Mga Saksi ni Jehova sa Tibuok Kalibotan—Zambia
HALUAG, bakiliron nga kapatagan nga nasabak sa usa ka dako, 1,200 ka metros nga patag sa ibabaw sa bukid—kini mao ang Zambia, usa ka nasod sa kinapusoran sa habagatang-sentral Aprika. Sa amihanang-sidlakan, ang Muchinga Mountains nangawankawan sa 2,100 ka metros. Ang dako kaayong Zambezi River, nga nagdahunog sa pag-agos diha sa ilado-sa-kalibotan nga Victoria Falls, nagporma sa dakong bahin sa habagatang utlanan niining yuta nga nalibotan sa ubang nasod. Adunay dakong panagkadaiya sa mga tawo, nga may kapin sa 70 ka nagkalainlaing etnikong grupo. Walo ka dagkong pinulongan ang gigamit dinhi, apan may daghan pang uban.
Niadtong 1911 usa ka lahing pinulongan ang misugod sa pagkatukod ug mikaylap sa Zambia. Ang mga bisita nagdalag mga kopya sa Studies in the Scriptures, ug ang mga Saksi ni Jehova naningkamot sukad niadto sa pagpakaylap sa “putling pinulongan” sa kamatuoran sa Bibliya sa Zambia. (Sofonias 3:9) Ilabinang makahagit mao ang dili-kasulatanhong mga pagtulon-an bahin sa kahimtang sa mga patay. Sa dihang ang mga tawo makakat-on sa kamatuoran ug makaamgo kon sa unsang paagi ang mga patuotuo nag-ulipon kanila, ang epekto makapahayahay!—Juan 8:32.
Pananglitan, usa ka matinumanong igsoong babaye nagtaho: “Sa dihang kalit nga namatay ang akong tiyo, ang akong inahan, nga usa ka malig-ong membro sa United Church of Zambia, naglibog. Human sa tibuok semanang rituwal sa paglubong, mibalik ako sa balangay sa pagsusi kon unsa nay iyang kahimtang. Sa akong pag-abot, nakita ko ang usa ka edarang tawo sa balay, ug sa dihang siya mibiya, gipangutana ko ang akong apohan nga babaye kon kinsa siya. Siya miingon nga siya usa ka tambalan. Nagplano ang akong inahan sa pagsuhol kaniya aron panimaslan ang kamatayon sa iyang igsoong lalaki aron ang iyang kalag makapahulay. Siya nagtuo nga niadtong tungora kini ‘naglaroylaroy lang,’ ingon pa niya.
“Si Lola dugang miingon nga ang akong pagduaw maoy usa ka panalangin tungod kay ang pamilya nagkinahanglag kuwarta aron ibayad sa tambalan. Siya mihangyo kanako nga moamot, apan ako mataktikanhong nagpatin-aw nga ingong usa ka Kristohanon, dili ako makahimo sa pagpakigbahin. Nangatarongan ako kaniya gikan sa Salmo 146:4, nga nagpakita nga ang mga patay walay mga hunahuna—busa walay kalag nga ‘naglaroylaroy.’ Gitagad usab namo ang Roma 12:19, nga nagpunting nga ang panimalos iya lamang kang Jehova ug dili alang kanato. Human niana, gisultihan ko ang akong inahan mahitungod sa paglaom sa pagkabanhaw nga gihisgotan ni Jesus, ingon sa girekord sa Juan 5:28, 29. Siya nakadayeg sa akong malig-ong pagtuo sa mga saad sa Diyos. Wala magdugay misugod siya sa pagtuon uban sa usa ka Saksi ug nakahimog kusog nga pag-uswag. Giputol niya ang tanang kalangkitan uban sa iyang relihiyon kanhi ug nagpasimbolo sa iyang dedikasyon sa Diyos pinaagig bawtismo. Karon siya usa na sa mga Saksi ni Jehova.”
Laing igsoong babaye nagtaho: “Ako mitambong sa paglubong sa asawa sa akong tiyo. Sa pag-abot nako, nakita ko ang akong tiyo ug ang akong ig-agaw nga nag-antos sa kagutom. Sila walay gikaong bisan unsa sukad sa adlaw nga namatay ang akong tiya. Sa dihang gisukna ko kon ngano, sila mitubag nga sumala sa tradisyon, sila dili tugotan nga maghaling ug kalayo aron magluto. Miboluntaryo ako sa pagluto, apan nahadlok ang ubang mga membro sa pamilya nga kon ako dili mosunod niining paganong kustombre, ang tanan mabuang!
“Gipatin-aw ko nga ingong usa sa mga Saksi ni Jehova, ako nagtahod sa giingon sa Bibliya sa Levitico 18:30 ug dili mosunod sa dili-kasulatanhong mga tradisyon. Gipakita ko dayon kanila ang brosyur nga Mga Espiritu sa mga Patay. Niana ang tensiyon mikalma, ug ako nagpadayon ug nag-andam ug pagkaon alang sa akong tiyo ug sa ubang mga tawo. Ang mga paryente sa namatay natandog sa akong kaisog ug miuyon sa pagtuon ug dugang sa Bibliya. Sila maoy dili-bawtismado nang mga magmamantala, ug ang tibuok pamilya naglaom nga mabawtismohan sa dili madugay.”
Pagkadako sa kalipay nato kon ang putling pinulongan sa kamatuoran magpapas sa kalibog sa relihiyosong kabakakan, ilabina niadtong malig-ong pagkatukod nga mga pangatarongan nga nagaulipon sa inosenteng mga tawo! Uban sa panalangin ni Jehova, ang putling pinulongan nagakaylap sa Zambia, bisan ingon sa tibuok yuta.—2 Corinto 10:4.
[Kahon sa panid 9]
LARAWAN SA NASOD
1994 Tuig sa Pag-alagad
KINATAS-ANG GIDAGHANONG NAGSANGYAW: 82,926
PROPORSIYON: 1 ka Saksi sa 107
TUMATAMBONG SA MEMORYAL: 363,372
ABERIDS NGA PAYUNIR NGA MGA MAGMAMANTALA: 10,713
ABERIDS NGA MGA PAGTUON SA BIBLIYA: 108,948
GIDAGHANON SA NABAWTISMOHAN: 3,552
GIDAGHANON SA MGA KONGREGASYON: 2,027
SANGANG BUHATAN: LUSAKA
[Hulagway sa panid 9]
Mga pasilidad sa sangang buhatan sa Watch Tower sa ilaya sa Lusaka
[Hulagway sa panid 9]
Nagsangyaw sa Shimabala, habagatan sa Lusaka