Mga Magmamantala sa Gingharian Nagtaho

Ang Maayong Balita sa Gingharian Igawali

SULOD sa kasiglohan ang pangunang kaaway sa Diyos, si Satanas nga Yawa, malansisong naggamit sa politikal nga mga kagamhanan ug bakak nga relihiyon diha sa iyang mga paningkamot nga babagan ang pagkaylap sa matuod nga Kristiyanidad. Apan kining mga paagiha mapakyas. Si Jesus nagtagna nga ang “maayong balita sa gingharian igawali [dili, “mahimong iwali” o, “ikawali”] sa tibuok gipuy-ang yuta ingong usa ka pagsaksi sa tanang kanasoran.”​—Mateo 24:14.

Ang kapakyasan ni Satanas nahimong dayag sa Gresya. Sa maong nasod ang Gregong Ortodoksong Iglesya misulay sa pagpugong sa mga Saksi ni Jehova sa pagwali sa maayong balita sa Gingharian. Apan, ingon sa gipasiugda sa mosunod nga kasinatian, sa ngadtongadto ang kamatuoran sa Bibliya nakaabot sa matinud-anog-kasingkasing nga mga tawo bisan pa sa pagsupak.

Mga 30 ka tuig kanhi, usa ka Gregong Ortodoksong pari ang midawat sa maayong balita ug mipahayag pa gani ug tinguha nga mahimong usa sa mga Saksi ni Jehova. Apan, ang iyang mga paryente kusganong misupak niining maong lakang ug nagpugos kaniya sa paghunong sa iyang pagpakig-uban sa mga Saksi. Aron mapahimut-an ang iyang pamilya, mipadayon siya sa iyang buluhaton ingong usa ka pari; apan, kanunay niyang giila nga ang mga Saksi ni Jehova nakatabang kaniya sa pagkat-on sa kamatuoran ug nga iya kining giundang ilis sa halangdong katungdanan diha sa usa ka bakak nga relihiyon.

Bisan pa niana, usahay misulti siya dapig sa mga Saksi ni Jehova sa dihang mitungha ang kahigayonan. Sa daghang kahimtang gitambagan pa gani niya ang mga tawo nga kon buot nilang mokat-on sa mga kamatuoran sa Bibliya, kinahanglan silang magtuon uban sa mga Saksi. Latas sa katuigan pipila ang misunod gayod sa iyang sugyot.

Di pa dugay ang pari grabeng nagsakit ug nakaamgo nga hayan hapit na siyang mamatay. Samtang didto sa ospital, iyang gipatawag ang iyang mga anak, ug silang tanan nag-alirong sa iyang higdaanan.a Dayon gisaysay niya kanila nga kon siya mamatay, sila mahimong makakita kaniya pag-usab. Iyang gisultihan sila bahin sa pagtulon-an sa Bibliya nga ang mga tawo banhawon ni Jehova aron mopuyo sa usa ka paraiso sa yuta, apan kon buot gayod nilang makita kana nga mahitabo, kinahanglang mokat-on sila sa kamatuoran gikan sa Bibliya ug mobulag sila gikan sa bakak nga relihiyon. Gihangyo niya sila nga makig-uban sa mga Saksi ni Jehova ug mokat-on gikan kanila kon sa unsang paagi mahimong tinuod nga mga Kristohanon.

Wala madugay human niadto, ang pari namatay. Apan, ang iyang panugon sa iyang mga anak mianig maayong mga resulta. Ang iyang anak babaye, sama sa kadaghanan sa iyang mga paryente, supak kaayo sa mga Saksi ni Jehova ug sa ilang buluhaton. Apan dili niya ikasalikway ang sinserong hangyo sa iyang himatyong amahan, busa sa wala madugay nakigkita siya sa mga Saksi ni Jehova ug misugod sa pagtuon sa Bibliya. Di pa dugay siya mismo nahimong usa ka Saksi, nga nagpahinungod sa iyang kinabuhi kang Jehova nga Diyos ug nagpasimbolo sa iyang pahinungod pinaagi sa pagpabawtismo sa tubig.

Sa Gresya ug sa kapin sa 230 ka ubang mga nasod, ang mga Saksi ni Jehova nagasalig sa gahom sa balaang espiritu sa Diyos. Maoy uban sa bug-os nga pagpaluyo sa balaang espiritu nga sila nakig-ambit sa katumanan sa tagna ni Jesus: “Kamo magadawat ug gahom sa dihang ang balaang espiritu moabot nganha kaninyo, ug kamo mahimong mga saksi nako sa Jerusalem ug sa tibuok Judea ug Samaria ug ngadto sa kinalay-ang dapit sa yuta.”​—Buhat 1:8.

[Footnote]