Usa ka Dalan sa Kinabuhi nga May Katuyoan

SUMALA SA GIASOY NI MELVA A. WIELAND

Niadtong Marso 1940, pipila ka bulan human ako mabawtismohi, ang akong manghod nga babaye nga si Phyllis miduol kanako ug nangutana: “Nganong dili ka man magpayunir?” “Magpayunir?” ako nangutana. “Buot mong ipasabot magsangyaw nga bug-os-panahon, halos adlaw-adlaw?”

‘SA UNSANG paagi ako mahimong payunir,’ ako naghunahuna, ‘uban sa akong limitadong kahibalo sa Bibliya ug mas limitadong tinigom sa bangko?’ Bisan pa niana, ang pangutana ni Phyllis nagpahunahuna kanako. Makadaghan usab akong nag-ampo bahin niana.

Sa kataposan ako nangatarongan, ‘Nganong dili man ko makasalig sa Diyos sa dihang nagsaad siya nga atimanon niya kita kon unahon nato pagpangita ang iyang Gingharian?’ (Mateo 6:33) Busa niadtong Hunyo 1940, nagpahibalo ako nga mobiya sa akong trabaho sa pagpanahi. Unya misulat ako sa sangang buhatan sa Watch Tower Society sa Australia, nga mihangyo ug asaynment sa pagpayunir.

Ang Akong Tibuok-Kinabuhing Asaynment

Duha ka semana sa ulahi, nakadawat ako ug tubag, nga nagpahibalo kanako nga hatagan ako ug asaynment human sa akong pagtambong sa kombensiyon nga pagahimoon sa nataran sa hedkuwarter sa mga Saksi ni Jehova sa Strathfield, usa ka kasikbit sa kinadak-ang siyudad sa Australia, ang Sydney. Sa buntag tapos sa kombensiyon, mireport ako sa opisina sa pagkuha sa akong asaynment.

Ang igsoon didto sa opisina misaysay: “Sa pagkakaron puliki kami sa labhanan. Mahimo ka bang motabang sulod sa duha ka semana?” Kadto maoy sa Agosto 1940​—ug ako nagatrabaho gihapon sa labhanan hangtod karon! Niadtong panahona diha lamay 35 sa pamilya sa hedkuwarter; karon adunay 276.

Apan mahibulong ka tingali kon nganong giisip nako ang pagtrabaho sa labhanan nga “usa ka dalan sa kinabuhi nga may katuyoan,” ilabina nga mao kini ang akong trabaho sulod na karon sa 50 ka tuig. Sa dili pa nako isaysay, pasultiha ko bahin sa akong unang mga tumong.

Ang Esports Nahimong Dalan sa Kinabuhi

Natawo ako sa Melbourne niadtong Enero 1, 1914, ang panganay sa lima ka anak. May mahigugmaon kaming mga ginikanan kinsa nagkinabuhi sumala sa tag-as nga mga prinsipyo ug nagpahamtang ug disiplina sa dihang gikinahanglan. Kami usab may gitawag nga dili-ugdang relihiyosong pagmatuto, tungod kay ang among mga ginikanan dili mga hinimba. Bisan pa niana, sila miinsister nga kaming mga anak motambong ug mga klase sa Sunday school sa Iglesya sa Inglaterra.

Sa dihang ako miundang pagtungha niadtong 1928 ug misugod pagtrabaho ingong mananahi, mihukom ako sa paggugol sa kadaghanan sa akong libreng panahon sa pagdula ug mga esport, kay nagtuo nga kini hayan makatabang kanako sa pagbuntog sa akong kamanggiulawon. Miapil ako sa usa ka klab sa tennis ug midula sa tibuok tuig. Panahon sa tingtugnaw midula usab ako ug basketbol ug bisbol, ug panahon sa ting-init modula ako sa tem sa cricket sa mga babaye. Ang cricket maoy tinuod nakong nagustohan, ug ako naningkamot nga mahingpit ang akong kahanas ingong abtik nga tigpasa sa bola aron mahimong takos alang sa mga bangga tali sa mga estado.

Usa ka Katuyoan nga Lahi sa Esports

Sa sayong bahin sa akong kinabuhi nahasol ako sa pagtulon-an nga ang usa ka Diyos sa gugma adunay dapit nga gitawag ug impiyerno diin kadtong nagbuhat ug daotang mga butang sakiton sa walay kataposan. Para kanako dili kini makataronganon. Busa handurawa ang akong kalipay sa dihang sa wala damha akong nakat-onan gikan sa Bibliya ang tinuod nga kahulogan sa “impiyerno.” Nahitabo kini niining paagiha:

Ang akong igsoong babaye nga si Phyllis, kinsa manghod nako ug lima ka tuig, nalingaw usab sa pagdula ug mga esport, ug kami diha sa samang tem sa cricket sa mga babaye. Niadtong 1936 usa ka kauban sa tem nagpailaila kang Phyllis ngadto sa usa ka batan-ong lalaki nga ginganlag Jim kinsa nailhan nga relihiyoso kaayo. Sa wala madugay si Jim misugod pagsulti kang Phyllis mahitungod sa mga pagtulon-an sa Bibliya. Siya nainteres. “Lohikal ug makataronganon kaayo kadto,” siya namulong kanako.

Niadtong panahona si Phyllis ug ako nag-uban sa usa ka kuwarto sa balay, ug naningkamot siya nga mapukaw ang akong interes diha sa kon unsay gisulti ni Jim kaniya mahitungod sa Gingharian sa Diyos. “Buhaton niini ang wala mahimo sa mga gobyerno sa tawo,” madasigon siyang nagsulti kanako. Hinunoa, nakiglalis ako kaniya, nga nag-ingon nga kini maoy lain lamang nga relihiyon nga magpalibog kanamo ug wala gayoy nasayod bahin sa umaabot. Apan si Phyllis malig-on ug nagbilin ug mga literatura sa lainlaing mga dapit sa kuwarto, nga naglaom nga mabasahan nako kini.

Mausisaon ako kon nganong si Phyllis madasigon kaayo bahin niining bag-ong pagtulon-an, busa usa ka adlaw gipunit nako ang usa ka pulyeto. Kadto may makapainteres nga ulohang Hereafter. Napukaw ang akong pagtagad sa dihang gipakli nako ang mga panid niini ug nakita ang pulong nga “impiyerno.” Sa akong katingala, akong nasayran nga ang pulong “impiyerno” sa Bibliya sa pagkatinuod nagtumong sa komon nga lubnganan sa katawhan ug nga ang maayo ug daotang mga tawo parehong moadto didto. Nakat-onan usab nako nga ang impiyerno dili usa ka dapit sa pagsakit; ang mga patay walay hunahuna ug dili na mobati.​—Ecclesiastes 9:5, 10; Salmo 146:3, 4.

Kini makataronganon alang kanako, ilabina sa dihang ang pulyeto misaysay nga ang usa ka mahigugmaon ug gamhanang Diyos nagsaad nga buhion ang mga patay pinaagi sa usa ka milagro nga gitawag ug pagkabanhaw. (Juan 5:28, 29) Karon buot usab nako nga mosusi pa ug dugang bahin sa mga butang nga ginasulti ni Jim kang Phyllis. Nakaplagan nako ang gamay nga King James Version nga gihatag sa akong amahan kanako sa dihang bata pa ako ug gitan-aw ang mga kasulatan nga nalista sa pulyeto. Kini nagpalig-on sa kon unsay gisulti bahin sa impiyerno ug sa kahimtang sa mga patay.

Ang laing makapainteres nga sorpresa kanako mao ang pagkakat-on nga ang Diyos adunay personal nga ngalan, si Jehova. (Salmo 83:18) Nakita usab nako nga ang Diyos adunay katuyoan, o katarongan, alang sa tanang butang nga iyang gibuhat o gitugotan sa pagkahitabo. Kini nagpahinabo kanako sa pagpangutana sa akong kaugalingon, ‘Unsa ba gayod ang akong katuyoan sa kinabuhi?’ Sukad niadto misugod ako sa pagkahibulong kon makaayo ba gayod kanako ang pag-isip sa esport nga ugdang kaayo​—halos sa sukod nga ang tanang ubang butang sa kinabuhi napasagdan.

Pagbuhat Sumala sa Gisaad

Si Jim ug Phyllis wala gayod masayod nga nausab ang akong panglantaw sa kinabuhi, apan ila kining nahibaloan sa dihang ang among pamilya gidapit sa usa ka salosalo sa usa ka higala. Niadtong mga adlawa, sa maong mga okasyon ang tanang nanambong mobarog, ug ang usa ka toast itanyag alang sa Hari sa Inglaterra, ug ang tanan moisa sa ilang mga baso aron moinom sa pagpasidungog sa hari. Apan, mihukom ako nga magpabilin sa akong lingkoranan uban kang Jim ug Phyllis. Nahibulong sila sa dihang nakita nila ako nga naglingkod gihapon! Siyempre, dili namo tuyo nga dili motahod, apan ingong mga Kristohanon among gibati nga kinahanglang neyutral kami ug dili moapil sa maong nasyonalistikong mga seremonyas.​—Juan 17:16.

Bisan pa niana, ang akong mga ginikanan ug ang uban sa pamilya nakurat. Matud nila kami dili maunongon, o nabuang​—o kanang duha! Unya, sa dihang si Phyllis ug ako mitambong sa tinuig nga seremonyas sa pagpanghatag ug mga premyo alang sa tem sa cricket sa mga babaye, ang susamang butang nahitabo panahon sa usa ka nasyonalistikong seremonyas. Ang resulta mao nga kaming duha miluwat gikan sa tem. Kini dili malisod ingon sa akong gihunahuna, kay naamgohan nako nga ang akong debosyon ug pagkamaunongon maoy ngadto kang Kristo Jesus, ang Hari sa langitnong Gingharian sa Diyos.

Si Phyllis misaysay niadtong tungora nga kinahanglang motambong ako sa mga tigom sa mga Saksi ni Jehova nga makanunayon aron mapalig-on ang akong pagtuo uban sa dugang kahibalo sa Bibliya. Niadtong panahona dihay usa lamang ka kongregasyon sa Melbourne, busa misugod ako sa pagtambong sa mga tigom didto matag Dominggo sa hapon. Sa wala madugay nakombinsir ako nga kini mao ang tinuod nga organisasyon sa Diyos sa yuta.

Sa wala madugay gidapit ako sa pagpakig-ambit sa balay-sa-balay nga kalihokan sa pagsangyaw sa kongregasyon. Sa sinugdan nagpanuko ako, apan usa niana ka Dominggo sa buntag mihukom ako sa pagkuyog aron sa pagtan-aw kon sa unsang paagi kini gibuhat. Nalipay ako sa dihang giasayn sa pagkuyog sa usa ka eksperyensiyadong Saksi kinsa misulti nga may pagsalig didto sa unang pultahan ug nakadawat ug maayong pagsanong gikan sa tagbalay. Sa akong hunahuna, ‘Aw, dili ra man diay kaayo lisod, apan kinahanglang magbansay ako pag-ayo sa dili pa ako makahimog ingon niana ka maayo.’ Busa hunahunaa ang akong kahibulong sa dihang, human sa unang pultahan, ang Saksi miingon kanako, “Mahimo ka na karong mosangyaw nga mag-inusara.”

“Mag-inusara?” ako nangutana, nga nakurat! “Nagtiaw ka lang! Unsa may akong isulti kon may mangutana ug dili ko kahibalo sa tubag?” Apan miinsister ang akong kauban. Busa, nga sa literal nangurog, nag-inusara ako samtang siya mipadayon sa pagsangyaw sa mga tawo sa pikas nga daplin sa dalan. Nakalahutay ra gihapon ako niadtong unang buntag.

Sukad niadto misugod ako sa pagpakig-ambit sa pagsangyawng buluhaton matag Dominggo sa buntag. Sa dihang may mangutana kanako diha sa mga pultahan nga dili nako matubag, ako moingon, “Manukiduki ko bahin niana ug mobalik sa pagduaw kanimo.” Ikalipay, si Jehova padayong nagtagana kanako ug kusog ug kaisog sa pagpadayon sa akong bag-ong dalan sa kinabuhi nga may katuyoan. Gipahinungod nako ang akong kinabuhi kaniya, ug sa Oktubre 1939, nabawtismohan ako sa swimming pool sa siyudad sa Melbourne. Wala madugay human niadto si Phyllis, kinsa niadtong panahona naminyo kang Jim, nangutana kon nganong wala dayon ako mosugod pagpayunir.

Pag-alagad Diha sa Sangang Buhatan

Niadtong Enero 1941, wala madugay human ako mosugod pagtrabaho sa Bethel, sumala sa pagtawag namo sa sangang buhatan, gidili ang buluhaton sa mga Saksi ni Jehova sa Australia. Human niadto ang militar miilog sa among Puy-anang Bethel sa Strathfield, ug ako gipadala sa uma sa Sosyedad sa Ingleburn, mga 48 ka kilometros gawas sa siyudad sa Sydney. Niadtong Hunyo 1943 ang mga korte nag-absuwelto sa Watch Tower Society ug nagkuha sa pagdili. Sa kataposan niadtong tuiga, 25 kanamo ang gidapit pag-usab sa Bethel sa Strathfield. Didto nagpadayon ako sa pagtrabaho sa labhanan, maingon man sa pagpakig-ambit sa ubang mga buluhaton sa palibot sa puy-anan.

Ang misunod nga dekada daw dali rang milabay. Unya niadtong 1956, naminyo ako sa usa ka kaubang trabahante sa Bethel, si Ted Wieland. Si Ted maoy usa ka kalmado kaayo, mapailobong tawo, ug kami nalipay sa dihang nadawat namo ang pagtugot nga magpadayon sa pagpuyo sa Bethel ingong bana ug asawa. Kami parehong nagpabili sa among dalan sa kinabuhi nga may katuyoan, nga nalipay sa pribilehiyo nga mag-alagad sa sangang buhatan sa Australia. Siyempre, dugang pa sa among buluhaton sa Bethel, mangayaon kami nga duyog nga nagbuhat sa pagtabang sa uban nga mahimong mga tinun-an ni Kristo. Ingong usa ka pananglitan, mabasa nimo ang bahin sa pamilyang Weekes sa Oktubre 22, 1993, nga isyu sa Pagmata!

Ang kanunayng pag-uswag sa pagsangyaw sa Gingharian nagkinahanglan sa pagdugang ug 10 o 12 lamang ka tawo panahon sa akong unang 30 ka tuig sa Bethel. Apan dali nga nausab ang kahimtang sa katuigang 1970 sa dihang misugod kami sa pagpatik dinhi sa mga magasing Bantayanang Torre ug Pagmata! Ang pagtukod nagsugod sa Enero 1972 diha sa bag-ong imprintahanan. Sa wala madugay ang 40-toneladang imprintahanan miabot gikan sa Hapon, ug sa 1973 kami nag-imprinta ug halos 700,000 ka magasin matag bulan. Ang among pamilyang Bethel misugod na sa pagdaghan niadtong panahona.

Ang katuigang 1970 maoy panahon usab sa personal nga kagul-anan alang kanako. Una, ang akong minahal nga bana, si Ted, namatay niadtong 1975 sa panuigong 80 anyos. Unya, wala dangtig tuig sa ulahi, ang akong tigulang nga amahan namatay usab. Nakakuha akog dakong kahupayan gikan kang Jehova ug sa iyang Pulong, ang Bibliya, ug gikan sa akong espirituwal nga mga igsoong lalaki ug babaye. Nakatabang usab ug dako nga ako padayong nagmapuliki sa Bethel uban sa akong kalihokan nga may katuyoan sulod niining masulob-on kaayong panahon sa akong kinabuhi.

Bisan pa niana, nagpadayon gihapon ang kinabuhi, ug ako misugod na usab sa pagsinati ug katagbawan ug mga panalangin, niining panahona ingong usa ka balo. Niadtong 1978, mitambong ako sa kombensiyon sa London, Inglaterra, ug human niadto miduaw sa tibuok-kalibotang hedkuwarter sa Watch Tower Society sa Brooklyn, New York. Ang pagkakita sa ginatos sa akong mga igsoong lalaki ug babaye nga malipayong nagtrabaho didto sa Brooklyn Bethel sa gihapon maoy inspirasyon alang kanako hangtod niining adlawa.

Sa natapos na ang katuigang 1970, nasayran namo nga ang dugang pag-uswag giplano alang sa pundok sa mga tinukod sa Bethel sa Australia. Apan, ang pag-uswag dili mahitabo sa Strathfield, diin nagamit na ang tanang luna. Hinunoa, ang usa ka bag-o, mas dakong pundok sa mga tinukod ang tukoron sa among propiyedad sa Ingleburn, diin ako nagtrabaho panahon sa pagdili sa sayong katuigan sa 1940.

Nagpadayong Dalan sa Kinabuhi nga May Katuyoan

Dihay dakong kahinam niadtong Enero 1982 sa dihang mibalhin kami sa among bag-ong mga pasilidad! Tinuod, sa sinugdanan dihay diyutayng kasubo sa pagbiya sa sinating mga palibot, apan sa wala madugay nalipay kami sa among bag-ong puy-anan nga may 73 ka matahom nga mga lawak-katulganan. Karon inay motan-aw sa tisa nga mga bungbong ug nait sa siyudad nga mga karsada, makita namo ang berdeng mga umahan ug mga kahoy, mga baka nga nanibsib, ug mahimayaong mga pagsilang ug pagsalop sa adlaw​—usa ka makalingaw kaayong talan-awon.

Niadtong Marso 19, 1983, may malipayon kaming dedikasyon sa bag-ong pundok sa tinukod panahon sa matahom nga silaw sa adlaw sa tinghunlak. Si Lloyd Barry sa Nagamandong Lawas sa mga Saksi ni Jehova mihatag ug makapatandog nga pakigpulong sa dedikasyon. Sa personal naapresyar nako nga siya ug ang iyang asawa presente sa programa sa dedikasyon, sanglit nagtrabaho ako uban kanila sa Bethel sa Strathfield sa dihang kaming tanan batabata pa.

Ang padayong pag-uswag sa kalihokan nga pagsangyaw sa Gingharian nagkinahanglan ug dugang pagpauswag sa among mga pasilidad dinhi sa Ingleburn. Niadtong 1987 ang buhatan gipadak-an. Unya, sa Nobyembre 25, 1989, ang usa ka bag-ong lima-ka-andana nga tinukod nga puy-anan ug ang tres-andana nga bag-ong dugang sa pabrika gipahinungod. Pagkadako gayod sa among pag-uswag​—gikan sa menos sa 4,000 ka ministro sa Australia sa dihang misugod ako sa akong ministeryo ngadto sa mga 59,000!

Di pa dugay ang sangang buhatan sa Australia gihimong usa sa tulo ka Rehiyonal nga Buhatan sa Enhinyeriya sa Sosyedad, duyog sa Hapon ug Alemanya. Kini nagkinahanglan ug dugang pa nga pag-uswag sa pundok sa mga tinukod sa Bethel. Ang laing tulo-ka-andana nga tinukod nga buhatan natapos na karon, ug hapit na mahuman ang trabaho sa lima-ka-andana nga puy-anan, nga aduna unyay 80 pa ka lawak aron puy-an sa among kanunay nagadakong pamilya.

Sa labhanan, aduna kami daghang trabahante nga modumala sa trabaho, apan kanunay nakong mahinumdoman kadtong adlaw sa Agosto niadtong 1940 sa dihang gidapit ako sa pagtabang dinhi niining departamentoha sulod sa duha ka semana. Mapasalamaton kaayo ako nga kadtong duha ka semana mipadayon ngadto sa kapin sa 50 ka tuig ug nga si Jehova nga Diyos naggiya sa akong mga lakang sa maong dalan sa kinabuhi nga may katuyoan.

[Hulagway sa panid 21]

Sa dihang ako 25 anyos

[Hulagway sa panid 23]

Among adlaw sa kasal sa 1956

[Hulagway sa panid 24]

Niadtong 1938 ang akong igsoong babaye ug ako nalangkit kaayo sa mga esport, apan ang akong kinabuhi karon labi pang mabungahon