, 27) Wala kini magpasabot nga ang mga tawo sama ug dagway sa Diyos. Wala, kay si Jesu-Kristo mipatin-aw nga “ang Diyos maoy usa ka Espiritu,” ug “ang usa ka espiritu walay unod ug mga bukog.” (Juan 4:24; Lucas 24:39) Ang pagkahinimo diha sa dagway sa Diyos nagtumong sa atong katakos sa pagpakita ug diyosnong mga hiyas. Busa, sanglit ang normal nga mga tawo may pagbati sa kaluoy niadtong nag-antos, makahinapos kita nga ang Maglalalang sa tawo, si Jehova nga Diyos, mabination ug nga siya adunay kaluoy sa nag-antos niyang tawhanong linalang.​—Itandi ang Lucas 11:13.

Ang usa ka paagi nga ang Diyos nagpakita sa iyang pagkamabination maoy pinaagi sa pagtagana sa katawhan ug sinulat nga katin-awan bahin sa hinungdan sa pag-antos. Kini gihimo niya diha sa iyang Pulong, ang Bibliya. Ang Bibliya tin-awng nagpakita nga ang Diyos naglalang sa tawo aron magpahimulos sa kinabuhi, dili aron mag-antos. (Genesis 2:7-9) Nagpadayag usab kini nga ang unang mga tawo nagpahinabog pag-antos sa ilang kaugalingon pinaagi sa pagsalikway sa matarong nga pagmando sa Diyos.​—Deuteronomio 32:4, 5; Roma 5:12.

Bisan pa niini, ang Diyos mobati gihapon ug kaluoy sa nag-antos nga katawhan. Kini tin-awng gipakita sa iyang saad nga taposon ang pag-antos sa tawo. “Tan-awa! Ang tolda sa Diyos anaa uban sa katawhan, ug siya mopuyo uban kanila, ug sila mahimong iyang mga katawhan. Ug ang Diyos mismo mouban kanila. Ug iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.”​—Pinadayag 21:3, 4; tan-awa usab ang Isaias 25:8; 65:17-25; Roma 8:19-21.

Kining kahibulongang mga saad nagpamatuod nga ang Diyos nasayod kaayo sa pag-antos sa tawo ug nga siya determinado nga motapos niana. Apan unsa gayod ang nagpahinabo sa pag-antos sa tawo sa unang bahin, ug nganong gitugotan sa Diyos kana nga mopadayon hangtod sa atong adlaw?

[Picture Credit Line sa panid 2]

Cover and page 32: Alexandra Boulat/Sipa Press

[Picture Credit Line sa panid 3]

Kevin Frayer/Sipa Press