Pagtagbaw sa Usa ka Pasukaranang Panginahanglan sa Tawo Pinaagi sa Pag-ila

ANG usa ka sinserong “Maayong pagkabuhat!” “Nalipay ako sa imong nalampos!” o “Nahimo nimo ang labing maayo; mapasigarbohon kami kanimo” makatabang kaayo sa pagpauswag sa pagpabili sa kaugalingon, ilabina kon kini naggikan sa usa ka tawo nga imong gitahod. Ang mga tawo malipay ug mouswag kon makadawat ug pag-ila. Tungod niana, mas maayo ang ilang mahimo ug sila mas malipayon. Sa pagkatinuod, ang angayang pag-ila hinungdanon alang sa hunahuna ug kasingkasing maingon nga ang maayong pagkaon hinungdanon sa lawas.

Usa ka diskyonaryo nagbatbat sa pag-ila ingong “pagdawat sa usa ka tawo ingong takos sa konsiderasyon o pagtagad” ug “linaing pagmatikod o pagtagad.” Kini suod nga nalangkit sa pagtahod, ang pagbati sa pagtamod, nga sa dihang ihatag nagpasabot ug makataronganong pagbanabana o pagtimbangtimbang sa usa ka tawo ug sa sukod sa pag-ila nga angay kaniya.

Pag-ila​—Usa ka Pasukaranang Panginahanglan

Ang paghatag ug pasidungog diin ang pasidungog gikinahanglan maoy makataronganon ug maangayon. Si Jesus nagpakita ug sumbanan diha sa iyang ilustrasyon bahin sa mga ulipon nga gitugyanan sa agalon sa iyang mga kabtangan. Sa pag-ila sa hustong pagdumala sa iyang mga kabtangan, siya miingon: “Maayong pagkabuhat, maayo ug kasaligan nga ulipon!” (Mateo 25:19-23) Hinunoa, kining angayang pagtahod kasagarang wala-panumbalinga. Ang pagkapakyas sa paghatag ug pag-ila mosumpo sa kadasig ug inisyatibo. Si Iona mipahayag niana niining paagiha: “Ang pag-ila magpabati kanimo nga gikinahanglan, nagustohan, ug gipabilhan . . . Magahatag kini kanimo ug inisyatibo. Kon ikaw mapasagdan, ikaw mobating masulob-on ug mahiubos.” Si Patrick midugang: “Unya lisod ang pagmentenar ug taas nga kalidad ug dakong kahimoan.” Nan, pagkahinungdanon gayod nga kita makakat-on kon sa unsang paagi ug kanus-a mohatag ug pag-ila. Kitang tanan nangandoy sa kasegurohan nga masayod nga kita gidawat sa mga tawo sa atong palibot. Kini maoy usa ka pasukaranang panginahanglan sa tawo.

Ang usa ka pulong sa pagdayeg, dugang responsabilidad, o bisan materyal nga gasa magpalihok kanimo sa pagpadayon sa paghimo nimo sa labing maayo. Kini matuod kon ikaw usa ka ginikanan, bana, asawa, anak, membro sa kongregasyon, o magtatan-aw. “Sa dihang gihatagan ug pag-ila,” matud ni Margaret, “ako mobatig kalipay, gikinahanglan, ug ako may tinguha sa pag-uswag.” Si Andrew miuyon, nga nag-ingon: “Mibati ako ug pagmaya, nga nagataganag panukmod nga motrabaho pa pag-ayo.” Bisan pa niana, ang paghatag ug pag-ila ug pagtahod sa usa ka tawo nagkinahanglan ug mainampingong paghunahuna ug maayong paghukom.

Sundoga ang Sumbanan ni Jehova sa Paghatag ug Pag-ila

Ang kinadak-ang panig-ingnan sa pag-ila sa katakos sa uban mao si Jehova nga Diyos. Iyang giila kadtong kinsa takos sa pag-ila. Namatikdan niya ang mga tawo sama kang Abel, Enoch, ug Noe. (Genesis 4:4; 6:8; Judas 14) Si Jehova nag-ila kang David tungod sa iyang talagsaong pagkamatinuohon. (2 Samuel 7:16) Si Samuel, kinsa ingong usa ka propeta nagpasidungog kang Jehova sulod sa katuigan, sa baylo gipasidunggan sa Diyos, kinsa misanong dayon sa pag-ampo ni Samuel sa tabang nga pildihon ang mga Pilistihanon. (1 Samuel 7:7-13) Dili ka ba mobating pinasidunggan nga makabaton nianang maong pag-ila gikan sa Diyos?

Ang pagkamapasalamaton ug pagpabili suod nga nalangkit sa pag-ila. Ang Bibliya nagdasig kanato nga ‘ipakita ang inyong kaugalingon nga mapasalamaton’ ug moila ug utang-kabubut-on sa kon unsay gihimo alang kanato. (Colosas 3:15; 1 Tesalonica 5:18) Bisan tuod kini ilabinang mapadapat sa pagkamapasalamaton kang Jehova, mapadapat usab kini sa adlaw-adlaw nga mga butang sa kinabuhi. Si apostol Pablo nagpabili niini. Gihatagan niyag pag-ila si Febe ingong “tigpanalipod sa daghan” ug si Prisca ug Aquila tungod sa ‘pagpameligro sa ilang kaugalingong mga liog’ alang kaniya ug alang sa uban. (Roma 16:1-4) Handurawa kon unsa kaha ang ilang gibati sa pagkadawat nianang dayag pagkapahayag nga kamapasalamaton. Makaayo usab alang kang Pablo ang pagbaton sa kalipay sa paghatag ug pag-ila, pasidungog, ug pagdasig. Kita usab makasundog kang Jehova ug sa iyang mapabilhong mga magsisimba pinaagi sa pagpakita ug tukmang pag-ila niadtong kinsa kana angayan.​—Buhat 20:35.

Pag-ila Sulod sa Pamilya

“Ang diyutayng pag-ila dakog ikatabang sa paghimo sa kinabuhi nga makalingaw,” matud ni Mitchell, usa ka bana ug Kristohanong ansiano. “Kini magpasuod kanimo, tingali hangtod sa hangtod, sa usa nga naghatag kanimo sa pag-ila.” Pananglitan, ang usa ka Kristohanong bana nagapas-an ug usa ka bug-at nga lulan sa responsabilidad ug nagahimog hinungdanong mga desisyon nga naglakip sa kaayohan sa pamilya. Kinahanglang magtagana siya sa espirituwal, materyal, ug emosyonal nga mga panginahanglan sa pamilya. (1 Timoteo 5:8) Pagkamapasalamaton niya sa dihang ang tukmang pag-ila ipakita alang sa iyang hinatag-Diyos nga asaynment ingong ulo sa pamilya ug sa dihang ang iyang asawa magpakita kaniya ug “halalom nga pagtahod”!​—Efeso 5:33.

Dili sayloan ang trabaho sa usa ka asawa, nga gihimo nga wala makita sa daghang tawo. Ang modernong mga ideya tingali magpaubos sa maong buluhaton ug maghikaw sa dignidad ug katakos niana. Apan, kana makapahimuot sa Diyos. (Tito 2:4, 5) Pagkamakapahupay gayod sa dihang ang usa ka masinabutong bana magdayeg sa iyang asawa, ilabina sa tanang mga bahin sa kinabuhi diin siya molabaw, nga maghatag kaniya sa maong pag-ila ilalom sa iyang pagkaulo! (Proverbio 31:28) Si Rowena namulong bahin sa iyang bana: “Sa dihang giila niya ang akong gibuhat, sayonan ako sa pagpasakop kaniya ug sa pagpasidungog ug pagtahod kaniya.”

Ang Amerikanong magtutudlo nga si Christian Bovee kas-a miingon: “Ang maalamong pagdayeg gikinahanglan sa mga bata maingon nga ang adlaw gikinahanglan sa mga bulak.” Oo, bisan ang usa ka gamay kaayong bata nagkinahanglan ug kanunayng pagpasalig nga siya usa ka gipabilhang membro sa pamilya. Panahon sa mahulmahon nga katuigan sa pagkatin-edyer, nga nahupong sa bag-ong emosyonal ug pisikal nga mga kausaban, adunay napauswag nga paghunahuna sa kaugalingon bahin sa personal nga panagway, dinuyogan sa pangandoy nga mag-independente ug mailhan. Niining panahona ilabina, ang usa ka tin-edyer nagkinahanglan nga mobating gihigugma sa iyang mga ginikanan ug tratahon uban ang pagsabot ug tawhanong kalulot. Ang nagakatigulang nga mga ginikanan ug mga apohan susamang nanginahanglan ug pasalig nga sila mapuslanon gihapon ug gimahal, nga sila wala ‘isalibay panahon sa katigulangon.’ (Salmo 71:9; Levitico 19:32; Proverbio 23:22) Ang tukmang pagtagbaw sa panginahanglan sa pag-ila nagdala ug labaw nga kalipay ug kalamposan sa pamilya.

Pag-ila Sulod sa Kristohanong Kongregasyon

Adunay dakong bili sa pag-ugmad ug sinserong interes sa uban diha sa Kristohanong kongregasyon ug madagayaong pagpahayag sa pagpabili alang sa ilang mga binuhatan ug mga paningkamot. Ang Kristohanong mga ansiano kinahanglang manguna pinaagi sa pag-ila sa mga kalamposan ug mga paningkamot sa uban diha sa kongregasyon. “Tapos ako giduaw nga makadaghan sa mga ansiano ako nakaamgo kon unsa ka hinungdanon ang mga pulong sa pag-ila may kalabotan sa pagdasig, katagbawan, ug kalipay,” miingon si Margaret. “Ako nakaamgo kon unsay gihikaw sa usa sa dihang ang kasagarang pag-ila wala ikahatag.” Kini maoy maayong katarongan sa pagpakita ug tinuod, mahigugmaong personal nga interes sa tanan diha sa kongregasyon! Ilha ang ilang maayong binuhatan. Madagayaong magdayeg ug magdasig. Sa daghang kongregasyon adunay nag-inusarang mga ginikanan nga naningkamot sa pagpatisok ug espirituwal nga mga sukdanan diha sa ilang mga anak. Ang maong mga tawo takos sa linaing pagdayeg. Ipasiugda ang maayong mga bahin inay ang dili-maayong mga bahin. Pakit-a ang uban sa imong inigsoong pagbati alang kanila. Pakit-a sila nga ikaw may kahangawa. Niining paagiha, ang mahigugmaong mga magtatan-aw naningkamot sa paglig-on sa kongregasyon. (2 Corinto 10:8) Ang indibiduwal nga mga membro mobalos pinaagi sa paghatag ug angayang pag-ila ug pagtahod sa maong matinumanong mga tawo kinsa naghago alang kanila.​—1 Timoteo 5:17; Hebreohanon 13:17.

Apan adunay laing bahin, o anggulo, niining butanga. Sa pagkatinuod, ang tinguha nga ilhon kusganon kaayo. Sa adlaw ni Jesus nahimo kining pangunang butang taliwala sa relihiyosong mga lider. Kinahanglang tul-iron ni Jesus ang sayop nga panglantaw sa iyang mga tinun-an niining bahina. (Marcos 9:33-37; Lucas 20:46) Ang mga Kristohanon nagkinahanglan ug pagkamakataronganon ug pagkatimbang. Kon dili mapugngan, ang tinguha nga ilhon mahimong makadaot sa espirituwal. (Santiago 3:14-16) Pananglitan, pagkamakapasubo gayod kon ang usa ka ansiano manghambog ug mosugod sa pagmando nga ang uban modawat sa iyang kaugalingong taas nga paghunahuna sa iyang kaugalingon!​—Roma 12:3.

Si apostol Pablo maalamong nagtambag sa isigka-Kristohanon sa Roma: “Sa inigsoong gugma batoni ang malumong pagmahal alang sa usag usa. Manguna sa pagpakitag pasidungog sa usag usa.” (Roma 12:10) Kining mga pulonga pangunang mapadapat sa Kristohanong mga ansiano, kinsa sa tanang panahon kinahanglang moila kang Kristo ingong Ulo sa kongregasyon. Ang pagpasakop sa iyang tuong kamot sa awtoridad gipakita pinaagi sa pagtinguha sa pagtultol ni Kristo pinaagi sa balaang espiritu, mga prinsipyo sa Bibliya, ug sa pagpanguna nga gihatag sa Nagamandong Lawas sa “kasaligan ug mabuot nga ulipon.”​—Mateo 24:45-47; tan-awa ang Pinadayag 1:16, 20; 2:1.

Busa, sa dihang magmiting ang mga ansiano, ug sila mag-ampo alang sa giya ni Jehova sa pagbantay sa panon sa Diyos, sila maningkamot sa paghimog mga desisyon nga pinasikad sa Kasulatan. Ang Kristohanong kamakasaranganon, kaaghop, ug kamapaubsanon magpugong sa usa ka ansiano sa pagsulay nga bayawon ang iyang kaugalingon, dominahan ang iyang mga igsoon, ug ipatuman ang iyang mga hunahuna niining maong mga miting. (Mateo 20:25-27; Colosas 3:12) Kon posible, maayong hangyoon una sa tsirman sa lawas sa mga ansiano ang kaubang mga ansiano nga mopahayag sa ilang mga hunahuna ug unya motagana ug usa ka hilisgotan nga sayo pa aron aduna silay igong panahon alang sa mainampingon ug mainampoong paghunahuna sa matag punto nga hisgotan. Panahon sa miting sa mga ansiano, siya maningkamot, dili sa pag-impluwensiya sa hunahuna sa mga ansiano, kondili, hinuon, sa pagdasig kanila sa pagbaton ug “kagawasan sa pagsulti” bahin sa mga butang nga gihisgotan. (1 Timoteo 3:13) Sa baylo, ang kaubang mga ansiano kinahanglang mainampingong mamati sa mga pahayag sa usag usa ug malipayong magpahimulos gikan sa kaalam sa mga ansiano nga adunay daghang katuigan sa kasinatian ingong Kristohanon.​—Exodo 18:21, 22.

Hinunoa, ang mga ansiano nakasabot nga si Kristo makagamit kang bisan kinsang ansiano diha sa lawas sa mga ansiano sa pagtagana sa mga prinsipyo sa Bibliya nga gikinahanglan aron sa pagsagubang sa usa ka kahimtang o sa paghimog usa ka hinungdanong desisyon. Ang usa ka maayong kahimtang magpabilin taliwala sa lawas sa mga ansiano sa dihang ang tukmang pag-ila ihatag ngadto sa matag ansiano gumikan sa iyang naamot sa pag-atiman sa espirituwal nga mga intereses sa kongregasyon.​—Buhat 15:6-15; Filipos 2:19, 20.

Paningkamot nga Maghatag ug Magbaton ug Angayang Pag-ila

Ang pag-ila nagapalig-on. Kini nagadasig ug makapasuod. “Bisan tuod bation nato nga kita ordinaryo lamang,” matud ni Mary, “kita nagkinahanglan ug pagdasig alang sa atong kaugalingong pagpabili-sa-kaugalingon.” Sinserong ilha ang adlaw-adlawng mga paningkamot sa uban. Ang paghimo niana makahimo sa kinabuhi nga labi pang mapuslanon ug makalipay alang kanila. Mga ginikanan, mga anak, mga magtatan-aw, ug mga membro sa Kristohanong kongregasyon, makadawat kamog pag-ila pinaagi sa inyong sinultihan ug linihokan. Ang Bibliya naghisgot nga may pag-uyon sa kugihan, makasaranganon, ug mapainubsanong mga tawo. (Proverbio 11:2; 29:23; Hebreohanon 6:1-12) Kat-oni ang pag-ila nga maluluton sa bili sa uban. Tagda ang mga pagbati sa uban samtang ikaw nagatrabaho uban kanila. Si apostol Pedro naghatag niining tambaga: “Pagbaton kamong tanan sa samang panghunahuna, nga magapakitag pagbati nga alang sa isigkaingon, nga magabaton ug inigsoong pagmahal, sa kalumo mabination, mapainubsanon sa hunahuna.” (1 Pedro 3:8) Kini nagkinahanglan ug pag-ila sa uban, sa ingon nagatagbaw sa usa ka pasukaranang panginahanglan sa tawo.