Giluwas nga Buhi Latas sa Dakong Kasakitan
“Mao kini sila ang nanagpakagawas gikan sa dakong kasakitan, ug ilang gilabhan ang ilang mga taas-nga-bisti ug nagpaputi niini sa dugo sa Kordero.”—PINADAYAG 7:14.
1. Kinsay moabiabi unya sa mga mabanhaw diha sa yutan-ong pagkabanhaw?
SA DIHANG ang di-maihap nga minilyon bangonon diha sa “pagkabanhaw sa mga matarong ug sa mga dili-matarong,” sila dili pagabanhawon sa kinabuhi diha sa usa ka walay-sulod nga yuta. (Buhat 24:15) Sila mahigmata diha sa matahom nga pagkahikay nga mga palibot ug makakaplag nga ang mga puy-anan, panapot, ug dagayang pagkaon giandam na alang kanila. Kinsay magahimo niining tanang mga pagpangandam? Tin-aw, aduna unyay mga tawong nagkinabuhi na sa bag-ong kalibotan sa dili pa magsugod ang yutan-ong pagkabanhaw. Kinsa kini sila? Ang Bibliya nagapaila nga sila mao unya ang mga makalabang buhi sa umaabot nga dakong kasakitan. Sa tanang pagtulon-an sa Bibliya, sa walay duhaduha kini maoy usa sa labing makaiikag—nga ang pila ka mga matinumanon mamaluwas latas sa dakong kasakitan ug dili na gayod mamatay. Kini nga paglaom gipamatud-an pag-ayo sa Balaang Kasulatan.
Ingon sa mga Adlaw ni Noe
2, 3. (a) Unsang kaamgiran ang makuha tali sa mga adlaw ni Noe ug sa atong panahon? (b) Unsay gipaila sa kaluwasan ni Noe ug sa iyang banay latas sa Lunop?
2 Sa Mateo 24:37-39, si Jesu-Kristo mihimog usa ka pagtandi tali sa mga adlaw ni Noe ug sa kataposang mga adlaw, nga atong gikinabuhian. Siya miingon: “Maingon kaniadto sa mga adlaw ni Noe, mao man usab unya ang pagkaanaa sa Anak sa tawo. Kay ingon nga sila niadtong mga adlawa sa wala pa ang baha, nanagpangaon ug nanagpanginom, nanagpangminyo ang mga lalaki ug ang mga babaye gipanghatag diha sa kaminyoon, hangtod sa adlaw nga misulod si Noe sa arka; ug wala sila magmatikod hangtod nga ang baha miabot ug mibanlas kanilang tanan, mao man usab unya ang pagkaanaa sa Anak sa tawo.”
3 Ang tibuok yutang Lunop nagbanlas sa tanang wala mamati sa pasidaang mensahe sa Diyos. Apan, kini wala magbanlas kang Noe ug sa iyang banay. Sila ‘misulod sa arka,’ sama sa giingon ni Jesus. Tungod sa ilang diyosnong pagkamahinalaron, si Jehova nagtagana kanila ug paagi aron maluwas. Ang 2 Pedro 2:5, 9 nagpunting sa kaluwasan ni Noe ug sa iyang banay sa dihang kini miingon: “Siya [Diyos] . . . mitipig kang Noe, usa ka magwawali sa pagkamatarong, nga hilwas uban sa pito pa dihang nagpadangat siya ug lunop sa usa ka kalibotan sa dili-diyosnong katawhan. Si Jehova mahibalo kon unsaon sa pagpahigawas sa katawhan nga may diyosnong pagkamahinalaron gikan sa pagsulay.” Si Jesus mihimog usa ka pagtandi tali sa mga adlaw ni Noe ug sa kataposang mga adlaw aron ipakita nga ang katawhan sa katibuk-an dili mamati sa pasidaang mensahe sa Diyos. Bisan pa, sa pagbuhat niana gipamatud-an usab niya nga si Noe ug ang iyang banay misugot kang Jehova nga Diyos, misulod sa arka, ug naluwas sa dakong Lunop. Ang kaluwasan ni Noe ug sa iyang banay nagapunting sa kaluwasan sa matinumanong mga alagad sa Diyos sa kataposan niining kalibotana.
Usa ka Unang-Siglong Sumbanan
4. Sa katumanan sa mga pulong ni Jesus, unsang mga hitabo ang mitultol sa kalaglagan sa Jerusalem niadtong 70 K.P.?
4 Gihisgotan usab ni Jesus ang mga hitabo nga mahitabo sa kataposan niining kalibotana. Sa Mateo 24:21, 22, atong mabasa: “Aduna unyay dakong kasakitan ingon nianang wala pa mahitabo sukad sa sinugdan sa kalibotan hangtod karon, dili, ni mahitabo pa pag-usab. Sa pagkatinuod, gawas kon kanang mga adlawa pamub-on, walay unod nga maluwas; apan gumikan sa mga pinili kanang mga adlawa pagapamub-on.” Kining mga pulonga may unang katumanan sa unang siglo sa atong Komong Panahon. Niadtong 66 K.P., ang siyudad sa Jerusalem gilikosan sa Romanong kasundalohan ubos ni Cestius Gallus. Ang Romanong kasundalohan nakadangat na sa punto sa paglumpag sa paril sa templo, ug daghang Hudiyo ang andam na nga mosurender. Apan, wala damha ug walay dayag nga katarongan, gipaatras ni Cestius Gallus ang iyang kasundalohan. Sa pagkakita sa mga Romano nga miatras, ang mga Kristohanon milihok sumala sa mga pulong ni Jesus, nga gisulti sa daghang tuig ang miagi: “Inigkakita ninyo sa Jerusalem nga malibotan sa nagkampong kasundalohan, nan hibaloi nga ang paghimong awaaw niya haduol na. Nan silang anaa sa Judea pakalagiwa na ngadto sa kabukiran, ug kadtong anaa sa iyang taliwala pabiyaa, ug kadtong anaa sa banikang mga dapit ayaw na pasudla ngadto kaniya.” (Lucas 21:20, 21) Ang mga Hudiyo nga nahimong Kristohanon, ang mga pinili, dihadiha mibiya sa laglagonong siyudad sa Jerusalem ug sa ingon naluwas gikan sa grabeng kalaglagan nga midangat niana wala magdugay human niadto. Niadtong 70 K.P., ang Romanong kasundalohan mibalik ubos ni Heneral Tito. Sila nagkampo sa palibot sa Jerusalem, nga naglikos sa siyudad, ug naglaglag niini.
5. Sa unsang diwa gipamubo ang kasakitan sa Jerusalem niadtong 70 K.P.?
5 Ang Hudiyohanong historyador nga si Josephus miasoy nga 1,100,000 ka Hudiyo ang nangamatay, samtang 97,000 ang naluwas ug gibihag. Kadtong mga naluwas nga dili-Kristohanong mga Hudiyo dayag nga dili “ang mga pinili” sa tagna ni Jesus. Mahitungod sa rebelyoso Hudiyohanong nasod, si Jesus miingon: “Tan-awa! Ang inyong balay gibiyaan nganha kaninyo. Kay ako magaingon kaninyo, Dili gayod kamo makakita kanako sukad karon hangtod nga moingon kamo, ‘Bulahan siya nga nagaanhi sa ngalan ni Jehova!’” (Mateo 23:38, 39) Walay rekord nga kadtong mga Hudiyo, nga nakulong sa Jerusalem, sa kataposang gutlo midawat kang Jesus ingong ang Mesiyas, nahimong mga Kristohanon, ug nakadawat sa pag-uyon ni Jehova. Bisan pa, ang kasakitan nga midangat sa 70 K.P. gipamubo. Ang kataposang paglikos sa Romanong kasundalohan wala magdugay. Kini nagtugot sa pipila ka mga Hudiyo nga maluwas, aron dalhon lamang ingong mga ulipon ngadto sa nagkalainlaing mga bahin sa Romanong Empiryo.
Usa ka Dakong Panon sa mga Maluwas
6, 7. (a) Unsang dakong relihiyosong siyudad ang pagalaglagon pa, ingong bahin sa unsang dili-hitupngang kasakitan? (b) Unsay gitagna ni Juan bahin sa umaabot nga dakong kasakitan niining kalibotana?
6 Bisag ang kalaglagan sa Jerusalem niadtong 70 K.P. sa pagkatinuod nagdala gayod ug “dakong kasakitan” nianang relihiyosong siyudad, ang dakong katumanan sa mga pulong ni Jesus pagatumanon pa. Usa ka mas dako relihiyosong siyudad, ang Babilonyang Bantogan, ang empiryo sa kalibotan sa bakak nga relihiyon, ang makasinatig usa ka makamatay dakong kasakitan nga pagasundan dihadiha sa usa ka dili-hitupngang kasakitan diha sa ubang bahin sa sistema sa mga butang ni Satanas. (Mateo 24:29, 30; Pinadayag 18:21) Mga 26 ka tuig human sa kalaglagan sa Jerusalem, si apostol Juan, sa Pinadayag 7:9-14, misulat bahin niining tibuok-yutang dakong kasakitan. Gipakita niya nga usa ka dakong panon sa mga tawo ang maluwas niana.
7 Kining mga maluwas, nga gitawag ang “dakong panon,” mailhan pinaagi sa pila ka mahukmanong mga lihok nga ilang himoon. Sumala sa Pinadayag 7:14, usa sa 24 ka ansiano sa langit nag-ingon kang Juan: “Mao kini sila ang nanagpakagawas gikan sa dakong kasakitan, ug ilang gilabhan ang ilang mga taas-nga-bisti ug nagpaputi niini sa dugo sa Kordero.” Oo, ang dakong panon nagadayeg kang Jehova ingong ang tuboran sa ilang kaluwasan. Sila nagpakitag pagtuo sa giulang dugo ni Jesus ug adunay matarong nga baroganan atubangan sa ilang Maglalalang ug sa iyang tinudlong Hari, si Jesu-Kristo.
8. Unsang maayong relasyon ang naglungtad tali sa “dakong panon” ug sa mga nahibilin sa dinihogang mga igsoon ni Jesus?
8 Karong adlawa, hapit lima ka milyong membro sa dakong panon ang nagkinabuhi ubos sa aktibong pagpanguna sa langitnong Hari si Jesu-Kristo. Sila nagapasakop kang Kristo ug suod nga nakig-uban sa iyang dinihogang mga igsoon nga ania pa sa yuta. Labot sa pagtagad nga gipakita sa dakong panon ngadto niining mga dinihogan, si Jesus nag-ingon: “Sa pagkamatuod ako magaingon kaninyo, Sa sukod nga gibuhat ninyo kini sa usa sa labing ubos niining akong mga igsoon, inyo kining gibuhat kanako.” (Mateo 25:40) Tungod kay sila sa pagkadili-mahakogon nagatabang sa dinihogang mga igsoon ni Kristo, kadtong kauban sa dakong panon pagahukman nga nakabuhat ug maayo ngadto kang Jesus mismo. Kini motabang kanila nga makabaton ug malig-on nga relasyon uban ni Jesu-Kristo ug ni Jehova nga Diyos. Sila nakabatog pribilehiyo nga moduyog sa dinihogang nahibilin sa pagkahimong mga Saksi sa Diyos ug mga tigdala sa iyang ngalan.—Isaias 43:10, 11; Joel 2:31, 32.
Padayon sa Pagtukaw
9, 10. (a) Unsay kinahanglan natong buhaton aron mahuptan ang atong matarong nga baroganan atubangan sa Anak sa tawo? (b) Unsay angay natong buhaton aron “padayong magtukaw”?
9 Ang dakong panon kinahanglang maghupot sa ilang matarong nga baroganan atubangan sa Anak sa tawo nga walay hunong, nga nagkinahanglan nga magpadayon sa pagtukaw hangtod sa kataposan. Gisulti kini ni Jesus nga tin-aw sa dihang siya miingon: “Tagda ang inyong kaugalingon nga ang inyong mga kasingkasing dili gayod mabug-atan sa pagpalabig kaon ug pagpalabig inom ug sa mga kabalaka sa kinabuhi, ug sa kalit kanang adlawa dihadiha modangat nganha kaninyo ingon nga usa ka lit-ag. Kay moabot kini nganha sa tanang nagapuyo ibabaw sa nawong sa tibuok nga yuta. Nan, padayong magtukaw, nga sa tanang panahon magapangamuyo nga kamo molampos sa pag-ikyas niining tanang butanga nga gikatinong mahitabo, ug sa pagbarog atubangan sa Anak sa tawo.”—Lucas 21:34-36.
10 Aron magmalamposon sa pagbarog atubangan sa Anak sa tawo, kita kinahanglang makabaton sa iyang pag-uyon, nga dili nato mabatonan kon tugotan nato ang atong kaugalingon nga maimpluwensiyahan sa panghunahuna niining kalibotana. Ang kalibotanong panghunahuna mahayloon ug makadaldal sa usa ka tawo sa pagpatuyang sa unodnong mga kalingawan o mahimong mabug-atan kaayo sa mga suliran sa kinabuhi nga dili na siya makapadayon sa pag-una sa mga intereses sa Gingharian. (Mateo 6:33) Ang maong dalan makapaluya sa usa ka tawo sa espirituwal ug mawad-an na siya ug kadasig bahin sa iyang mga kaakohan ngadto sa Diyos ug sa uban. Siya mahimong di-aktibo o magdaot sa iyang dapit diha sa kongregasyon pinaagi sa pagbuhat ug seryosong sala, tingali magpakita pa gani ug dili mahinulsolong tinamdan. Ang matag indibiduwal diha sa dakong panon kinahanglang maghatag ug pagtagad sa iyang kaugalingon. Siya kinahanglang magpabilin nga bulag niining dili-diyosnong kalibotan ug sa mga buhat niini.—Juan 17:16.
11. Ang pagpadapat sa unsang Kasulatanhong mga prinsipyo ang motabang kanato nga maluwas sa Armageddon?
11 Tungod niana, si Jehova nagtagana sa atong gikinahanglan pinaagi sa iyang Pulong, sa iyang balaang espiritu, ug sa iyang makitang organisasyon. Kita kinahanglang magpahimulos pag-ayo niini. Dugang pa, kita kinahanglang magmainampoon ug magmasinugtanon sa Diyos kon laoman natong mabatonan ang iyang pag-uyon. Sa usa ka butang, kinahanglang ugmaron nato ang usa ka kusganong pagdumot sa daotan. Ang salmista miingon: “Wala ako molingkod uban sa mga tawo sa kabakakan; ni nakigkuyog sa mga tawong tigpakaaron-ingnon. Gikasilagan ko ang katilingban sa mga mamumuhat ug daotan, ug ako dili molingkod uban sa mga tawong daotan. Ayawg dad-a ang akong kalag uban sa mga makasasala, ni ang akong kinabuhi uban sa mga tawong sad-an sa dugo.” (Salmo 26:4, 5, 9) Diha sa Kristohanong kongregasyon, ang mga batan-on ug mga tigulang kinahanglang maglimite sa pagpakig-uban niadtong wala magpahinungod kang Jehova. Aron makadawat sa pag-uyon sa Diyos, kita maningkamot nga mawalay-ikasaway ug nga walay buling gikan sa kalibotan. (Salmo 26:1-5; Santiago 1:27; 4:4) Busa, kita makasalig nga sa Armageddon, dili kita mapapha ni Jehova sa kamatayon uban sa mga dili-diyosnon.
Ang Pipila “Dili Gayod BisanKanus-a Mamatay”
12, 13. (a) Sa wala pa banhawa si Lazaro, unsang mga pulong ang gisulti ni Jesus nga wala bug-os hisabti ni Marta? (b) Unsay wala ipasabot sa mga pulong ni Jesus mahitungod sa pipila nga ‘dili na gayod mamatay’?
12 Makapalipay nga palandongon nga maluwas sa kataposan niining sistema sa mga butang ug ang posibilidad nga dili na gayod mamatay. Kini ang palaaboton nga gitanyag kanato ni Jesus. Sa wala pa banhawa ang namatay niyang higalang si Lazaro, gisultihan ni Jesus ang igsoong babaye ni Lazaro nga si Marta: “Ako ang pagkabanhaw ug ang kinabuhi. Siya nga nagapasundayag ug pagtuo kanako, bisan pa siya mamatay, makadangat sa kinabuhi; ug ang matag usa nga buhi ug nagapasundayag ug pagtuo kanako dili gayod bisan kanus-a mamatay. Nagatuo ka ba niini?” Si Marta nagtuo sa pagkabanhaw, apan wala siya makasabot sa tanang gipanulti ni Jesus.—Juan 11:25, 26.
13 Wala ipasabot ni Jesus nga ang iyang matinumanong mga apostoles magpabiling buhi sa unod ug dili gayod mamatay. Sa kasukwahi, iyang gipaila sa ulahi nga ang iyang mga tinun-an mamatay. (Juan 21:16-23) Sa pagkatinuod, ang pagdihog kanila sa balaang espiritu sa Pentekostes 33 K.P. nagpasabot nga sila mamatay aron makadawat sa ilang langitnong panulondon ingong mga hari ug mga saserdote. (Pinadayag 20:4, 6) Busa, sa paglabay sa panahon, ang tanang unang-siglong mga Kristohanon nangamatay. Bisan pa niana, si Jesus nag-ingon nga may katuyoan ang iyang gibuhat. Ang iyang mga pulong bahin sa pagkabuhi nga dili na gayod mamatay matuman.
14, 15. (a) Sa unsang paagi matuman ang mga pulong ni Jesus mahitungod sa pipila nga ‘dili na gayod mamatay’? (b) Unsay situwasyon niining kalibotana, apan unsa ang paglaom sa mga matarong?
14 Lain pa, ang matinumanong dinihogang mga Kristohanon dili gayod makasinati ug walay kataposang kamatayon. (Pinadayag 20:6) Dugang pa, ang mga pulong ni Jesus nagpunting sa usa ka espesipikong panahon sa dihang ang Diyos mangilabot sa tawhanong mga kalihokan ug magapapas sa pagkadaotan sa yuta, sama sa iyang gibuhat sa mga adlaw ni Noe. Ang mga matinumanon nga makaplagang nagabuhat sa kabubut-on sa Diyos sa maong panahon dili gayod mamatay pinaagi sa mga buhat sa paghukom sa Diyos. Hinunoa, sama kang Noe ug sa iyang banay, sila adunay kahigayonan nga maluwas sa kalaglagan sa kalibotan. Ang maong paglaom malig-on, kay gipasukad diha sa mga pagtulon-an sa Bibliya ug ginapakita pinaagig mga panig-ingnan. (Itandi ang Hebreohanon 6:19; 2 Pedro 2:4-9.) Ang katumanan sa tagna sa Bibliya nagpakita nga sa dili madugay ang presenteng kalibotan nga nagalangkob sa dili-matarong tawhanong katilingban matapos diha sa kalaglagan. Ang presenteng situwasyon dili na mabali, tungod kay ang kalibotan hilabihan na ka daotan. Ang gipamulong sa Diyos mahitungod sa kalibotan sa mga adlaw ni Noe matinuod usab sa kalibotan karong adlawa. Ang mga kasingkasing sa kinabag-an sa katawhan tugob sa pagkadaotan, ug ang ilang mga hunahuna pulos lamang daotan sa tanang panahon.—Genesis 6:5.
15 Gitugotan ni Jehova ang mga tawo sa pagmando sa yuta sa kasiglohan nga walay pagbalda sa Diyos, apan ang ilang panahon hapit nang matapos. Sa dili madugay pagalaglagon ni Jehova ang tanang daotan sa yuta, sama sa giingon sa Bibliya. (Salmo 145:20; Proverbio 2:21, 22) Apan, dili niya laglagon ang matarong uban sa daotan. Wala pa sukad makahimo ang Diyos nianang butanga! (Itandi ang Genesis 18:22, 23, 26.) Nganong laglagon man niya kadtong naningkamot sa pag-alagad kaniya nga matinumanon, nga may diyosnong kahadlok? Makataronganon lamang nga ang matinumanong mga magsisimba ni Jehova nga buhi sa pagsugod sa dakong kasakitan makakaplag ug pabor sa iyang mga mata ug dili pagalaglagon, ingon nga si Noe ug ang iyang banay wala laglaga sa dihang ang daotang kalibotan sa iyang adlaw midangat sa malaglagong kataposan. (Genesis 7:23) Sila makabatog diyosnong panalipod ug maluwas sa kataposan niining kalibotana.
16. Unsang katingalahang mga butang ang mahitabo unya sa bag-ong kalibotan, nga magkahulogan ug unsa alang sa mga maluwas?
16 Unsay mahitabo unya? Sa bag-ong kalibotan, ang nagahupay nga mga panalangin moagos sa katawhan samtang ipadapat nga bug-os ang mga kaayohan sa halad lukat ni Jesus. Ang Bibliya naghisgot sa usa ka simbolikong “suba sa tubig sa kinabuhi, ingon katin-aw sa kristal, nga nagadagayday gikan sa trono sa Diyos ug sa Kordero latas sa taliwala sa lapad nga dalan niini. Ug dinhing daplina sa suba ug dinhang daplina dihay mga kahoy sa kinabuhi nga nagapatungha ug napulog-duha ka abot nga bunga, nga nagahatag sa ilang mga bunga matag bulan. Ug ang mga dahon sa mga kahoy maoy alang sa pag-ayo sa kanasoran.” (Pinadayag 22:1, 2) Kahibulongan nga isulti, kana nga “pag-ayo” nagalakip sa pagbuntog sa Adanikong kamatayon mismo! “Siya sa pagkatinuod magalamoy sa kamatayon sa walay kataposan, ug ang Soberano Ginoong Jehova magapahid gayod sa mga luha gikan sa tanang nawong.” (Isaias 25:8) Busa, kadtong mabuhi sa dakong kasakitan ngadto sa bag-ong kalibotan dili na gayod magaatubang ug kamatayon!
Usa ka Seguradong Paglaom
17. Unsa ka segurado ang paglaom nga ang pipila mamaluwas sa Armageddon ug “dili gayod bisan kanus-a mamatay”?
17 Bug-os ba kitang makasalig niining talagsaong paglaom? Tino gayod! Gipaila ni Jesus kang Marta nga adunay panahon unya sa dihang ang mga tawo mabuhi nga dili na gayod mamatay. (Juan 11:26) Dugang pa, diha sa kapitulo 7 sa Pinadayag nga gihatag ni Jesus kang Juan, gibutyag nga usa ka dakong panon ang mogula gikan sa dakong kasakitan, nga maluwas niana. Makatuo ba kita kang Jesu-Kristo ug sa makasaysayanhong asoy bahin sa Lunop sa mga adlaw ni Noe? Walay duhaduha! Dugang pa, ang Bibliya adunay laing mga asoy sa mga higayon sa dihang gitipigan sa Diyos nga buhi ang iyang mga alagad latas sa mga panahon sa paghukom ug sa pagkapukan sa mga nasod. Dili ba mao usab kanay atong pagalaoman kaniya niining panahon sa kataposan? Aduna bay imposible sa Maglalalang?—Itandi ang Mateo 19:26.
18. Sa unsang paagi kita makasalig sa kinabuhi diha sa matarong nga bag-ong kalibotan ni Jehova?
18 Pinaagi sa pag-alagad nga matinumanon kang Jehova karon, kita makabaton sa pasalig nga kinabuhing walay kataposan diha sa iyang bag-ong kalibotan. Alang sa dimaihap nga minilyon, ang kinabuhi nianang bag-ong kalibotan moabot pinaagi sa pagkabanhaw. Bisan pa niana, sa atong adlaw, minilyon sa katawhan ni Jehova—oo, usa ka dakong panon nga walay tawo ang makaihap o makalimite—ang makabaton ug talagsaong pribilehiyo nga pagaluwason nga buhi latas sa dakong kasakitan. Ug sila dili na gayod mamatay.
Palihog Ipatin-aw
◻ Sa unsang paagi ang pagkaluwas sa Armageddon naglandong sa mga adlaw ni Noe?
◻ Unsay kinahanglan natong buhaton aron padayong nagabarog inig-abot ni Jesus sa pagpahamtang sa mga paghukom ni Jehova?
◻ Nganong ikaingon nato nga ang mga maluwas sa Armageddon “dili gayod bisan kanus-a mamatay”?
[Hulagway sa panid 15]
Ang mga Kristohanon nakaikyas sa kasakitan sa Jerusalem