Gihatagan Kamig Usa ka Perlas nga Dako Kaayog Bili
SUMALA SA GIASOY NI RICHARD GUNTHER
Kadto maoy Septiyembre 1959. Nagsakay kami sa Italyanhong barko nga ginganlag Julio Caesar nga naglawig sa Dagat Atlantiko gikan sa New York paingon sa Cádiz, Espanya. Ang Watch Tower Society nag-asayn kanako, kauban sa akong asawa, si Rita, ug ni Paul ug Evelyn Hundertmark, laing misyonaryong magtiayon, ngadto nianang Iberianhong nasod. Pagaatubangon namo ang daghang lisod nga mga kahimtang. Apan naunsa ba pagkahitabo nga kami misugod sa usa ka misyonaryong karera?
SI Rita ug ako nabawtismohan ingong mga Saksi ni Jehova sa 1950 sa New Jersey, T.B.A. Sa wala madugay, gihimo namo ang usa ka desisyon nga sa nahaigong panahon magbutang sa among mga kamot sa usa ka perlas nga dako kaayog bili. Diha kami sa usa ka kongregasyon nga may igong mga igsoong lalaki ug babaye sa pagtrabaho sa teritoryo. Busa gibati namo nga obligado nga motanyag sa pag-alagad diin adunay mas dakong panginahanglan sa mga magsasangyaw. Sa internasyonal nga asembliya sa mga Saksi ni Jehova sa New York City sa ting-init sa 1958, miaplay kami sa misyonaryong pag-alagad.
Wala madugay human niadto, gidapit kami alang sa Watchtower Bible School of Gilead, ug sulod sa usa ka tuig kami nagpaingon na sa Espanya ingong mga misyonaryo. Tungod kay nalambigit kaayo sa daghang kahikayan ug nalumsan sa dakong kalipay, wala kami makaamgo niadtong panahona kon unsay gikahatag kanamo. Si Jesus nakahisgot bahin sa usa ka perlas nga dako kaayog bili. (Mateo 13:45, 46) Bisan pag ang among misyonaryong pribilehiyo dili mao ang punto sa iyang sambingay, alang kanamo ang among pribilehiyo sa pag-alagad ingong mga misyonaryo ikatandi sa maong perlas. Sa paghinumdom, karon kami mas bug-os nga nag-apresyar niining bililhong gasa sa pag-alagad diha sa organisasyon ni Jehova.
Usa ka Halandumong Kasinatian
Niadtong panahona ang misyonaryong kurso sa Gilead gihimo diha sa matahom nga banikanhong palibot sa Finger Lakes nga rehiyon sa Estado sa New York. Didto, gigugol namo ang unom ka kahibulongang mga bulan nga sa bug-os nalambigit sa pagtuon sa Bibliya ug tinuod Kristohanong panag-ubanay, nga nahibulag sa mga kahikayan ug mga suliran niining kalibotana. Ang among mga kasaring maoy gikan sa daghang bahin sa kalibotan, apil ang Australia, Bolivia, Britanya, Gresya, ug New Zealand. Sa wala madugay hinuon, kadto adlaw na sa graduwasyon. Sa Agosto 1959, kami nanamilit uban sa mga luha sa among mga mata samtang kami milarga paingon sa among tinagsa ka misyonaryong mga asaynment. Usa ka bulan sa ulahi kami nakaabot sa Espanya.
Usa ka Bag-ong Kultura
Midunggo kami sa habagatang pantalan sa Algeciras, tapad sa nagbuntaog nga Rock of Gilbraltar. Niadtong gabhiona kaming upat, si Rita ug ako kauban sa magtiayong Hundertmark, misakay ug tren paingon sa Madrid. Miadto kami sa Hotel Mercador, nga didto magpaabot hangtod nga kami makontak sa mga membro sa sekretong sangang buhatan sa Sosyedad. Ang Espanya niadto nailalom sa diktador nga pagmando ni Heneralisimo Francisco Franco. Nagkahulogan kini nga ang giilang opisyal nga relihiyon sa nasod mao ang Iglesya Katolika Romana. Supak sa balaod ang pagtuman sa bisan unsang laing relihiyon sa dayag, ug ang balay-balay nga buluhatong pagsangyaw sa mga Saksi ni Jehova gidili. Gidili bisan ang relihiyosong mga tigom, mao nga ang mga Saksi ni Jehova, nga mikabat ug mga 1,200 sa 30 ka kongregasyon sa Espanya niadtong panahona, dili mahimong magtigom sa mga Kingdom Hall sama sa diha sa ubang kanasoran. Kinahanglang magtigom kaming sekreto sa pribadong mga balay.
Pagtuon ug Kinatsila ug Pagsugod
Ang una namong hagit mao ang pagtuon sa pinulongan. Sa unang bulan migugol kami ug 11 ka oras sa pagtuon ug Kinatsila—4 ka oras kada buntag sa klase, dayon 7 ka oras sa kinaugalingong pagtuon. Ang ikaduhang bulan maoy sama sa mabuntag, apan ang mga hapon gigahin sa balay-balay nga pagsangyaw. Mahanduraw mo ba? Nga dili pa mahibalo sa pinulongan ug uban lang ang sinag-ulong introduksiyon nga gisulat sa usa ka tarheta, si Rita ug ako migawas sa balay-balay nga buluhaton nga kamikami lamang!
Makahinumdom ako nga nanuktok sa usa ka pultahan sa Vallecas, usa ka seksiyon sa mga obrero sa Madrid. Nga gikuptan ang tarheta, enkasog malimtan nako kon unsay isulti, ako miingon sa Kinatsila: “Maayong buntag. Nagabuhat kami sa usa ka Kristohanong buluhaton. Ang Bibliya nag-ingon (mobasa kamig usa ka teksto). Gusto namong makabaton ka niining pulyetoha.” Aw, ang babaye mitan-aw lamang, dayon mikuha sa pulyeto. Sa among pagbalik-duaw, kami iyang gipadayon, ug samtang kami misulti, siya mitan-aw lamang. Gisugdan namo ang pagtuon sa Bibliya uban kaniya kutob sa among maarangan, ug panahon sa mga panagtuon, siya namati lamang ug mitan-aw. Human sa taastaas nga panahon sa kataposan kami iyang giingnan nga wala siya makasabot kon unsay among gisulti sa among unang pagduaw apan nakadungog sa pulong Dios ug nga kadto igo na alang kaniya nga hisayrang kadto maayo. Sa ngadtongadto, siya nakabaton ug igong kahibalo sa Bibliya ug nabawtismohan, nga nahimong usa sa mga Saksi ni Jehova.
Ang pagkat-on sa Kinatsila lisod kaayo alang kanako. Samtang nagbiyahe sa siyudad, ako tigsag-ulo sa mga porma sa berbo. Ang nasag-ulo nako sa usa ka semana akong malimtan sa sunod! Makapahigawad kaayo kadto. Sa makadaghan ako hapit nang mosurender. Sanglit ako nagsultig ngil-ad kaayong Kinatsila, ang Katsilang kaigsoonan nagpailob kaayo kanako samtang ako ang nanguna sa ilang taliwala. Sa usa ka distritong kombensiyon, usa ka igsoong lalaki mihatag kanakog sinulat-kamot nga pahibalo aron basahon sa entablado. Kay naglisod sa pagbasa sa iyang sinulatan, ako mipahibalo: “Dad-a ang inyong muletas (mga sungkod) sa estadyum ugma.” Ang angay unta mao, “Dad-a ang inyong maletas (mga bagahe) sa estadyum ugma.” Siyempre, ang panon sa katawhan nangatawa, ug natural nga ako nanlipaghong.
Unang mga Pagsulay sa Madrid
Kadtong unang pila ka tuig sa Madrid lisod kaayo sa emosyon alang kang Rita ug kanako. Gimingaw kaayo kami sa among balay ug sa among mga higala. Matag panahong makadawat kamig sulat gikan sa Tinipong Bansa, kami mingawon kaayo. Kadtong mga yugto sa kamingaw maoy bug-at kaayo, apan kadto milabay ra. Kon buot sabton, among gibiyaan ang panimalay, pamilya, ug mga higala aron kapuli niana dawaton ang usa ka perlas nga dako kaayog bili. Gikinahanglan nga kami magpaayon-ayon.
Sa una namong pagpuyo sa Madrid, kami nagpuyo sa timawa kaayong balay-paabangan. Kami may kuwarto ug tulo ka pagkaon sa usa ka adlaw. Kadto maoy usa ka gamayng ngitngit nga kuwarto, ug ang mga kutson ginama sa uhot. Ang abang sa bulan naghurot sa among gamayng binulan nga alawans. Sagad nga kami maniudto didto, ug ang among gikaserahan tigbilin sa among panihapon sa hurno aron magpabilin kining mainit aron sa gabii nang dako kami may makaon. Bisan pa, tungod sa pagbinaktas sa kadalanan sa maadlaw ug magabii, kami gutmon pag-ayo. Kon wala nay nabilin sa among alawans, gastohon namo ang among diyutayng personal nga kuwarta aron ipalit sa labing baratong barita sa tsokolet nga among makaplagan. Hinuon, kining kahimtanga sa wala madugay nausob sa pagduaw sa magtatan-aw sa sona sa Sosyedad. Siya nakakita sa among kahimtang ug miingon nga kami makapangitag usa ka gamayng apartment aron magamit nga misyonaryong balay. Aw, ang pagbaton ug among kaugalingong apartment mas maayo gayod kay sa pagkaligo nga magtindog sa usa ka linging banyera sa salog sa kusina sa balay-paabangan. Sa maong panahon kami makabatog usa ka shower, repriherador nga mabutangan sa pagkaon, ug de-koryenteng kusinilya aron kalutoan sa among mga pagkaon. Mapasalamaton kaayo kami tungod sa pagkamahunahunaon.
Kahibulongang mga Kasinatian sa Madrid
Ang balay-balay nga pagsangyaw mainampingon kaayong gihimo. Ang adlaw-adlaw nga kabanha sa Madrid maoy usa ka bentaha, nga nagsalimbong kanamo mao nga kami dili kaayo madayag. Naningkamot kami sa pagbiste ug paglihok nga sama sa uban aron kami dili mailhan ingong mga langyaw. Ang paagi namo sa ganghaan-ug-ganghaan nga pagsangyaw mao ang pagsulod sa usa ka apartment, pagtuktok sa usa ka ganghaan, pagpakigsulti sa tawo, ug dayon pagbiya sa apartment, sa kalye, ug sa dapit. Diha kanunay ang posibilidad nga ang tagbalay magpahibalo sa kapolisan, ug busa dili maalamon ang pagpabilin sa silinganan. Ngani, bisan pag sila mainampingon sa paggamit niining paagiha, si Paul ug Evelyn Hundertmark gidakop ug gipalagpot gikan sa nasod niadtong 1960. Nangadto sila sa silingang Portugal, nga nag-alagad didto sulod sa ubay-ubayng katuigan, nga si Paul ang nag-atiman sa sekretong sangang buhatan. Karong adlawa siya ang magtatan-aw sa siyudad sa San Diego, California.
Hinuon, alang kanamo nahitabo ang usa ka pag-angay-angay. Pila ra ka bulan sa ulahi, unom ka misyonaryong naasayn sa Portugal gimandoan sa pagpahawa sa maong nasod! Kadto nagpahinabog kahimut-anang panghitabo tungod kay si Eric ug Hazel Beveridge, kinsa diha usab sa among klase sa Gilead, sa maong panahon gitugon sa pagpahawa sa Portugal ug pag-adto sa Espanya. Busa kami didto sa Pebrero 1962, sa Hotel Mercador sa makausa pa—sa maong panahon aron pagsugat kang Eric ug Hazel sa ilang pag-abot.
Maoy panahon niadtong unang mga adlaw sa Madrid nga si Rita ug ako nakabaton ug personal nga kasinatian sa relihiyosong kasalingkapaw. Nagtuon kami sa Bibliya uban sa usa ka magtiayon, si Bernardo ug Maria, kinsa nagpuyo sa usa ka payag nga ginama sa biyang mga piraso sa igtutukod nga materyal nga makaplagan ni Bernardo. Kami nagtuon uban kanila sa gabii na kaayo, ug human sa pagtuon, sila modalit kanamo ug tinapay, bino, ug diyutayng keso o bisan unsa nga ilang nabatonan. Akong namatikdang ang keso maoy sama gayod sa Amerikanhong keso. Usa ka gabii human sa pagtuon, gipagawas nila ang lata nga nasudlan sa keso. May nasulat didto sa dagkong mga letra, “Gikan sa Amerikanhong katawhan ngadto sa Katsilang katawhan—dili angay ibaligya.” Sa unsang paagi nakadawat ang maong kabos nga pamilya sa keso? Ang Iglesya Katolika gigamit sa gobyerno sa pag-apod-apod niana ngadto sa mga kabos. Apan ang pari nagbaligya niana!
Mabungahong Ministeryo Taliwala sa Militaryo
Sa wala madugay may kahibulongang butang nga nahitabo nga misangpot nga usa ka tugob nga panalangin alang kanamo ug sa daghan pang uban. Nakadawat kamig pahibalo gikan sa sangang buhatan nga naghangyo kanamo sa pagduaw sa usa ka batan-ong lalaki nga ginganlag Walter Kiedaisch, kinsa naestasyon sa U.S. Air Force nga base sa Torrejón, nga nahimutang ug pila ka milya sa gawas sa Madrid. Giduaw namo siya ug ang iyang asawa, nga gisugdan ang pagtuon sa Bibliya uban kaniya ug sa laing magtiayon sa Air Force didto.
Niadtong panahona, ako nagdumalag mga lima ka pagtuon sa Bibliya uban sa mga tawo sa U.S. Air Force, ang tanan sa Ingles, siyempre. Niana nila, pito ang nabawtismohan sa ulahi, ug sa pag-uli sa Tinipong Bansa, upat sa mga lalaki ang nahimong mga ansiano sa kongregasyon.
Kadto maoy sa panahon nga may diyutay kaayong mga paagi sa pagpasulod ug mga libro, mga magasin, ug mga Bibliya sa nasod tungod sa pagdili sa atong buluhaton. Bisan pa niana, pila ka basahon gidala sa mga turista ug sa among Amerikanong mga kontak. Giasayn ako sa sangang buhatan sa pagpadagan ug sekretong pondohanan ug mga basahon. Kadto usa ka bodega sa likod sa usa ka tindahan ug mga papel sa Vallecas. Ang asawa sa tag-iya maoy usa sa mga Saksi ni Jehova. Bisan pag dili Saksi, ang tag-iya nagtahod sa atong buluhaton, ug bisan sa dakong kapeligrohan sa iyang kaugalingon ug sa iyang negosyo, gitugotan niya ako sa paggamit sa maong dapit sa likod sa paghikay sa mga putos sa mga basahon aron ipadala ngadto sa mga siyudad sa tibuok nasod. Sanglit ang maong kuwarto kinahanglang tan-awon kanunay kon unsay angay nga mao kana—abogon, nagkalandrakas nga kuwarto nga punog mga karton—kinahanglang ako maggamag usa ka trabahoang bangko ug mga estante sa libro nga dali rang ikapatindog ug maandam alang sa trabaho ug unya tagoan sulod sa pila ka segundo. Sa kataposan sa adlaw, ako maghulat hangtod nga wala nay tawo sa tindahan ug unya daling mogawas nga dala ang akong mga pinutos.
Usa ka talagsaong pribilehiyo ang pagpakig-ambit sa pagpanagtag sa espirituwal nga balasahon, sama sa mga magasing Bantayanang Torre ug Pagmata! ug sa ubang basahon, ngadto sa mga kongregasyon sa tibuok nasod. Kadto kulbahinam nga kapanahonan.
Si Rita nalipay sa pagdumalag 16 ka pagtuon sa Bibliya sa balay, nga katunga kanila nahimong bawtismadong mga Saksi ni Jehova. Si Dolores maoy usa ka batan-ong minyong babaye nga migugol sa tugnawng mga panahon sa tingtugnaw nga naghigda tungod sa usa ka sakit sa kasingkasing. Sa tingpamulak siya makabangon ug makalihoklihok. Lig-on ang pagtuo ni Dolores, mao nga sa pag-abot sa panahon alang sa among distritong kombensiyon sa Toulouse, Pransiya, gusto gayod niyang moadto. Gipasidan-an siya sa doktor nga dili maalamon kana tungod sa iyang sakit sa kasingkasing. Nga nagsul-ob ug pangbalay nga biste ug sinelas ug walay bagahe, siya miadto sa estasyon sa tren aron sa pagpalarga sa iyang bana, iyang inahan, ug sa uban pa. Nga nagluhaluha ang iyang mga mata, siya dili makaantos nga motan-aw nga sila molarga nga dili siya kauban, mao nga siya misakay sa tren, ug siya mibiyahe paingon sa Pransiya! Si Rita wala masayod nga nahitabo kini. Apan didto sa kombensiyon, pagkadako sa katingala sa dihang iyang nakita si Dolores, nga may dakong pahiyom sa iyang nawong!
Usa ka Talagsaong Pagtuon sa Bibliya
Dili kami makatapos niining asoya sa among asaynment sa Madrid nga dili iapil si Don Benigno Franco, ang “el profesor.” Usa ka lokal nga Saksi ang nagdala kanako sa pagduaw sa usa ka tigulang nga talahurong lalaki nga nagpuyo uban sa iyang asawa sa usa ka kabos kaayong apartment. Akong gisugdan ang pagtuon sa Bibliya uban kaniya. Human sa pagtuon sa mga usa ka tuig ug tunga, siya mihangyo nga mabawtismohan ug mahimong usa sa mga Saksi ni Jehova.
Ang maong tigulang nga talahurong lalaki, si Don Benigno Franco, mao ang ig-agaw ni Francisco Franco, ang diktador sa Espanya niadtong panahona. Mipatim-aw nga si Don Benigno sa kanunay usa ka tawong mahigugmaon ug kagawasan. Panahon sa Gubat Sibil sa Espanya, siya misimpatiya sa Republika ug misupak sa iyang ig-agaw—ang heneral nga nakadaog sa gubat ug nagtukod sa Katolikong pagmandong diniktador. Sukad gayod sa 1939, si Don Benigno gihikawan sa katungod sa pagtrabaho, ug siya nalimitihan sa gamay kaayong pangabuhian. Busa nahitabo nga ang ig-agaw sa Heneralisimo Francisco Franco, ang militaryong diktador sa Espanya, nahimong usa sa mga Saksi ni Jehova.
Sorpresang Imbitasyon
Niadtong 1965 ang sangang buhatan sa Espanya nagdapit kanamo nga mosugod sa pagpanaw ingong magtatan-aw sa sirkito sa Barcelona. Nagpasabot kadto nga biyaan ang tanang mahigugmaong mga igsoon nga nahimong suod kaayo kanamo sa Madrid. Niadto nagsugod dili lamang ang usa ka bag-ong kasinatian alang kanako kondili usa usab ka pagsulay. Ang kasinatian makalilisang tungod kay ako kanunayng nagduhaduha sa akong katakos. Nahibalo ako pag-ayo nga si Jehova maoy nakapaarang kanako nga mahimong epektibo sa maong natad sa pag-alagad.
Ang pagduaw sa usa ka kongregasyon sa kada semana nagkahulogan sa pagpuyo sa mga balay sa mga igsoon. Kami walay permanenteng puy-anan, ug halos kada duha ka semana, kami mobalhin ngadto sa laing balay. Kini lisod ilabina alang sa usa ka babaye. Apan sa wala madugay si José ug Roser Escudé, kinsa nagpuyo sa Barcelona, midapit kanamo nga moipon pagpuyo kanila sulod sa daghang sunodsunod nga mga adlaw. Mahigugmaon kaayo kadto sa ilang bahin, kay nagpasabot kadto nga kami makabaton ug permanenteng dapit nga kabutangan sa among mga kabtangan ug regular nga dapit nga kapaulian sa magabii sa Dominggo.
Si Rita ug ako migugol sa sunod nga upat ka tuig sa sirkitong buluhaton sa probinsiya sa Catalonia, nga nahimutang sa Mediteranyong Baybayon. Ang tanan namong tigom sa Bibliya sekretong gihimo sa pribadong mga balay, ug ang among balay-balay nga pagsangyaw mainampingon usab nga gihimo aron dili kami makadanig pagtagad. Usahay sa Dominggo ang tibuok kongregasyon “magpiknik” sa kakahoyan, ilabina sa dihang maghimog sirkitong asembliya.
Kami modayeg sa kanunay sa daghang debotadong espirituwal nga mga igsoon nga nagpameligro sa ilang mga trabaho ug kagawasan, nga nanlimbasog sa paghugpong ug pagpaaktibo sa mga kongregasyon. Daghan kanila nanguna sa pagpaabot sa buluhaton ngadto sa mga lungsod sa gawas sa siyudad. Kadto nahimong pasukaranan sa dakong pag-uswag sa Espanya human nga giwagtang ang pagdili ug gitugot ang relihiyosong kagawasan niadtong 1970.
Pagbiya sa Among Misyonaryong Asaynment
Sulod sa napulo ka tuig namo sa Espanya, ang among pagpahimulos niining espesyal nga panalangin sa pag-alagad kang Jehova natimbangan sa kahimtang sa among mga ginikanan. Sa ubay-ubayng higayon, kami hapit nga makabiya sa among asaynment ug mopauli aron paggalam sa akong inahan ug amahan. Ugaling, tungod sa mahigugmaong mga igsoong lalaki ug babaye didto sa mga kongregasyon nga duol sa akong mga ginikanan, kami nakapadayon sa Espanya. Oo, ang pribilehiyo sa pag-alagad niadtong mga katuigan sa misyonaryong buluhaton maoy tungod sa bahin sa uban nga nakig-ambit uban kanamo sa pagbutang pag-una sa intereses sa Gingharian sa Diyos.
Sa kataposan, sa Disyembre 1968, kami mipauli aron paggalam sa akong inahan. Niadtong bulana mismo ang akong amahan namatay, ug ang akong inahan sa maong panahon nag-inusara. Tungod kay may pagkalibre pa sa pag-alagad sa bug-os panahon, nadawat namo ang usa ka asaynment sa pag-alagad sa sirkitong buluhaton, apan sa maong panahon sa Tinipong Bansa na. Sulod sa misunod nga 20 ka tuig, kami mialagad sa Katsilang mga sirkito. Bisan pag nawala kanamo ang among misyonaryong perlas nga dako kaayog bili, kami may lain pa nga gibutang sa among mga kamot.
Pagsangyaw Taliwala sa mga Droga ug Kabangisan
Karon nag-alagad kami nga kauban sa daghang igsoong lalaki ug babaye nga nagpuyo sa napunog-krimen nga mga bahin sa mga siyudad. Aw, sa unang semana mismo sa sirkitong buluhaton sa Brooklyn, New York, si Rita giagawan sa iyang bag.
Sa laing higayon si Rita ug ako kauban sa usa ka grupo nga naghimo sa balay-balay nga buluhatong pagsangyaw sa laing seksiyon sa New York City. Sa pagliko sa usa ka eskina, namatikdan namo ang pipila ka tawong naglinya atubangan sa usa ka lungag sa paril sa usa ka biniyaang tinukod. Samtang kami milakaw ug pila ka lakang sa dalan, namatikdan namo ang usa ka batan-ong nagtindog sa asiras nga nagtan-aw kanamo. Diha pay lain sa layong eskina nga nagbantay sa mga sakyanan sa polis. Kami nakasum-ok sa usa ka transaksiyon sa mga droga! Ang unang bantay nakurat, apan unya iyang nakita ang magasing Bantayanang Torre ug nahuwasan. Kon buot sabton, ako mahimong usa unta ka polis! Unya siya nanawag sa Kinatsila, “¡Los Atalayas! ¡Los Atalayas!” (Mga Bantayanang Torre! Mga Bantayanang Torre!) Nakaila sila kon kinsa kami, nga naglangkit kanamo sa magasin, ug ang tanan maayo ra. Samtang ako miagi duol kaniya, ako miingon, “¿Buenos dias, como está?” (Maayong buntag, komosta ka?) Siya mitubag pinaagi sa paghangyo nga iampo siya!
Usa ka Lisod nga Desisyon
Sa 1990 nadayag nga kinahanglang ako makauban sa akong inahan kada adlaw. Naningkamot kami pag-ayo nga magpabilin sa buluhaton sa sirkito, apan ang kaalam nagdiktar nga dili mahimo ang pagtuman sa duha ka katungdanan. Gusto gayod namong matino nga si Mama mahigugmaong pagkaatiman. Apan sa makausa kinahanglang among buhian ang usa ka perlas nga dako kaayog bili, butang nga bililhon kaayo alang kanamo. Ang tanang literal nga mahalong bato sa kalibotan ug ang tanan nga mahimo niana alang sa usa ka tawo gamay kaayo kon itandi sa mga mutya sa pag-alagad nga misyonaryo o pagkamagtatan-aw sa sirkito sa organisasyon ni Jehova.
Si Rita ug ako karon anaa sa ikapitong dekada sa among kinabuhi. Kami matagbawon ug malipayong nagaalagad uban sa usa ka lokal tigsultig-Kinatsilang kongregasyon. Samtang among hinumdoman ang among katuigan diha sa pag-alagad ni Jehova, kami nagpasalamat kaniya tungod sa pagsalig kanamo sa pila ka perlas nga dako kaayog bili.
[Hulagway sa panid 23]
Uban ni Rita ug ni Paul ug Evelyn Hundertmark (tuo) sa gawas sa bugnoan sa toro sa Madrid
[Hulagway sa panid 24]
Pag-alagad sa usa ka kongregasyon panahon sa usa ka “piknik” sa kakahoyan