Mga Magmamantala sa Gingharian Nagtaho

Pagwali sa Samok nga Panahon

SI APOSTOL Pablo mitagna nga “sa kataposang mga adlaw ang makuyaw nga mga panahon nga lisod sagubangon moabot.” (2 Timoteo 3:1) Pagkatukma nianang mga pulonga! Ang katawhan sa El Salvador sa Sentral Amerika dugay nang nakasinati niining mapait nga kamatuoran. Sulod na sa kapig usa ka dekada, kanang nasora nalambigit sa usa ka gubat sibil nga nagdalag katimawa ug kamatayon sa linibo. Sa pagkakaron natapos na ang gubat, apan nagpabilin ang katimawa. Ang krimen midagsang pag-ayo human sa gubat. Usa ka lokal nga komentarista sa telebisyon miingon karong bag-o: “Ang kapintasan ug panulis mao karon ang adlaw-adlaw nga panghitabo.”

Ang mga Saksi ni Jehova apektado usab niining kaylap nga krimen. Ang mga kawatan nanglungkab sa daghang Kingdom Hall ug nangawat sa mga kasangkapan sa sound. Sa daghang higayon ang mga gang sa armadong kabatan-onan misulong sa mga Kingdom Hall samtang nagpadayon ang Kristohanong mga tigom, nga nangawat sa salapi, mga relo, ug ubang mahalong mga butang gikan niadtong nanambong. Samtang nagabuhat sa ilang matag-adlawng mga kalihokan, ang ubay-ubayng Saksi gipamatay pa sa mga tulisan.

Bisan pa sa maong kababagan, ang mga Saksi ni Jehova sa El Salvador nagpadayon sa pagkugi sa pagwali sa maayong balita. Gibuhat nila kini ingong pagsunod sa Kasulatanhong sugo: “Ang maayong balita kinahanglang iwali una sa tanang kanasoran.” (Marcos 13:10) Adunay daghan pa niining nasora ang nangandoy sa paglaom sa Gingharian nga gitanyag sa Bibliya, ug ang mga Saksi nagapaningkamot sa pag-abot sa matag usa kanila. Ang dili-pormal nga pagsangyaw nagapamatuod nga usa ka epektibong paagi sa pagwali.

Samtang gitambalan sa usa ka ospital, usa ka Saksi migamit sa tanang higayon sa pagpakigsulti sa ubang mga pasyente mahitungod sa mga saad sa Diyos alang sa umaabot, sumala sa hikaplagan diha sa Bibliya. Usa ka pasyenteng grabe kaayo ug sakit masulob-ong nangagho: “Hapit na akong mamatay!” Apan ang masulob-ong panglantaw sa pasyente wala makapabugnaw sa Saksi gikan sa pagpaambit sa maayong balita sa Gingharian sa Diyos. Hinunoa, siya mibasag kusog ngadto sa tawo gikan sa librong Ikaw Mabuhing Walay Kataposan sa Paraiso sa Yuta, nga gipatik sa mga Saksi ni Jehova. Pila ka adlaw sa ulahi, ang Saksi migawas sa ospital, nga masulob-ong naghunahuna nga ang tawo nagtinga na.

Upat ka tuig sa ulahi ang Saksi kinahanglang magpatambal sa laing ospital. Samtang atua siya didto, usa ka pasyente ang miduol kaniya ug miingon: “Nakahinumdom ka ba kanako?” Kadto ang tawo nga iyang nahibalag upat ka tuig nga miagi, ang tawo nga gituohang himalatyon na! Pagkamakalipayng sorpresa sa dihang gigakos siya sa tawo ug nagkanayon pa: “Karon ako usa na usab sa mga Saksi ni Jehova!” Gidawat sa tawo ang paglaom sa Bibliya alang sa umaabot, nagtuon sa Bibliya uban sa mga Saksi ni Jehova, ug nagpahinungod sa iyang kinabuhi kang Jehova. Dili lamang nga siya usa ka Saksi kondili siya nakig-ambit sa bug-os-panahong ministeryo ingong regular payunir sulod na sa mga duha ka tuig.

Niining kahimtanga, ang mga binhi sa kamatuoran nga nahapugas sa dili-pormal nga kahimtang nakaabot sa usa ka masanongon nga kasingkasing. Kining pribilehiyo sa pagtabang sa mga tawo nga makadangat sa kahibalo sa kamatuoran motukmod sa matuod nga mga Kristohanon sa pagpadayon sa buluhatong pagwali bisan pa niining “makuyaw nga mga panahon nga lisod sagubangon.”